Ta Bon pa Mi Pidi Mi Ruman Fiá Mi Placa?
SIMON su yu mas chikitu ta malu i tin mester di remedi urgente. Pero Simon ta hopi pober i e no por cumpra e remedi. Kico e por haci? Wel, tin un ruman cristian cu yama Michael cu ta mihó pará cuné. Podisé Michael por fi’é e placa. Sin embargo, den su curason Simon sa cu casi sigur lo e no por paga e cen ei bek.a
Awor Michael ta hañ’é den un dilema ora Simon bini cerca dje. E ta realisá cu Simon di berdad tin mester dje placa, pero e ta sospechá tambe cu Simon lo no por pagu’é e placa bek, pasobra pa duna su famia di come so, Simon tin un lucha. Kico Michael mester haci?
Den hopi pais, hende por perde nan medio di entrada den un drumi lanta, i haña nan den un situacion sin placa ni seguro pa paga dokter. Kisas no ta posibel pa fia placa na banco, of interes di fiansa ta demasiado haltu. Ora un emergencia presentá, por parce cu e único solucion ta di fia placa cerca un amigu. Pero promé cu bo pidi hende fiá bo cen, tin algun asuntu importante pa considerá.
Calculá e Gastu
E Scritura ta duna guia pa tantu esun cu ta duna como pa esun cu ta pidi e fiansa. Dor di haci caso dje conseho aki, nos por evitá hopi dolor i malcomprendimentu.
Por ehempel, Bijbel ta recordá nos cu nos no mester mira fiamentu di placa como algu leve. Apostel Pablo a urgi cristiannan na Roma: “Boso no debe ningun hende ni un solo cos, fuera di stima otro; pasobra esun cu ta stima su próhimo a cumpli cu e ley.” (Romanonan 13:8) Lo ta ideal si e único debe di un cristian ta amor. P’esei, nos lo por puntra nos mes promé: ‘Di berdad mi mester dje fiansa aki?’
Si e contesta ta sí, e ora ei ta sabí pa pensa riba e consecuencianan di hinca bo mes den debe. Jesucristo a mustra cu nos mester pensa i planea bon promé cu nos tuma decisionnan importante. El a puntra su disipelnan: “Cua di boso cu kier traha un toren no ta sinta promé i calculá e gastu, pa mira si e tin suficiente pa complet’é?” (Lucas 14:28) E principio aki ta aplicá ora nos ta considerando si nos mester pidi un ruman fia nos placa of no. Calculá e gastu di un fiansa kier men calculá con i ki dia nos lo pagu’é bek.
Esun cu ta duna e fiansa tin derecho di sa con i ki dia lo e haña su placa bek. Dor di evaluá e asuntu cuidadosamente, nos lo por dun’é contestanan concreto. Nos a calculá e gastu di paga e cen bek den un periodo di tempu razonabel? Naturalmente, lo ta mas fácil pa bisa nos ruman: “Lo mi pagá bo mas pronto posibel. Bo sa cu bo por confiá mi.” Pero nos no mester manehá asuntunan asina, den un manera mas responsabel? For di promé instante nos mester ta decididu pa paga e cen bek, ya cu ta esei Jehova ta rekerí di nos. Salmo 37:21 ta bisa: “E malbado ta pidi pa fia i no ta paga bek.”
Dor di calculá con i ki dia nos lo paga e fiansa bek, nos ta recordá nos mes cu nos ta haciendo un compromiso serio. Esaki ta hacié ménos probabel cu nos lo hinca nos mes den debe innecesariamente. Ta mas mihó si nos por evitá di hinca nos curpa den debe. Proverbionan 22:7 ta spierta: “E fiadó ta sirbidó dje homber cu ta duna e préstamo.” Asta ora cu tantu e dunadó di fiansa como e fiadó ta rumannan spiritual, un fiansa por afectá nan relacion, por lo ménos te na cierto grado. Malcomprendimentu riba fiansa a kibra e pas di algun congregacion.
Splica Pakico Bo Tin Mester dje Placa
Básicamente e persona cu ta duna e fiansa tin derecho di sa con nos ta bai usa e placa fiá. Fuera dje fiansa aki, nos ta bai fia placa cerca mas hende? Si ta asina, nos mester laga e ruman sa esei, pasobra esaki tin un efecto riba nos abilidad di paga e cen bek.
Ta foral importante pa haci distincion entre un fiansa pa negoshi i unu pa atendé un emergencia. Un ruman no tin obligacion bíblico di duna un fiansa pa un asuntu comercial, pero probablemente sí lo e sintié incliná na yuda un ruman cu sin por yuda no tin placa pa cosnan básico manera cuminda, paña of cuido médico esencial. Den e asuntunan aki frankesa i papia berdad lo yuda prevení malcomprendimentu.—Efesionan 4:25.
Pon’é Riba Papel
Un acuerdo skirbí ta un paso vital si nos kier evitá malcomprendimentu den futuro. Ta fácil pa lubidá detayenan specífico di un acuerdo, a ménos cu nan ta riba papel. Nos tin cu skirbi e suma cu a fia i ki dia tin cu pagu’é bek. Lo ta consehabel pa tantu e fiadó como esun cu ta duna e fiansa firma e acuerdo i pa cada un di nan keda cu un copia personal. Bijbel ta indicá cu mester documentá transaccionnan financiero. Djis promé cu e babilonionan a destruí Jerusalem, Jehova a bisa Jeremías pa cumpra un pida tereno for di un di su famianan. Nos por beneficiá di un repaso dje procedura.
Jeremías a bisa: “Mi a pasa na cumpra e cunucu cu tabata na Anatot for di Hanamel, yu di mi tio parti tata. I mi a cuminsá pisa e placa p’e, shete siclo i dies pida di plata. Anto mi a skirbi un acta i a pone e seyo i a tuma testigonan segun mi tabata pisa e placa den e balansa. Despues di esei mi a tuma e acta di compra, esun seyá segun e mandamentu i e reglamentunan, i esun lagá habrí; i despues mi a duna e acta di compra na Baruc, yu di Neria, yu di Mahseya, dilanti wowo di Hanamel, yu di mi tio parti tata, i dilanti wowo dje testigonan, esnan cu a skirbi den e acta di compra, dilanti wowo di tur e hudiunan cu tabata sintá den e Patio dje Guardia.” (Jeremías 32:9-12) Aunke e ehempel aki ta trata di compra i no di un fiansa, e ta mustra e importancia di manehá transaccionnan di placa den un manera cla i precis.—Mira La Atalaya di 1 di november 1973, página 671-2 [na ingles, 1 di mei 1973, página 287-8].
Si dificultadnan presentá, cristiannan mester purba solucioná nan na armonia cu e conseho di Jesus skirbí na Mateo 18:15-17. Pero un anciano cu a purba di yuda den asuntunan asina ta comentá: “Den casi tur caso, no tabatin un acuerdo skirbí. Como resultado, no tabatin un comprendimentu cla entre e dos partidonan pa loke ta con lo mester a paga e fiansa bek. Mi ta convencí cu pone e asuntunan aki riba papel ta un muestra di amor, no di desconfiansa.”
Una bes nos a cera un acuerdo, nos sigur lo kier haci esfuerso pa cumpli cu nos palabra. Jesus a exhortá: “Simplemente laga boso palabra Sí nificá Sí, boso No, No; pasobra loke ta bin acerca di esakinan ta for dje malbado.” (Mateo 5:37) Si un problema imprevisto stroba nos di paga e fiansa bek manera a palabrá, nos mester splica e situacion mesora na esun cu a fia nos e placa. Por ta cu lo e laga nos paga e fiansa bek na sumanan mas chikitu durante un periodo di tempu mas largu.
Sin embargo, circunstancianan desfaborabel no ta dispensá nos for di nos responsabilidad. Un persona cu ta teme Jehova ta haci su best pa cumpli cu su palabra. (Salmo 15:4) Aunke asuntunan tal bes no ta resultá manera nos a spera, nos mester ta prepará pa haci sacrificio pa por paga nos debenan, ya cu esei ta nos responsabilidad cristian.
Tene Cuidou cu Fia Hende Placa
Naturalmente, esun cu ta pidi pa fia placa no ta e único cu tin cu evaluá e asuntu bon. Un ruman cu nan pidi pa fia placa tambe tin cu calculá e gastu. Promé cu fia hende cen, ta sabí pa nos tuma tempu pa considerá e asuntu cu cuidou i obhetivamente. Bijbel ta urgi pa nos ta cuidadoso dor di bisa: “No yega di ta entre esnan cu ta dal man, entre esnan cu ta para borg pa préstamo.”—Proverbionan 22:26.
Promé cu bo comprometé bo mes, considerá kico lo por sosodé si e ruman no por pagá bo bek. Abo mes lo keda den problema financiero serio? Maske e ruman por tin e mihó intencion, circunstancianan por cambia of su calculacionnan por tabata robes. Santiago 4:14 ta recordá nos tur: “Boso no sa con boso bida lo ta mañan. Pasobra boso ta un neblina cu ta presentá pa poco tempu anto ta disparcé.”—Compará cu Eclesiástes 9:11.
Specialmente den e caso di un fiansa pa negoshi, lo ta sabí pa tuma na cuenta e reputacion di esun cu ta pidi e fiansa. E ta conocí di ta un persona digno di confiansa, of e ta malu den manehá asuntunan financiero? E tin e tendencia di cana pidi vários hende den congregacion pa fi’é placa? Ta sabí pa tene e palabranan aki na mente: “Cualkier persona sin experencia ta pone fe den tur palabra, pero esun spiertu ta considerá su pasonan.”—Proverbionan 14:15.
Tin biaha, un fiansa tal bes no ta den e mihó interes di esun cu ta pidié tampoco. Fácilmente e por bira un carga p’e, i por pon’é perde su goso. Nos lo kier pa un ruman asina bira nos “sirbidó”? Por ta cu un fiansa lo afectá nos relacion, fomentando incomodidad of asta bergwensa si e ruman no por pagu’é bek?
Si di berdad tin un necesidad, nos lo por pensa pa duna un regalo en bes di un fiansa, maske e suma por ta mas chikitu? E Scritura ta animá nos pa ta compasivo ora nos mira nos ruman den necesidad. “E hustu ta mustra fabor i ta duna regalo,” e salmista a canta. (Salmo 37:21) Amor mester motivá nos pa haci loke nos por pa duna yudansa práctico na nos rumannan den necesidad.—Santiago 2:15, 16.
Wak Bon Kico Bo Ta Haci
Como cu fiansa ta un potencial fuente di friccion, nos mester mir’é como un último recurso en bes di un opcion fácil. Manera a ser mencioná promé, esun cu ta pidi e fiansa mester ta franco cu esun cu ta duna e fiansa, poniendo riba papel con i ki dia lo pagu’é bek. I den caso di un pertá mes, podisé un regalo ta e mihó solucion.
Michael no a fia Simon e placa cu el a pidi. Na lugá di esei, Michael a dun’é un suma mas chikitu como regalo. Simon tabata gradicidu pa e yudansa cu a contribuí na paga e remedi di su yu. I Michael tabata contentu cu e por a mustra su amor fraternal den un manera práctico. (Proverbionan 14:21; Echonan 20:35) Tantu Michael como Simon ta spera cu anhelo e tempu ora Cristo, bou dje gobernacion di Reino, lo “libra esun pober cu ta sclama pa yudansa” i ningun hende lo bisa: “Mi ta malu.” (Salmo 72:12; Isaías 33:24) Miéntras tantu, laga nos wak bon kico nos ta haci si un dia nos sinti nos forsá pa pidi un ruman fia nos placa.
[Nota]
a A cambia e nombernan.
[Plachi na página 25]
Pone acuerdonan pa un fiansa riba papel, ta un muestra di amor, no di desconfiansa