Otro Hende Ta Aceptá Bo Conseho?

UN BON conseho, duná n’e manera apropiado, semper ta duna bon resultado. Esei ta berdad? No! Hopi bes hende ta ignorá of rechasá asta conseho excelente cu conseheronan capas ta duna.—Proverbionan 29:19.

Esaki ta precis loke a sosodé ora Jehova a consehá Cain, kende a cultivá un odio contra su ruman, Abel. (Génesis 4:3-5) Sabiendo ki peligroso esaki tabata pa Cain, Dios a bis’é: “Pakico bo ta yen di rabia i pakico bo cara ta cerá? Si bo dirigí bo mes pa haci loke ta bon, lo no tin halsamentu? Pero si bo no dirigí bo mes pa haci loke ta bon, tin picá di bùk n’e entrada, i su deseo fuerte ta pa bo; i abo, di bo parti, lo logra domin’é?”—Génesis 4:6, 7.

Asina Jehova a compará picá cu un roofdier cu ta cla pa bula riba Cain, si el a persistí den alimentá e rencor cu e tabatin contra su ruman. (Compará cu Santiago 1:14, 15.) Ainda tabatin tempu pa Cain cambia su actitud i ‘dirigí su mes pa haci loke ta bon,’ en bes di sigui un curso calamitoso. Lamentablemente, Cain no a haci caso. El a rechasá Jehova su conseho, i esaki tabatin consecuencianan trágico.

Algun persona tal bes ta sinti nan mes ofendí i nan ta rechasá cualkier conseho. (Proverbionan 1:22-30) E echo cu nan ta rechasá e conseho por ta falta dje consehero? (Job 38:2) Abo cu ta duna conseho ta hacié difícil pa otronan acept’é? Dor di imperfeccion humano, tin hopi chens pa esei. Pero bo por mengua e posibilidad pa esei sosodé dor di sigui principionan bíblico cuidadosamente. Laga nos considerá vários di nan.

‘Reahustá cu un Spiritu di Suavedad’

“Rumannan, aunke un homber dal un paso robes promé cu e realisá esei, boso cu tin cualidadnan spiritual, trata na reahustá e homber ei cu un spiritu di suavedad, vigilando bo mes, pa miedu cu bo mes tambe no ser tentá.” (Galationan 6:1) Cu e palabranan ei, apostel Pablo a mustra cu esnan cu tin “cualidadnan spiritual” mester trata na reahustá un cristian cu a “dal un paso robes promé cu e realisá esei.” Tin biaha ta parce cu ta net esnan cu ta ménos cualificá, ta mas lihé pa duna conseho. P’esei, no sea lihé pa duna otro hende conseho. (Proverbionan 10:19; Santiago 1:19; 3:1) Esnan promé yamá pa haci esei ta ancianonan di congregacion, kendenan ta spiritualmente cualificá. Naturalmente, tur cristian maduro mester bati alarma si e mira un ruman drenta zona di peliger.

Si bo ta duna conseho, haci sigur cu loke bo ta bisa ta basá riba sabiduria divino, i no riba teoria i filosofia humano. (Colosensenan 2:8) Haci manera un koki atento cu ta percurá pa tur ingrediente cu ta bai den e cuminda ta saludabel i liber di cualkier cos cu por ta venenoso. Haci sigur cu bo conseho ta firmemente basá riba e Palabra di Dios i no djis riba bo opinion personal. (2 Timoteo 3:16, 17) Ora bo haci esaki, bo por ta sigur cu bo conseho lo no haci ningun hende daño.

Meta dje conseho ta pa “reahustá” un persona cu ta fayando, no pa fors’é haci cambio cu e no kier. E palabra griego traducí como “reahustá” tin di haber cu un expresion relacioná cu e tratamentu pa pone un wesu cu a sali for di lugá bek, pa evitá mas daño. Segun e lexicógrafo W. E. Vine, e ta indicá tambe “e necesidad pa ehercé pacenshi i perseverancia durante e proceso.” Imaginá cuantu ternura i abilidad ta necesario pa no pone e persona sufri dolor físico sin nodi. Di igual manera, un consehero tin cu tene hopi cuidou p’e no ofendé esun cu e ta duna conseho. Ora un hende pidi bo conseho mes, esaki ta difícil. I ora e no pidi bo conseho, bo mester tin asta mas abilidad i tacto.

Sigur-sigur lo bo no “reahustá” ningun persona si bo ofend’é. Pa evitá esaki, keda corda cu bo mester desplegá “tierno cariño di compasion, bondad, humildad di mente, suavedad i gran pacenshi.” (Colosensenan 3:12) Si un dokter no tin pacenshi i sin niun motibu ta trata su pashent brutu, e pashent kisas no ta sigui su conseho i nunca mas lo e bolbe pa e tratamentu necesario.

Esaki no ta nificá cu bo no mester ta firme ora bo ta duna conseho. Jesucristo tabata firme ora el a consehá e shete congregacionnan den e distrito di Asia. (Revelacion 1:4; 3:1-22) El a duna nan algun conseho masha directo cu tabata necesario pa nan a tende i aplicá. Pero semper Jesus a balansá su firmesa cu cualidadnan manera compasion i ternura, reflehando asina e spiritu amoroso di su Tata celestial.—Salmo 23:1-6; Juan 10:7-15.

Duna Conseho cu Gracia

“Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.” (Colosensenan 4:6) Salu por aumentá e smak di cuminda i hacié mas apetitoso. Si bo kier pa hende aceptá bo conseho, bo tin cu present’é “cu gracia, sasoná cu salu.” Sin embargo, asta cu e mihó ingredientenan, bo cuminda por sali malu of mustra manera un bola di cos bruhá den un tayó. Esei no ta habri apetit di ningun hende. Eigenlijk, tin biaha ta difícil pa guli sikiera un boca di un cuminda sin smak.

Ora bo ta duna conseho, ta vital pa bo scoge e palabranan corecto. E homber sabí Sálomon a bisa: “Manera apel di oro den obra grabá di plata, ta un palabra papiá n’e tempu apropiado p’e.” (Proverbionan 25:11) Por ta masha bon cu el a pensa riba un bunita skalchi di plata cu tabatin apel di oro exkisito labrá riba dje. Ki un bunita bista esei lo tabata, i cuantu lo bo a apreci’é si bo a hañ’é di regalo! Di igual manera, palabra bon scogé i cu gracia, por atraé mashá un persona cu bo ta trata di yuda.—Eclesiástes 12:9, 10.

Na contraste, “un palabra cu ta causa dolor ta instigá rabia.” (Proverbionan 15:1) Ta masha fácil pa palabranan inapropiado lanta sintimentunan di dolor i rabia, en bes di gratitud. Eigenlijk, no ta palabranan inapropiado so, pero un tono di bos robes tambe por pone un persona rechasá un conseho cu riba su mes ta bon. Duna conseho sin usa tacto i den un manera insensitivo, por ta mes dañoso cu atacá un persona cu un arma. “Ta existí esun cu ta papia sin pensa manera e hincánan di un spada,” Proverbionan 12:18 ta bisa. Pakico papia sin pensa i asina hacié difícil pa un hende scucha conseho?—Proverbionan 12:15.

Manera Sálomon a bisa, conseho mester ta ‘duná n’e tempu apropiado.’ Pa e conseho tin bon resultado, ta masha importante pa determiná e momento apropiado! Ta obvio cu un persona cu no tin apetit lo no apreciá cuminda. Kisas el caba di yena su barica, of e por ta malu. No ta sabí ni aceptabel pa obligá un persona cu no kier, p’e come.

Duna Conseho cu Humildad di Mente

“Haci mi goso completo dor di [no] . . . haci nada motivá pa gana di pleita of motivá pa egoismo, sino considerá cu humildad di mente cu e otronan ta superior cu boso, no vigilando cu interes personal boso mes asuntunan so, sino tambe cu interes personal den asuntu dje otronan.” (Filipensenan 2:2-4) Si bo ta un bon consehero, “interes personal” den bienestar di otro hende lo ta bo motivacion. Tambe lo bo desplegá “humildad di mente” ora di trata cu bo rumannan spiritual, considerando nan superior cu bo. Kico esei ta nificá?

Humildad di mente lo prevení bo di adoptá un actitud of tono superior. Ningun di nos tin motibu pa sinti nos superior cu nos compañeronan creyente. Nos tur ta faya de bes en cuando. Dor cu nos no por lesa curason di hende, ta specialmente importante pa nos no husga e motibunan dje persona cu nos ta consehá. Kisas e no tin mal intencion i e no ta conciente di ningun actitud of acto robes. Asta si e ta un tiki conciente cu el a faya cu Dios su rekisitonan, sin duda lo e haña cu ta mas fácil pa aceptá conseho si bo dunele cu humildad i un berdadero interes den su bienestar spiritual.

Imaginá con lo bo sinti bo, si bo haña invitacion pa un comementu, pero bo anfitrion ta trata bo friu i cu desprecio! Sigur-sigur lo bo no disfrutá dje cuminda. Sí, “mihó un plato di berdura unda tin amor cu un toro gordá for di pesebre, i odio huntu cuné.” (Proverbionan 15:17) Mescos tambe, asta e mihó conseho por ta difícil pa aceptá, si e consehero ta manifestá un disgustu den e persona cu e ta consehá of si e ta menospreci’é i bergons’é. Sin embargo, amor, respet mutuo i confiansa, lo haci cu ta mas fácil pa duna i ricibí conseho.—Colosensenan 3:14.

Conseho cu Hende A Aceptá

Profeta Natan a demostrá humildad di mente ora el a consehá Rey David. Den loke Natan a bisa i haci, su amor i respet pa David tabata bisto. Natan a cuminsá cu un ilustracion cu a tene cuenta cu e posibel dificultad cu David lo por tabatin pa scucha conseho. (2 Samuel 12:1-4) E profeta a apelá na David su amor pa husticia i rectitud, maske esaki no tabata bisto den David su echonan cu a enbolbé Bat-seba. (2 Samuel 11:2-27) Ora e punto dje ilustracion a sali na cla, David a reaccioná di curason: “Mi a peca contra Jehova.” (2 Samuel 12:7-13) Contrario na Cain cu no a scucha Jehova, cu humildad David a aceptá e coreccion.

Sin duda, Jehova a guia Natan, teniendo cuenta cu David su imperfeccion i e echo cu e por a reaccioná desfaborablemente. Natan a actua cu hopi tacto i tabata obvio cu el a considerá David superior cuné debí na David su posicion como Jehova su rey nombrá. Si bo ta ocupá un of otro posicion di autoridad, kisas bo ta duna conseho apropiado, pero si bo no desplegá humildad di mente, lo e por ta difícil pa otronan aceptá.

Natan a reahustá David cu un spiritu di suavedad. E palabranan dje profeta tabata cu gracia i prepará cuidadosamente di manera cu David por a reaccioná den un manera cu lo tabata mihó pa e mes. Natan no tabata motivá pa interes personal, ni e no a purba demostrá cu e tabata moralmente of spiritualmente superior cu David. Ki un excelente ehempel di bisa e palabranan apropiado den e manera corecto! Si bo ta desplegá un spiritu similar, ta hopi mas probabel cu otronan lo aceptá bo conseho.

[Plachi na página 22]

Mescos cu cuminda nutritivo, bo consehonan mester ta saludabel

[Plachi na página 23]

Bo consehonan ta mes atractivo cu apel di oro den obra grabá di plata?

[Plachi na página 24]

Profeta Natan humildemente a apelá na David su amor pa husticia i rectitud