Informe di Proclamadonan di Reino

Yudando Tur Clase di Hende na Hulanda

ABRAHAM tabata un homber cu un fe extraordinario. “Ora el a ser yamá,” segun apostel Pablo, Abraham a obedecé bos di Dios i “a sali, aunke e no tabata sa unda e tabata bai.” Despues cu el a muda henter su famia, Abraham “a biba como stranhero den e tera dje promesa” p’e sobrá shen aña di su bida.—Hebreonan 11:8, 9.

Mescos tambe awe, hopi Testigo di Jehova a aceptá e desafio di muda bai un otro pais pa por sirbi caminda e necesidad ta mas grandi. Otronan a siña un otro idioma pa nan por duna testimonio na stranhero cu a bin biba den nan pais. Manera e siguiente ehempelnan ta mustra, e spiritu excelente aki a habri “un porta grandi cu ta hiba na actividad” na Hulanda, caminda un miyon dje 15 miyon habitantenan ta bin di otro pais.—1 Corintionan 16:9.

◻ Bahram, ex-instructor di Kung Fu, a bini di un pais di Medio Oriente. El a haña un Bijbel i algun publicacion di Watch Tower. Den un luna, Bahram a realisá cu el a haña e berdad. A cuminsá un studio cuné i su esposa, pero tabatin un problema—nan maestro di Bijbel no por a papia nan idioma. Nan tabata comunicá cu gesto, i papia “cu man cu pia,” manera nan ta recordá. Cu tempu, Bahram i su casá a logra haña un congregacion cu ta papia nan idioma natal, i despues di esei nan a progresá rápidamente. Awor Bahram ta un Testigo bautisá.

◻ Un pareha hulandes cu ta traha pionero a acercá un homber indones cu tabata pará dilanti un supermarket. El a keda gratamente sorprendí ora e pareha a papia cuné den su mes idioma. A haci areglo e ora ei pa bishit’é na su cas. E Testigonan a haña sa cu el a biba na Rusia pa mas cu 20 aña, i cu durante e tempu ei el a bira ginecólogo. El a bisa cu e ta ateo, pero el a admití cu cada bes cu el a yuda trece un baby na mundu, e no por a laga di keda asombrá: “Esta perfecto e curpa humano ta! Ki un milager!” El a bai eens pa studia Bijbel i no a tarda muchu cu el a cuminsá kere cu tin un Creador cu ta interesá den humanidad. (1 Pedro 5:6, 7) Awor e ta un ruman bautisá i ta sirbi den e congregacion indones na Amsterdam.

◻ Na Rotterdam, un dje hafnan mas grandi na mundu, un grupo di pionero a bira ábil den predicá na hende di vários idioma cu ta bini riba barcu cu ta bin mara tur dia den haf. Como resultado dje actividad dje grupo entusiasmá di predicadó aki, vários nabegante, incluso un capitan, un oficial di marina i un ex-bodyguard, a aceptá e berdad. Awor nan tambe ta yuda plama e bon nobo dje Reino di Dios rond mundu.—Mateo 24:14.

Mescos cu na otro parti di mundu, Testigonan di Jehova na Hulanda ta determiná pa haci nan parti den declará e bon nobo eterno na tur nacion, tribu, lenga i pueblo.—Revelacion 14:6.