Exito dor di Perseverá

PERSEVERANCIA a bai for di moda den e tempu moderno aki. Hopi hende ta kere cu éxito ta un asuntu di ta na e lugá corecto na e ora corecto. Nan no ta mir’é mashá como algu cu tin di haber cu perseverancia. Ken por culpa nan? Medionan di comunicacion ta saturá cu lemanan di propaganda cu di un manera sutil ta duna e impresion cu bo por haña casi kico cu bo kier cu un mínimo di esfuerso i djis un poco mas placa. Korantnan ta producí un fluho continuo di relato di hendenan cu a logra éxito di un dia pa otro i di empresarionan hóben super-sabí cu ta gana miyones djis despues cu nan caba scol.

E columnista Leonard Pitts ta lamentá: “Den un sociedad obsesioná cu percepcion, e ta parce muchu fácil. . . .E ta parce manera algu cu ken cu ta por logra, basta e comprendé e triki, tin e abilidad of Dios dun’é un man.”

Kico Ta Perseverancia?

Perseverá ta nificá ‘tene duru i firme na un propósito, condicion of empeño apesar di obstáculo of contratempu.’ E ta implicá sigui cu determinacion apesar di adversidad, siendo persistente i sin entregá. Bijbel ta resaltá e importancia dje cualidad aki. Por ehempel, e Palabra di Dios ta spierta nos: “Sigui busca, anto, promé e reino,” “sigui bati, i lo ser habrí pa boso,” “perseverá den oracion” i “tene duru na loke ta excelente.”—Mateo 6:33; Lucas 11:9; Romanonan 12:12; 1 Tesalonicensenan 5:21.

Un parti importante di perseverancia ta di lucha cu e contratempunan inevitabel. Proverbionan 24:16 ta declará: “E hustu por cai asta shete biaha, i lo e lanta sigur.” En bes di ‘entregá’ ora e topa cu dificultad of fracaso, e persona cu ta perseverá ta “lanta,” “sigui” i purba atrobe.

Sin embargo, hopi hende no ta prepará p’e dificultad i fracasonan cu nan por encontrá. Dor cu nan nunca a desaroyá e boluntad pa perseverá, nan ta entregá fácilmente. “Muchu hopi hende ta reaccioná riba fracaso den un manera cu ta perhudicá nan mes,” segun escritor Morley Callaghan. “Nan ta haña duele di nan mes, nan ta culpa tur hende, nan ta bira amargá i . . .ta legumai tur cos.”

Esaki ta masha lamentabel. Pitts ta bisa: “Nos ta lubidá cu tin un motibu pa pasa dor di prueba, cu tin algun balor den adversidad.” Ki balor esei ta? E ta concluí: “[Bo] ta siña cu fracaso no ta fatal, ni derota no ta eterno. Bo ta gana profundidad. Bo ta bira mihó prepará.” Bijbel ta bis’é mas simpel: “For di tur clase di trabou pisá ta bini un bentaha.”—Proverbionan 14:23.

Claro cu no ta semper fácil pa cuminsá atrobe despues di un contratempu. Tin bes nos ta haña nos mes confrontá cu desafionan cu por parce di ta resistí tur nos esfuersonan pa vence nan. En bes di nos metanan yega mas cerca, nan por parce di ta cai perde poco-poco. Nos por sinti nos aplastá, incapas, i por bira desanimá, asta deprimí. (Proverbionan 24:10) Pero Bijbel ta animá nos: “Laga nos no entregá den haci loke ta excelente, pasobra n’e debido tempu nos lo cosechá si nos no cansa.”—Galationan 6:9.

Kico Por Yuda Nos Perseverá?

E promé paso pa perseverá den un cierto curso ta pa fiha metanan digno i alcansabel. Apostel Pablo sigur a comprendé esaki. El a bisa e corintionan: “E manera cu mi ta core no ta insigur; e manera cu mi ta dirigí mi golpinan no ta pa dal den laira.” Pablo tabata sa cu pa su esfuersonan por ta exitoso, lo e mester a pone meta bon definí, mescos cu un coredó cu ta concentrá tur su atencion riba crusa e liña final den un careda. “Boso no sa cu tur coredó den un careda ta core, pero cu ta un so ta ricibí e premio? Core di tal manera pa boso por alcans’é,” el a exhortá nan. (1 Corintionan 9:24, 26) Con nos por haci esaki?

E persona “spiertu ta considerá su pasonan,” segun Proverbionan 14:15. Ta sabí pa de bes en cuando reevaluá nos plannan den bida, i puntra nos mes unda nos ta bayendo i si nos tin cu haci ahustenan. Ta vital pa tene bon cla na mente kico nos kier logra i pakico. Nos lo ta ménos incliná pa entregá ora nos tin nos destinacion final bon fihá den nos mente. “En cuanto bo wowonan, stret dilanti nan mester mira,” e proverbio inspirá ta urgi, di manera cu “tur bo mes camindanan [por ta] firmemente establecí.”—Proverbionan 4:25, 26.

Despues di a identificá bo metanan, e siguiente paso ta pa analisá con pa alcansá nan. Jesus a puntra: “Cua di boso cu kier traha un toren no ta sinta promé i calculá e gastu?” (Lucas 14:28) Na armonia cu e principio aki, un experto di salú mental a remarcá: “Un dje cosnan cu mi a ripará tocante hende exitoso ta cu nan ta comprendé bon cla e relacion entre causa i efecto den nan bida. Hende exitoso ta comprendé cu si nan kier algu, nan tin cu haci tur loke ta necesario pa hañ’é.” Ora nos tin un comprendimentu cla di tur e pasonan necesario cu nos tin cu dal pa logra loke nos kier, esei lo yuda nos mantené nos enfoke. E ora ei tambe lo ta mas fácil pa nos reorganisá pa cuminsá di nobo si nos haña nos cu contratempu. Un análisis asina tabata fundeshi dje éxito di Orville i Wilbur Wright.

P’esei, ora bo haña bo cu contratempu, haci bo best pa mira nan den un lus positivo i como experencia pa siña for di nan. Analisá e situacion, dicerní kico bo a haci robes, anto corigí e eror of remediá e debilidad. Ta bon pa papia cu otro hende, ya cu “dor di conseho plannan mes ta keda firmemente establecí.” (Proverbionan 20:18) Naturalmente, cu cada intento, bo ta desaroyá mas abilidad i aptitud, loke finalmente ta contribuí na bo éxito.

Un di tres aspecto esencial di perseverancia ta accion consistente. Apostel Pablo ta exhortá nos: “Te n’e grado cu nos a haci progreso, laga nos sigui cana ordenadamente den e mésun rutina aki.” (Filipensenan 3:16) Manera un educadó a bisa, “den transcurso di tempu moderacion i consistencia ta producí resultado significativo.” Esaki ta keda bon ilustrá den e fábula bon conocí tocante e morcoi i e conenchi. E morcoi a gana e careda, aunke e tabata hopi mas slow cu e conenchi. Pakico? Pasobra e morcoi tabata constante i disipliná. E no a stop di core pero a scoge un velocidad cu realísticamente e por a wanta, i despues el a pega na dje te ora el a crusa e liña final. Dor cu un persona organisá i constante ta progresá consistentemente, e ta keda motivá i asina tin ménos chens di bandoná e careda of cai for di dje. Sí, “core di tal manera” pa bo alcansá bo meta.

Scogiendo Metanan Digno

Claro cu pa perseverancia por tin balor, nos mester tin metanan cu ta bale la pena. Hopi hende ta core tras di cosnan cu no ta trece felicidad. Pero Bijbel ta bisa: “Esun cu ta mira cuidadosamente den e ley perfecto cu ta pertenecé na libertad i cu ta persistí den dje . . . lo ta felis haciendo esei.” (Santiago 1:25) Sí, un meta masha balioso ta pa studia pa comprendé e ley di Dios manera e ta describí den Bijbel. Pakico? Básicamente, pasobra e ley di Dios ta fundá riba su normanan perfecto i hustu. Como e Creador, e sa kico ta mihó pa su criaturanan. Pues si nos persistí den siña Dios su instruccionnan i aplicá nan den nos bida, e persistencia ei sigur lo trece felicidad pa nos. “Confia den Jehova cu tur bo curason . . . Den tur bo camindanan tuma nota di dje, i e mes lo haci bo camindanan stret,” Proverbionan 3:5, 6 ta primintí.

Ademas, gana conocimentu di Dios i di Jesus “ta nificá bida eterno,” segun Jesus. (Juan 17:3) Profecia di Bijbel ta indicá cu nos ta bibando den “e último dianan” dje sistema aki. (2 Timoteo 3:1-5; Mateo 24:3-13) Pronto e Reino di Dios, su gobiernu hustu, lo imponé su gobernacion riba habitantenan di tera. (Daniel 2:44; Mateo 6:10) E gobiernu aki lo introducí un era sin precedente di pas, prosperidad i bienestar pa tur hende obediente. (Salmo 37:10, 11; Revelacion 21:4) Echonan 10:34 ta bisa cu “Dios no ta parcial.” Sí, tur hende ta invitá pa disfrutá dje beneficionan!

Bijbel ta un buki antiguo yen di sabiduria i nificacion. Tempu i esfuerso ta necesario pa comprend’é. Pero cu Dios su yudansa—i si nos persistí den busca Bijbel su conocimentu—e lo ta un buki habrí pa nos. (Proverbionan 2:4, 5; Santiago 1:5) Ta berdad cu kisas ta un desafio pa aplicá loke nos siña. Tal bes nos tin cu haci ahuste den nos manera di pensa of nos custumbernan. Amigu of miembronan di famia cu tin bon intencion por asta oponé nos studio di Bijbel. P’esei persistencia ta esencial. Apostel Pablo ta recordá nos cu Dios lo duna bida eterno na esnan cu ta mustra “perseverancia den obra cu ta bon.” (Romanonan 2:7) Testigonan di Jehova lo ta contentu pa yuda bo alcansá e meta aki.

Bo por ta sigur cu lo bo tin éxito si bo perseverá den siña tocante Dios i su boluntad i ta persistente den aplicá loke bo siña.—Salmo 1:1-3.

[Plachi na página 6]

Lo bo tin éxito si bo perseverá den siña tocante Dios i su boluntad

[Rekonosementu pa Potrèt na página 4]

Culver Plachinan