Evidensia Arkeológiko Ku Hesus A Eksistí?

“PRUEBA di Hesus Skirbí den Piedra.” Esei ta loke e revista Biblical Archaeology Review (novèmber/desèmber 2002) a deklará riba su portada. Riba kaft dje revista tabatin potrèt di un kahita trahá di piedra di kalki ku wesu aden (osario) ku nan a haña na Israel. Hudiunan tabata usa e kahitanan aki ampliamente durante e periodo kòrtiku entre siglo unu promé ku nos era i aña 70 di nos era. Loke a hasi e kahita aki partikularmente signifikativo tabata un inskripshon na arameo den un di su bandanan. Ekspertonan a saka afó ku e ta bisa: “Santiago, yu di Jose, ruman di Hesus.”

Segun Beibel, Hesus di Nazaret tabatin un ruman ku yama Santiago i kende tabata ser konsiderá yu di Jose, esposo di Maria. Ora Hesukristu a prediká n’e hendenan di su pueblo natal, nan a keda asombrá i a puntra: “No ta yu di e karpinté esaki ta? No ta Maria su mama yama, i su rumannan: Santiago, Jose, Simon i Hudas? I su ruman muhénan tur no ta aki serka nos?”—Mateo 13:54-56; Lukas 4:22; Juan 6:42.

Sí, e inskripshon riba e kahita ta kuadra ku e deskripshon di Hesus e nazareno. Si e Santiago menshoná den e inskripshon tabata e mitar ruman di Hesukristu, e ora ei “fuera di Beibel, esaki lo ta e prueba arkeológiko mas antiguo di Hesus,” segun André Lemaire, un outoridat riba inskripshonnan di antigwedat i eskritor di e artíkulo menshoná den Biblical Archaeology Review. Hershel Shanks, editor di e revista, ta remarká ku e kahita “ta algu palpabel i visibel, i e ta data for di e tempu ku é personahe mas importante ku a yega di biba a kana riba tera.”

Sin embargo, tur e tres nòmbernan riba e kahita ku por a wòrdu lesá tabata komun den e promé siglo. Pues ta posibel ku ademas di e famia di Hesukristu por tabatin mas famia den kua tabatin un Santiago, un Jose i un Hesus. Lemaire ta kalkulá ku “durante e dos generashonnan na Yerusalèm promé ku aña 70 di nos era, tabatin . . . probablemente rònt di 20 hende ku lo por tabata yama ‘Santiago (òf Jakobo) yu di Jose, ruman di Hesus.’” No opstante, e ta sinti ku tin 90 porshento chèns ku e Santiago riba e kahita di wesu tabata e mitar ruman di Hesukristu.

Tin un otro faktor ku ta pone hende kere ku e Santiago den e inskripshon tabata e mitar ruman di Hesukristu. Ounke tabata komun pa menshoná tata di un defuntu den inskripshonnan asina, masha poko biaha tabata menshoná nòmber di un ruman. P’esei algun eksperto ta kere ku e Hesus aki lo mester tabata un persona importante. I esei ta pone nan pensa ku aki tabata trata di Hesukristu, fundadó di kristianismo.

E Kahita di Wesu Ta Outéntiko?

Despues ku e kurpa di un defuntu a putri te kaba na nada den kueba ku a sirbi komo graf, nan tabata kohe e wesunan i pone nan den un kahita òf osario. Ta masha ladronisia di kahita di wesu tabatin for di e santananan rònt di Yerusalèm. E kahita ku e inskripshon di Santiago a bini for di un marshe di kosnan antik, no for di un sitio ofisial kaminda a koba saka kos. Aparentemente e doño dje kahita a kumpr’é pa un par di shen dòler den dékada di 1970. Pues for di unda e kahita a bini sí ta un misterio. “Si bo no por bisa unda un opheto a wòrdu hañá i unda e tabata pa kasi 2.000 aña, bo no por pretendé sin mas ku e opheto ta konektá ku e hendenan ku lo e por ta menshonando,” segun Profèser Bruce Chilton di e Kolegio Bard, na New York.

Pa kompensá e falta di un ‘background’ arkeológiko, André Lemaire a manda e kahita p’e Departamento di Investigashon Geológiko na Israel. Aya e investigadónan a konstatá ku e kahita a ser trahá di piedra di kalki for di e promé òf di dos siglo di nos era. Nan a informá ku no tabatin “ningun señal ku a usa un hèrmènt moderno” pa traha e kahita. Pero, e ekspertonan di Beibel ku The New York Times a entrevistá tabata di opinion ku “posiblemente e evidensia sirkunstansial ku ta apoyá un konekshon ku Hesus tabata fuerte, pero ku e ta keda djis un evidensia sirkunstansial.”

E revista Time a komentá ku “awendia kasi ningun hende eduká ta duda ku Hesus a yega di eksistí.” Tòg, hopi ta haña ku fuera di e relatonan di Beibel tokante Hesus, mester tin mas prueba ku el a yega di eksistí. Arkeologia mester ta e base pa un hende kere den Hesukristu? Ki evidensia nos tin di ku “é personahe mas importante ku a yega di kana riba tera” di bèrdat a eksistí?

[Rekonosementu pa Potrèt na página 3]

Man robes, Kahita di Wesu di Santiago: AFP PHOTO/J.P. Moczulski; man drechi, inskripshon: AFP PHOTO/HO