E Tabata Famia di Kaifas
Un lugá típiko kaminda nan ta warda osario
De bes en kuando, arkeólogonan sa deskubrí ophetonan ku ta proba, direktamente òf indirektamente, ku un personahe bíbliko a yega di eksistí di bèrdat. Por ehèmpel, na aña 2011, ekspertonan israelí a publiká informashon tokante un opheto asina. Ta trata aki di un osario di mas o ménos 2.000 aña bieu, esta, un kahita dekorá ku granit den kua nan tabata pone wesu di un defuntu.
Riba e osario akí tabatin e inskripshon: “Miriam, yu muhé di Yeshua, yu hòmber di Kaifas, saserdote di Maazias di Beth ʹImri.” E sumo saserdote hudiu ku tabata enbolbí den husgamentu i ehekushon di Hesus tabata yama Kaifas. (Huan 11:48-50) Historiadó Flavio Hosefo a referí na e sumo saserdote akí komo Yosef. Evidentemente, e osario akí tabata di un famia di Kaifas. I komo ku riba un otro osario ku nan a haña tabatin e inskripshon “Yehosef bar Caiapha,” esta Yosef yu di Kaifas,a Miriam lo mester tabata famia di Kaifas.
Segun e informashon ku IAA (Outoridat di Kosnan Antiguo di Israel) a duna, nan a konfiská e osario di Miriam for di man di ladronnan ku a plùnder un graf antiguo. Un análisis di e artefakto akí i di loke tabatin skirbí riba dje a komprobá ku e ta outéntiko.
Ademas, e inskripshon riba e osario di Miriam ta divulgá algu nobo. E ta menshoná “Maazias,” kende tabata kabes di e di 24 divishon saserdotal; kada divishon tabata haña turno pa sirbi na e tèmpel na Herúsalèm. (1 Kró. 24:18) Segun IAA, e inskripshon riba e osario di Miriam ta revelá ku “e famia di Kaifas tabata di e divishon di Maazias.”
E inskripshon ta menshoná Beth ʹImri tambe. Tin dos posibel interpretashon pa e nòmber akí: Segun IAA, ‘e promé ta ku Beth ʹImri probablemente ta nòmber di un famia saserdotal: yu hòmbernan di Imer. (Èsdras 2:36-37; Nehemías 7:39-42) Nan desendientenan tabata miembro di e divishon di Maazias.’ E di dos posibel interpretashon ta ku Beth ʹImri ta ‘e lugá di orígen di Miriam òf di henter su famia.’ Sea kual sea e kaso, e osario di Miriam ta evidensia palpabel ku e personanan ku Beibel ta menshoná a yega di eksistí di bèrdat.
a Pa mas informashon tokante e osario di Kaifas, wak e artíkulo “E Sumo Saserdote Ku A Kondená Hesus,” den E Toren di Vigilansia di 15 di yanüari 2006, página 10-13.