“E Spada di Yehova i di Gideon!”

NAN a bin na bòshi, meskos ku dalakochi, i a kombertí terenonan fértil den desierto. Tabata den e periodo ku huesnan a goberná Israel, i e israelitanan tabata desesperá. Pa shete aña largu, asina ku simia sembrá a kuminsá sprùit, tropanan di madianita, amalekita i yu hòmbernan di oriente riba kamel tabata baha riba e tera pa plùnder e. E bandidunan aki tabata plama en buska di tereno ku yerba, i a kaba ku tur loke tabata bèrdè. Pero e pueblo di Israel no tabatin ni buriku ni toro ni karné. Madian su régimen di teror tabata asina fuerte ku e israelitanan ku tabata masha pober no tabatin otro opshon sino di warda nan kosnan den seru-, kueba- i sitionan difísil pa alkansá.

Kiko a pone nan pasa den e pèrtá ei? Israel apóstata tabata adorá dios falsu. Yehova, na su turno, a laga nan kai den man di opresornan. Ora e yunan di Israel no por a soportá mas, nan a akudí na Yehova pa yudansa. Yehova a skucha? Kiko e eksperensia di Israel por siña nos?—Huesnan 6:1-6.

Un Kunukero Kouteloso òf un “Guerero Balente”?

Normalmente e kunukeronan israelita tabata bati trigu ku uso di un buey i un wil di garoshi den un lugá habrí, eksponí na bientu, di manera ku e bientu por a supla e bagas i separ’é for di e grano. Pero en bista di e menasa di parti di e bandidunan ku tabata determiná pa kaba ku tur loke e tera a produsí, e proseso di bienta trigu lo a bira muchu bisto. Skondí p’e madianitanan, Gideon tabata bati trigu den un baki-di-pèrs-wendrùif—probablemente un buraku grandi kobá den baranka. (Huesnan 6:11) Bou di e sirkunstansianan ei, Gideon a improvisá un ke otro i ku tur probabilidat tabata bati e trigu ku un palu na kantidatnan chikitu.

Imaginá Gideon su asombro ora e angel di Yehova a aparesé na dje i a bis’é: “SEÑOR ta ku bo, o guerero balente.” (Huesnan 6:12) Komo un hòmber ku tabata bati trigu skondí-skondí den un baki-di-pèrs-wendrùif, Gideon sigur lo no a sinti ku e tabata balente. Pero e palabranan ei ta indiká ku Dios sí tabatin e konfiansa ku Gideon por tabata un lider balente den Israel. Tòg, Gideon mes mester a konvensé su mes di esei.

Ora Yehova a duna Gideon e enkargo pa “libra Israel for di man di Madian,” Gideon a deklará ku modestia: “O SEÑOR, kon lo mi libra Israel? Mira, mi famia ta esun di mas ménos den Manasés, i ami ta esun di mas chikitu den e kas di mi tata.” Ku masha kuidou Gideon a pidi un señal pa garantis’é ku Dios lo a yud’é derotá e madianitanan, i Yehova tabata dispuesto pa kumpli ku Gideon su deseo rasonabel pa haña un garantia. Pues Gideon a presentá un regalo di kuminda na e angel ku a bishit’é, i kandela a sali for di un baranka i kima e ofrenda. Despues ku Yehova a kalma Gideon su miedu, Gideon a traha un altar na e sitio ei.—Huesnan 6:12-24.

“Laga Baal Defendé Su Mes”

Israel su problema di mas grandi no tabata e opreshon di Madian. Tabata mas bien sklabitut na adorashon di Baal. Yehova ta “un Dios yalurs,” i un hende no por sirbi Dios di un forma aseptabel miéntras e ta adorá otro dios. (Eksodo 34:14) P’esei, Yehova a manda Gideon destruí e altar ku su tata a traha pa Baal i tumba e palu sagrado. Ku yudansa di dies sirbidó Gideon a aktua anochi, i no den dia, pasobra e tabatin miedu di e reakshon di su tata i di otro hende.

Su miedu no tabata infundá, pasobra si e adoradónan lokal di Baal a deskubrí e “sakrilegio” aki, nan lo a eksigí su bida. Pero ku un lógika irefutabel Joas, tata di Gideon, a rasoná ku e pueblo ku si Baal tabata Dios, lo e por a defendé su mes. Ku esei, Joas a yama su yu aptamente Jerobaal, ku ta nifiká “Laga Baal Defendé Su Mes Kontra Dje.”—Huesnan 6:25-32.

Semper Dios ta bendishoná su sirbidónan ku ta defendé adorashon berdadero ku kurashi. Ora e madianitanan i nan aliadonan a invadí e teritorio di Israel un biaha mas, ‘e spiritu di SEÑOR a bin riba Gideon.’ (Huesnan 6:34) Bou di direkshon di Dios su spiritu, òf forsa aktivo, Gideon a forma un ehérsito for di e tribunan di Manasés, Aser, Zabulon i Nèftalí.—Huesnan 6:35.

Prepará pa Akshon

Ounke Gideon tabatin un ehérsito di 32.000 hòmber awor, el a pidi Dios un señal. Si serena a kai riba un pida lana di karné riba e plenchi-di-bati-maishi miéntras ku e suela mes a keda seku, esei lo a indiká ku Dios lo a salba Israel pa medio di dje. Yehova a hasi e milager aki. Pero Gideon tabata ke un konfirmashon. El a pidi awor pa laga serena kai riba e suela miéntras ku e pida lana di karné mes mester a keda seku. Atrobe Yehova a kumpli. Akaso Gideon tabata demasiado deskonfiá? Aparentemente ku nò pasobra Yehova a kumpli ku su petishon pa dun’é un garantia. (Huesnan 6:36-40) Nos no ta ferwagt e milagernan ei awe. Loke sí nos por risibí ta Yehova su guia i garantia for di su Palabra.

Na un dado momentu Dios a bisa Gideon ku su ehérsito ta muchu grandi. Si e israelitanan a derotá nan enemigunan ku un ehérsito grandi asina, nan lo tabata kapas di broma ku ta nan a libra nan mes. Pero ta Yehova mester a risibí mérito p’e binidero viktoria. Kiko tabata e solushon? Gideon mester a apliká un provishon di e Lei di Moisés dor di invitá esnan ku tabatin miedu pa nan retirá. Ku esei, 22.000 di su hòmbernan a bai, lagando solamente 10.000.—Deuteronomio 20:8; Huesnan 7:2, 3.

For di e punto di bista di Dios, ainda tabatin muchu hòmber. Dios a bisa Gideon pa laga nan bai kaminda tabatin awa. E historiadó hudiu Hosefo ta bisa ku Dios a laga Gideon su tropanan kana bai na un riu den e kalor di dia. Sea kual sea e situashon, Gideon a opservá kon e hòmbernan tabata bebe awa. Apénas 300 di nan a hinka un man den e awa i trese esaki na nan boka miéntras nan tabata vigilá un posibel atake enemigu. Solamente e 300 hòmbernan ku a vigilá lo a bai ku Gideon. (Huesnan 7:4-8) Pone bo mes na nan lugá. Siendo ku e ehérsito enemigu tabata konsistí di 135.000 hòmber, lo bo mester a konkluí sigur ku ta ku e poder di Yehova so lo bo por a logra viktoria, i no ku bo mes poder!

Dios a invitá Gideon pa bai e kampamentu madianita huntu ku un asistente pa eksplorá esaki. Ora nan tabata einan, Gideon a tende un hòmber konta un kompañero kiko el a soña kuné i mesora su kompañero a interpretá for di e soño ku Dios a determiná pa entregá Madian den man di Gideon. Esei ta presis loke Gideon mester a tende. E tabata sigur ku Yehova lo a duna tantu e komo su 300 hòmbernan viktoria riba e madianitanan.—Huesnan 7:9-15.

Strategia di Bataya

Gideon a dividí e 300 hòmbernan den tres grupo di 100. El a duna kada hòmber un kachu i un kanika grandi bashí. Den e kanika tabatin un flambeu skondí. E promé òrdu di Gideon tabata esaki: ‘Wak mi i hasi meskos ku mi. Ora mi supla e kachu, boso tambe supla esun di boso i grita “e spada di Yehova i di Gideon!”’—Huesnan 7:16-18, 20, NW.

E 300 guereronan israelita a move ketu-ketu bai te na rant di e kampamentu enemigu. Tabata rònt di dies or di anochi—djis despues di kambiamentu di warda. Parse ku esaki tabata e ora adekuá pa aktua pasobra lo a dura un ratu promé ku e wowonan di e guardianan nobo por a ahustá n’e skuridat.

Awor sí e madianitanan a spanta nan morto! E kibramentu di 300 kanika, e suplamentu di 300 kachu i e gritamentu di 300 hòmber a kibra diripiente e trankilidat di anochi. Asombrá, foral dor di e gritu “e spada di Yehova i di Gideon!,” e madianitanan mes tambe a kuminsá grita, lokual a hasi e konmoshon mas grandi ainda. Den e káos tabata imposibel pa nan distinguí amigu for di enemigu. E 300 hòmbernan a para ketu den nan posishon asigná miéntras Dios a pone e enemigunan usa nan mes spada pa mata otro. Henter e ehérsito ku tabata den e kampamentu a sali na kareda, pero no tabatin skapatorio. Gideon a laga persiguí esnan ku a logra hui pa kaba ku nan i tambe e pokonan ku a keda atras pa asina eliminá e menasa madianita. Por fin e dominio largu i kruel aki a yega na su fin.—Huesnan 7:19-25; 8:10-12, 28.

Asta despues di e viktoria aki, Gideon a keda un hòmber modesto. Ora e efrainitanan, kendenan aparentemente a sinti nan ofendí dor ku nan no a ser konvoká pa e bataya, a purba pleita kuné, el a reakshoná suavemente. Su kontesta suave a kita nan rabia i kalma nan spiritu.—Huesnan 8:1-3; Proverbionan 15:1.

Awor ku pas a ser establesé, e israelitanan a hasi un yamamentu riba Gideon p’e bira nan rei. Esei lo tabata un tentashon pa Gideon, pero el a rechasá. E no a pèrdè for di bista ta ken a gana e viktoria riba Madian. El a deklará: “Ami lo no goberná riba boso, ni mi yu hòmber lo no goberná riba boso; SEÑOR lo goberná riba boso.”—Huesnan 8:23.

Sin embargo, komo un hòmber imperfekto, no ta tur ora Gideon a ehersé sano huisio. Pa un motibu ku no ta ser menshoná, el a traha un efot ku e botin di guera i eksibí esaki den e stat. E registro ta bisa ku henter Israel a kuminsá “prostituí nan mes” ku e efot. Nan a ador’é, i el a bira un trampa asta pa Gideon i su famia. Tòg, Gideon no a bira ègt un adoradó di dios falsu pasobra e Skritura ta konsider’é un hòmber ku tabatin fe den Yehova.—Huesnan 8:27; Hebreonan 11:32-34.

Ki Lès Nos Por Saka?

E relato di Gideon ta siña nos un lès di tantu spièrtamentu komo animashon. E ta spièrta nos ku si Yehova kita su spiritu i bendishon for di nos pa motibu di desobedensia, nos kondishon spiritual lo bira meskos ku esun di e residentenan pober di un tera riba kua dalakochi ta kaba ku tur loke ta bèrdè. Nos ta bibando den un tempu krítiko i no mester lubidá nunka ku “ta e bendishon di SEÑOR ta hasi riku, i e no ta agregá tristesa na dje.” (Proverbionan 10:22) Nos tin e bendishon di Dios pasobra nos ta “sirbié ku henter [nos] kurason i ku un alma boluntario.” Di otro manera, lo e rechasá nos.—1 Krónikanan 28:9.

Nos por haña animashon for di e relato tokante Gideon, pasobra e ta demostrá ku Yehova por libra su pueblo for di kualke menasa, asta pa medio di esnan ku ta parse débil òf indefenso. E echo ku Gideon i su 300 hòmbernan por a derotá 135.000 madianita ta duna prueba di Dios su poder sin límite. Kisas nos por haña nos mes den un pèrtá grandi i den kua nos enemigunan ta hopi mas tantu ku nos. Pero, e relato bíbliko tokante Gideon ta animá nos pa konfia den Yehova, kende lo bendishoná i libra tur persona ku ta ehersé fe den Dje.