Benefisiá di e Mihó Edukashon Ku Ta Eksistí!

BEIBEL ta identifiká Yehova Dios komo e Kreadó di tur kos, inkluso hende. (Génesis 1:27; Revelashon 4:11) Komo e Magnífiko Instruktor, el a eduká e promé pareha humano, Adam ku Eva, i a prepará nan pa biba den e bunita hòfi di Edén. Su propósito tabata pa sigui eduká nan i perkurá pa nan pa semper. (Génesis 1:28, 29; 2:15-17; Isaias 30:20, 21) Djis pensa ki futuro tabata spera nan!

Pero lamentablemente e promé pareha a tira nan futuro afó. Nan desobedensia a habri kaminda pa e degenerashon moral i físiko di e rasa humano. (Génesis 3:17-19; Romanonan 5:12) Refiriendo na e personanan ku a biba apénas un par di generashon despues ku hende a ser kreá, Beibel ta bisa: “SEÑOR a mira ku maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so.”—Génesis 6:5.

Kasi 4.500 aña a pasa desde ku Yehova a konkluí ku hende ta konstantemente inkliná pa hasi malu, i aworakí e situashon di humanidat ta mas pió ku nunka. Hopi hende ta gaña kara seku, hòrta òf ataká otro. Problemanan ta oumentá tur dia, miéntras ku interes den próhimo ta mengua. No ta bisto ku mayoria relashon personal, inkluso esnan den famia, ta den un berdadero krísis? Pero hende no por kulpa Dios pa e situashon aktual. Nan no por bisa tampoko ku Dios no ta interesá mas den e problemanan djawe. Semper Yehova tabata interesá den e bienestar di hende, i e ta dispuesto pa eduká esnan ku ta akudí na dje en buska di guia pa logra un bida felis. Un 2.000 aña pasá el a manda su Yu Hesukristu na tera i a demostrá ku E ta interesá pa eduká hende ku ke tin éksito den nan bida. E tempu largísimo ku Hesus a risibí instrukshon di e Magnífiko Instruktor a kapasit’é p’e laga un modelo di edukashon perfekto pa nos.

Kristianismo Berdadero—Un Edukashon

Hesukristu ta esun ku a instituí kristianismo berdadero, un manera di biba basá riba amor. Den kristianismo berdadero tur pensamentu i akshon mester ta na armonia ku e boluntat di Dios, ku e propósito di trese onor i gloria pa su nòmber. (Mateo 22:37-39; Hebreonan 10:7) Esun ku tabata tras di Hesus su siñansanan tokante e kaminda di bida aki tabata su Tata, Yehova. Na Juan 8:29 nos ta lesa tokante e apoyo ku Hesus a risibí di Dios: “Esun ku a manda mi ta ku mi; e no a laga mi mi so, pasobra semper mi ta hasi e kosnan ku ta agrad’é.” Sí, Hesus tabatin e apoyo i guia di su Tata atraves di su ministerio. E promé siguidónan di Hesus no tabatin ku enfrentá e desafionan di bida sin guia. Yehova a eduká nan pa medio di su Yu. E echo ku nan a sigui e siñansanan i ehèmpel di Hesus a hasi nan mihó hende. Meskos ta konta pa su disipelnan awe.—Wak e kuadro “E Influensia di Hesus i Su Siñansanan,” na página 6.

Un karakterístika partikular di kristianismo berdadero ta ku e ta enserá edukashon ku ta influensiá mente i kurason di hende, i p’esei ta logra kambia hende di paden. (Efesionan 4:23, 24) Pa menshoná djis un ehèmpel, konsiderá loke Hesus a siña hende tokante fieldat den matrimonio: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason.” (Mateo 5:27, 28) Ku e palabranan aki, Hesus a siña su disipelnan ku nan kurason mester ta limpi, i ku maske pensamentu- i deseonan impuru no a ser realisá ainda, esakinan por tin konsekuensia serio. No ta bèrdat ku mal pensamentu por hiba na aktonan ku ta ofendé Dios i perhudiká otro hende?

P’esei Beibel ta duna e konseho aki: “No sea konforme e mundu aki, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.” (Romanonan 12:2) Podisé bo ta puntra bo mes: ‘Ta realmente posibel pa renobá mi mente pa medio di edukashon?’ Renobá mente ta nifiká motiv’é den un otro direkshon dor di yen’é ku e prinsipionan i instrukshon di e Palabra di Dios. Bo por logra esaki dor di aseptá e edukashon ku Dios ta proveé mediante su Palabra.

Motivá pa Hasi Kambio

“E palabra di Dios ta bibu i poderoso.” (Hebreonan 4:12, BPK) Ainda e ta ehersiendo un influensia poderoso riba hende, i esei ta duna prueba ku e no ta bira antikuá. E por duna un persona e motivashon pa kambia su rumbo den bida, aseptá kristianismo berdadero i bira un mihó persona. E siguiente ehèmpelnan ta ilustrá e balor di edukashon bíbliko.

Emilia, menshoná den e artíkulo anterior, a deklará: “No tabata sufisiente pa djis hasi esfuerso riba mi mes pa mehorá e situashon na kas. Ora mi a kuminsá studia Beibel ku Testigunan di Yehova, mi a realisá ku tabatin speransa i mi a kuminsá kambia mi aktitut. Mi a siña tene mas pasenshi i stòp ku atakenan di rabia. Ku tempu, mi esposo tambe a kuminsá partisipá den e estudio. No tabata fásil pa e stòp di bebe, pero el a logra. Esaki a duna nos matrimonio un komienso nobo. Awor nos ta kristiannan felis i nos ta inkulkando den nos yunan e prinsipionan ekselente di Beibel.”—Deuteronomio 6:7.

E edukashon ku berdadero kristianismo ta perkurá por libra un persona di bisio i un estilo di bida inmoral. Manuela a komprobá esaki. Dia e tabatin 13 aña, el a bai for di kas i a kuminsá huma mariwana. Ku tempu, el a pasa pa heroina. E tabata tene relashon seksual ku hòmber i muhé a kambio di plaka i un dak riba su kabes. Na algun okashon Manuel tabata sostené su mes tambe dor di kometé atrako. Kasi semper e tabata bou di influensia di droga. Hopi bes, su kondukta violento a pone ku el a kai será. Un biaha el a pasa kuater aña tras di trali, i eiden el a haña su mes enbolbí den trafikashon di arma. Despues ku Manuel a kasa, el a sigui kosechá e mal konsekuensianan di e tipo di bida ku el a hiba. El a bisa: “Nos a bin resultá den loke un tempu tabata un kouchi di galiña. Esei tabata nos kas. Ainda mi ta kòrda kon mi kasá tabata kushiná riba blòki. Nos situashon tabata asina prekario ku mi mes famia tabata konsehá mi kasá pa e bai laga mi.”

Kiko a kambia su bida? Manuel a kontestá: “Un konosí di mi a bini nos kas pa papia tokante Beibel. Mi a aseptá su bishitanan djis pa mustr’é ku no ta eksistí un Dios ku ta interesá den hende. Mi a konsiderá mi mes un prueba bibu di esei. Pero e Testigu su pasenshi i bon manera a impreshoná mi, p’esei mi a aseptá su invitashon pa asistí na e reunionnan na Salòn di Reino. Ounke algun di e personanan einan tabata sa di mi bida, nan a kumindá mi amigablemente. Nan a laga mi sinti mi meskos ku un di nan, lokual tabata un gran konsuelo pa mi. Tur esei a motivá mi pa disidí di stòp di usa droga i buska un trabou onrado. Kuater luna despues ku mi a kuminsá studia Beibel, mi a kualifiká pa partisipá den e trabou di prediká, i kuater luna despues di esei, mi a batisá komo Testigu di Yehova.”

Kiko kristianismo berdadero a nifiká pa Manuel i su famia? “Sin edukashon di Beibel lo mi tabata morto sigur hopi aña kaba. E kaminda di bida ku Hesus a siña hende a duna mi mi famia bèk. Mi dos yunan no tin nodi pasa den loke ami a pasa komo hóben. Mi ta sinti mi orguyoso i hopi gradisidu na Yehova pa e bon relashon ku mi tin ku mi kasá aktualmente. Algun di mi konosínan di ántes a felisitá mi i a bisa mi ku nan ta haña ku e bida ku mi ta hibando aworakí ta esun di mas mihó.”

Den e bida kristian, un hende ku ta moralmente limpi mester ta físikamente limpi tambe. John, kende ta biba den un área hopi pober na Sur Afrika, a bin komprondé esei. El a splika: “Tin biaha nos yu muhé tabata pasa un siman sin baña, i aparentemente ningun di nos no tabata wòri.” Su esposa a atmití ku nan kas tabatin un aspekto teribel. Pero ku edukashon kristian, kosnan a kambia. John a stòp di asosiá ku un gèng di ladron di outo i a kuminsá duna mas atenshon na su famia. “Nos a siña ku komo kristian, nos mester tene nos kurpa i paña limpi. Mi gusta e palabranan na 1 Pedro 1:16 ku ta spièrta nos pa nos ta santu pasobra Yehova Dios ta santu. Awor nos tambe ta purba duna nos kas simpel un toke agradabel.”

Bo Por Haña e Mihó Edukashon

E eksperensianan menshoná anteriormente no ta kasonan eksepshonal. Komo resultado di edukashon basá riba Beibel, míles di hende a siña hiba un mihó bida. Dor ku nan ta onrado i diligente, nan doñonan di trabou ta apresiá nan. Nan a bira bon bisiña i amigu, i nan ta mustra interes den e bienestar di nan próhimo. Nan ta determiná pa evitá bisio- i tendensianan karnal, i nan ta kuida nan salú físiko, mental i emoshonal mihó. En bes di dispidí nan rekursonan ku bisio, nan ta usa esakinan pa e bienestar di nan mes i di nan famia. (1 Korintionan 6:9-11; Kolosensenan 3:18-23) Sin duda, e resultadonan di pone na práktika e siñansa di e Palabra di Yehova ta demostrá ku kristianismo berdadero ta produsí e mihó bida posibel. Ta trata aki di e mihó edukashon ku ta eksistí. Relashoná ku e persona ku ta biba na armonia ku e leinan di Dios, Beibel ta deklará: “Tur loke ku e hasi ta prosperá.”—Salmo 1:3.

Ta un animashon pa sa ku e Dios Todopoderoso, Yehova, ta dispuesto pa eduká nos. E ta bisa di su mes: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana.” (Isaias 48:17) Sí, Yehova a mustra kua ta e kaminda pa medio di e ehèmpel i siñansanan di su Yu Hesukristu. Hesus su siñansanan a kambia e bida di hopi hende ku a konos’é tempu ku e tabata riba tera, i esei ta e kaso tambe ku hopi otro hende ku awe ta biba segun su siñansanan. Pakiko no tuma tempu pa haña sa mas di e siñansanan aki? Testigunan di Yehova den bo bisindario gustosamente lo yuda bo risibí e edukashon balioso ei.

[Nota]

[Kuadro/Plachi na página 6]

E Influensia di Hesus i Su Siñansanan

Zakeo a malusá su posishon komo kobradó prinsipal di belasting pa bira riku dor di estafá i hòrta plaka di hende komun. Pero el a kambia su bida dor di apliká e siñansanan di Hesus.—Lukas 19:1-10.

Saulo di Tarso a stòp di persiguí e kristiannan i a kombertí na kristianismo, lokual a hasié apòstel Pablo.—Echonan 22:6-21; Filipensenan 3:4-9.

Algun di e kristiannan na Korinto tabata ‘fornikadó, adoradó di dios falsu, adúltero, homoseksual, ladron, golos pa plaka, buraché, blasfemadó i estafadó.’ Pero, ora nan a siña di kristianismo berdadero, nan a ‘wòrdu labá, santifiká i hustifiká den e nòmber di nan Señor Hesukristu.’—1 Korintionan 6:9-11.

[Plachi na página 7]

Beibel por mustra bo kon bo por tin éksito