Hòmber i Muhé un Papel Digno pa Kada Un di Nan

YEHOVA DIOS a krea Adam promé, despues Eva. Promé ku Eva a ser kreá, Adam a haña eksperensia den bida. Durante e tempu aki, Yehova a dun’é sierto instrukshonnan. (Génesis 2:15-20) Sirbiendo komo bosero di Dios, Adam mester a pasa esakinan pa su esposa. Ta lógiko anto ku e lo a hiba delantera den tur asuntu ku tabatin di haber ku adorashon.

Den e kongregashon kristian ta eksistí un areglo similar, i lo ta benefisioso pa nos analisá esaki. Apòstel Pablo a skirbi: “Mi no ta permití hende muhé . . . ehersé outoridat riba hende hòmber, ma pa keda ketu. Pasobra ta Adam a wòrdu formá promé, despues Eva.” (1 Timoteo 2:12, 13) Esaki no ta nifiká ku hende muhé mester keda kompletamente ketu na reunionnan di e kongregashon kristian. E mester keda ketu den e sentido ku e no ta debatí ku e hòmber. E no mester menospresiá su posishon nombrá òf purba instruí e kongregashon. Ta hende hòmber a haña e asignashon pa dirigí i instruí e kongregashon, pero hende muhé ta kontribuí hopi na reunionnan kristian dor di partisipá den nan den vários manera.

Apòstel Pablo ta yuda nos komprondé e respektivo papelnan di hende hòmber i hende muhé den e areglo di Dios. El a skirbi: “Hòmber no ta originá for di muhé, ma muhé for di hòmber; . . . den Señor ni muhé no ta independiente di hòmber, ni hòmber no ta independiente di muhé. Pasobra meskos ku muhé ta originá for di hòmber, asina tambe hòmber ta nasí di muhé; i tur kos ta originá for di Dios.”—1 Korintionan 11:8-12.

Hende Muhé Tin Privilegio Ekselente

Bou di e Lei ku Dios a duna Israel, hende muhé tabatin hopi privilegio i tabata liber pa tuma inisiativa. Por ehèmpel, Proverbionan 31:10-31 ta papia di “un bon esposa” [BPK] ku ta kumpra material ekselente i traha bunita bistí pa su famia. Imaginá bo, “e ta traha paña-di-bisti di tela di lino, i ta bende nan”! (Versíkulo 13, 21-24) E muhé ekselente aki ta ‘manera barku di komersiante’ ku ta bai buska kuminda di bon kalidat, asta si e mester trese esei for di lugánan leu. (Versíkulo 14) “E ta inspektá un tereno, i ta kumpr’é,” i “e ta planta un kunuku di wendrùif.” (Versíkulo 16) Siendo ku “su negoshi ta bai bon,” su aktividatnan ta produsí ganashi. (Versíkulo 18) Ademas di “tene e kamindanan di su famia bon na bista,” e muhé diligente aki ku ta teme Yehova ta kla pa saka man pa yuda otro hende. (Versíkulo 20, 27) No ta nada straño ku e ta haña elogio!—Versíkulo 31.

E leinan ku Yehova a proveé mediante Moisés a duna hende muhé amplio oportunidat pa krese spiritualmente. Por ehèmpel, na Josué 8:35, nos ta lesa: “No tabatin ni ún palabra di tur loke Moisés a ordená ku Josué no a lesa dilanti di henter e asamblea di Israel, inkluyendo e muhénan, e mucha chikitunan i e stranheronan ku tabata biba meimei di nan.” Relashoná ku e saserdote Esdras, Beibel ta deklará: “[El] a trese e lei dilanti di e asamblea di hòmber, muhé, i tur hende ku por a skucha ku komprondementu, riba e promé dia di e di shete luna. I el a lesa for di dje dilanti di e plasa ku tabata keda dilanti di e Porta di Awa, for di mainta trempan te mèrdia, den presensia di hòmber i muhé, esnan ku por a komprondé; i henter e pueblo tabata skucha atentamente na e buki di lei.” (Nehemias 8:2, 3) Hende muhé a benefisiá di tal lesamentu di e Lei. Tambe nan a selebrá fiestanan religioso. (Deuteronomio 12:12, 18; 16:11, 14) Mas importante ainda, hende muhé den Israel di antigwedat por tabatin un relashon personal ku Yehova Dios i por a hasi orashon individualmente na dje.—1 Samuel 1:10.

Den e promé siglo di nos era, muhénan temeroso di Dios tabatin e privilegio di sirbi Hesus. (Lukas 8:1-3) Un hende muhé a basha zeta perfumá riba Hesus su kabes i pia durante un sena na Betania. (Mateo 26:6-13; Juan 12:1-7) Entre e personanan na ken Hesus a aparesé despues di su resurekshon tabatin hende muhé. (Mateo 28:1-10; Juan 20:1-18) Despues ku Hesus a subi na shelu, den e grupo di mas o ménos 120 disipel ku a bini huntu tabatin “muhénan i Maria, mama di Hesus.” (Echonan 1:3-15) Sin duda, hopi di e muhénan aki, si no ta tur mes, lo tabata den e sala ariba den Yerusalèm riba dia di Pentekòste di aña 33 di nos era, ora spiritu santu a yena Hesus su disipelnan i pone nan papia milagrosamente den vários idioma.—Echonan 2:1-12.

Tantu hòmber komo muhé tabata entre esnan ku a eksperensiá kumplimentu di Joel 2:28 i 29. Apòstel Pedro a sita e teksto aki riba dia di Pentekòste, bisando: “Lo mi [Yehova] basha di mi spiritu riba henter humanidat; i boso yu hòmbernan i boso yu muhénan lo profetisá . . . Tambe riba mi sirbidónan, tantu hòmber komo muhé, lo mi basha di mi spiritu den e dianan ei.” (Echonan 2:13-18) Pa un tempu despues di Pentekòste di aña 33, muhénan kristian a haña donnan milagroso di e spiritu. Nan a papia den idiomanan stranhero i a profetisá, no nesesariamente pronostikando sierto kosnan; mas bien, nan a proklamá e bèrdatnan bíbliko.

Den apòstel Pablo su karta na e kristiannan na Roma, el a papia amorosamente di “nos ruman muhé Febe,” rekomendando e na nan. El a referí tambe na Trifena i Trifosa, yamando nan “trahadónan den Señor.” (Romanonan 16:1, 2, 12) Ounke e muhénan aki no tabatin posishonnan nombrá den e kongregashon kristian di promé siglo, nan i hopi otro hende muhé tabatin e privilegio di a wòrdu skohé dor di Dios pa bira ko-heredero ku su Yu Hesukristu den e Reino selestial.—Romanonan 8:16, 17; Galationan 3:28, 29.

Awe tambe, muhénan deboto na Dios tin un gran privilegio. Salmo 68:11 [NW] ta bisa: “Yehova mes ta duna e palabra; hende muhé ku ta anunsiá e bon nobo ta un ehérsito grandi.” E hende muhénan ei meresé nos elogio. Por ehèmpel, nan bon abilidat den kondusí estudionan di Beibel ta yudando hopi hende aseptá e siñansanan berdadero ku ta agradá Dios. Muhénan kristian kasá ku ta yuda nan yunan bira kreyente i ku ta apoyá nan esposonan ku tin hopi responsabilidat di kongregashon tambe meresé nos elogio. (Proverbionan 31:10-12, 28) Muhénan soltero tambe tin un lugá digno den e areglo di Dios, i Beibel ta instruí hòmbernan kristian pa “trata . . . e muhénan mas bieu manera mama, e muhénan mas hóben manera ruman muhé, den tur puresa.”—1 Timoteo 5:1, 2.

E Diferente Asignashonnan di Hende Hòmber

Dios a duna hòmbernan kristian un papel i e ta ferwagt ku nan ta kumpli kuné. Pablo a deklará: “Mi kier pa boso komprondé ku Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.” (1 Korintionan 11:3) Hende hòmber tambe tin un kabes: Kristu. Sí, hòmber ta responsabel na Kristu i finalmente na Dios. I Dios ta ferwagt ku e hòmber ta kumpli ku su papel komo kabes na un manera amoroso. (Efesionan 5:25) Esei ta asina for di tempu ku hende a ser kreá.

Beibel ta mustra ku Dios a duna hòmber asignashonnan ku ta kuadra ku su posishon komo kabes. Por ehèmpel, Yehova a laga e hòmber Noe konstruí un arka pa konserbá bida durante e Diluvio. (Génesis 6:9–7:24) Dios a primintí e hòmber Abraham ku pa medio di su simia, tur e famianan i nashonnan di tera lo bendishoná nan mes. E parti prinsipal di e simia ei ta Kristu Hesus. (Génesis 12:3; 22:18; Galationan 3:8-16) Dios a apuntá e hòmber Moisés pa saka e israelitanan for di Egipto. (Eksodo 3:9, 10, 12, 18) Tabata mediante Moisés ku Yehova a duna e kódigo di lei konosí komo e aliansa di Lei, òf e Lei di Moisés. (Eksodo 24:1-18) I sin eksepshon, tur e eskritornan di Beibel tabata hende hòmber.

Komo Kabes di e kongregashon kristian, Hesus a “duna donnan [den] hende.” (Efesionan 1:22; 4:7-13) Ora Pablo a menshoná e kualifikashonnan pa superintendente, el a referí na hende hòmber. (1 Timoteo 3:1-7; Tito 1:5-9) Pues ta hende hòmber ta sirbi komo superintendente, òf ansiano, i komo sirbidó ministerial den e kongregashonnan di Testigunan di Yehova. (Filipensenan 1:1, 2; 1 Timoteo 3:8-10, 12) Hende hòmber so por sirbi komo wardadó den e kongregashon kristian. (1 Pedro 5:1-4) No opstante, manera nos a mira anteriormente, Dios a duna hende muhé privilegionan maravioso.

Kontentu ku Nan Papel

Ora tantu hòmber komo muhé ta kumpli ku e papel ku Dios a duna nan, esei ta hasi nan felis. Matrimonionan ta felis ora esposo i esposa ta imitá e ehèmpel di Kristu i su kongregashon. Pablo a skirbi: “Esposonan, stima boso esposa, meskos ku Kristu tambe a stima e iglesia i a entregá su mes p’e . . . Laga kada un di boso tambe stima su esposa manera su mes.” (Efesionan 5:25-33) P’esei, esposonan mester kumpli ku nan papel komo kabes na un manera amoroso, i no na un manera egoista. E kongregashon di Kristu no ta konsistí di hende perfekto. Pero Hesus ta stim’é i ta kuid’é. Asina tambe, un esposo kristian mester stima su esposa i kuid’é.

Un esposa kristian mester “respetá su esposo” profundamente. (Efesionan 5:33) En konekshon ku esaki, e por mira riba e kongregashon komo ehèmpel. Efesionan 5:21-24 ta deklará: “Sea sumiso na otro den e temor di Kristu. Esposanan, sea sumiso na boso mes esposo, manera na Señor. Pasobra e esposo ta kabes di e esposa, meskos ku Kristu tambe ta kabes di e iglesia, e mes siendo salbadó di e kurpa. Ma meskos ku e iglesia ta sumiso na Kristu, asina tambe e esposanan mester ta sumiso na nan esposo den tur kos.” Un esposa por haña ku de bes en kuando ta difísil pa ta sumiso na su esposo; sin embargo, esaki ta “pas den Señor.” (Kolosensenan 3:18) Lo ta mas fásil pa e esposa ta sumiso na su kasá si e kòrda ku esaki ta agradá Señor Hesukristu.

Asta si su esposo no ta un kreyente, un esposa kristian mester someté su mes na su hefatura. Apòstel Pedro a bisa: “Boso, esposanan, sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.” (1 Pedro 3:1, 2) Sara, kende a respetá su kasá, Abraham, tabatin e privilegio di duna lus na Isaak i bira un antepasado di Hesukristu. (Hebreonan 11:11, 12; 1 Pedro 3:5, 6) Esposanan ku ta komportá nan mes meskos ku Sara sigur lo haña nan rekompensa serka Dios.

Pas i armonia ta prevalesé ora tantu hòmber komo muhé kumpli ku e papel ku Dios a duna nan. Esaki ta duna nan satisfakshon i felisidat. Ademas, ora kada un ta kumpli ku rekisitonan bíbliko, nan lo haña e dignidat ku un lugá privilegiá den e areglo di Dios ta trese kuné.

[Kuadro na página 7]

Kon Nan Ta Mira e Papel Ku Dios A Duna Nan

Susan a bisa: “Mi esposo ta kumpli ku su papel komo kabes na un manera amoroso i bondadoso. Por lo general nos ta papia riba e desishonnan ku mester ser tumá, i ora e disidí kiko nos lo hasi òf keda sin hasi, mi sa ku esei ta pa nos bienestar. E lugá ku Yehova a duna esposanan kristian ta hasi mi realmente felis i ta hasi nos matrimonio fuerte. Nos ta hopi será ku otro i ta traha huntu pa alkansá metanan spiritual.”

Un señora ku yama Mindy a komentá: “E papel ku Yehova a asigná na su sirbidónan femenino ta un garantia di e amor ku e tin pa nos. Mi ta sinti ku ora mi ta duna mi esposo onor i rèspèt i tambe ora ku mi ta apoy’é den su debernan di kongregashon, mi ta mustrando mi gratitut na Yehova pa e areglo aki.”

[Plachinan na página 5]

Na armonia ku e hòmber su posishon komo kabes, Dios a duna Noe, Abraham i Moisés diferente asignashon

[Plachi na página 7]

“Hende muhé ku ta anunsiá e bon nobo ta un ehérsito grandi”