Pakiko Papia Bèrdat?

TEMPU ku Manfred tabatin 18 aña, e tabata haña entrenamentu den trabounan di ofisina.a E kompania kaminda e tabata traha a hasi areglo pa e i vários otro empleado ku tabata den training bai un skol di preparashon pa un profeshon dos dia pa siman. Un dia nan a laga e klas bai mas trempan ku tabata programá. Segun e reglanan di e kompania, e empleadonan mester a bai traha bèk e restu di dia. Pero en bes di esei, nan tur a tuma liber pa rekreá. Ta Manfred so a bai trabou bèk. Pa kasualidat e supervisor enkargá ku e trahadónan den training a pasa. Ora el a mira Manfred, el a puntr’é: “Dikon bo no a bai skol awe? I unda e otronan ta?” Kiko Manfred mester a kontestá?

Manfred a hañ’é den un situashon difísil ku hopi bes sa surgi. E mester papia bèrdat, òf e mester tapa kos pa su kompañeronan di klas? Si e bisa bèrdat, esei lo trese problema pa e otronan i e ta bira impopular. Ta korekto pa gaña bou di e sirkunstansianan ei? Kiko abo lo a hasi? Nos lo bini bèk riba e kaso di Manfred. Pero laga nos konsiderá promé ki faktornan nos tin ku tene kuenta kuné ora nos tin ku disidí si nos ta papia bèrdat òf nò.

Bèrdat i Mentira—Un Rivalidat Fundamental

Na komienso di historia humano, tur kos tabata basá riba bèrdat. No tabatin trosementu di echonan, ni manipulashon òf falsifikashon di loke ta bèrdat. Yehova, e Kreadó, ta e “Dios di bèrdat.” Su palabra ta e bèrdat; e no por gaña, i ta kondená gañamentu i esnan ku ta saka mentira.—Salmo 31:5, BPK; Juan 17:17; Tito 1:2.

Siendo ku esei ta asina, kon mentira a kuminsá? Hesukristu a duna e kontesta konfiabel ora el a bisa su opositornan religioso ku tabata busk’é pa mata: “Boso ta di boso tata e Diabel, i boso kier hasi e deseonan di boso tata. E tabata un matadó for di prinsipio, i no ta para den e bèrdat, pasobra no tin bèrdat den dje. Ki ora ku e papia un mentira, e ta papia for di su mes naturalesa, pasobra e ta un gañadó i e tata di mentira.” (Juan 8:44) Ta bisto ku Hesus tabata refiriendo na e suseso ku a tuma lugá den e hardin di Edén ora Satanas a persuadí e promé pareha humano pa nan desobedesé Dios i asina bira víktima di piká i morto.—Génesis 3:1-5; Romanonan 5:12.

Hesus su palabranan ta identifiká Satanas klaramente komo “e tata di mentira,” e originadó di gañamentu i mentira. Te awe Satanas ta e promotor prinsipal di mentira i, de echo, e ta “gaña henter mundu.” E ta e kulpabel prinsipal pa e daño ku e práktika di gañamentu—ku ta plamá tur kaminda—a kousa hende awe.—Revelashon 12:9.

Ta Satanas e Diabel a kuminsá ku e rivalidat fundamental entre bèrdat i mentira ku ta reina te awe. E ta penetrá den tur nivel di sosiedat humano i e ta afektá tur hende. E manera ku un hende ta biba ta indiká na kua banda e ta pará. Esnan ku ta n’e banda di Dios ta biba segun e bèrdat di Beibel, e Palabra di Dios. Ken ku no ta sigui e kaminda di e bèrdat ta kai, konsiente- òf inkonsientemente, den man di Satanas pasobra “henter mundu ta bou di kontròl di e malbado.”—1 Juan 5:19; Mateo 7:13, 14.

Dikon Hende Tin Tendensia di Gaña?

E echo ku “henter mundu” ta bou di kontròl di Satanas ta yuda nos komprondé dikon asina tantu hende ta gaña. Pero kisas bo ta puntra: Dikon Satanas, “e tata di mentira,” a gaña? Satanas tabata sa ku Yehova ta e Soberano legítimo di tur loke El a krea, inkluso e promé pareha humano. Pero Satanas a deseá e posishon elevá i úniko aki, algu ku e no tabatin derecho riba dje. Golosidat i ambishon egoista a pon’é bin ku e plan malisioso pa kita Yehova su puesto. Pa logra esaki, Satanas a rekurí na mentira i engaño.—1 Timoteo 3:6.

Kiko di awe? Bo no ta di akuerdo ku loke ta impulsá hende pa gaña ta nèt e golosidat i ambishon egoista aki? Komersiantenan golos, polítikonan korupto i religion falsu ta pèstá ku engaño, mentira, manipulashon i froude. Dikon? No ta asina ku hopi bes ta golosidat i ambishon ta motivá hende pa bai dilanti òf optené rikesa, poder òf un posishon ku nan no tin derecho riba dje? Un gobernante sabí, Rei Salomon di Israel di pasado, a spièrta: “Esun ku ta purá pa bira riku lo no keda sin kastigu.” (Proverbionan 28:20) I apòstel Pablo a skirbi: “Amor pa plaka ta rais di tur sorto di maldat.” (1 Timoteo 6:10) Ku tur siguransa nos por bisa meskos di e deseo irasonabel pa poder òf posishon.

Un otro faktor tras di gañamentu ta miedu: miedu di e konsekuensianan òf di loke otro hende kisas lo pensa si bo papia bèrdat. Ta masha normal ku hende ta deseá pa otronan gusta nan òf aseptá nan. Sin embargo, e deseo aki por motivá nan pa trose loke ta bèrdat, ounke ta djis un tiki, pa nan por tapa fayo, skonde detayenan desfaborabel òf simplemente pa duna un bon impreshon. Korektamente, Salomon a skirbi: “Temor pa hende ta pone un trampa, ma esun ku konfia den SEÑOR lo ta halsá.”—Proverbionan 29:25.

Lealtat na e Dios di Bèrdat

Kiko Manfred a bisa ora e ehekutivo di e kompania a pidié un splikashon? Manfred a papia bèrdat. El a bisa: “E maestro a laga nos bai mas trempan awe, p’esei mi a bin traha. Pa loke ta e otronan, mi no por papia pa nan. Kisas Mener por puntra nan personalmente.”

Manfred por a duna un kontesta sabí i engañoso i asina bira popular serka e otro personanan den training. Pero e tabatin bon motibu pa pega lealmente na loke ta bèrdat. Manfred ta Testigu di Yehova. Su onestidat a lag’é keda ku un konsenshi limpi. Esaki a pone tambe ku el a gana e konfiansa di su doño di trabou. Komo parti di Manfred su training nan a mand’é bai traha den e departamento di hoya kaminda normalmente nan no sa permití personanan den training traha. Mas o ménos 15 aña despues ora Manfred a ser promové na un puesto di responsabilidat den e kompania, e mesun ehekutivo aki a bèl Manfred pa felisit’é i a kòrd’é kon el a papia bèrdat durante e insidente aki.

Yehova ta e Dios di bèrdat, pues ken ku ke tin un relashon estrecho kuné mester ‘pone mentira un banda’ i “papia bèrdat.” Un sirbidó di Dios mester stima bèrdat. E hòmber sabí a skirbi: “Un testigu fiel no ta gaña.” Pero kiko ta un mentira?—Efesionan 4:25; Proverbionan 14:5.

Kiko Ta un Mentira?

Ki ora ku bo gaña bo no a papia bèrdat, pero no ta tur biaha ku bo no papia bèrdat bo a gaña. Dikon no? Un dikshonario ta definí mentira komo un deklarashon ku un persona ta hasi pa gaña un otro hende, ounke e sa òf ta kere ku loke e ta bisa no ta bèrdat. Sí, sakamentu di mentira ta bai akompañá ku e intenshon di gaña un persona. P’esei, bisa algu ku no ta bèrdat inkonsientemente—manera por ehèmpel, duna un persona datonan òf sifranan inkorekto sin ku esei tabata e intenshon—no ta meskos ku saka mentira.

Ademas, nos tin ku wak tambe si e persona ku ta pidi informashon tin derecho di risibí un kontesta kompletu. Por ehèmpel, suponé ku ta un ehekutivo di un otro kompania a hasi Manfred e mesun preguntanan. Manfred lo tabatin e obligashon di kont’é tur kos? Bon mirá, nò. Siendo ku e ehekutivo no tabatin derecho di haña e informashon ei, Manfred lo no tabatin e obligashon di dun’é tampoko. Klaru ku asta den e kaso aki lo no tabata bon pa e gaña.

Ki ehèmpel Hesukristu a pone den e aspekto aki? Na un okashon Hesus tabata papia ku algun persona ku no tabata su disipel pero ku a mustra interes den su plannan di biahe. Nan a konseh’é: “Sali for di akinan i bai Hudea.” Kiko Hesus a kontestá? “Boso bai e fiesta [na Yerusalèm] numa; Ami no ta bai e fiesta aki ainda, pasobra mi tempu no ta kumplí ainda.” Djis despues, Hesus a biaha bai Yerusalèm pa e fiesta. Dikon el a kontestá nan asina? Nan no tabatin derecho di sa detayenan eksakto di su paradero. Pues ounke Hesus no a gaña, e no a duna nan un kontesta kompletu. Asina el a limitá e posibel daño ku nan por a kousa su disipelnan. Esaki no tabata un mentira pasobra apòstel Pedro a skirbi relashoná ku Kristu: “[E] no a kometé piká, ni mentira no a wòrdu hañá den su boka.”—Juan 7:1-13; 1 Pedro 2:22.

Kiko di Pedro mes? No ta gaña el a gaña ora ku tres biaha el a nenga ku e tabata konosé Hesus, e anochi ku nan a arestá Hesus? Sí, Pedro a sukumbí na miedu di hende i a gaña. Pero mesora el “a yora amargamente,” el a repentí i a haña pordon. Ademas, el a siña di su eror. Algun dia despues, el a papia públikamente tokante Hesus i el a nenga redondamente di stòp ora outoridatnan hudiu na Yerusalèm a menas’é. Sin duda, Pedro su kaida i rekuperashon rápido mester ta un animashon pa nos tur, ku fásilmente por haña nos den un momento di debilidat i asina trompeká ku palabra òf echo.—Mateo 26:69-75; Echonan 4:18-20; 5:27-32; Santiago 3:2.

Bèrdat Lo Ta Establesí pa Semper

Proverbionan 12:19 ta splika: “Lepnan ku ta papia bèrdat lo ta establesí pa semper, ma un lenga mentiroso ta pa un momento so.” Sí, palabra berdadero ta keda pa semper. Relashonnan entre hende ta bira mas stabil i satisfasiente ora hende ta determiná pa papia bèrdat i aktua na armonia kuné. Definitivamente, ora un persona ta papia bèrdat e ta haña rekompensa mesora. Esakinan ta entre otro un konsenshi limpi, un bon reputashon, relashon fuerte den matrimonio, den famia, entre amigunan i asta den negoshi.

Di otro banda, mentira no ta keda skondí, ku tempu e ta sali na kla. Un lenga ku ta saka mentira por gaña hende pa un ratu, pero su mentira no ta keda skondí pa hopi tempu. Fuera di esei, Yehova, e Dios di bèrdat, a fiha un límite di tempu ku e ta tolerá mentira i esnan ku ta promové mentira. Beibel ta primintí ku Yehova lo eliminá e influensia di Satanas e Diabel, e tata di mentira, kende ta gañando henter e tera habitá. Pronto Yehova lo kaba ku tur mentira i gañadó.—Revelashon 21:8.

Lo ta ki un alivio ora ku por fin e “lepnan ku ta papia bèrdat” keda establesí pa semper!

[Nota]

[Komentario na página 5]

Golosidat i ambishon egoista ta loke ta motivá hopi hende pa gaña

[Komentario na página 6]

Ki ora ku bo gaña bo no a papia bèrdat, pero no ta tur biaha ku bo no papia bèrdat bo a gaña

[Plachi na página 6]

Kiko nos ta siña dje echo ku Pedro a nenga Kristu?

[Plachi na página 7]

Papiamentu di bèrdat ta resultá den relashonnan stabil i satisfasiente