Hóben​—Kiko Lo Bo Hasi ku Bo Bida?

“Mi no ta bòks manera un hende ku ta dal den bashí.”​—1 KOR. 9:26.

1, 2. Kiko bo mester tin pa logra éksito den bida segun ku bo ta bira adulto?

SI BO ta bai hasi un biahe via un ruta ku ta deskonosí pa bo, probablemente lo bo bai ku un mapa i un kompas. Dikon? Pasobra e mapa lo yuda bo saka afó unda bo ta pará awor i plania e ruta korekto. I e kompas por yuda bo keda riba e kaminda korekto. Sinembargo, e mapa i e kompas lo no yuda bo si bo no tin un destinashon. P’esei, pa evitá ku bo ta kana dual sin rumbo, bo mester sa presis unda bo ke bai.

² Komo hóben, bo ta den un situashon similar pasobra bo ta riba kaminda pa bira adulto. I bo tambe tin un mapa konfiabel i un kompas na bo disposishon. Sí, Beibel ta un mapa ku por yuda bo skohe e kaminda korekto. (Pro. 3:​5, 6) I si bo konsenshi ta bon entrená, meskos ku un kompas, e por ta un gran yudansa pa bo por keda riba e kaminda korekto. (Rom. 2:15) Pero, pa bo por tin éksito den bida, bo mester sa tambe kiko bo ke logra. Pues, ta importante pa bo tin metanan spesífiko.

 3. Segun Pablo su palabranan na 1 Korintionan 9:26, kiko ta e benefisionan di pone meta?

³ Apòstel Pablo a resumí e benefisionan di pone meta i hasi esfuerso pa logra nan, ora el a skirbí: “Mi no ta kore [“na un manera insigur,” NW] manera un hende sin meta; mi no ta bòks manera un hende ku ta dal den bashí.” (1 Kor. 9:26) Pues, si bo tin meta, bo por kore ku konfiansa. Pronto lo bo tin ku tuma algun desishon importante relashoná ku asuntunan manera adorashon, trabou, matrimonio i famia. Tin biaha, bo por sinti ku ta difísil pa skohe entre tur e opshonnan ku bo tin. Pero si bo plania di antemano loke bo ke logra i basa bo desishonnan riba e bèrdat- i prinsipionan di e Palabra di Dios, lo bo no haña gana di bai den e direkshon robes.​—2 Tim. 4:​4, 5.

4, 5. (a) Kiko por sosodé si abo mes no ta pone meta? (b) Dikon un deseo pa agradá Dios mester influensiá bo desishonnan?

⁴ Si abo mes no ta pone meta, bo pareunan i bo maestronan probablemente lo influensiá bo pa hasi loke nan ta kere ku ta bon pa bo. I asta ora bo tin meta spesífiko kaba, otronan por bin ku nan opinion i sugerensianan. Pero, ora bo skucha nan, puntra bo mes: ‘E metanan ei lo yuda mi kòrda riba mi Kreador awor ku mi ta yòn òf nan lo stroba mi di hasi esei?’​—Lesa Eklesiastés 12:1.

⁵ Dikon un deseo pa agradá Dios mester influensiá bo desishonnan? Un motibu ta ku Yehova a duna nos tur e bon kosnan ku nos tin. (Sant. 1:17) P’esei, tur hende mester ta gradisidu na Yehova. (Rev. 4:11) I kon abo por mustra bo gratitut na Yehova? E mihó manera ku bo por hasi esei ta di tene kuenta ku Yehova su punto di bista ora bo ta pone meta. Awor laga nos konsiderá ki metanan ta bale la pena i kiko bo mester hasi pa logra nan.

Ki Metanan Bo Por Pone?

 6. Ki meta importante bo por pone, i dikon?

⁶ Manera e artíkulo anterior a menshoná, un meta importante ku bo por pone ta pa komprobá pa bo mes ku loke Beibel ta bisa ta bèrdat. (Rom. 12:2; 2 Kor. 13:5) Kisas bo pareunan ta kere den evolushon òf den vários doktrina religioso falsu, pasobra otro hende a bisa nan ku ta esei nan tin ku kere. Sinembargo, abo sí no tin nodi di kere algu djis pasobra otro hende ke pa bo kere esei. Kòrda ku Yehova ke pa bo sirbié ku henter bo mente. (Lesa Mateo 22:​36 i 37.) Nos Tata selestial ke pa nos basa nos fe riba e bèrdatnan ku Beibel ta kontené.​—Heb. 11:1.

7, 8. (a) Ki metanan di término kòrtiku lo yuda bo fortalesé bo fe? (b) Kiko lo bo eksperensiá segun ku bo ta logra algun di bo metanan di término kòrtiku?

⁷ Pa por fortalesé bo fe, pakiko no pone algun meta di término kòrtiku? Un meta ku bo por pone ta pa hasi orashon tur dia. Pa yuda bo hasi orashon spesífiko i no keda ripití e mesun kosnan, bo por skirbí òf keda kòrda kosnan ku a pasa durante dia ku bo ke inkluí den bo orashon. Pero, ta bon pa no menshoná solamente e kosnan difísil ku bo a pasa aden sino tambe e bon kosnan ku bo a disfrutá di dje. (Fil. 4:6) Un otro meta ku bo por pone ta pa lesa Beibel tur dia. Bo tabata sa ku si bo lesa mas o ménos kuater página pa dia, lo bo kompletá henter e Beibel den un aña?a Salmo 1:​1 i 2 ta bisa: “Bendishoná ta e hende. . . [kende] su delisia ta den e lei di SEÑOR, i den Su lei e ta meditá di dia i anochi.”

⁸ E di tres meta di término kòrtiku ku bo por pone ta pa prepará un komentario pa kada reunion di kongregashon. Pa kuminsá, bo por lesa e kontestá òf lesa un teksto di Beibel. Ku tempu, bo por pone e meta pa kontestá ku bo mes palabranan. De echo, kada biaha ku bo kontestá, bo ta duna Yehova un regalo. (Heb. 13:15) Unabes, bo a logra algun di e metanan akí, lo bo haña mas konfiansa, mas apresio pa Yehova, i lo bo ta kla pa pone metanan di término largu.

 9. Si bo no ta un publikadó di Reino ainda, ki meta di término largu bo por pone?

⁹ Ki metanan di término largu bo por pone? Si ainda bo no ta un publikadó di Reino, bo por pone esei komo un meta. Unabes, bo a logra e meta, òf privilegio akí, ta bon pa bo hasi esfuerso pa bo ta regular i efikas den sirbishi i no laga ningun luna pasa sin ku bo a prediká. Ademas, ta bon pa bo siña usa bo Beibel den e ministerio. Segun ku bo ta hasi esei, lo bo ripará ku bo ta disfrutá mas di e trabou di prediká. Despues di esei, bo por oumentá e kantidat di tempu ku bo ta dediká na e trabou di kas pa kas òf asta hasi esfuerso pa kondusí un estudio di Beibel. I kua ta e meta di mas importante ku un publikadó no-batisá por pone? Sí, e meta pa kualifiká pa boutismo i bira un Testigu di Yehova dediká i batisá.

10, 11. Ki metanan di término largu hóbennan batisá por pone?

¹⁰ Si bo ta un sirbidó di Yehova batisá, bo por hasi esfuerso pa alkansá e siguiente metanan di término largu. Por ehèmpel, de bes en kuando, bo por yuda kongregashonnan prediká den teritorionan ku no ta ser trahá frekuentemente. Bo por skohe tambe pa usa bo forsa i vigor den e trabou di pionero ousiliar òf regular. Míles di pionero felis lo por bisa bo ku e sirbishi di tempu kompletu ta un manera plasentero pa kòrda bo Kreador durante bo hubentut. Esakinan ta meta ku bo por logra miéntras bo ta biba serka bo mayornan. Bo kongregashon tambe lo benefisiá ora bo alkansá e metanan akí.

¹¹ Tin otro metanan di término largu ku bo por pone ku por benefisiá otronan fuera di bo kongregashon. Por ehèmpel, bo por plania pa bai sirbi den un otro área òf pais kaminda tin mas nesesidat. Podisé bo por bai yuda den konstrukshon di Salònnan di Reino òf sukursal den estranheria. Kisas bo por asta bai sirbi na Bètel òf sirbi komo misionero. Klaru ku e meta di mas importante ku bo tin ku alkansá ta boutismo. Despues di esei, bo por pone e otro metanan di término largu ku a ser menshoná. Si bo no a batisá ainda, ta bon pa bo konsiderá kon bo por alkansá e meta importante ei.

Kon Bo Por Alkansá e Meta di Boutismo?

12. Pakiko algun hende ta batisá, i dikon e motibunan akí no ta korekto?

¹² Segun bo, kiko ta e propósito di boutismo? Algun hende ta pensa ku boutismo ta sirbi komo un frena kontra piká. Otronan kisas ta haña ku nan mester batisá pasobra nan pareunan ta batisá. Tin otro hóbennan ke batisá pa hasi nan mayornan kontentu. Sinembargo, boutismo no ta un kontrakt ku ta frená bo di hasi kosnan malu ku lo bo tin gana di hasi den sekreto. Bo no mester batisá tampoko pasobra otro hende ta pone preshon riba bo. Mas bien, bo mester batisá ora bo ta bon konsiente kiko ser un Testigu di Yehova ta enserá i ora bo ta kla i dispuesto pa karga e responsabilidat ei.​—Ekl. 5:​4, 5.

13. Dikon bo mester batisá?

¹³ Un motibu pakiko bo mester batisá ta pasobra Hesus a manda su siguidónan ‘hasi hende disipel i batisá’ nan. Ademas, e mes a batisá, poniendo un ehèmpel pa nan. (Lesa Mateo 28:​19 i 20; Marko 1:9.) Es mas, boutismo ta un paso importante pa esnan ku ke haña salbashon. Despues ku apòstel Pedro a menshoná e konstrukshon di e arka den kua Noe i su famia a skapa e Diluvio, el a bisa: “I korespondiendo na esei, boutismo awor ta salba boso.  . . pa medio di e resurekshon di Hesukristu.” (1 Ped. 3:​20, 21) Ma esaki no ta nifiká ku boutismo ta manera un pólisa di seguro ku bo ta sera pa por si akaso surgi un desaster. Mas bien, bo ta batisá pasobra bo ta stima Yehova i ke sirbié ku henter bo kurason, alma, mente i ku tur bo forsa.​—Mar. 12:​29, 30.

14. Dikon algun hóben no ke dal e paso di boutismo, pero ki konfiansa bo por tin?

¹⁴ Tin hóben no ke dal e paso di boutismo pasobra nan tin miedu ku nan por ser ekspulsá despues. Abo tin e miedu akí? Si esei ta e kaso, e miedu ei riba su mes no nesesariamente ta malu, pasobra e por nifiká ku bo ta komprondé ku ser un Testigu di Yehova ta un responsabilidat serio. Pero kiko por ta un otro motibu ku bo tin miedu? Kisas bo no ta konvensí ainda ku biba na armonia ku e normanan di Dios ta e mihó manera pa biba. Si ta asina, pensa riba e konsekuensianan ku esnan ku ta ignorá normanan bíbliko ta sufri. Esei lo yuda bo tuma un desishon. Di otro banda, kisas bo ta stima e normanan di Dios, pero bo no tin sigur ku bo por kumpli ku nan tur. En realidat, esei ta un bon señal, pasobra e ta mustra ku bo ta humilde. Al fin i al kabo, Beibel ta bisa ku kurason di tur hende imperfekto ta traishonero. (Jer. 17:9) Pero, si konstantemente bo ta ‘mantené bo mes alerta segun e Palabra di Dios,’ bo por tin éksito. (Lesa Salmo 119:9.) Sea kual sea e motibunan pakiko bo no ke batisá, ta bon pa bo analisá nan i trata di eliminá nan.b

15, 16. Kon bo por sa ku bo ta kla pa batisá?

¹⁵ Pero kon bo por sa ku bo ta kla pa batisá? Un manera ku bo por sa esei ta hasiendo bo mes pregunta manera esnan siguiente: ‘Mi por splika siñansanan básiko di Beibel na otro hende? Mi ta bai sirbishi asta riba e dianan ku mi mayornan no ta bai? Mi ta hasi esfuerso pa bai tur reunion kristian? Mi por kòrda okashonnan spesífiko ku mi a resistí preshon di mi pareunan? Lo mi sigui sirbi Yehova asta si mi mayor- i amigunan stòp di hasi esei? Den mi orashonnan, mi a bisa Yehova kon importante mi relashon kuné ta pa mi? I mi a hasi orashon i dediká mi mes sin reserva na Yehova?’

¹⁶ Boutismo ta kambia bo bida. P’esei, bo tin ku pensa bon promé ku bo dal e paso ei. Bo ta sufisiente maduro pa hasi esei? Ser maduro ta enserá mas ku djis duna bon parti òf duna kontesta impreshonante durante reunion. Un persona maduro mester ta kapas pa tuma desishon a base di su komprondementu di prinsipionan bíbliko. (Lesa Hebreonan 5:14.) Si abo a yega asina leu ku bo por hasi esei, bo por logra e mayor privilegio, esta, e onor di por sirbi Yehova di henter bo kurason i biba di tal manera ku ta demostrá ku bo a dediká bo mes kompletamente na dje.

17. Kiko por yuda bo trata ku pruebanan ku por surgi despues di bo boutismo?

¹⁷ Ora bo kaba di batisá, probablemente lo bo ta masha entusiasmá pa sirbi Dios. Pero djis despues di esei, bo por konfrontá situashonnan ku ta pone bo fe i perseveransia na prueba. (2 Tim. 3:12) No pensa ku bo no tin yudansa pa trata ku e pruebanan ei. Mas bien, buska konseho serka bo mayornan. Pidi rumannan den kongregashon ku tin mas eksperensia yuda bo. Sera amistat ku rumannan ku por apoyá bo. I nunka lubidá ku Yehova ta interesá den bo, i ku lo e duna bo e fortalesa nesesario pa enfrentá kualke situashon ku por surgi.​—1 Ped. 5:​6, 7.

Kon Bo Por Logra Bo Metanan?

18, 19. Kon un análisis di bo prioridatnan lo benefisiá bo?

¹⁸ Apesar di bo bon intenshon, ta parse ku nunka bo tin sufisiente tempu pa hasi e kosnan ku bo ke i esnan ku bo tin ku hasi? Si esei ta e kaso, bo tin ku analisá bo prioridatnan. Laga nos ilustrá esaki: Imaginá ku bo ta kohe un hèmber di plèstik i yena vários piedra grandi den dje. Despues, bo ta yen’é ku santu. Awor bo tin un hèmber yen di piedra i santu. Saka tur e santu i piedranan for di e hèmber. Kaba, yena e hèmber atrobe ku e mesun kantidat di piedra i santu. Pero e biaha akí, bo ta yena e santu promé, i despues purba hinka tur e piedranan aden. Kiko bo ta ripará? No tin sufisiente lugá pa hinka tur e piedranan, pasobra bo a yena e santu promé.

¹⁹ Bo tambe por haña bo ku e mesun problema akí debí na e manera ku bo ta usa bo tempu. Si bo ta pone kosnan manera rekreo na promé lugá, lo parse ku nunka bo tin sufisiente tempu pa e kosnan mas importante, esta, aktividatnan relashoná ku bo sirbishi na Dios. Pero si bo ta sigui e konseho di Beibel pa “hasi sigur di e kosnan mas importante,” lo bo ripará ku bo tin tempu pa sirbi Dios i pa asta rekreá de bes en kuando.​—Fil. 1:10, NW.

20. Kiko bo mester hasi si bo tin algun ansiedat i duda segun ku bo ta hasi esfuerso pa logra bo metanan?

²⁰ Segun ku bo ta hasi esfuerso pa logra bo metanan, inkluso esun di boutismo, bo por tin algun ansiedat i duda. Ora esei ta e kaso, ‘tira bo karga riba Yehova, i e lo sostené bo.’ (Sal. 55:22) Awor bo tin chèns di partisipá den e trabou di mas interesante i importante den historia humano, esta, un kampaña mundial di prediká i di siña hende. (Echo. 1:8) Bo por skohe pa para un banda i wak otronan hasi e trabou akí òf bo por partisipá aktivamente den dje. Skohe pa usa bo abilidatnan pa sirbi Yehova i apoyá su Reino. Nunka lo bo lamentá ku bo a sirbi “bo Kreador den e dianan di bo hubentut.”​—Ekl. 12:1.

[Nota]

Kon Lo Bo Kontestá?

• Dikon bo tin ku pone meta?

• Menshoná algun meta ku ta bale la pena.

• Kiko por yuda bo alkansá e meta di boutismo?

• Kon un análisis di bo prioridatnan por yuda bo logra bo metanan?

[Plachi na página 20]

Bo tin e meta pa lesa Beibel tur dia?

[Plachi na página 22]

Kiko lo yuda bo alkansá e meta di boutismo?

[Plachi na página 23]

Ki lès bo ta siña for di e ilustrashon akí?