Kon pa Alkansá Bo Metanan Spiritual
1 Komo un hóben kristian, sin duda bo metanan den bida tin hopi di haber ku bo amor pa Yehova i Hesus su palabranan pa “buska promé e Reino.” (Mat. 6:33) Kisas bo tin e meta pa ekspandé bo sirbishi dor di traha komo pionero òf sirbi kaminda tin mas nesesidat pa proklamadó di Reino. Podisé algun hóben ta pensa di traha komo boluntario den e obra internashonal di konstrukshon, sirbi na un sukursal òf komo misionero. Esakinan ta metanan masha atmirabel i ku ta duna hopi satisfakshon.
2 Algu ku por yuda bo alkansá bo metanan ta di pone nan riba papel. E Toren di Vigilansia di 15 di yüli 2004 a bisa: “Un idea vago ta bira mas kla i ta haña mas forma ora [bo] ekspres’é ku palabra. P’esei, [lo bo] ke pone [bo] metanan i tambe e strategia pa alkansá nan riba papel.” Ademas, metanan di término kòrtiku por yuda bo evaluá bo progreso i keda konsentrá bo esfuersonan pa alkansá un meta di término largu.
3 Metanan di Término Kòrtiku: Si bo no a batisá ainda, pensa riba loke bo tin ku hasi pa por alkansá e meta ei. Podisé bo tin mester di un mihó komprondementu di siñansanan básiko di Beibel. Si esei ta e kaso, pone komo bo meta pa studia a fondo e buki Beibel Ta Siña i buska tur e tekstonan ku ta ser menshoná. (1 Tim. 4:15) Pone komo bo meta tambe pa lesa henter e Beibel, di Génesis te ku Revelashon, manera ta ser rekerí di bètelita- i studiantenan di Galaad. Despues di esei, mantené un programa regular di lesa Beibel diariamente. (Sal. 1:2, 3) Imaginá bo kon esei lo yuda bo krese spiritualmente! Habri i sera kada seshon di lesamentu i di estudio di Beibel ku orashon sinsero, i semper hasi esfuerso pa apliká loke bo ta siña.—Sant. 1:25.
4 Si bo ta batisá kaba, ki otro metanan bo por purba alkansá? Bo tin ku mehorá bo abilidatnan di prediká? Por ehèmpel, bo por pone komo meta pa bira mas ábil den usa e Palabra di Dios den sirbishi di vèlt? (2 Tim. 2:15) Kon lo bo por ekspandé bo sirbishi? Pone metanan spesífiko di término kòrtiku ku ta kuadra ku bo edat i sirkunstansia, i ku lo yuda bo alkansá bo metanan di término largu.
5 Ehèmpel di Éksito: Tempu ku Tony di 19 aña a bishitá un sukursal di Testigunan di Yehova, el a kuminsá sinti un deseo pa sirbi na Bètel. Sin embargo, e no tabata masha bon mucha, i e no a ni dediká su mes na Dios. Tony a disidí di armonisá su bida ku e kamindanan di Yehova i a pone e meta p’e kualifiká pa boutismo. Despues ku el a alkansá e meta ei, el a pone e meta pa sirbi komo pionero ousiliar i despues regular. I el a nota e fechanan ku e kier a kuminsá hasi esakinan riba su kalènder. Bo por imaginá bo kon kontentu el a keda ora ku despues ku e tabatin algun tempu ta sirbi komo pionero, el a haña invitashon pa bai sirbi na Bètel?
6 Bo tambe por alkansá bo metanan spiritual segun ku bo ta pone e interesnan di Reino na promé lugá. Pone “bo obranan” dilanti Yehova den orashon i hasi esfuerso diligente pa alkansá nan.—Pro. 16:3; 21:5.
[Study Questions]
1. Ki metanan spiritual hopi hóben kristian tin?
2. Kiko por yuda bo alkansá bo metanan spiritual?
3. Menshoná algun meta di término kòrtiku ku por yuda un persona kualifiká pa boutismo.
4. Un kristian ku tin e meta di término largu pa drenta sirbishi di Bètel òf di misionero por pone kua metanan di término kòrtiku?
5. Kon metanan di término kòrtiku a yuda un ruman hòmber alkansá su meta di sirbi na Bètel?
6. Kiko por yuda bo alkansá bo metanan spiritual?