Tene Kurashi​—Yehova Ta ku Bo!

1, 2. (a) Ki kualidatnan lo yuda nos enfrentá prueba ku éksito? (b) Kon lo bo definí fe? Ilustrá esei.

NOS ta haña hopi goso den nos sirbishi na Yehova. Pero, meskos ku tur otro hende, nos tambe ta haña nos ku difikultat den bida i kisas ta “sufri pa kousa di hustisia.” (1 Ped. 3:14; 5:8, 9; 1 Kor. 10:13) Pa nos por enfrentá e pruebanan ei ku éksito, nos tin mester di fe i kurashi.

² Kiko ta fe? Apòstel Pablo a skirbi: “Fe ta e konfiansa firme ku hende tin ku loke nan ta spera ariba lo keda realisá, e demostrashon kla di realidatnan ku nan no ta mira.” (Heb. 11:1) E palabra griego tradusí komo “konfiansa firme” tabata aparesé hopi biaha den dokumentonan di negoshi i a transmití e idea di un garantia di algu ku un hende lo a haña den futuro. Di igual manera, hende ku tin fe ku Dios lo kumpli ku su promesanan tin e garantia ku nan lo risibí loke nan ta spera. Nos fe ta duna nos e konvikshon ku loke Dios a primintí lo kumpli sigur i ku tur loke e ta bisa nos den su Palabra ta bèrdat, asta e kosnan ku nos ‘no por mira.’

3, 4. (a) Kiko ta kurashi? (b) Kiko por yuda nos haña mas fe i kurashi?

³ Kurashi ta e forsa pa papia i aktua sin miedu ora nos ta den situashonnan difísil i peligroso. Si nos tin kurashi, nos lo ta balente, sigur di nos mes i asta dispuesto pa sufri pa nos kreensianan.—Mar. 6:49, 50; 2 Tim. 1:7.

⁴ Fe i kurashi ta kualidatnan masha deseabel. Awor, kiko nos por hasi si nos sinti ku nos tin mester di mas fe i kurashi? Wèl, Beibel ta papia di míles di sirbidó di Dios ku a manifestá e kualidatnan akí i ku ta sirbi komo un bon ehèmpel pa nos. Laga nos analisá algun di e ehèmpelnan akí i mira kon nan por yuda nos haña mas fe i kurashi.

 5. Pa Hosue por tabata un bon lider, kiko e tabatin mester?

⁵ Laga nos bai bèk un 3.500 aña den historia. Kuarenta aña a pasa desde ku Yehova a usa su man poderoso pa libra miónes di israelita for di sklabitut na Egipto. Profeta Moises tabata nan lider. E tabatin 120 aña dia el a subi Seru Nebo i a para mira e Tera Primintí djaleu. El a muri einan riba tòp di e seru. Su susesor tabata Hosue, un hòmber “yen di e spiritu di sabiduria.” (Deu. 34:1-9) E israelitanan tabata kla pa konkistá e tera di Kanan. Pa Hosue por a sirbi komo un bon lider pa nan, e tabatin mester di e sabiduria di Dios. Tambe e mester a pone fe den Yehova, ser fuerte i tene kurashi.—Deu. 31:22, 23.

 6. (a) Segun Hosue 23:6, nos mester di kurashi pa hasi kiko? (b) Kiko nos ta siña for di e palabranan di Echonan 4:18-20 i Echonan 5:29?

⁶ E sabiduria, kurashi i fe ku Hosue a demostrá durante e tempu largu ku nan a bringa pa konkistá Kanan lo mester a fortalesé e israelitanan. Ma nan tabatin mester di kurashi no solamente pa bringa den bataya sino tambe pa obedesé Dios. Djis promé ku Hosue a muri, el a bisa nan den su diskurso di despedida: “Sea masha firme anto [òf, “tene kurashi,” NW] pa warda i hasi tur loke ta pará skirbí den e buki di lei di Moises, pa boso no bira bai for di dje ni na man drechi ni na man robes.” (Hos. 23:6) Nos tambe mester tin e kurashi pa obedesé Yehova na tur momento, inkluso ora hende manda nos hasi algu ku ta bai kontra di e boluntat di Dios. (Lesa Echonan 4:18-20; 5:29.) Si nos konfia den Yehova i pidi su guia, lo e yuda nos para firme ku kurashi.

 7. Pa Hosue por a aktua ku kurashi i logra éksito, kiko e mester a hasi?

⁷ Pa nos por tin e kurashi pa hasi e boluntat di Dios, nos tin ku studia Su Palabra i pon’é na práktika. Esei ta loke Yehova a bisa Hosue hasi ora el a bira susesor di Moises: “Sea fuerte i tene hopi kurashi; perkurá di hasi konforme henter e lei ku mi sirbidó Moises a ordená bo . . . E buki di lei akí lo no apartá for di bo boka, ma bo mester meditá den dje di dia i anochi, pa bo perkurá di hasi konforme tur loke ta pará skirbí den dje; pasobra e ora ei lo bo hasi bo kaminda prosperá, i e ora ei lo bo tin éksito.” (Hos. 1:7, 8) Hosue tabatin éksito pasobra el a sigui e konseho ei. Si nos hasi meskos, nos tambe lo tin mas kurashi i éksito den e sirbishi di Dios.

 8. Kiko ta e teksto di aña pa 2013, i kon bo ta kere ku e palabranan ei lo yuda bo?

⁸ Hosue lo mester a haña hopi mas konfiansa pa kumpli ku su asignashon ora ku el a tende loke Yehova a sigui bis’é: “Sea fuerte i tene kurashi! No tembla ni desmayá, pasobra SEÑOR [Yehova] bo Dios ta ku bo unda ku bo bai.” (Hos. 1:9) Yehova ta ku nos tambe. Pues, no ta importá ki prueba nos haña nos kuné; nos no tin nodi di tene miedu. Spesialmente e palabranan akí ta importante pa nos: ‘Sea fuerte i tene kurashi! . . . Yehova bo Dios ta ku bo.’ E palabranan ei di Hosue 1:9 a keda skohé komo e teksto di aña pa 2013. Nan lo fortalesé nos sigur den e lunanan binidero, huntu ku e ehèmpel di otro personanan ku a demostrá fe i kurashi tantu ku palabra komo ku akshon.

 9. Den ki manera Rahab a demostrá fe i kurashi?

⁹ Ora Hosue a manda dos hòmber bai spioná e tera di Kanan, e prostituta Rahab a skonde nan i desviá nan enemigunan. Pa e fe i kurashi ku el a demostrá, e ku su famia a skapa ora ku e israelitanan a konkistá e stat Yériko. (Heb. 11:30, 31; Sant. 2:25) Naturalmente, Rahab a bandoná su bida inmoral pa e por a agradá Yehova. Tin hende ku a bira kristian ku tambe tabatin e fe, kurashi i fortalesa moral nesesario pa hasi kambionan similar pa agradá Dios.

10. Den ki situashon Rut a skohe pa adorashon berdadero, i esei a resultá den ki bendishon p’e?

¹⁰ Rut, e moabita, a biba despues di Hosue, i ku kurashi e tambe a skohe pa adorashon berdadero. Komo biuda di un israelita, probablemente e tabata sa algu di Yehova. Su suegra Noemí tabata biba na Moab i e tambe tabata biuda, ma el a disidí di bai bèk Israel pa biba na Bètlehèm. Na kaminda, Noemí a urgi Rut pa bai bèk serka su hendenan, ma e mucha muhé moabita a kontest’é: “No keda insistí pa mi bai laga bo, ni kita mi di sigui bo . . . Bo pueblo lo ta mi pueblo, i bo Dios, mi Dios.” (Rut 1:16) Anto Rut a para tras di su palabranan. Ku tempu, Boas, un famia di Noemí, a kasa ku Rut. Rut a haña un yu hòmber i a bira un antepasado di David i Hesus. Ta bisto ku Yehova ta bendishoná hende ku demostrá fe i kurashi.—Rut 2:12; 4:17-22; Mat. 1:1-6.

11. Kon Joiada i Josaba a demostrá kurashi, i kiko nan a logra ku nan akshon?

¹¹ Nos ta haña mas fe i kurashi ora nos mira ku Dios ta ku esnan ku ta riska nan bida pa hasi su boluntat i pa protehá nan rumannan. Tuma, por ehèmpel, Sumo Saserdote Joiada i su kasá, Josaba. Despues ku Rei Okozias a muri, su mama Atalía a mata tur e yunan di e rei, ku eksepshon di Joas, i a koroná su mes komo reina. Joiada i Josaba a riska nan bida pa skapa Joas, yu hòmber di Okozias, i a ten’é skondí seis aña largu. Den e di shete aña, Joiada a proklamá Joas komo rei i a duna òrdu pa mata Atalía. (2 Rei. 11:1-16) Mas despues, Joiada a yuda Rei Joas drecha e tèmpel. Ora Joiada a muri na edat di 130 aña, nan a der’é entre e reinan “pasobra el a hasi loke ta bon den Israel i na Dios i Su kas.” (2 Kró. 24:15, 16) Es mas, ta pasobra Joiada ku su kasá a aktua ku kurashi, e liña di famia real di David a keda konserbá te na e Mesías.

12. Kon Ebed-melek a demostrá kurashi?

¹² Ebed-melek, un eunuko den e kas di Rei Sedekias, a riska su bida pa profeta Yeremías. E rei a entregá Yeremías den man di e prensnan di Huda, kendenan a akus’é falsamente di a desanimá e sòldánan i henter e pueblo. E prensnan a tir’é den un renbak yen di lodo i a bai lag’é ei den pa e muri. (Yer. 38:4-6) Ebed-melek a bai serka Rei Sedekias i a suplik’é pa yuda e profeta. Loke Ebed-melek a hasi tabata peligroso, ya ku hopi hende tabata odia Yeremías. Pero Sedekias a bai di akuerdo pa yud’é i a bisa Ebed-melek pa bai ku 30 hòmber i saka Yeremías for di e renbak. Mediante Yeremías mes, Dios a sigurá Ebed-melek ku lo e no pèrdè su bida ora Babilonia ataká Herúsalèm. (Yer. 39:15-18) Dios ta rekompensá hende ku demostrá kurashi pa hasi su boluntat.

13. Kon e tres hebreonan a demostrá kurashi, i kiko nos por siña for di nan eksperensia?

¹³ Un 600 aña promé ku Kristu, tres sirbidó hebreo di Yehova a proba klaramente ku Dios ta rekompensá hende ku demostrá fe i kurashi. Rei Nabukodonosor a reuní tur e dignatarionan di Babilonia i a eksigí pa nan adorá un imágen gigante di oro. Ken ku no a hasi esei lo a muri den un fòrnu di kandela. Ku tur rèspèt e tres hebreonan a bisa Nabukodonosor: “Nos Dios, kende nos ta sirbi, por libra nos for di e fòrnu di kandela kayente kayente, i e lo libra nos for di bo man, o rei. Ma asta si e no hasi esei, sea sigur, o rei, ku nos no ta bai sirbi bo diosnan, ni adorá e imágen di oro ku bo a lanta.” (Dan. 3:16-18) Na Daniel 3:19-30, nos por lesa e relato emoshonante di e manera ku Yehova a salba e tres hebreonan. Aunke no ta probabel ku nos lo ser menasá ku morto den un fòrnu di kandela, tin biaha nos ta haña nos ta obedesé Dios den situashonnan masha difísil. Pero nos por tin sigur ku Dios lo bendishoná nos si nos demostrá fe i kurashi.

14. Segun Daniel kapítulo 6, kon Daniel a aktua ku kurashi, i kiko tabata e resultado?

¹⁴ Daniel tambe a demostrá fe i kurashi den un situashon difísil. Su enemigunan a konvensé Rei Darío pa saka e dekreto ku “esun ku durante di trinta dia hasi un petishon na kualke dios òf hende fuera di bo, o rei, lo wòrdu tirá den kueba di leon.” Asina ku “Daniel a haña sa ku e dokumento a wòrdu firmá, el a bai den su kas (awor den su kamber ariba e tabatin bentananan habrí den direkshon di Herúsalèm); i el a sigui hinka rudia tres biaha pa dia, i a hasi orashon i a duna gradisimentu dilanti di su Dios, manera e tabata hasi anteriormente.” (Dan. 6:6-10) Nan a tira Daniel den un kueba di leon, pero Yehova a libr’é!—Dan. 6:16-23.

15. (a) Kon Akila ku Priskila a demostrá fe i kurashi? (b) Kiko e palabranan di Hesus na Huan 13:34 ta nifiká, i kon hopi kristian a demostrá e tipo di amor ei?

¹⁵ Beibel ta bisa ku Akila i Priskila ‘a riska nan bida pa Pablo,’ aunke e no ta menshoná bou di ki sirkunstansia nan a hasié. (Echo. 18:2; Rom. 16:3, 4) Ku kurashi nan aktua na armonia ku e siguiente palabranan di Hesus: “Mi ta duna boso un mandamentu nobo: stima otro; meskos ku ami a stima boso, boso tambe stima otro.” (Huan 13:34) Lei di Moises tabata rekerí pa un persona stima su próhimo meskos ku el a stima su mes. (Lev. 19:18) Pues, dikon Hesus a bisa ku su mandamentu tabata “nobo”? Pasobra el a deskribí un amor ku lo a bai mas leu: Nos mester ta dispuesto pa muri pa otro hende, meskos ku é a hasi. Hopi kristian a demostrá amor i kurashi ora nan a “riska nan bida” pa evitá ku nan rumannan ta sufri trato kruel òf ta muri na man di enemigu.—Lesa 1 Huan 3:16.

16, 17. Kon e fe di algun di e promé kristiannan a ser poné na prueba, i kon algun kristian den nos tempu a eksperensiá e mesun tipo di prueba?

¹⁶ Ku kurashi e promé kristiannan, meskos ku Hesus, a adorá Yehova so. (Mat. 4:8-10) Nan a nenga di kima sensia na onor di emperador romano. (Wak e plachi.) Daniel P. Mannix a skirbi den su buki Those About to Die (Esnan a Punto di Muri): “Masha poko kristian a renunsiá nan fe, aunke nan lo por a hasi esei fásilmente, pasobra normalmente tabatin un altar ku un kandela sendé den e arena di e stadion, i e úniko kos ku e prizonero mester a hasi ta tira un tiki sensia den e kandela. Ku esei, nan lo a dun’é un Sertifikado di Sakrifisio i lag’é liber. Tambe nan tabata splik’é bon kla ku esaki no tabata un akto di adorá emperador, sino djis un akto pa rekonosé e naturalesa divino di emperador komo kabes di e estado romano. Pero kasi ningun kristian no a hasi uso di e oportunidat akí pa skapa di morto.”

¹⁷ Kristiannan di nos tempu ku tabata prezu den kampo di konsentrashon nazi tambe tabata haña vários oportunidat pa sali liber i evitá pena di morto. Nan mester a djis firma un deklarashon den kua nan ta nenga Yehova. Pero masha poko a firma esei. Durante e genosidio na Ruanda poko tempu pasá, Testigunan di Yehova tutsi i hutu a riska nan bida pa protehá otro. E pueblo di Dios tin mester di kurashi i fe ora nan ta konfrontá e tipo di pruebanan ei.

18, 19. Menshoná algun ehèmpel bíbliko di fe i kurashi ku por yuda nos kumpli ku nos trabou di prediká.

¹⁸ Awe nos tin e privilegio di partisipá den e trabou di mas grandi ku Dios a yega di konfia su sirbidónan riba tera kuné, esta, prediká tokante e Reino i hasi disipel. (Mat. 24:14; 28:19, 20) Esta gradisidu nos ta pa e ehèmpel sin igual ku Hesus a laga pa nos! “Hesus a kuminsá biaha di stat pa stat i di pueblito pa pueblito, predikando i anunsiando e bon notisia di e Reino di Dios.” (Luk. 8:1) Meskos kuné, nos tin mester di fe i kurashi pa nos por prediká e mensahe di e Reino. Ku Dios su yudansa, nos por tin e mesun kurashi ku Noe. E tabata “un predikadó di hustisia” den “un mundu di hende malbado” ku tabata a punto di ser destruí den un diluvio mundial.—2 Ped. 2:4, 5.

¹⁹ Orashon ta yuda nos kumpli ku e trabou di prediká. Ora algun siguidó di Kristu ku tabata ser persiguí a pidi Dios yuda nan pa nan por a ‘deklará su palabra ku kurashi,’ Dios a kontestá nan súplika. (Lesa Echonan 4:29-31.) Si bo tin un poko miedu di prediká di kas pa kas, pidi Yehova duna bo mas fe i kurashi, i lo e yuda bo.—Lesa Salmo 66:19, 20.a

20. Komo sirbidónan di Yehova, ki apoyo nos tin?

²⁰ No ta fásil pa sigui hasi e boluntat di Dios ora nos ta konfrontá prueba den e mundu malbado i yen di problema akí. Pero nos no ta nos so. Dios ta ku nos. Su Yu, ku ta Kabes di e kongregashon, tambe ta ku nos. Ademas, nos tin mas ku 7.000.000 kompañero Testigu di Yehova rònt mundu. Laga nos tur huntu sigui demostrá fe i deklará e bon notisia, teniendo na mente nos teksto di aña 2013: ‘Sea fuerte i tene kurashi! . . . Yehova bo Dios ta ku bo.’—Hos. 1:9.