Moises—Un Hòmber di Fe

Segun Beibel, “fe” ta enserá konfiansa firme, basá riba evidensia sólido. Un hende ku tin fe den Dios tin konfiansa ku Dios ta kumpli ku tur su promesanan.

Moises a hiba un bida enfoká riba e promesanan di Dios. (Génesis 22:15-18) E por a hiba un bida kómodo meimei di tur e luho di Egipto, pero el a nenga di hasi esei i a “skohe pa ser maltratá huntu ku e pueblo di Dios en bes di gosa di e plasernan pasahero di piká.” (Hebreonan 11:25) Akaso esei tabata un desishon deskabeyá, unu ku lo a duel e despues? Nò, pasobra Beibel ta bisa ku Moises a “sigui firme komo si fuera el a mira Esun ku ta invisibel.” (Hebreonan 11:27) Moises nunka a lamentá e eskohonan ku el a hasi basá riba su fe den Dios su promesanan.

Moises a hasi esfuerso pa fortalesé e fe di otro hende. Por ehèmpel, wak kiko a pasa ora e israelitanan a kere ku nan a keda atrapá entre e ehérsito di Fárao i Laman Kòrá. Morto spantá pa loke a parse un kalamidat inevitabel, e israelitanan a sklama na Yehova i na Moises. Kon Moises lo a reakshoná?

Moises probablemente no tabata sa ku Dios lo a bai parti Laman Kòrá na dos, habriendo un kaminda pa e israelitanan por a skapa. Sinembargo, Moises tabatin konfiansa ku Dios lo a hasi algu pa protehá Su pueblo. I Moises a deseá pa e otro israelitanan tambe tabatin e mesun konvikshon ei. Beibel ta bisa: “Moises a bisa e pueblo: ‘No tene miedu! Para firme i mira e salbashon di SEÑOR ku E lo prepará pa boso awe.’” (Éksodo 14:13) Moises a logra fortalesé fe di e otro israelitanan? Sigur ku sí, pasobra Beibel ta bisa relashoná ku Moises i tur israelita: “Pa medio di fe nan a pasa dor di Laman Kòrá komo si fuera riba tera seku.” (Hebreonan 11:29) E fe ku Moises a demostrá a benefisiá no solamente e mes, sino tambe tur hende ku a mira e importansia di pone fe den Yehova.

Awe, nos tambe, meskos ku Moises, mester hiba un bida enfoká riba e promesanan di Dios. Por ehèmpel, Dios ta primintí nos ku lo e perkurá pa nos nesesidatnan material si nos pone su adorashon na promé lugá den nos bida. (Mateo 6:33) Kisas no ta fásil pa resistí e tendensia di pone kos material na promé lugá, pasobra esei ta loke hopi hende ta hasi awe. Pero nos por ta sigur ku ora nos ta hasi esfuerso pa hiba un bida simpel i enfoká riba nos adorashon, Yehova lo duna nos tur loke nos mester. E ta duna nos e garantia: “Hamas lo mi bandoná bo, i hamas lo mi laga bo desampará.”—Hebreonan 13:5.

Ademas, nos ta hasi esfuerso pa yuda otro hende haña mas fe. Por ehèmpel, mayornan sabí ta realisá ku nan tin un bon oportunidat pa yuda nan yunan haña fe den Dios. Mayornan mester kuminsá siña nan yunan for di un edat hopi yòn ku ta eksistí un Dios i ku el a duna nos su normanan di kiko ta bon i kiko ta malu. Tambe mayornan mester hasi sigur ku nan yunan ta komprondé ku ora nan sigui Dios su normanan, lo bai bon ku nan den bida. (Isaías 48:17, 18) Mayornan ta duna nan yunan un regalo presioso ora nan yuda nan haña fe ku Dios “ta eksistí i ku e ta bira Esun ku ta rekompensá esnan ku ta hasi esfuerso pa busk’é.”—Hebreonan 11:6.