Bo Ta Mira “Esun Ku Ta Invisibel”?

1, 2. (a) Splika pakiko por a parse ku Moises tabata den peliger. (Wak e promé plachi.) (b) Dikon Moises no tabatin miedu di e rabia di e rei?

FÁRAO tabata un gobernante poderoso, i e egipsionan tabata mir’é komo un dios. Den nan bista, el ‘a surpasá tur otro kriatura riba tera den sabiduria i poder,’ segun e buki Tempu Ku Egipto Tabata Goberná Oriente (When Egypt Ruled the East). Pa hinka miedu den su súpditonan, Fárao tabata bisti un korona ku e figura di un kobra kla pa ataká—un atvertensia di ku enemigu di rei lo a keda eliminá mesora. Imaginá bo anto kon Moises lo a sinti su mes ora Yehova a bis’é: “Lo mi manda bo serka Fárao pa bo saka mi pueblo, e yunan di Israel, for di Egipto.”—Éks. 3:10.

² Moises a bai Egipto, el a duna Fárao e mensahe di Dios i, manera tabata di spera, Fárao a haña rabia riba dje. Despues ku nuebe plaga a asotá e pais, Fárao a spièrta Moises: “Perkurá pa bo no mira mi kara mas, pasobra e dia ku bo mira mi kara, lo bo muri!” (Éks. 10:28) Promé ku Moises a bai for di su dilanti, el a profetisá ku e promé yu hòmber di e rei lo a muri. (Éks. 11:4-8) Finalmente, Moises a instruí tur famia israelita pa mata un kabritu òf un karné—un animal ku tabata sagrado pa e dios egipsio Ra—i sprengu e sanger riba nan kozeinnan. (Éks. 12:5-7) Kon Fárao lo a reakshoná? Moises no tabatin miedu. Dikon nò? Ku fe, el a obedesé Yehova, “[sin] miedu di e rabia di e rei, ya ku el a sigui firme, komo si fuera el a mira Esun ku ta invisibel.”—Lesa Hebreonan 11:27, 28.

 3. Kiko nos lo analisá tokante e fe ku Moises tabatin den “Esun ku ta invisibel”?

³ Bo fe ta asina fuerte ku ta komo si fuera bo ta “mira Dios”? (Mat. 5:8) Pa nos hasi nos vishon spiritual mas skèrpi pa nos por mira “Esun ku ta invisibel,” laga nos wak e ehèmpel di Moises atrobe. Kon su fe den Yehova a proteh’é for di miedu di hende? Kon el a demostrá fe den e promesanan di Dios? I kon e echo ku Moises por a mira “Esun ku ta invisibel” a fortalesé e i su pueblo ora nan tabata den peliger?

 4. For di un punto di bista humano, Moises por a para banda di Fárao?

⁴ For di un punto di bista humano, Moises no por a para banda di Fárao. E bida, bienestar i futuro di Moises a parse di ta den man di Fárao. Moises mes a puntra Yehova: ‘Ta ken mi ta pa mi bai serka Fárao i saka e yunan di Israel for di Egipto?’ (Éks. 3:11) Un 40 aña mas promé Moises a hui for di Egipto. Lo el a puntra su mes: ‘Ta sabí pa mi bai Egipto bèk i kore e riesgo di pone e rei rabia?’

5, 6. Kiko a yuda Moises pa teme Yehova en bes di Fárao?

⁵ Promé ku Moises a bolbe Egipto, Dios a siñ’é un prinsipio importante, e prinsipio ku e mesun Moises akí a registrá despues den e buki di Yòb: “E temor di SEÑOR, ta esei ta sabiduria.” (Yòb 28:28) Pa yuda Moises haña e temor akí i aktua sabí, Yehova a lag’é mira un kontraste grandi entre hende i e mes, e Dios Todopoderoso. El a puntr’é: “Ta ken a traha boka di hende? Ta ken a traha e muda, òf e surdu, òf esun ku ta mira òf e siegu? No ta ami?”—Éks. 4:11.

⁶ Kiko tabata e lès? Moises no tabatin nodi di tin miedu. Ta Yehova a mand’é, i lo el a duna Moises loke sea e tabatin mester pa e hiba e mensahe di Dios pa Fárao. Ademas, Fárao no por a para banda di Yehova. Al fin al kabo, no tabata promé biaha ku sirbidónan di Dios a haña nan den peliger na Egipto. Kisas Moises a meditá riba e manera ku Yehova a protehá Abraham, Yosef i asta Moises mes durante e reinado di e Fáraonan anterior. (Gén. 12:17-19; 41:14, 39-41; Éks. 1:22–2:10) Ku fe den Yehova, “Esun ku ta invisibel,” i ku kurashi Moises a presentá dilanti di Fárao i a papia tur loke Yehova a mand’é papia.

 7. Kon fe den Yehova a protehá un ruman muhé?

⁷ Meskos tambe, fe den Yehova a protehá un ruman muhé ku yama Ella pa no laga miedu di hende domin’é. Na 1949, outoridatnan polisial (KGB) di Estonia a arest’é, nan a kit’é sunú i e polisnan hóben a keda wak e. El a bisa: “Mi a sinti mi humiá, pero mi a resa na Yehova i esei a duna mi un pas i trankilidat mental.” Despues nan a sera Ella den kashòt pa tres dia. El a konta: “E polisnan a grita mi: ‘Nos lo sòru pa hende ni kòrda e nòmber Yehova na Estonia! Abo ta bai un kampamentu di trabou fòrsá i e otronan ta bai Siberia!’ Anto den forma di chèrchi, nan a puntr’é: ‘Unda bo Yehova ta?’” Ella a haña miedu di hende, òf el a konfia den Yehova? Ora nan a interog’é, el a bisa nan sin miedu: “Mi a pensa hopi riba e asuntu akí, i mi ta preferá di biba den prizòn i mantené mi relashon ku Dios intakto en bes di sali liber i pèrdè su aprobashon.” Pa Ella, Yehova tabata mes real ku e hòmbernan ku tabata pará su dilanti. Pa medio di su fe, el a mantené su integridat.

8, 9. (a) Kiko ta e remedi kontra miedu di hende? (b) Si bo ta sinti ku bo tin miedu di hende, riba ken bo mester fiha bo atenshon?

⁸ Fe den Yehova lo yuda bo vense kualke miedu ku bo por tin. Si outoridatnan purba di stòp bo di adorá Dios, por parse ku bo bida, bienestar i futuro ta den man di e personanan akí. Lo bo por asta puntra bo mes si ta sabí pa sigui sirbi Yehova i pone outoridatnan rabia. Ma kòrda esaki: E remedi kontra miedu di hende ta fe den Dios. (Lesa Proverbionan 29:25.) Yehova ta puntra bo: “Kon bo por tin miedu antó di hende ku tin ku muri tòg, hende ku bida pasahero manera yerba?”—Isa. 51:12, 13, BPK.

⁹ Fiha bo atenshon riba bo Tata todopoderoso. E ta mira ken ta sufri na man di gobernantenan inhustu; e ta sinti pa hende asina i ta yuda nan. (Éks. 3:7-10) Asta si bo tin ku defendé bo fe dilanti di ofisialnan di alto rango, ‘no bira anshá tokante kon pa papia òf kiko pa bisa, pasobra e momento ei lo bo haña sa kiko pa bisa.’ (Mat. 10:18-20) Niun gobernante ni ofisial di gobièrnu no por para banda di Yehova. Si bo fortalesé bo fe awor, lo bo bin mira Yehova komo un Persona real ku ta ansioso pa yuda bo.

10. (a) Ki instrukshon Yehova a duna e israelitanan den e luna di nisan di aña 1513 promé ku Kristu? (b) Dikon Moises a obedesé e instrukshonnan di Dios?

¹⁰ Den e luna di nisan di aña 1513 promé ku Kristu, Yehova a bisa Moises i Aron pa duna e israelitanan e instrukshon un poko straño akí: Skohe un chubatu di karné òf di kabritu sano, mat’é i sprengu su sanger riba kozein di boso portanan di kas. (Éks. 12:3-7) Kon Moises a reakshoná? Mas despues, apòstel Pablo a skirbi di dje: “Pa medio di fe el a selebrá e Pasku i a sprengu sanger riba e kozeinnan di porta, pa e destruktor no hasi daño na nan yu mayó.” (Heb. 11:28) Moises tabata sa ku Yehova ta kumpli ku su promesanan i ku lo e mata tur e yu hòmbernan mayó di Egipto.

11. Dikon Moises a spièrta e otro israelitanan?

¹¹ Aparentemente e yu hòmbernan di Moises mes tabata na Madian, leu for di “e destruktor.”a (Éks. 18:1-6) Ma el a obedesé Dios i a instruí otro famianan israelita pa nan por a skapa nan yu hòmbernan mayó. Bida tabata den wega, i Moises tabata stima su próhimo. Beibel ta bisa ku “e ora ei Moises a manda yama tur e ansianonan di Israel i a bisa nan: . . . ‘Mata e lamchi di Pasku.’”—Éks. 12:21.

12. Yehova a instruí nos pa proklamá ki mensahe importante?

¹² Bou di direkshon di angel, e pueblo di Yehova ta proklamá un mensahe importante: “Teme Dios i dun’é gloria, pasobra e ora di su huisio a yega! P’esei, adorá Esun ku a traha shelu, tera, laman i fuentenan di awa.” (Rev. 14:7) Awor ta tempu pa deklará e mensahe ei. Nos tin ku spièrta nos próhimo pa sali for di Babilonia e Grandi, pa nan no “risibí parti di su plaganan.” (Rev. 18:4) E kristiannan ungí, ku yudansa di e ‘otro karnénan,’ ta roga hende ku ta alehá for di Dios pa “rekonsiliá” kuné.—Huan 10:16; 2 Kor. 5:20.

13. Kiko lo duna nos mas deseo pa prediká e bon notisia?

¹³ Nos ta konvensí ku “e ora di huisio” en bèrdat a yega. Nos tin fe tambe ku Yehova no a eksagerá e urgensia di nos trabou di prediká i di hasi disipel. Den un vishon, apòstel Huan “a mira kuater angel pará na e kuater skinanan di tera, ku e kuater bientunan di tera duru tené.” (Rev. 7:1) Ku wowo di fe, bo ta mira e angelnan ei kla pa lòs e bientunan destruktivo di e tribulashon grandi riba e mundu akí? Si bo ta mira nan, lo bo sinti bo impulsá pa prediká e bon notisia ku konvikshon.

14. Kiko ta motivá nos pa “spièrta e malbado pa [e] laga su mal kaminda”?

¹⁴ Kristiannan berdadero ya kaba tin un amistat ku Yehova i e speransa di biba pa semper. Sinembargo, nos ta rekonosé ku nos tin e responsabilidat pa “spièrta e malbado pa [e] laga su mal kaminda pa e biba.” (Lesa Ezekiel 3:17-19.) Naturalmente, nos no ta prediká simplemente pa evitá kulpa di sanger. Nos ta stima Yehova, i nos ta stima nos próhimo. Den Hesus su komparashon di e bon samaritano, el a ilustrá kiko realmente ta nifiká amor i miserikòrdia. Nos por puntra nos mes: ‘Meskos ku e samaritano, mi tin “duele” di e hendenan, i esei ta motivá mi pa duna nan testimonio?’ Nos lo no ke bula pipa manera e saserdote i e levita den e komparashon, na moda di papia, ‘krusa pasa bai’ otro banda di kaminda. (Luk. 10:25-37) Fe den e promesanan di Dios i amor pa próhimo lo motivá nos pa partisipá aktivamente den e trabou di prediká promé ku ta muchu lat.

15. Dikon e Israelitanan a sinti ku nan a kai den un trampa?

¹⁵ Moises su fe den “Esun ku ta invisibel” a yud’é ora ku e israelitanan tabata den peliger despues ku nan a bandoná Egipto. Beibel ta bisa: “E yunan di Israel a hisa kara wak, i mira, e egipsionan tabata marcha bini nan tras, i nan a spanta mashá, i e yunan di Israel a sklama na SEÑOR.” (Éks. 14:10-12) Bon mirá, e situashon akí no mester a sorprendé nan. Di kon nò? Pasobra Yehova a profetisá: “Lo mi hasi Fárao su kurason duru, i e lo persiguí nan; i ami lo wòrdu onrá atraves di Fárao i henter su ehérsito, i e egipsionan lo sa ku ta ami ta SEÑOR.” (Éks. 14:4) No opstante, e israelitanan tabata mira solamente loke nan por a wak ku nan wowo literal: Laman Kòrá ku a blòkia e kaminda nan dilanti, Fárao su garoshinan di guera rápido nan tras i un wardadó di karné di 80 aña ku mester a guia nan! Nan a sinti ku nan a kai den un trampa.

16. Kon fe a fortalesé Moises na Laman Kòrá?

¹⁶ Ma Moises no tabatin miedu. Dikon nò? Pasobra ku wowo di fe el a mira algu muchu mas poderoso ku un laman òf un ehérsito. E por a “mira e salbashon di SEÑOR,” i e tabata sa ku Yehova lo a bringa pa e israelitanan. (Lesa Éksodo 14:13, 14.) I su fe a motivá e pueblo di Dios. Beibel ta bisa: “Pa medio di fe nan a pasa dor di Laman Kòrá komo si fuera riba tera seku, pero ora e egipsionan a purba di hasi meskos, laman a traga nan.” (Heb. 11:29) Despues di esei, “e pueblo a [kuminsá] teme SEÑOR, i nan a kere den SEÑOR i den su sirbidó Moises.”—Éks. 14:31.

17. Den futuro, ki suseso lo pone nos fe na prueba?

¹⁷ Pronto, nos bida tambe lo parse di ta den peliger. Na e kulminashon di e tribulashon grandi, e gobièrnunan di e mundu akí lo a destruí e organisashonnan religioso ku tabata muchu mas poderoso ku esun di nos. (Rev. 17:16) Den un profesia, Yehova ta deskribí nos kondishon vulnerabel komo un lugá di biba sin protekshon, ku no tin ‘muraya, ni grèndel ni porta.’ (Eze. 38:10-12, 14-16) For di un punto di bista humano, nos lo no tin skapatorio. Kon lo bo reakshoná?

18. Dikon nos no tin nodi di tin miedu durante e tribulashon grandi?

¹⁸ Nos no tin nodi di tin miedu. Dikon nò? Pasobra Yehova a profetisá ku su pueblo lo ser ataká, pero tambe ku lo e protehá nan. El a bisa: “‘Lo sosodé riba e dia ei, ora Gòg bini kontra tera di Israel,’ SEÑOR Dios ta deklará, ‘ku mi furia lo subi den mi nanishi.’ I den mi zelo i e ardor di mi furia, mi ta deklará.’” (Eze. 38:18-23) E ora ei Yehova lo destruí tur esnan ku ke hasi su pueblo daño. Si bo tin fe ku Yehova lo protehá bo durante su “dia grandi i temibel,” lo bo por ‘mira e salbashon di Yehova’ i mantené bo integridat.—Yoël 2:31, 32.

19. (a) Kon íntimo e amistat entre Yehova i Moises tabata? (b) Si bo obedes’é Yehova den tur bo kamindanan, ki bendishon lo bo risibí?

¹⁹ Prepará awor pa e susesonan emoshonante ei dor di sigui para firme komo si fuera bo ta mira “Esun ku ta invisibel”! Fortalesé bo amistat ku Yehova Dios mediante estudio regular i orashon. Moises tabatin un amistat íntimo ku Yehova, kende a us’é di un manera asina poderoso ku Beibel ta bisa ku Yehova tabata konosé Moises “kara-kara.” (Deu. 34:10) Moises tabata un profeta ekstraordinario. Si bo tin fe, bo tambe por tin un amistat íntimo ku Yehova; komo si fuera bo por mir’é realmente. Si bo ta obedes’é “den tur bo kamindanan,” manera e Palabra di Dios ta animá bo pa hasi, “e lo dirigí bo bereanan.”—Pro. 3:6.