Amor Un Kualidat Presioso

BOU di inspirashon, apòstel Pablo a skirbi tokante nuebe kualidat ku ta bini di spiritu santu. (Gal. 5:22, 23) El a bisa ku e bunita kualidatnan akí ta forma e “fruta di spiritu.”a E fruta akí ta karakterístika di “e personalidat nobo.” (Kol. 3:10) Meskos ku un palu lo pari fruta si e haña bon kuido, asina tambe, ora spiritu santu ta obra libremente den bida di un hende, lo e desplegá e fruta di spiritu.—Sal. 1:1-3.

E promé aspekto di e fruta di spiritu ku Pablo a menshoná ta e presioso kualidat di amor. Kon presioso e ta? Wèl, Pablo a bisa ku si e no tabatin amor, e no tabata “nada.” (1 Kor. 13:2) Pero kiko ta amor, i kon nos por kultiv’é i demostr’é tur dia?

Aunke no ta fásil pa definí amor, Beibel ta deskribí sí kon nos por demostr’é. Por ehèmpel, Beibel ta bisa ku amor “tin pasenshi i ta bondadoso.” Ademas, e “ta alegrá ku loke ta bèrdat,” i e “ta wanta tur kos, kere tur kos, spera tur kos, soportá tur kos.” Riba esei, amor ta enserá un kariño profundo pa otro hende, un interes sinsero den nan i un sintimentu di apego na nan. Di otro banda, yalursheit, orguyo, komportashon indesente, egoismo, rabia i wardamentu di renkor ta demostrá un falta di amor. Kontrali na e karakterístikanan negativo i perhudisial ei, e amor ku nos ke kultivá “no ta buska su mes interes.”—1 Kor. 13:4-8.

“Dios ta amor.” Sí, Yehova ta e personifikashon di amor. (1 Huan 4:8) Tur su obranan i tur loke e ta hasi ta demostrá su amor. Su muestra di amor di mas grandi pa humanidat tabata ora el a manda Hesus pa sufri i muri pa nos. Apòstel Huan a bisa: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje. E amor ei ta nifiká esaki: no ta nos a stima Dios, sino ta é a stima nos i a manda su Yu komo un sakrifisio di rekonsiliashon pa nos pikánan.” (1 Huan 4:9, 10) Pa motibu di e amor di Dios, nos por haña pordon di piká, nos por tin un speransa i haña bida eterno.

Hesus a demostrá su amor pa humanidat ya ku e tabata dispuesto pa kumpli ku e boluntat di Dios. Pablo a skirbi: “[Hesus] ta bisa: ‘Wak! Mi a bini pa hasi bo boluntat.’ . . . Di akuerdo ku e ‘boluntat’ ei di Dios nos a ser santifiká pa medio di e ofrenda di e kurpa di Hesukristu ún biaha i pa semper.” (Heb. 10:9, 10) Niun hende no por mustra un amor mas grandi ku esei. Hesus a bisa: “Ningun hende no tin un amor mas grandi ku esun ku ta entregá su alma pa su amigunan.” (Huan 15:13) Komo hende imperfekto, nos por imitá e amor ku Yehova i Hesus a mustra na nos? Sí! Ban wak kon nos por hasi esei.

Pablo ta urgi nos: “Imitá Dios, komo yunan stimá, i sigui kana den amor, meskos ku Kristu tambe a stima boso i a entregá su bida pa boso.” (Efe. 5:1, 2) Nos ta “sigui kana den amor” ora nos ta demostrá e kualidat akí den tur aspekto di nos bida. Nos ta hasi esei no ku palabra so sino ku nos akshonnan. Huan a skirbi: “Yunan stimá, nos no mester stima ku palabra òf ku boka so, ma ku echo i ku sinseridat.” (1 Huan 3:18) Por ehèmpel, ora nos ta kana den amor pa Dios i pa próhimo, nos lo sinti nos motivá pa kompartí ‘e bon notisia di e Reino’ ku nos próhimo. (Mat. 24:14; Luk. 10:27) Ademas, nos ta kana den amor ora nos ta demostrá pasenshi, ora nos ta bondadoso i ora nos ta pordoná otronan. De echo, Beibel ta konsehá nos: “Meskos ku Yehova a pordoná boso libremente, boso tambe mester hasi meskos.”—Kol. 3:13.

Pero nos no mester konfundí e amor di kurason ei ku sentimentalismo. Por ehèmpel, pa kalma un mucha ku ta yora, un mayor sentimental lo duna e mucha tur loke e ke. Pero un mayor ku di bèrdat ta stima su yu lo ta firme kuné ora ta nesesario. Di mes manera, Dios ta amor, pero “esun ku Yehova ta stima e ta disipliná.” (Heb. 12:6) Ora nos ta kana den amor, nos lo duna disiplina tambe ora ta nesesario. (Pro. 3:11, 12) Klaru, ora nos hasi esei, nos mester kòrda ku nos tambe ta pekadó i por tin e tendensia di hasi algu sin demostrá amor. Pues, nos tur tin áreanan den kua nos por demostrá mas amor. Ban wak tres manera ku nos por hasi esei.

Di promé, pidi Dios pa su spiritu, ku ta produsí amor. Hesus a bisa ku Yehova ta “duna spiritu santu na esnan ku pidié.” (Luk. 11:13) Si nos pidi Dios pa su spiritu santu i hasi esfuerso pa “sigui kana pa medio di spiritu,” nos lo demostrá mas i mas amor. (Gal. 5:16) Por ehèmpel, si bo ta un ansiano di kongregashon, bo por pidi spiritu santu pa yuda bo duna konseho bíbliko ku amor. Òf si bo ta un mayor, bo por pidi Dios pa su spiritu yuda bo disipliná bo yunan ku amor i no ku rabia.

Di dos, meditá riba kon Hesus a mustra amor asta ora nan a provok’é. (1 Ped. 2:21, 23) Nos mester pensa riba e ehèmpel di Kristu spesialmente ora un hende faya kontra nos òf ora nos eksperensiá un inhustisia. Na e momentonan ei, ta bon pa nos puntra nos mes: ‘Kiko Hesus lo a hasi?’ Un ruman muhé ku yama Leigh a mira ku ora e pensa riba e pregunta ei, esei ta yud’é pensa bon promé ku e hasi algu. E ta konta: “Un biaha, un kolega di mi a manda un e-mail pa mi otro koleganan ku komentarionan negativo di mi i di mi trabou. Esei a hùrt mi hopi. Pero despues mi a puntra mi mes: ‘Kon mi por imitá Hesus ora di trata ku e persona akí?’ Anto despues di a meditá riba loke Hesus lo a hasi, mi a disidí di legumai e asuntu i no lag’é bira un problema. Despues mi a haña sa ku mi kolega tabata dil ku un problema serio di salú i tabata bou di hopi strès. Mi a yega na e konklushon ku probablemente e no tabata ke men loke el a skirbi. Komo ku mi a meditá riba kon Hesus a mustra amor asta ora nan a provok’é, mi por a mustra tal amor na mi kolega.” Sí, si nos imitá Hesus, semper nos lo demostrá amor.

Di tres, kultivá amor inegoista, loke ta identifiká kristiannan berdadero. (Huan 13:34, 35) Relashoná ku esaki, e Skritura ta animá nos pa kultivá e mesun “aktitut mental” ku Hesus tabatin. Ora el a baha for di shelu, “el a entregá tur loke e tabatin” pa nos, asta su bida. (Flp. 2:5-8) Segun ku nos ta imitá su amor inegoista, nos pensamentu- i sintimentunan lo bira mas manera esnan di Kristu, i nos lo ta motivá pa pone interes di otro hende promé ku esun di nos mes. Ki otro benefisio nos ta haña ora nos kultivá amor?

Ora nos ta demostrá amor, nos ta haña hopi benefisio. Ban wak dos ehèmpel.

• UN HERMANDAT INTERNASHONAL: Debí na nos amor pa otro, nos sa ku sin importá ki kongregashon nos bishitá, e rumannan lo duna nos un kaluroso bon biní. Ta un gran bendishon ku ‘henter e hermandat di ruman rònt mundu’ ta stima nos. (1 Ped. 5:9) Unda mas ku no ta entre e pueblo di Dios nos por haña un amor asina?

• PAS: Ora nos ta ‘soportá otro den amor,’ nos por gosa di “e vínkulo di pas.” (Efe. 4:2, 3) Nos ta eksperensiá e pas akí na nos reunionnan, asambleanan i kongresonan. Un ambiente di pas asina sigur ta algu úniko den e mundu dividí akí, no ta bèrdat? (Sal. 119:165; Isa. 54:13) Ora nos keda na pas ku otro hende, nos ta demostrá kuantu nos ta stima nan, i esei ta algu ku ta agradá nos Tata selestial.—Sal. 133:1-3; Mat. 5:9.

Pablo a skirbi: “Amor ta edifiká.” (1 Kor. 8:1) Kon amor ta hasi esaki posibel? Den Promé Korintionan kapítulo 13, loke a ser yamá e “Salmo di Amor,” apòstel Pablo a splika kon amor ta edifiká. Pa kuminsá, e ta buska e interes di otro hende. (1 Kor. 10:24; 13:5) Ademas, si nos ta demostrá amor, nos ta pensa bon promé ku nos hasi algu, nos ta tene konsiderashon i pasenshi ku otro hende, nos lo ta bondadoso, nos lo mustra hopi kariño na nos famia i e kongregashon lo ta mas uní.—Kol. 3:14.

Nos amor pa Dios ta e amor di mas presioso i animante ku nos por tin. E amor ei ta uni hende di tur rasa, kultura i idioma, i nan ta adorá Yehova “den ún akuerdo.” (Sof. 3:9) Laga nos ta determiná pa tur dia nos demostrá e aspekto presioso akí di e fruta di spiritu di Dios.