Plamando e Conocimentu cu Ta Hiba na Bida Eterno
1 Jehova ta “Esun cu ta siña hende conocimentu.” (Sal. 94:10) E ta usa nos pa plama conocimentu salbador-di-bida tocante dje na esnan cu no sa con pa sirbié aceptablemente. E buki Conocimentu cu Ta Hiba na Bida Eterno ta un excelente instrumento di siñansa mediante cua esnan di curason onrado por gana un comprendimentu exacto di Dios for di su Palabra skirbí, e Bijbel. (1 Tim. 2:3, 4) E buki Conocimentu su desaroyo lógico i cla dje berdad lo yuda hende capta loke Jehova ta tratando na siña nan. E luna aki nos kier enbolbé e hendenan den combersacionnan cu lo pone cu nan kier lesa e buki. Ata aki algun sugerencia. En bes di trata na siña esakinan for di cabes, purba expresá e pensamentunan clave den bo mes palabra i manera natural di combersá.
2 Ya cu mayoria hende a perde un stimá den morto, lo bo por hinca e speransa di resureccion den un combersacion dor di bisa promé algu asina aki:
◼ “Mayoria di nos a perde un stimá den morto. Bo a yega di puntra bo mes si lo bo mira e persona ei atrobe? [Permití contesta.] Morto no tabata parti dje propósito original di Dios pa hende. Jesus a duna prueba cu nos stimánan por ser rescatá for di morto. [Lesa Juan 11:11, 25, 44.] Maske esaki a tuma lugá siglonan pasá, e ta demostrá loke Dios a primintí di haci pa nos. [Habri e buki Conocimentu n’e plachi na página 85 i lesa e palabranan cu ta compañá e plachi. Despues mustra e plachi na página 86 i comentá riba dje.] Si bo lo kier lesa mas tocante e speransa consolador aki dje resureccion, gustosamente lo mi laga e buki aki cu bo.”
3 Despues dje consideracion inicial tocante e speransa di resureccion, lo bo por cuminsá e siguiente combersacion cu e mésun persona den e manera aki:
◼ “Tal bes bo ta corda cu mi a bisa cu morto no tabata parti dje propósito original di Dios pa hende. Si esei ta berdad, pakico nos ta bira bieu i muri? Algun tortuga ta biba mas cu 100 aña, i tin palunan cu ta na bida pa miles di aña. Pakico hende ta biba solamente 70 of 80 aña? [Permití contesta.] Nos ta muri debí cu e promé pareha humano a desobedecé Dios.” Lesa Romanonan 5:12. Bai na página 53 dje buki Conocimentu i lesa e título dje capítulo. Considerá e promé tres paragrafnan, indicando e contestanan p’e preguntanan imprimí. Traha un cita pa bolbe despues pa considerá e resto dje capítulo. Animá e persona pa caba di lesa e capítulo miéntras tantu.
4 Si bo papia cu un persona cu ta parce di ta religioso, lo bo por bisa:
◼ “Tin literalmente cientos di diferente religion awe. Nan ta siña tur clase di creencia contradictorio. Algun hende ta bisa cu tur religion ta bon i cu no ta haci ningun diferencia kico nos ta kere. Kico ta bo opinion? [Permití contesta.] Jesus a siña di e religion berdadero i a mustra cu otro formanan di adoracion ta inaceptabel pa Dios. [Lesa Mateo 7:21-23.] Si nos kier agradá Dios, nos mester ador’é na armonia cu su boluntad.” Habri e buki Conocimentu na capítulo 5, lesa e título, i mustra algun dje subtemanan. Splica cu e informacion aki lo yuda un persona siña con pa agradá Dios. Ofrecé pa laga e buki i mencioná cu nos ta aceptá un contribucion p’e.
5 Hende cu ta confundí debí cu tin asina tantu religion kisas ta apreciá e contesta na e pregunta aki ora bo haci nan un rebishita:
◼ “Cu asina tantu diferente religion existiendo awe, con nos por determiná cua ta esun corecto? Con abo lo determiná esei? [Permití contesta.] Jesus a bisa nos con pa identificá su berdadero siguidornan.” Lesa Juan 13:35. Considerá §18 i 19 den capítulo 5 dje buki Conocimentu. Mustra cu dor di usa e indicacionnan bíblico aki i e proceso di eliminacion, un persona por reconocé e religion berdadero. Relatá con Testigonan di Jehova ta conocí rond mundu pa nan amor genuino i normanan moral haltu. Splica con un studio di Bijbel, usando e buki Conocimentu, claramente lo identificá e forma di adoracion cu Dios ta aprobá.
6 Si bo topa un mayor, e introduccion aki lo por ta eficas:
◼ “Tur dia, nos ta tende informenan tocante e conducta desordená di hóbennan cu ta parce di tin ningun clase di balor moral. Algun adulto kier culpa e sistema escolar pasobra e no a siña muchanan e diferencia entre bon i malu. Ken abo ta kere cu mester percurá e entrenamentu aki? [Permití contesta.] Scucha na loke Bijbel ta bisa riba e pregunta aki. [Lesa Efesionan 6:4.] Esei ta bisa nos cu inculcando balornan moral den muchanan ta e responsabilidad dje mayornan.” Habri e buki Conocimentu na página 145, lesa §16, i comentá riba e plachi na página 147. Splica cu e buki ta diseñá pa henter e famia studia. Usando §17 i 18 na página 146, ofrecé pa demostrá con nos ta conducí un studio asina cu famianan.
7 Si na e bishita inicial bo a cuminsá un studio cu un mayor preocupá, lo bo por sigui e studio n’e rebishita dor di bisa:
◼ “E mundu djawe ta pone hopi tentacion dilanti nos hóbennan. Esaki ta hacié asina difícil pa nan bira temeroso di Dios segun cu nan ta crece. Kisas bo ta corda cu den nos último combersacion, nos a concentrá riba dos principio. Como mayornan piadoso, nos mester pone ehempelnan excelente pa nos yunan i nos mester mustra nan constantemente cu nos stima nan. Tin un cos mas cu Bijbel ta bisa cu yunan mester haña for di nan mayornan.” Lesa Proverbionan 1:8. Bai na página 148 den e buki Conocimentu i sigui e studio, abarcando §19-23. Sugerí e persona pa bo bini bek pa studia cu henter e famia, cuminsando na capítulo 1.