“Esaki Ta Nificá Bida Eterno”
1 E palabranan di Jesus registrá na Juan 17:3 tin cu ser tumá na serio. E tabata kier men loke el a bisa, esta, cu adkiriendo conocimentu di Dios i di Cristo ta nificá bida eterno! Pero ta simplemente dor di tin conocimentu di Jehova i di Jesus cu nos lo ser recompensá cu bida eterno? No. E israelitanan tabata sa cu Jehova tabata nan Dios, pero nan curso di bida no a reflehá e creencia ei. Como resultado, nan a perde su fabor. (Osé. 4:1, 2, 6) Awe miyones di hende por “tin un celo pa Dios; pero no segun conocimentu exacto.” (Rom. 10:2) Nan tin cu yega na conocé Jehova, “e único Dios berdadero,” i siña con pa sirbié corectamente. Cu e meta ei, durante november nos lo ofrecé e buki Conocimentu cu Ta Hiba na Bida Eterno. Ki introduccion lo bo usa pa presentá e buki Conocimentu? Aki tin un algun sugerencia cu lo por yudá bo.
2 Ya cu e idea di biba pa semper riba tera ta nobo pa mayoria hende, e introduccion aki kisas lo por capta nan interes:
◼ “Nos ta haciendo nos bisiñanan un pregunta. Si bo ser invitá pa biba pa semper den un mundu manera esaki, lo bo aceptá e invitacion? [Mustra e plachi riba página 4-5 den e buki Conocimentu. Permití contesta.] Esaki realmente por bira bo experencia felis den bida. Pero kico bo ta kere lo bo tin cu haci pa mir’é bira un realidad pa bo? [Permití contesta.] Tuma nota di ki accion ta ser rekerí segun Juan 17:3. [Les’é.] E buki aki ta yudando hopi hende adkerí e clase di conocimentu special aki. Lo bo kier tin un copia personal pa lesa? [Permití contesta.] Na mi siguiente bishita, nos por considerá pakico ta razonabel pa kere cu nos por alcansá bida eterno aki mes riba tera.”
3 Ora bo bolbe pa bishitá esnan cu ken bo a considerá Juan 17:3, kisas lo bo por continuá den e manera aki:
◼ “Durante mi último bishita, mi a lesa pa bo e palabranan fasinante di Jesus skirbí na Juan 17:3, caminda el a sigurá nos cu adkiriendo conocimentu di Dios i di dje ta nificá bida eterno. Pero hopi hende ta kere cu un mihó bida por ser lográ solamente den shelu. Kico abo ta pensa di esei? [Permití contesta.] Si e buki cu mi a laga cu bo ta na man, lo mi kier mustrá bo algun versículo di Bijbel cu ta proba cu Paradijs lo ser restorá riba tera. [Considerá §11-16 na página 9-10 den e buki Conocimentu.] Na mi siguiente bishita, lo mi kier mustrá bo pakico bo por confia e promesanan aki cu ta ser hañá den Bijbel. Miéntras tantu, kisas lo bo por lesa capítulo 2 den bo copia dje buki.”
4 Ata aki un presentacion cu lo bo kier usa cu hende cu tin inclinacion religioso:
◼ “Nos a bin ta papia cu nos bisiñanan tocante pakico tin asina tantu diferente religion na mundu. Na Merca so ta existí rond di 1.200 denominacion religioso i mas di 10.000 den henter mundu. Sin embargo, tin solamente un Bijbel. Segun bo, pakico ta existí e confusion aki di religion? [Permití contesta. Habri e buki Conocimentu na capítulo 5, i lesa §1.] Lo bo ricibí contesta satisfactorio n’e preguntanan ei dor di lesa e capítulo aki. Gustosamente lo mi laga e buki aki cu bo si bo ta interesá pa examin’é.” Si e buki ser aceptá, haci areglonan definitivo pa bolbe, i bisa: “Ora mi bini bek, kisas nos lo por considerá si tur religion ta simplemente diferente caminda cu ta hiba n’e mésun lugá.”
5 Ora bo bolbe pa continuá cu e consideracion tocante pakico tin asina tantu religion, lo bo por bisa esaki:
◼ “Ultimo biaha cu mi a papia cu bo, mi a haci e pregunta si tur religion ta simplemente diferente caminda hibando n’e mésun lugá. Kico bo ta pensa di esei? [Permití contesta.] Lo mi kier a mustrá bo den e buki cu mi a laga cu bo loke Jesus a bisa tocante e asuntu. [Bai na capítulo 5 den e buki Conocimentu i lesa §6-7, incluyendo Mateo 7:21-23.] Tal bes bo ta puntra bo mes pakico ta asina importante pa sa exactamente kico ta e boluntad di Dios. Lo bo ripará cu e siguiente paragrafnan ta masha informativo. Por fabor, lesa e resto dje capítulo aki. E siguiente biaha cu mi bini, gustosamente lo mi mustrá bo e balor di tin conocimentu exacto di Bijbel.”
6 Un manera directo di abordá hopi bes tin éxito den cuminsá studionan di Bijbel. Ata aki un introduccion sugerí cu ta aparecé na página 6 dje foyeto chikitu “Con pa Cuminsá i Continuá Consideracionnan Bíblico”:
◼ “Mi ta di bishita pa ofrecé bo un curso di Bijbel grátis na cas. Si bo permití mi, lo mi kier a tuma solamente un par di minuut pa demostrá con, den rond di 200 pais, hende ta considerá e Bijbel na cas como famia. Nos por usa cualkier un dje temanan aki como un base pa consideracion. [Mustra e tabla di contenido for dje buki Conocimentu.] Cua tema ta interesá bo specialmente?” Warda p’e persona scoge un. Bai n’e capítulo cu el a scoge i cuminsá e studio den e promé paragraf.
7 Ata aki un otro exitoso manera directo di abordá cu lo bo por purba pa cuminsá studionan:
◼ “Mi ta duna les di Bijbel grátis i mi tin lugá den mi orario pa mas studiante. E buki aki nos ta usa como yudansa pa studia Bijbel. [Mustra e buki Conocimentu.] E curso ta dura solamente un par di luna i ta duna contesta na preguntanan manera: Pakico Dios ta permití sufrimentu? Pakico nos ta bira bieu i muri? Kico ta sosodé cu nos stimánan morto? I con nos por hala cerca di Dios?” E ora ei puntra, “Mi por mustrá bo con e studio ta bai?” Si e persona nenga e oferta di studio, puntr’é si lo e kier e buki Conocimentu p’e lesa riba su mes.
8 Ki un tesoro e conocimentu exacto di Dios i di Cristo ta pa tur hende cu tin e! Adkiriendo e conocimentu ei realmente ta nificá bida eterno den condicionnan perfecto. Laga nos usa tur oportunidad durante november pa compartí cu otronan e conocimentu cu ta hiba na bida eterno.