Kon Ta Logra Berdadero Union Entre Kristiannan?
1 Kiko lo por uni mas ku seis mion hende di 234 pais, i ku na tur ta papia mas o ménos 380 idioma? Ta e adorashon di Yehova Dios so por logra esei. (Mik. 2:12; 4:1-3) Testigunan di Yehova, di nan eksperensia personal sa ku awendia ta eksistí berdadero union entre kristiannan. Komo “ún tou,” bou di “ún wardadó,” nos ta desididu pa resistí e mundu su spiritu di desunion.—Juan 10:16; Efe. 2:2.
2 E propósito infalibel di Dios ta pa tur kriatura inteligente (angel i hende) ser uní den adorashon berdadero. (Rev. 5:13) Dor ku Hesus tabata sa ku union entre su disipelnan ta hopi importante, el a hasi orashon sinsero pa esaki. (Juan 17:20, 21) Kon kada un di nos por kontribuí na e union di e kongregashon kristian?
3 Kon pa Logra Union: Sin Dios su Palabra i spiritu no por tin union entre kristiannan. Dor di apliká loke nos ta lesa den Beibel nos ta permití e spiritu di Dios flui libremente den nos bida. Esaki ta yuda nos “preservá e unidat di e spiritu den e vínkulo di pas.” (Efe. 4:3) E ta impulsá nos pa soportá otro ku amor. (Kol. 3:13, 14; 1 Ped. 4:8) Abo ta promové union dor di meditá riba e Palabra di Dios tur dia?
4 E tarea ku nos tin di prediká i hasi disipel tambe ta uni nos. Ora nos ta traha ku otro den sirbishi kristian, “luchando huntu pa e fe di evangelio,” nos ta bira “kolaboradónan pa e bèrdat.” (Fil. 1:27; 3 Juan 8) Segun ku nos ta hasi esei, e banchi di amor ku tin den kongregashon i ku ta uni nos ta bira mas fuerte. Pakiko no invitá un persona ku bo tin basta dia sin traha kuné den sirbishi di vèlt, pa traha ku bo e siman aki?
5 Nos ta masha privilegiá ku nos ta parti di e úniko berdadero hermandat internashonal ku ta eksistí riba tera awe! (1 Ped. 5:9) Resientemente, míles di hende a eksperensiá e union mundial aki personalmente na e Kongresonan Internashonal “Duna Gloria na Dios.” Laga nos kada un kontribuí na e union presioso aki dor di lesa e Palabra di Dios tur dia, resolvé nos desakuerdonan den un manera amoroso i prediká e bon nobo “di ún akuerdo.”—Rom. 15:6.