Mantene Unidad den e Ultimo Dianan Aki

“Comportá boso di un manera digno dje bon nobo . . . parando firme den un solo spiritu, haciendo esfuerso lado a lado cu un solo alma pa e fe dje bon nobo.”—FILIPENSENAN 1:27.

 1. Ki contraste tin entre Testigonan di Jehova i e mundu?

ESAKINAN ta “e último dianan.” Sin duda, nos ta bibando den un “tempu crítico, duru pa trata cuné.” (2 Timoteo 3:1-5) Den e “tempu di fin” aki, cu su inkietud den sociedad humano, Testigonan di Jehova ta resaltá na contraste skerpi debí na nan pas i unidad. (Daniel 12:4) Pero cada individuo cu ta pertenecé n’e famia mundial di Jehova su adoradornan tin cu traha duru pa mantené e unidad aki.

 2. Kico Pablo a bisa tocante mantené unidad, i ki pregunta nos lo considerá?

² Apostel Pablo a amonestá compañeronan cristian pa mantené unidad. El a skirbi: “Comportá boso di un manera digno dje bon nobo tocante Cristo, afin di cu, sea mi ta bini i mira boso of ta ausente, mi por tende tocante dje cosnan cu tin di haber cu boso, cu boso ta parando firme den un solo spiritu, haciendo esfuerso lado a lado cu un solo alma pa e fe dje bon nobo, i cu den ningun sentido boso ta ser temorisá dor di boso oponentenan. Esaki mes ta un prueba di destruccion pa nan, pero di salbacion pa boso; i e indicacion aki ta bini di Dios.” (Filipensenan 1:27, 28) Pablo su palabranan ta mustra claramente cu nos mester traha huntu como cristiannan. Pues, anto, kico lo yuda nos mantené nos unidad cristian den e tempu difícil aki?

Someté Bo Mes n’e Boluntad Divino

 3. Na ki tempu i con e promé gentilnan incircuncidá a bira siguidornan di Cristo?

³ Un manera pa mantené nos unidad ta pa someté nos mes n’e boluntad divino na tur ocasion. Esaki por exigí un ahuste den nos manera di pensa. Tuma por ehempel e disipelnan hudiu di Jesucristo di promé siglo. Ora apostel Pedro a predicá pa promé biaha na gentilnan incircuncidá na 36 E.C., Dios a drama spiritu santu riba e hendenan aki dje nacionnan, i nan a ser bautisá. (Echonan, capítulo 10) Te cu e tempu ei, ta solamente hudiunan, prosélitonan di hudaismo i samaritanonan a bira siguidor di Jesucristo.—Echonan 8:4-8, 26-38.

 4. Despues di a splica loke a tuma lugá en coneccion cu Cornelio, kico Pedro a bisa, i ki prueba esaki a presentá pa Jesus su disipelnan hudiu?

⁴ Ora e apostelnan i otro rumannan na Jerusalem a haña sa tocante e combertimentu di Cornelio i otro gentilnan, nan tabata interesá pa tende e informe di Pedro. Despues di a splica loke a tuma lugá en coneccion cu Cornelio i e otro gentilnan creyente, e apostel a concluí cu e palabranan: “P’esei, si Dios a duna nan [e gentilnan creyente ei] e mésun don grátis [di spiritu santu] mescos cu el a duna nos [e hudiunan] tambe cu a kere den Señor Jesucristo, ken mi tabata pa por a stroba Dios?” (Echonan 11:1-17) Esaki a presentá un prueba p’e siguidornan hudiu di Jesucristo. Nan lo a someté nan mes n’e boluntad di Dios i aceptá gentilnan creyente como nan compañeronan di adoracion? Of e unidad di Jehova su sirbidornan terenal lo tabata na peliger?

 5. Con e apostelnan i otro rumannan a reaccioná riba e echo cu Dios a concedé repentimentu n’e gentilnan, i kico nos por siña for dje actitud aki?

⁵ E relato ta bisa: “Awor, ora nan [e apostelnan i otro rumannan] a tende e cosnan aki, nan a conformá nan mes, i nan a glorificá Dios, bisando: ‘Wel, anto, Dios a concedé repentimentu p’e propósito di bida na hende dje nacionnan tambe.’ ” (Echonan 11:18) E actitud ei a conserbá i promové e unidad di Jesus su siguidornan. Den solamente un tempu corticu, e trabou di predicacion a avansá entre e gentilnan, of hende dje nacionnan, i Jehova su bendicion tabata riba e actividadnan ei. Nos tin cu conformá nos mes ora nos cooperacion ta ser pidí en coneccion cu e formacion di un congregacion nobo of ora algun ahuste teocrático ta ser hací bou dje guia di Dios su spiritu santu. Nos cooperacion di henter curason lo agradá Jehova i lo yuda nos mantené nos unidad den e último dianan aki.

Pega n’e Berdad

 6. Ki efecto e berdad tin riba e unidad di Jehova su adoradornan?

⁶ Como parti di Jehova su famia di adoradornan, nos ta mantené unidad pasobra nos tur ta “siñá dor di Jehova” i ta pega firmemente na su berdad revelá. (Juan 6:45; Salmo 43:3) Ya cu nos siñansanan ta basá riba e Palabra di Dios, nos tur ta papia di acuerdo cu otro. Nos ta aceptá gustosamente e alimento spiritual cu Jehova ta haci disponibel mediante “e esclabo fiel i discreto.” (Mateo 24:45-47) Tal siñansa uniforme ta yuda nos mantené nos unidad rond mundu.

 7. Si nos individualmente tin dificultad pa comprendé un cierto punto, kico nos mester haci, i kico nos no mester haci?

⁷ Kico si nos individualmente tin dificultad pa comprendé of aceptá un cierto punto? Nos tin cu pidi den oracion pa sabiduria i haci investigacion den e Scritura i publicacionnan cristian. (Proverbionan 2:4, 5; Santiago 1:5-8) Papia cu un anciano por yuda. Si ainda bo no por comprendé e punto, kisas ta mihó pa no preocupá mashá cu e asuntu. Tal bes mas informacion riba e tópico lo ser publicá, i esei lo amplia nos comprendimentu e ora ei. Sin embargo, lo ta robes pa purba convencé otronan den e congregacion pa aceptá nos mes opinion distinto. Haciendo esaki lo bo ta sembrando discordia i lo bo no ta obrando pa promové unidad. Ta cuantu mas mihó pa “sigui cana den e berdad” i animá otronan pa haci mescos!—3 Juan 4.

 8. Ki actitud pa cu e berdad ta apropiado?

⁸ Den e promé siglo, Pablo a bisa: “Actualmente nos ta mira na un forma nebliná pa medio di un spiel di metal, pero e tempu ei lo ta cara-cara. Actualmente mi conocé parcialmente, pero e tempu ei lo mi conocé cu exactitud mescos cu ami ta conocí cu exactitud.” (1 Corintionan 13:12) Aunke e cristiannan di promé no a dicerní tur e detayenan, nan a keda uní. Awor nos tin un comprendimentu muchu mas cla di Jehova su propósito i di su Palabra dje berdad. P’esei laga nos keda gradicidu p’e berdad cu nos a ricibí mediante e “esclabo fiel.” I laga nos keda gradicidu cu Jehova a guia nos pa medio di su organisacion. Aunke nos no semper tabatin e mésun grado di conocimentu, nos no a muri di hamber of sed spiritualmente. Mas bien, nos Wardador, Jehova, a tene nos unificá i a cuida nos bon.—Salmo 23:1-3.

Usa e Lenga Corectamente!

 9. Con por usa e lenga pa promové unidad?

⁹ Usando e lenga pa animá otronan ta un manera importante pa promové unidad i un spiritu di hermandad. E carta cu a resolvé un cuestion riba circuncision, manera el a ser mandá dor dje cuerpo gobernante di promé siglo, tabata un fuente di estímulo. Despues di a les’é, e disipelnan gentil na Antiokia “a alegrá riba e estímulo.” Hudas i Sílas, cu a ser mandá for di Jerusalem cu e carta, a “animá e rumannan cu hopi discurso i a fortalecé nan.” Sin duda, e presencia di Pablo i Barnabas tambe a animá i fortalecé compañeronan creyente na Antiokia. (Echonan 15:1-3, 23-32) Nos por haci mescos ora nos ta reuní pa reunionnan cristian i ta ‘animá otro’ mediante nos presencia i comentarionan edificante.—Hebreonan 10:24, 25.

10. Pa mantené unidad, kico lo mester haci si presentá un caso di zundramentu?

¹⁰ Sin embargo, e uso robes dje lenga por menasá nos unidad. “E lenga ta un miembro chikitu i tog ta broma hopi,” disipel Santiago a skirbi. “Mira! Ki un candela chikitu ta necesario pa pega un mondi asina grandi na candela!” (Santiago 3:5) Jehova ta odia esnan cu ta causa pleitu. (Proverbionan 6:16-19) Papiamentu asina por causa desunion. Pues, anto, kico si tin zundramentu, esta, ora un persona ta ser ofendé bes tras bes of ta ser someté na papiamentu insultante? E ancianonan lo trata di yuda e malechor. Sin embargo, un zundrador no-repentí mester ser scomulgá p’e pas, ordu i unidad dje congregacion por ser mantené. Al fin i al cabo, Pablo a skirbi: “Stop di mescla boso den compania di cualkier un cu ta ser yamá un ruman cu ta . . . un zundrador . . . , ni sikiera come cu un hende asina.”—1 Corintionan 5:11.

11. Pakico humildad ta importante si nos a bisa algu cu a causa tension entre nos i un compañero creyente?

¹¹ Frenamentu dje lenga ta yuda nos mantené unidad. (Santiago 3:10-18) Pero suponé cu algu cu nos a bisa a causa tension entre nos i un compañero cristian. Lo no ta apropiado pa tuma e iniciativa pa haci pas cu nos ruman, pidiendo dispensa si ta necesario? (Mateo 5:23, 24) Ta cierto cu esaki ta rekerí humildad, pero Pedro a skirbi: “Faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde.” (1 Pedro 5:5) Humildad lo impulsá nos pa ‘sigui tras di pas’ cu nos rumannan, admitiendo nos erornan i pidiendo dispensa apropiadamente. Esaki ta yuda mantené e unidad dje famia di Jehova.—1 Pedro 3:10, 11.

12. Con nos por usa e lenga pa promové i mantené e unidad dje pueblo di Jehova?

¹² Nos por promové e spiritu di famia entre esnan den Jehova su organisacion si nos ta usa nos lenga corectamente. Siendo cu esei ta loke Pablo a haci, e por a recordá e tesalonicensenan: “Boso sa bon cu, mescos cu un tata ta haci cu su yunan, nos a sigui spierta cada un di boso, a consolá boso i a duna boso testimonio, afin cu boso ta sigui cana di un manera digno di Dios.” (1 Tesalonicensenan 2:11, 12) Dor cu e mes a pone un ehempel excelente relacioná cu esaki, Pablo por a urgi compañeronan cristian pa “papia di un manera consolador cu e almanan deprimí.” (1 Tesalonicensenan 5:14) Pensa cuantu bon nos por haci usando e lenga pa consolá, animá i edificá otronan. Sí, “un palabra na su tempu oportuno, O ki bon esei ta!” (Proverbionan 15:23) Ademas, un manera di papia asina ta yuda promové i mantené e unidad dje pueblo di Jehova.

Sea Pordonador!

13. Pakico nos mester ta hende cu ta pordoná?

¹³ Pordoná un ofensor cu a pidi disculpa ta esencial si nos kier mantené unidad cristian. I cuantu biaha nos mester pordoná? Jesus a bisa Pedro: “No te na shete bes, sino, te na setentishete bes.” (Mateo 18:22) Si nos no ta pordoná, nos ta traha contra nos propio interes. Con asina? Wel, hostilidad i cargamentu di rencor lo horta nos di pas mental. I si nos bira conocí como hende cu ta anda di un manera cruel i cu no ta pordoná, nos por haci otronan alehá for di nos. (Proverbionan 11:17) Carga rencor ta desagradá Dios i por hiba na picá grave. (Levítico 19:18) Corda cu Juan Bautista a ser decapitá den un complot cu e malbado Herodías, kende tabata “carga rencor” contra dje, a traha.—Marco 6:19-28.

14. (a) Kico Mateo 6:14, 15 ta siña nos tocante pordon? (b) Semper nos mester warda riba un disculpa promé cu nos pordoná un hende?

¹⁴ Jesus su oracion modelo ta incluí e palabranan aki: “Pordoná nos nos picánan, pasobra nos mes tambe ta pordoná tur esnan cu ta debe nos.” (Lucas 11:4) Si nos ta hende cu no ta pordoná, nos ta core e rísico cu algun dia Jehova Dios lo no pordoná nos picánan mas, pasobra Jesus a bisa: “Si boso pordoná hende nan ofensanan, boso Tata celestial tambe lo pordoná boso; miéntras cu si boso no pordoná hende nan ofensanan, boso Tata lo no pordoná boso ofensanan tampoco.” (Mateo 6:14, 15) Pues si nos realmente kier haci nos parti den mantené unidad den Jehova su famia di adoradornan, nos lo ta pordonador, tal bes djis lubidando un ofensa cu kisas tabata debí na falta di consideracion i sin cu tabatin ningun mal intencion. Pablo a bisa: “Sigui soportá otro i pordoná otro libremente si cualkier un tin un motibu di keha contra otro. Mescos cu Jehova a pordoná boso libremente, asina boso tambe haci mescos.” (Colosensenan 3:13) Ora nos ta pordonador, nos ta yuda mantené e unidad precioso di Jehova su organisacion.

Unidad i Decisionnan Personal

15. Kico ta yuda e pueblo di Jehova mantené unidad ora di tuma decisionnan personal?

¹⁵ Dios a duna nos un boluntad liber huntu cu e privilegio i responsabilidad pa tuma decisionnan personal. (Deuteronomio 30:19, 20; Galationan 6:5) Sin embargo, ta posibel pa nos mantené unidad pasobra nos ta cumpli cu e leynan i principionan di Bijbel. Nos ta tuma nan na consideracion ora nos ta tuma decisionnan personal. (Echonan 5:29; 1 Juan 5:3) Suponé cu ta surgi un cuestion tocante neutralidad. Nos por tuma un decision personal basá riba conocimentu cordando cu nos “no ta parti dje mundu” i cu nos a ‘bati nos spada na ploeg.’ (Juan 17:16; Isaías 2:2-4) Di manera similar, ora nos mester tuma un decision personal en cuanto nos relacion cu Estado, nos ta tuma na consideracion loke Bijbel ta bisa tocante paga bek “na Dios e cosnan di Dios,” miéntras cu nos ta someté nos mes na “e autoridadnan superior” den asuntunan seglar. (Lucas 20:25; Romanonan 13:1-7; Tito 3:1, 2) Sí, teniendo cuenta cu leynan i principionan di Bijbel ora nos ta tuma decisionnan personal ta yuda nos mantené nos unidad cristian.

16. Con nos por yuda mantené unidad ora di tuma decisionnan cu no ta enbolbé ley of principio di Bijbel? Ilustrá.

¹⁶ Nos por yuda mantené unidad cristian asta ora nos ta tuma un decision cu ta totalmente personal i cu no ta enbolbé un ley of principio di Bijbel. Con asina? Dor di mustra interes amoroso den otronan cu por ser afectá dor di nos decision. Pa ilustrá: Den e congregacion na Corinto di antigwedad, a surgi un cuestion relacioná cu carni sacrificá na ídolonan. Naturalmente, un cristian lo no a participá den un ceremonia di idolatria. Sin embargo, no tabata un picá pa come sobrá dje sorto di carni aki cu a ser bendé den un marshe público i di cua su sanger a ser dramá corectamente. (Echonan 15:28, 29; 1 Corintionan 10:25) No obstante, comementu dje carni aki a molestiá concenshi di algun cristian. P’esei Pablo a urgi otro cristiannan pa evitá di trompecá nan. Realmente, el a skirbi: “Si cuminda ta pone mi ruman trompecá, lo mi no bolbe come carni hamas, pa mi no pone mi ruman trompecá.” (1 Corintionan 8:13) Pues asta ora no tin ningun ley of principio di Bijbel enbolbí, ta ki amoroso pa tuma otronan na consideracion ora di tuma decisionnan personal cu lo por afectá e unidad dje famia di Dios!

17. Kico ta consehabel pa haci ora nos mester tuma decisionnan personal?

¹⁷ Si nos no ta sigur kico pa haci, ta sabí pa dicidí den un manera cu ta laga nos cu un concenshi limpi, i otronan mester respetá nos decision. (Romanonan 14:10-12) Naturalmente, ora nos tin cu tuma un decision personal, nos mester busca e guia di Jehova den oracion. Mescos cu e salmista, nos por haci oracion cu confiansa: “Incliná bo orea na mi. . . . Pasobra bo ta mi baranca skerpi i mi fortalesa; i pa causa di bo nomber lo bo guiá mi i conducí mi.”—Salmo 31:2, 3.

Semper Mantené Unidad Cristian

18. Con Pablo a ilustrá e unidad dje congregacion cristian?

¹⁸ Den 1 Corintionan capítulo 12, Pablo a usa e curpa humano pa ilustrá e unidad dje congregacion cristian. El a enfatisá interdependencia i e importancia di cada miembro. “Si nan tur tabata un solo miembro, unda e curpa lo tabata?” Pablo a puntra. “Pero awor nan ta hopi miembro, tog un solo curpa. E wowo no por bisa e man: ‘Mi no tin mester di bo’; of, atrobe, e cabes no por bisa e pia: ‘Mi no tin mester di bo.’ ” (1 Corintionan 12:19-21) Di manera similar, no ta nos tur den e famia di Jehova su adoradornan ta efectuá e mésun funcion. Sin embargo, nos ta uní, i nos un tin mester di otro.

19. Con nos por beneficiá dje percuracionnan spiritual di Dios, i kico un ruman di edad a bisa relacioná cu esaki?

¹⁹ Mescos cu e curpa tin mester di cuminda, cuido i guia, nos tin mester dje percuracionnan spiritual cu Dios ta duna nos mediante su Palabra, spiritu i organisacion. Pa beneficiá for dje percuracionnan aki, nos mester ta parti dje famia terenal di Jehova. Despues di hopi aña den sirbishi di Dios, un ruman homber a skirbi: “Mi ta masha gradicidu cu mi a biba segun e conocimentu disponibel di Jehova su propósitonan for dje dianan djis promé cu 1914 ora cu tur cos no tabata asina cla . . . te n’e dia aki cu e berdad ta briya mescos cu solo di merdia. Si tabatin un solo cos masha importante pa mi, esei tabata e asuntu di keda cerca e organisacion visibel di Jehova. Mi experencia di pasado a siñá mi ki robes ta pa dependé riba razonamentu humano. Una bes mi a dicidí riba e punto ei, mi a determiná pa permanecé cu e fiel organisacion. Di ki otro manera bo por haña e fabor i bendicion di Jehova?”

20. Kico nos mester ta determiná pa haci tocante nos unidad como e pueblo di Jehova?

²⁰ Jehova a yama su pueblo for dje scuridad i desunion dje mundu. (1 Pedro 2:9) El a trece nos den unidad bendicioná cu su mes i cu nos compañeronan creyente. E unidad aki lo existí den e sistema nobo di cosnan cu ta asina cerca awor. P’esei, den e último dianan crítico aki, laga nos sigui ‘bisti nos mes cu amor’ i haci tur loke nos por pa promové i mantené nos unidad precioso.—Colosensenan 3:14.

Con Lo Bo Contestá?

◻ Pakico hacimentu dje boluntad di Dios i pegamentu n’e berdad lo yuda nos mantené unidad?

◻ Con unidad ta relacioná cu e uso corecto dje lenga?

◻ Kico ta enbolbí den ser un hende cu ta pordoná?

◻ Con nos por mantené unidad ora di tuma decisionnan personal?

◻ Pakico nos tin cu mantené unidad cristian?

[Plachi na página 16]

Mescos cu e wardador aki ta tene su tou huntu, asina Jehova ta tene su pueblo uní

[Plachi na página 18]

Dor di pidi dispensa humildemente ora nos causa ofensa, nos ta yuda promové unidad