Warda Esaki

Bo Ta Usa e Foyetonan Akí?

Bida Ta Obra di un Kreador?

Spesialmente pa hende ku ta duda ku Dios ta eksistí

Kon pa ofres’é: “Den e mundu moderno akí, hopi hende ta kere ku evolushon ta un echo komprobá. Kiko ta bo opinion? [Permití e persona kontestá.] Hopi hende, despues ku nan a analisá un ke otro riba e punto akí, a yega na e konklushon ku fe den kreashon ta basá riba pruebanan sólido.” Lesa Hebreonan 11:1, referí na página 2 i ofresé e foyeto.

Purba esaki: Si e doño di kas tuma e foyeto, bis’é: “Lo mi ke bolbe serka bo pa nos analisá e pregunta ku tin na página 29: ‘Ta hasi un diferensia kiko bo ta kere?’”

Un Buki pa Tur Hende

Spesialmente pa hende bon siñá pero ku no sa mashá di Beibel

Kon pa ofres’é: Lesa 2 Timoteo 3:16 i 17. Anto bisa: “Bo ta di akuerdo ku Beibel ta inspirá di Dios? Òf bo ta pensa ku e ta djis un bon buki? [Permití e persona kontestá.] Nos a ripará ku mayoria di hende tin nan propio opinion tokante Beibel, pero masha poko di nan a les’é. [Lesa e eksperensia bou di e tema na página 3.] E foyeto interesante akí ta mustra pakiko ta bon pa hende di tur rasa i kredo tuma nota di loke Beibel ta kontené.”

Purba esaki: Si e doño di kas tuma e foyeto, bis’é: “Un motibu pakiko hopi hende ta pensa ku no tin sentido pa lesa Beibel ta e echo ku religion a desakreditá Beibel i su siñansanan. Ora mi bini bèk, lo mi mustra bo un ehèmpel.” Ora bo bai bèk, trata parti di e informashon na página 4 i 5.

Bo Por Ta Amigu di Dios

Spesialmente pa hende ku no tin hopi skol òf ku no por lesa bon

Kon pa ofres’é: “Bo ta kere ku hende por ta amigu di Dios? [Permití e persona kontestá. Despues lesa Santiago 2:23.] E foyeto akí lo mustra bo kon abo tambe por bira amigu di Dios, meskos ku Abraham.”

Purba esaki: Sea na e momento ei òf n’e siguiente bishita, trata lès 1 òf parti di dje pa mustra e doño di kas kon nos ta studia Beibel ku hende.

Kiko Ta Sosodé cu Nos ora Nos Muri?

Spesialmente pa budista i otro hende ku ta kere ku tin bida despues di morto

Kon pa ofres’é: “Algun hende ta kere ku despues di morto, hende ta pasa pa un otro bida; otronan ta kere ku morto ta fin di tur kos. Abo ta kere ku nos mester tin miedu di morto? [Permití e persona kontestá.] Wak kiko Yòb a bisa ora el a sinti ku e tabata serka di muri. [Lesa Yòb 14:14 i 15.] Beibel ta siña nos kiko ta pasa ku nos ora nos muri. I e foyeto akí ta splika bo esei bon kla.”

Purba esaki: Na final di e promé bishita, pidi e doño di kas pa skohe un di e preguntanan na página 32. Kaba, traha afsprak pa analisá e kontesta ku e foyeto ta duna.

Hamas Lo Yega di Tin un Mundu Sin Guera?

Spesialmente pa hudiu

Kon pa ofres’é: “Atraves di historia humanidat a sufri hopi pa kousa di guera. Aunke hende ta boga pa pas, dikon bo ta kere te ainda tin guera? [Permití e persona kontestá.] E profesia di Isaías ta duna nos speransa. [Lesa Isaías 2:4.] Pero na mes momento ta lanta algun pregunta: Na ki tempu i kon e profesia di Isaías lo kumpli? Dikon nos por mira e Skritura Santu komo un fuente konfiabel di speransa? E foyeto akí lo kontestá e preguntanan ei.”

Purba esaki: Si e doño di kas tuma e foyeto, mustr’é página 16 i 17 i bis’é: “Hopi hende ta referí na susesonan teribel, manera e Holokousto, i ta puntra: ‘Si Dios ta eksistí, dikon e ta permití sufrimentu?’ Nos lo por papia riba esei na mi siguiente bishita.”

Bo Mester Kere den Trinidad?

Spesialmente pa hende ku ta konfundí tokante e doktrina di Trinidat

Kon pa ofres’é: “Hende tin diferente punto di bista enkuanto kon Dios ta realmente. Kiko abo ta pensa? Ta importá loke bo ta kere? [Permití e persona kontestá.] Mira kiko Hesus a bisa tokante esaki.” Lesa Huan 17:3. Despues, lesa paragraf 3 na página 3 i ofresé e foyeto.

Purba esaki: Si e doño di kas tuma e foyeto, bis’é: “Si Trinidat no ta un siñansa bíbliko, kon bin el a bira un doktrina di iglesia? E siguiente biaha ku mi bishitá bo, nos lo por papia riba e punto ei.” Ora bo bai bèk, trata parti di e informashon bou di e tema na página 7.

Keda Vigilá!

Spesialmente pa hende preokupá ku e kondishon aktual di mundu

Kon pa ofres’é: “Hopi hende ta preokupá ku e problemanan serio i susesonan spantoso ku ta asotá mundu kompleto awe. [Menshoná un ehèmpel konosí lokalmente.] Bo tabata sa ku e kosnan ei ta parti di un señal ku ta indiká ku e gobièrnu di Dios pronto lo intervení den asuntunan humano? [Permití e persona kontestá. Kaba, lesa un teksto apropiá, manera Mateo 24:3, 7 i 8; Lukas 21:7, 10 i 11 òf 2 Timoteo 3:1-5.] E foyeto akí ta splika dikon ta mas urgente ku nunka pa nos komprondé kiko e susesonan akí ta nifiká.”

Purba esaki: Si e doño di kas tuma e foyeto, bis’é: “Pakiko bo ta kere ku bo tin ku tuma e spièrtamentunan akí na serio? [Mustr’é página 20 i 21.] Ora mi bishitá bo atrobe, nos lo por trata e kontesta riba e pregunta ei a base di e informashon akí.”

The Bible​—What Is Its Message?

Spesialmente pa hende ku no sa mashá di Beibel, foral esnan di religion ku no ta kristian

Kon pa ofres’é: “Nos tin gana di sa kiko bo ta pensa di loke e Buki Sagrado akí ta trese dilanti. [Lesa Salmo 37:11, ku ta aparesé den sekshon 11.] Kon bo ta kere mundu lo bira ora e profesia akí kumpli? [Permití e persona kontestá.] Esaki ta djis un ehèmpel di e speransa i konsuelo ku Beibel ta duna hende di tur kultura i kredo.” Lesa e introdukshon na página 3 i ofresé e foyeto.

Purba esaki: Si bo ta usando e buki Beibel Ta Siña pa duna estudio di Beibel na un hende di un religion ku no ta kristian, tuma un par di minüt na komienso òf final di kada estudio pa trata un sekshon di e foyeto akí. Esei por dun’é un idea general di loke tin den Beibel.

Our Problems​—Who Will Help Us Solve Them?

Spesialmente pa hindú

Kon pa ofres’é: “Hopi hende ku nos a papia kuné ta masha preokupá ku e maldat ku nan ta mira den e mundu akí. Abo ta kere ku un dia Dios lo kaba ku e problemanan aktual di mundu? [Permití e persona kontestá.] E profesia akí ta duna nos speransa. [Lesa Salmo 37:11.] Loke mi a kaba di lesa ta for di Beibel, un buki ku hopi bes hende a mal interpretá i hasi mal uso di dje. Lo bo keda sorprendí pa sa ku Beibel no ta un buki pa merikano òf europeo. Tampoko e no ta promové kolonialismo ni halsa un rasa riba otro. Mas bien, e ta duna nos speransa ku pronto Dios lo kaba ku tur nos problemanan. Tambe e tin prinsipionan ku por yuda nos trata ku nos problemanan for di awor. E foyeto akí ta duna bo mas informashon.”

Purba esaki: Na un siguiente bishita, despues di lanta e doño di kas su interes den Beibel, mustr’é e plachinan na página 4 i 5 den e buki Beibel Ta Siña. Lesa por lo ménos un di e tekstonan sitá i ofresé e buki.

Real Faith​—Your Key to a Happy Life

Spesialmente pa mòslem ku ta biba den un komunidat kaminda nan por sinti nan liber pa studia Beibel.

Kon pa ofres’é: Mustra e persona e plachi na página 16 i 17 i bis’é: “Mundu ta hopi diferente for di e plachi akí, pero bo ta kere ku un dia lo e bira asin’akí? [Permití e persona kontestá.] Tuma nota di loke e buki di Dios akí ta primintí. [Lesa un di e tekstonan sitá for di bo Beibel.] E foyeto akí ta yuda nos kultivá berdadero fe ku e promesanan akí lo kumpli.”

Purba esaki: Na final di e promé bishita, pidi e doño di kas skohe un di e preguntanan na página 32. Kaba, traha afsprak pa huntu boso analisá e kontesta ku e foyeto ta duna.

A Satisfying Life​—How to Attain It

Spesialmente pa hende ku no tin un formashon religioso

Kon pa ofres’é: “Nos ta bishitá bo awe pasobra nos a ripará ku hopi hende ke hiba un bida mas felis. Nos tur ta konfrontá problema ku por hasi nos tristu. Ora nos ta sinti nos asina, kisas nos ta buska konseho serka un famia òf amigu ku nos ta konfia, òf den biblioteka òf riba Internet. Unda abo ta kere nos por haña e mihó konseho? [Permití e persona kontestá.] Algun hende a keda asombrá di haña konseho práktiko den Beibel. Wak un ehèmpel akí. [Mustra e doño di kas kapítulo 2, anto lesa un di e tekstonan sitá.] E foyeto akí ta splika nos kon nos por hiba un bida mas felis.”

Purba esaki: Si e doño di kas tuma e foyeto, bis’é: “Hopi hende a tende ku Beibel tin yen di kos ku no ta kuadra. Ora mi bini bèk, lo mi ke mustra bo un ehèmpel di kon eksakto Beibel ta riba tereno di siensia. Lo bo keda fasiná.” Ora bo bai bèk, trata paragraf 4 na página 12.

Lasting Peace and Happiness​—How to Find Them

Spesialmente pa chines

Kon pa ofres’é: “Awe tin yen di kos den bida ku por kita nos felisidat. Kiko por yuda bo ser felis apesar di problema? [Permití e persona kontestá.] Hopi hende a haña felisidat ora nan a sigui e konsehonan di Beibel. [Lesa Salmo 119:1 i 2.] Algun hende no ta kere den Beibel pasobra nan ta bisa ku e ta un buki pa merikano i europeo. Pero skucha esaki. [Lesa paragraf 16 na página 17.] E foyeto akí ta mustra kon nos por haña pas i felisidat duradero.”

Purba esaki: Si e doño di kas tuma e foyeto, lesa huntu kuné e promé tres frasenan di paragraf 18 na página 17 i bis’é: “Ora mi bolbe, lo mi ke mustra bo kiko nos por spera den futuro segun Beibel.” Na e siguiente bishita, trata un di e puntonan di paragraf 6 na página 30.