Kon pa Usa e Foyeto Dios Tin Bon Notisia pa Nos!
Diseñá pa Yuda Nos Hasi Rebishita i Kuminsá Estudio di Beibel
1. Ki publikashon nobo nos a risibí na e Kongreso di Distrito “Protehá Bo Kurason!” pa yuda nos hasi rebishita i kuminsá estudio di Beibel?
1 Nos a keda masha kontentu ora nos a risibí na nos Kongreso di Distrito “Protehá Bo Kurason!” un publikashon nobo pa yuda nos hasi rebishita i kuminsá estudio di Beibel. E foyeto Dios Tin Bon Notisia pa Nos!, ku su lèsnan kòrtiku i al kaso, ta remplasá e foyeto Rekerí. Ademas, nos por usa e foyeto akí pa kuminsá estudio di Beibel na porta. Miéntras e foyeto Rekerí ta enfoká riba normanan kristian ku por ta difísil pa un studiante nobo aseptá, e foyeto nobo akí ta enfoká riba e bon notisia ku tin den Beibel.—Echo. 15:35.
2. Dikon a produsí e foyeto Bon Notisia?
2 Dikon un foyeto nobo? Rumannan rònt mundu a bini ta pidi pa algu simpel ku por lanta interes di un hende i dun’é gana di studia e buki Beibel Ta Siña, nos hèrmènt prinsipal pa estudio di Beibel. I hopi hende ta mas dispuesto pa studia Beibel for di un foyeto ku for di un buki. Ademas, ta mas fásil pa tradusí un foyeto den un gran kantidat di idioma.
3. Kiko ta hasi e foyeto akí diferente for di e otro publikashonnan di estudio?
3 Su Diseño: Mayoria di nos publikashonnan di estudio ta skirbí di tal manera ku un hende por lesa nan i komprondé e bèrdat riba su mes. Pero e foyeto akí ta diferente; e persona interesá mester studi’é ku yudansa di un maestro. P’esei, ta bon pa ora nos ofres’é nos trata un òf dos paragraf ku e persona. Komo ku e paragrafnan ta kòrtiku, por studi’é ku e persona na su porta di kas òf na su trabou. Aunke lo ta bon pa kuminsá na e promé lès, nos por kuminsá un estudio na kualke un di e lèsnan.
4. Kon e foyeto ta yuda nos siña e studiante direktamente for di Beibel?
4 Den hopi di nos publikashonnan, un persona por haña e kontesta di e pregunta imprimí den e paragraf ku el a kaba di lesa. Sinembargo, den e foyeto akí e kontestanan ta prinsipalmente den Beibel. Mayoria di hende ta preferá siña direktamente for di Beibel i no for di nos literatura. Ta p’esei kasi niun di e tekstonan bíbliko menshoná ta sitá. E idea ta pa e studiante lesa nan for di Beibel i asina mira ku loke e ta siña ta bini for di Dios.—Isa. 54:13.
5. Dikon ta importante pa e maestro prepará bon promé ku kada seshon di estudio?
5 E foyeto no ta splika tur e tekstonan tampoko. Dikon nò? A hasié pa motivá e studiante pa hasi pregunta i pa laga e maestro usa su kapasidat di siña. P’esei, ta importante pa prepará bon promé ku kada seshon di estudio. Pero tene kuenta sí pa no papia hopi. Aunke komo Testigu di Yehova nos gusta splika tekstonan bíbliko, ta mihó nos laga e studiante splika kiko el a komprondé di un teksto. Nos por usa preguntanan bon pensá pa yud’é komprondé kiko kada teksto ta bisa.—Echo. 17:2.
6. Kon nos por usa e foyeto: (a) kaminda hende no ta kere den Dios òf den Beibel? (b) ora di prediká di kas pa kas? (c) ora di ofresé un estudio di Beibel ku e método direkto? (d) ora di hasi rebishita?
6 Meskos ku otro publikashonnan di estudio, nos por ofresé e foyeto akí tur momento, maske e no ta e oferta di luna. Hopi publikadó lo ta kla pa usa e método direkto ku e foyeto akí pa kuminsá estudio di Beibel na porta. Ademas, manera nos a skucha na e kongreso di distrito, “e foyeto akí di bèrdat ta duna bo smak di hasi rebishita!”—Wak e kuadronan na página 5-7.
7. Kon nos por usa e foyeto pa studia ku un hende?
7 Kon pa Kondusí e Estudio: Nos por kuminsá na lesa e pregunta numerá ku ta aparesé ku lèter diki i e paragrafnan korespondiente. Despues nos por buska e tekstonan menshoná ku tin “lesa” nan dilanti den Beibel i pa medio di pregunta trata na yuda e persona komprondé kiko e tekstonan akí ta bisa. Anto, promé ku nos bai na e siguiente sekshon, nos por bolbe hasi e pregunta ku lèter diki pa hasi sigur ku e persona a komprondé e punto bon. Na e promé bishitanan ta mihó nos trata solamente ún di e preguntanan ku lèter diki. Ku tempu, nos por hasi e estudio mas largu te ora nos por trata henter un lès.
8. Kon nos mester introdusí e tekstonan bíbliko, i dikon?
8 E tekstonan menshoná ku tin “lesa” nan dilanti ta esnan ku ta kontestá e pregunta ku lèter diki mas direktamente. Ora nos ta bai lesa un teksto bíbliko, nos mester evitá di bisa “apòstel Pablo a skirbi” òf, “tuma nota di loke e profesia di Yeremías ta bisa,” ya ku e persona por pensa ku nos ta sitando palabra di hende. Lo ta mihó pa bisa: “E Palabra di Dios ta bisa” òf, “tuma nota kiko Beibel a profetisá.”
9. Nos mester lesa tur teksto ku tin den e paragrafnan?
9 Nos mester lesa tur e tekstonan menshoná òf solamente esnan ku tin “lesa” nan dilanti? Esei ta dependé di e sirkunstansianan. Tur teksto menshoná t’ei pa un motibu. Kada un di nan tin informashon ku ta bale la pena pa trata. Pero, si e studiante no tin hopi tempu, no ta masha interesá òf no ta lesa bon, kisas ta mihó nos buska solamente e tekstonan ku tin “lesa” nan dilanti.
10. Ki ora nos por pasa pa e buki Beibel Ta Siña?
10 Ki Ora Nos Por Pasa pa e Buki Beibel Ta Siña? Ora un persona ta studia regularmente, nos por opta pa pasa pa e buki Beibel Ta Siña òf sigui den e foyeto Bon Notisia te ora nos kaba kuné. Publikadónan por usa disernimentu pa disidí na ki momento ta bon pa hasi e kambio. Ora nos pasa pa e buki Beibel Ta Siña, nos mester kuminsá na e promé kapítulo? No tin un regla pa esei ya ku kada studiante ta diferente. Sinembargo, lo ta bon pa e studiante repasá e mesun temanan atrobe, bayendo mas den detaye den e buki Beibel Ta Siña.
11. Dikon nos mester hasi bon uso di e foyeto akí?
11 Den un mundu dominá pa mal notisia, nos tin e gran privilegio di deklará e mihó notisia ku tin: e Reino di Dios ta goberná i un bes aki lo e trese un mundu nobo kaminda hustisia ta biba. (Mat. 24:14; 2 Ped. 3:13) Nos tin sigur ku hopi di esnan ku skucha e mensahe akí lo ta di akuerdo ku e palabranan inspirá: ‘Ki bunita riba e serunan ta e pianan di esun ku ta trese bon notisia, ku ta anunsiá pas i ta trese bon notisia di felisidat, ku ta anunsiá salbashon i ku ta bisa Sion: “Bo Dios ta reina!”’ (Isa. 52:7) Laga nos hasi bon uso di e foyeto akí pa hiba bon notisia di parti di Dios na hende ku tin set spiritual.
[Kuadro na página 5]
Pa Usa Kaminda Hende No Ta Kere den Dios òf den Beibel:
● Eksperensia a demostrá ku den algun área hende no ke skucha ora nos usa palabranan manera “Dios” òf “Beibel.” Den e teritorionan ei ta mihó nos kuminsá papia riba kosnan ku ta preokupá e komunidat, manera e nesesidat di un bon gobièrnu, unda famianan por haña yudansa práktiko i kiko futuro lo trese kuné. Nos por introdusí e foyeto Bon Notisia despues ku nos a kòmbersá vários biaha ku e persona i demostr’é ku Dios ta eksistí i ku su Palabra ta konfiabel.
[Kuadro na página 6]
Pa Usa di Kas pa Kas:
● “Hopi hende ta puntra nan mes kiko Dios tin na mente pa futuro di humanidat. Lo mi ke mustra bo kon fásil bo por haña sa esei. Por ehèmpel, bo ta kere ku Dios lo libra nos di tur sufrimentu? [Permití e persona kontestá.] E foyeto akí ta yuda bo haña e kontesta pa e pregunta ei den bo mes Beibel. [Dun’é un foyeto, anto lesa tantu e promé paragraf di lès 1 komo Yeremías 29:11.] For di loke nos a kaba di lesa, no ta opvio ku Dios ke pa nos tin un mihó futuro? [Permití e persona kontestá.] Bo por keda ku e foyeto. Anto otro biaha nos por trata e di dos paragraf pa haña e kontesta ku Beibel ta duna riba e pregunta: ‘Kon Dios lo libra hende di tur loke ta kousa sufrimentu?’” Si e persona tin mas tempu, bo por lesa i trata e di dos paragraf i e tres tekstonan di Beibel. Traha un afsprak pa trata e di dos pregunta di e lès.
● “Hopi bes nos ta aserká Dios den orashon, foral ora nos tin problema, no ta bèrdat? [Permití e persona kontestá.] Bo ta kere ku Dios ta skucha tur orashon, òf tin orashon ku ta desagrad’é? [Permití e persona kontestá.] Mi tin un foyeto aki ku ta mustra unda den Beibel nos por haña kontesta riba e preguntanan ei. [Entreg’é un foyeto, i trata kuné e promé paragraf di lès 12 i e tekstonan ku tin “lesa” nan dilanti.] Bo no ta kontentu pa sa ku Dios ke pa nos aserk’é den orashon? Pero pa nos por disfrutá plenamente di e privilegio akí, nos mester konosé Dios bon. [Bai na lès 2 i indiká kada suptema.] Si bo ke, mi por laga e foyeto akí pa bo i na un otro okashon nos por lesa e kontestanan ku Beibel ta duna riba e preguntanan interesante akí.”
● “Hopi hende ta puntra nan mes kiko ta bai para di e mundu akí. Bo ta kere ku kos lo drecha un dia? [Permití e persona kontestá.] Bo tabata sa ku den Beibel tin bon notisia ku ta duna nos speransa? Wak algun pregunta ku Beibel ta kontestá.” Dun’é un foyeto i pidié skohe for di e último página di e foyeto un pregunta ku ta interes’é. Despues bai na e lès ku el a skohe i demostr’é kon nos ta studia Beibel ku hende. Traha un afsprak pa bo bolbe i trata e siguiente pregunta di e lès.
[Kuadro na página 7]
Pa Usa ku e Método Direkto:
● “Mi ta di bishita pa demostrá bo un kurso nobo pa studia Beibel. E foyeto akí tin 15 lès ku ta mustra unda den Beibel bo por haña kontesta pa preguntanan masha importante. [Mustr’é e parti dilanti i e parti patras di e foyeto.] Abo a yega di purba komprondé Beibel? [Permitié kontestá.] Laga mi mustra bo kon fásil e lèsnan ta. [Trata e promé paragraf di pregunta 3 di lès 3, i lesa Revelashon 21:4 i 5. Si tin posibilidat, trata e siguiente paragraf i e tekstonan pa “lesa.”] Si bo ta deseá, mi ta laga e foyeto akí pa bo. Nos ta animá bo pa bo purba sikiera ún lès. Si bo gusta, bo por sigui ku e kurso. E próksimo biaha nos por trata e promé lès ku ta un página so.”
[Kuadro na página 7]
Pa Usa Ora di Hasi Rebishita:
● Ora nos bolbe bishitá un persona ku a mustra interes, nos por bis’é: “Mi ta kontentu di topa bo atrobe. Mi a trese e foyeto akí ku ta kontestá hopi pregunta interesante ku tekstonan bíbliko. [Dun’é un foyeto i pidié wak e último página.] Kua di e tópikonan akí ta interesá bo mas? [Permitié kontestá. Despues bai na e lès ku el a skohe.] Laga mi mustra bo kon por usa e foyeto akí pa haña e kontesta ku Beibel ta duna riba e pregunta ei.” Pa demostrá kon nos ta studia Beibel ku hende, trata un òf dos paragraf i e tekstonan ku tin “lesa” nan dilanti. Asina fásil bo a kuminsá un estudio! Laga e persona ku e foyeto i traha afsprak pa bolbe. Ora bo kaba di konsiderá e lès, laga e persona skohe un otro tema òf kuminsá for di padilanti.