Usa e Website jw.org den Sirbishi: “Bira Amigu di Yehova”

Riba jw.org tin vidio pa mucha ku yama “Bira Amigu di Yehova.” Abo a yega di usa e vidionan ei den sirbishi? Por ehèmpel, bo por mustr’é na un studiante di Beibel ku tin yu chikí. Kisas esei por dun’é gana di bai wak otro sekshon di jw.org.

Ora un ruman hòmber a duna un señora un ehemplar di e Notisia di Reino Num. 38, e señora a kuminsá lesa e tratado mesora. E yunan di e señora tambe tabata ke sa kiko e tratado ta bisa. E ora ei, e ruman brevemente a konta nan di kiko e tratado ta papia i a mustra nan e adrès di nos website ku tin parti patras. Mirando ku e señora a mustra interes, e ruman a usa su smartphone pa laga nan tur wak un di e vidionan di Kalèb.

Un ruman muhé a konta un kolega ku tin yu chikí tokante jw.org anto di e informashon ku tin riba dje pa famia. E señora a bai riba e website huntu ku su yunan. Despues, el a konta e ruman ku na kas tur ora e yunan ta kanta “Prediká!,” un di e kantikanan riba nos website.

Pues lo ta bon pa nos familiarisá nos mes ku e vidionan akí i baha nan riba nos smartphone òf tablet. Asina nos por usa nan den sirbishi. Nan ta útil pa yuda nos sirbi manera esklabo pa Señor.—Echo. 20:19.