Kon pa Pone Metanan Spiritual i Logra Nan

 1. Ki metanan spiritual nos por pone?

NOS komo kristiannan berdadero ta stima Yehova masha hopi mes. P’esei, nos ke dun’é lo mihó den tur loke nos ta hasi p’e. Pero pa nos por hasi esei, nos mester pone metanan spiritual, manera kultivá kualidatnan kristian, siña abilidatnan nobo i buska maneranan pa yuda nos rumannan.b

 2. Dikon nos mester pone metanan spiritual i hasi esfuerso pa logra nan?

² Dikon nos mester pone metanan spiritual i hasi nos esfuerso pa logra nan? Pasobra, na promé lugá nos ke agradá nos Tata den shelu ku ta stima nos masha hopi mes. Yehova ta keda kontentu ora e mira ku nos ta usa tur nos talento- i abilidatnan pa sirbié. Ademas, nos ke pone metanan spiritual di manera ku nos por yuda nos rumannan mas mihó. (1 Tes. 4:9, 10) Sea ku nos tin hopi òf tiki tempu den e bèrdat, nos tur por pone metanan spiritual. Laga nos wak kon nos por hasi esei.

 3. Segun 1 Timoteo 4:12-16, kiko Apòstel Pablo a animá Timoteo pa hasi?

³ Aunke Timoteo tabata un hóben ainda ora Apòstel Pablo a skirbi su promé karta na dje, Timoteo ya tabatin eksperensia komo ansiano. Ma tòg Pablo a anim’é pa sigui pone metanan spiritual. (Lesa 1 Timoteo 4:12-16.) Segun ku bo ta pensa riba e palabranan di Pablo, lo bo ripará ku e tabata ke pa Timoteo sigui hasi progreso den dos manera. E mester a kultivá kualidatnan kristian manera amor, fe i puresa i tambe mehorá den abilidatnan manera lesamentu den públiko dunamentu di animashon i siñansa. Nos lo bai analisá e ehèmpel di Timoteo pa wak kon ora nos pone metanan ku nos por logra, esei lo yuda nos bira mihó sirbidónan di Yehova. Tambe nos lo bai wak den ki maneranan nos por hasi mas den nos sirbishi.

 4. Segun Filipensenan 2:19-22, dikon Timoteo tabata útil pa Yehova?

⁴ Dikon Timoteo tabata útil pa Yehova? Pasó e tabatin bunita kualidatnan kristian. (Lesa Filipensenan 2:19-22.) Fo’i loke Pablo a bisa di Timoteo, nos por mira ku e tabata humilde, leal, trahadó i konfiabel. E tabata stima su rumannan mashá i tabata preokupá pa nan. Pa e motibunan ei Pablo tabata stima Timoteo i no a duda pa konfi’é ku asignashonnan difísil. (1 Kor. 4:17) Di mes manera, si nos kultivá e kualidatnan ku Yehova ta gusta, lo e stima nos i lo usa nos mas den kongregashon.—Sal. 25:9; 138:6.

 5. (a) Kon bo por disidí kua kualidat kristian bo tin ku mehorá? (b) Kiko e ruman riba e plachi ta hasi pa mustra mas empatia?

⁵ Pone un meta spesífiko. Hasi orashon i pensa riba ki kualidatnan di bo personalidat bo tin ku mehorá. Awor, skohe un di nan ku bo ke traha riba dje. Por ehèmpel, lo bo por mustra mas empatia òf haña mas gana pa yuda bo rumannan? Lo bo por bira un hende mas pasífiko òf mas dispuesto pa pordoná otro? Kisas lo ta bon pa puntra un amigu di konfiansa algun sugerensia ku por yuda bo mehorá.—Pro. 27:6.

 6. Kon nos por kultivá un sierto kualidat?

⁶ Hasi esfuerso pa logra bo meta. Kon bo por hasi esei? Un manera ta di hasi estudio personal riba e kualidat ku bo ke mehorá. Ban bisa ku bo ke ta mas dispuesto pa pordoná otronan. Kuminsá ku lesa i meditá riba hendenan den Beibel ku a pordoná libremente i esnan ku no a hasi esei. Tuma Hesus komo ehèmpel. El a pordoná otronan libremente. (Luk. 7:47, 48) E no a focus riba nan fayonan, pero mas bien riba loke nan por logra. Di otro banda, e fariseonan “tabata menospresiá otro hende.” (Luk. 18:9) Despues di meditá riba e ehèmpelnan ei, hasi bo mes e siguiente preguntanan: ‘Kiko mi ta mira den otro hende? Kua di nan kualidatnan mi ta skohe pa focus riba dje?’ Si bo ta haña ta difísil pa pordoná un hende, traha un lista di tur e bon kualidatnan ku bo ta mira ku e hende ei tin. Djei puntra bo mes: ‘Ki Hesus ta pensa di e hende akí? Lo e pordon’é?’ Un estudio personal asina por yuda bo kambia bo manera di pensa. Kisas na promé instante tòg lo ta un tiki difísil pa pordoná un hende ku a hùrt nos. Pero si nos keda hasi esfuerso, ku tempu lo bira mas fásil pa pordoná.

 7. Kon awendia Yehova ta usa rumannan ku ta ábil den nan trabou? (Proverbionan 22:29)

⁷ Un otro meta ku bo por pone ta di siña un abilidat nobo. Por ehèmpel, pensa riba e kantidat di trahadónan ku mester pa konstrukshon di Bètel, Salòn di Asamblea i Salòn di Reino. Hopi di e rumannan akí a siña e abilidatnan ei pasobra nan a traha huntu ku otro rumannan ku tabatin mas eksperensia den esei. Manera nos ta mira riba e plachi, tantu ruman hòmbernan komo ruman muhénan por siña kon pa mantené Salòn di Reino i Salòn di Asamblea. Di e manera akí i tambe na otro maneranan, Yehova Dios, “e Rei di eternidat,” i Kristu Hesus, “Rei di esnan ku ta goberná komo rei,” ta usa rumannan ku ta ábil den nan trabou pa hasi kosnan maravioso. (1 Tim. 1:17; 6:15; lesa Proverbionan 22:29.) Nos tambe ke traha duru i usa nos abilidatnan pa glorifiká Yehova, i no nos mes.—Huan 8:54.

 8. Kon nos por sa kua abilidat nos tin ku mehorá?

⁸ Pone un meta spesífiko. Kua abilidat lo bo tin gana di mehorá? Bo por papia ku bo ansianonan i kisas ku bo superintendente di sirkuito pa nan yuda bo mira kua abilidat bo por mehorá. Ban bisa nan konsehá bo pa mehorá den bo dunamentu di siñansa. Puntra nan kiko spesífikamente bo tin ku traha riba dje. Djei, hasi bo esfuerso pa mehorá. Kon bo por logra esei?

 9. Si bo ke bira un bon maestro, kon bo por logra e meta ei?

⁹ Hasi esfuerso pa logra bo meta. Ban bisa bo ke bira un mihó maestro. Si ta asina, tuma tempu pa studia e foyeto Dediká Bo Mes na Lesamentu i na Dunamentu di Siñansa. Ora bo haña un parti pa e reunion di den siman, bo por pidi un ruman ku eksperensia pa skucha bo parti promé ku bo dun’é i pa duna bo sugerensia kon pa mehorá. Prepará bo partinan adelantá, ya asina bo ta demostrá ku bo ta trahadó i ku bo ta konfiabel.—Pro. 21:5; 2 Kor. 8:22.

10. Kon e ehèmpel di Garry ta mustra ku nos por mehorá den un abilidat?

¹⁰ Ban bisa ku e abilidat ku bo ke mehorá no ta bo punto fuerte. No desanimá! Un ruman ku yama Garry no por a lesa bon. E ta kòrda kuantu bèrgwensa e tabata sinti ora e mester a lesa na reunion. Pero, e no a entregá. El a sigui hasi esfuerso pa mehorá. Awor e ta bisa ku ta debí na e entrenamentu ku el a haña, e por duna diskurso na reunion, na asamblea di sirkuito i na kongreso!

11. Meskos ku Timoteo, kiko nos tin ku hasi si nos ke hasi mas pa Yehova den kongregashon?

¹¹ Kon a para ku Timoteo? El a logra bira un bon diskursante òf un maestro ekselente? Beibel no ta bisa. Pero debí ku el a sigui e konseho di Pablo, sin duda e por a kumpli mas mihó ku su asignashonnan. (2 Tim. 3:10) Di mes manera, si nos mehorá nos abilidatnan, nos lo por hasi mas pa Yehova den kongregashon.

12. Kon otro ruman a yega di yuda bo?

¹² Nos ta sinti nos masha kontentu ora nos rumannan yuda nos. Por ehèmpel, ora nos ta den hospital, nos ta apresiá ora nos haña bishita di un ansiano ku ta forma parti di sea e Komité di Kontakto ku Hospital òf e Grupo di Bishitá Pashènt. I ora nos ta pasa den momentonan difísil den nos bida, nos ta keda masha kontentu ora un ansiano ta saka tempu pa skucha i konsolá nos. I ora nos mester yudansa pa dirigí un estudio di Beibel, nos ta keda masha felis ora un pionero ku eksperensia ta kompañá nos i ta duna nos sugerensia pa mehorá. Hesus a bisa: “Tin mas felisidat den duna ku den risibí.” (Echo. 20:35) Tur e rumannan ei ta sinti e felisidat ei ora nan yuda otronan. Anto nos tambe por sinti e felisidat ei si nos hasi meskos. Si abo tambe tin e meta pa hasi mas pa Yehova yudando bo rumannan òf den kualke otro manera, kiko por yuda bo logra esei?

13. Kiko nos tin ku tene kuenta kuné ora di pone meta?

¹³ No pone metanan ku no ta spesífiko. Por ehèmpel, kisas bo ta pensa: ‘Mi tin gan’i hasi mas den kongregashon.’ Pero, e meta ei no ta spesífiko i ta masha difísil pa bo sa unda pa kuminsá i kasi imposibel pa sa si b’a logr’é òf nò. Pues, ta masha importante pa ta spesífiko ora di pone meta. Bo por asta pone bo meta riba papel i traha un plan kon pa logr’é.

14. Dikon nos mester ta fleksibel ora nos pone meta?

¹⁴ Ora nos pone meta, nos mester ta fleksibel tambe. Dikon? Pasobra nos sirkunstansia por kambia. Por ehèmpel: Apòstel Pablo a yuda forma un kongregashon nobo na Tesalónika. I sin duda, su meta tabata pa keda einan i yuda e rumannan ei. Pero debí na oposishon, e mester a bandoná e stat. (Echo. 17:1-5, 10) Si el a keda tòg, e por a pone bida di su rumannan na peliger. Pero, e no a laga esei strob’é di purba yuda nan. Mas bien, el a adaptá na su sirkunstansia. Mas despues, el a manda Timoteo fortalesé fe di e rumannan nobo na Tesalónika. (1 Tes. 3:1-3) Esta kontentu e rumannan ei tabata ora ku nan a mira ku Timoteo tabata dispuesto pa yuda kaminda tabatin mester!

15. Ki nos tin ku hasi ku nos metanan debí na kambio di sirkunstansia? Duna un ehèmpel.

¹⁵ Nos por siña hopi for di loke a pasa ku Pablo na Tesalónika. Kisas nos ta pone un meta pa logra un sierto privilegio, pero diripiente nos sirkunstansia ta kambia i nos no por logra e meta ei. (Ekl. 9:11) Den un kaso asina, sea dispuesto pa adaptá i pone un otro meta ku sí bo por logra. Esei ta nèt loke Ted i su kasá Hiedi a hasi. Debí na problema ku salú, nan no por a keda na Bètel. Pero dor ku nan tabata stima Yehova hopi, mesora nan a buska otro maneranan pa hasi mas p’e. Promé, nan a kuminsá traha pionero regular. Ku tempu, nan a bira pionero spesial i Ted a haña entrenamentu pa bira superintendente di sirkuito supstituto. Pero e ora ei, e edat máksimo pa ta superintendente di sirkuito a kambia. Ted ku Hiedi a ripará ku nan no por a logra e meta ei mas. Aunke nan tabata desapuntá, nan tabata sa ku nan por a sirbi Yehova na otro manera sí. Ted a bisa: “Nos a siña ku nos por sirbi Yehova na mas ku un manera.”

16. Kiko nos ta siña for di Galationan 6:4?

¹⁶ Nos no tin kontrol riba tur loke ta pasa den nos bida. P’esei, ta masha importante pa nunka nos pensa ku nos asignashon òf privilegio ta determiná kon útil nos ta pa Yehova. Tampoko nos no mester kompará nos asignashon òf privilegio ku esnan di otro ruman. Hiedi a bisa: “Lo bo no ta felis si bo ta kana kompará bo bida ku bida di otronan.” (Lesa Galationan 6:4.) P’esei ta masha importante pa nos sigui buska maneranan di sirbi Yehova i yuda otronan.c

17. Kiko bo por hasi si bo ke hasi mas pa Yehova?

¹⁷ Pa bo por hasi mas pa Yehova, ta importante pa bo mantené bo bida simpel i evitá debe innesesario. Pone metanan chikitu ku lo yuda bo logra metanan mas grandi. Por ehèmpel, si bo meta ta pa bira pionero regular, purba for di aworakí pa sirbi komo pionero ousiliar riba base regular. Òf si bo tin meta di bira sirbidó ministerial, hasi bo esfuerso pa pasa mas tantu tempu den sirbishi i bishitá e rumannan den bo kongregashon ku ta malu òf di edat. E eksperensia ku bo ta gana aworakí por yuda bo ku e privilegionan ku lo bo haña den futuro. P’esei, sea determiná pa hasi bo bèst den kualke asignashon ku bo tin aworakí.—Rom. 12:11.

18. Manera e plachi ta mustra, kiko nos por siña for di Beverley?

¹⁸ Nos no mester pensa nunka ku nos ta muchu bieu pa pone metanan spiritual. Wak e ehèmpel di Beverley di 75 aña. E tabatin problema serio ku salú anto e no por a kana bon. Pero, e tabatin masha gana di partisipá den e kampaña di Memorial. Pues, el a pone metanan spesífiko. E tabata masha felis mes ora el a logra su metanan pa e kampaña. I e esfuersonan ku el a hasi a motivá otro ruman pa nan tambe hasi mas pa Yehova. Yehova ta balorá mashá tur e trabou ku nos rumannan di edat ta hasi, asta si nan sirkunstansia ta pone ku nan no por hasi hopi.—Sal. 71:17, 18.

19. Ki ta algun meta spiritual ku bo por pone?

¹⁹ Pone metanan ku bo por logra. Kultivá kualidatnan ku ta agradá Yehova. Siña abilidatnan nobo ku ta hasi bo mas útil pa Dios i pa su organisashon. Buska maneranan pa yuda bo rumannan mas tantu.d Si bo imitá Timoteo, Yehova lo bendishoná bo pa asina “tur hende por mira bon kla ku bo a hasi progreso.”—1 Tim. 4:15.