Loke Revelashon Ta Nifiká pa Bo Awe

1-2. Menshoná un motibu pakiko nos mester ta interesá den e buki di Revelashon.

BO A yega di wak álbum di un otro hende? Bo ta kuminsá pasa den dje pero mayoria di e karanan bo no konosé. Pero, diripiente un potrèt ta hala bo atenshon. Dikon? Pasobra bo ta riba dje. Segun ku bo ta wak e potrèt, bo ta purba di kòrda ta na unda a sak’é i ta ken e otro karanan ta. Di tur e potrètnan den e álbum, e potrèt ei tin un balor spesial pa bo.

² E buki di Revelashon ta manera e potrèt ei. Dikon? Pa por lo ménos dos motibu. Di promé, Revelashon ta skirbí spesialmente pa nos. Revelashon 1:1 ta bisa: “Esaki ta un revelashon di Hesukristu, ku Dios a dun’é, pa e mustra su esklabonan e kosnan ku tin ku sosodé pronto.” Pues, e buki ei no ta pa tur hende, pero pa nos ku ta sirbi Dios. P’esei, no ta sorprendé nos ku nos ta forma parti den kumplimentu di e profesianan ku tin den e buki ei. Den un sentido, nos ta “riba e potrèt.”

3-4. Na ki periodo e profesianan di Revelashon a kuminsá kumpli, anto kiko nos mester hasi?

³ E di dos motibu tin di haber ku e periodo ku e profesianan akí lo kumpli. Apòstel Huan a referí na e periodo ei ora el a skirbi: “Bou di inspirashon, mi a haña mi den e dia di Señor.” (Rev. 1:10) Huan a skirbi e palabranan akí rònt di aña 96 D.K. E tempu ei, ainda tabata falta hopi aña pa “e dia di Señor” kuminsá. (Mat. 25:14, 19; Luk. 19:12) Profesianan di Beibel ta mustra ku el a kuminsá na 1914 ora Hesus a bira Rei den shelu. For di e aña ei, e profesianan den e buki di Revelashon, ku tin di haber ku Dios su pueblo, a kuminsá kumpli. Pues, nos ta bibando den “e dia di Señor.”

⁴ Komo ku nos ta bibando den e periodo interesante akí, nos tin ku presta èkstra atenshon na e konseho na Revelashon 1:3: “Felis ta esun ku ta lesa e palabranan di e profesia akí na bos haltu pa otro hende, i felis ta esnan ku ta tende nan i obedesé loke ta pará skirbí den dje; pasobra e tempu stipulá ta serka.” Sí, nos tin ku “lesa e palabranan di e profesia akí na bos haltu” pa “tende nan i obedesé” nan. Kua ta algun di e palabranan ku nos tin ku obedesé?

 5. Dikon Hesus a duna e shete kongregashonnan na Asia Menor konseho?

⁵ For di e promé kapítulo di Revelashon, nos ta mira ku Hesus ta bon na altura di tur kos ku ta sosodé den e kongregashonnan. (Rev. 1:12-16, 20; 2:1) E mensahenan ku el a manda pa e shete kongregashonnan na Asia Menor ta proba esei. Den e mensahenan ei, el a duna konseho hopi spesífiko ku a yuda e kristiannan di e tempu ei hasi sigur ku Yehova tabata aseptá nan adorashon. E konsehonan ei ta konta pa tur adoradó di Yehova awendia. Kiko esaki ta siña nos? Ku nos Lider, Kristu Hesus, ta bon konsiente den ki kondishon nos amistat ku Yehova ta. E ta guia i protehá nos, i e ta mira delaster un kos. E sa presis kiko nos tin ku hasi pa no pèrdè Yehova su aprobashon. Pues, laga nos ban analisá algun di e konsehonan ei.

 6. (a) Segun Revelashon 2:3 i 4, ki problema e kristiannan na Efeso tabatin? (b) Ki nos ta siña for di esei?

⁶ Lesa Revelashon 2:3, 4. No pèrdè e amor ku nos tabatin na kuminsamentu pa Yehova. Hesus su mensahe na e kristiannan na Efeso ta mustra ku nan a perseverá i a sigui sirbi Yehova apesar di vários prueba. Sinembargo, nan a pèrdè e amor ku nan tabatin na kuminsamentu. Nan mester a rebibá e amor ei si nan tabata ke pa Yehova aseptá nan adorashon. Meskos ta konta awe. Nos no tin ku djis perseverá. Nos tin ku perseverá ku e motivashon korekto. Dikon? Pasobra Yehova no ta djis interesá den loke nos ta hasi, pero tambe pakiko nos ta hasié. Nos motivashon ta masha importante pa Yehova. E ke pa nos ador’é pasobra nos ta stim’é i ta gradisidu na dje.—Pro. 16:2; Mar. 12:29, 30.

 7. (a) Segun Revelashon 3:1-3, ki problema e kongregashon na Sardis tabatin? (b) Kiko nos tin ku hasi?

⁷ Lesa Revelashon 3:1-3. Sigui keda lantá i alerta. E problema di e kongregashon na Sardis tabata diferente. Den pasado, nan tabata hasi hopi pa Yehova, pero awor nan a baha man. Hesus a bisa nan pa “lanta for di soño.” Ki lès nos ta siña? Klaru ku Yehova no ta bai lubidá loke nos a hasi p’e den pasado. (Heb. 6:10) Pero, no ta pasó nos a hasi hopi pa Yehova den pasado ke men ku awor nos por sinta man krusá. Aunke kisas nos no por hasi mes tantu kompará ku ántes, nos mester keda okupá “den e trabou di Señor” i sigui keda lantá i alerta te na e fin.—1 Kor. 15:58; Mat. 24:13; Mar. 13:33.

 8. Kiko nos ta siña for di loke Hesus a bisa e kristiannan na Laodisea? (Revelashon 3:15-17)

⁸ Lesa Revelashon 3:15-17. Adorá Yehova ku entusiasmo i di kurason. E kongregashon na Laodisea tabatin un problema diferente. Nan tabata “lou” den nan adorashon. Debí ku nan tabata neglishá nan adorashon, Hesus a bisa ku nan tabata “infelis [i] den kondishon deplorabel.” Pues, nan mester a lanta nan entusiasmo pa Yehova i su adorashon bèk. (Rev. 3:19) Kiko nos ta siña for di esei? Si nos bira negligente den nos adorashon na Yehova, nos tin ku kuminsá focus riba tur e kosnan ku Yehova i su organisashon ta perkurá pa nos pa asina nos oumentá nos apresio. (Rev. 3:18) Nos no mester laga deseo di tin un bida kómodo distraí nos. Nos ke pa nos adorashon na Yehova semper keda na promé lugá den nos bida.

 9. Segun loke Hesus a bisa e kristiannan na Pérgamo i Tiatira, ki peliger nos tin ku evitá?

⁹ Rechasá siñansanan di apóstatanan. Hesus a reprendé algun kristian den e kongregashon na Pérgamo pasobra nan tabata krea desunion. (Rev. 2:14-16) Di otro banda, el a elogiá esnan na Tiatira ku a keda leu for di e “kosnan profundo ku ta bini di Satanas,” i el a animá nan pa “tene duru” na e bèrdat. (Rev. 2:24-26) E kristiannan den e dos kongregashonnan ei ku sí a bai tras di e siñansanan falsu mester a arepentí. Ki ta e lès pa nos? Nos tin ku rechasá kualke siñansa ku ta bai kontra di loke Yehova ta pensa. Apóstatanan por tin “aparensia di ta deboto na Dios, ma ku no ta demostrá e deboshon ei den nan bida.” (2 Tim. 3:5) Si nos ta bon studiante di Beibel, lo ta hopi fásil pa nos rekonosé i rechasá siñansanan falsu.—2 Tim. 3:14-17; Hudas 3, 4.

10. Ki otro lès nos ta siña for di loke Hesus a bisa e kristiannan na Pérgamo i Tiatira?

¹⁰ Rechasá tur tipo di inmoralidat. E kristiannan na Pérgamo i Tiatira tabatin un problema mas. Hesus a hala atenshon di algun di nan pasó nan no a rechasá inmoralidat. (Rev. 2:14, 20) Ki ta e lès pa nos? Si nos kometé inmoralidat, nos no mester pensa ku Yehova lo sera wowo lag’é pasa pasó nos tin hopi aña ta sirbié i tin hopi privilegio. (1 Sám. 15:22; 1 Ped. 2:16) Yehova ke pa nos keda pega na su normanan haltu sin importá kon abou esnan di mundu baha.—Efe. 6:11-13.

11. Kiko nos a siña te asina leu? (Wak e kuadro “Lèsnan pa Nos.”)

¹¹ Kiko nos a siña te asina leu? Ku nos tin ku hasi sigur ku Yehova ta aseptá nos adorashon. Si nos ta hasiendo kualke kos ku e no ta aprobá, nos tin ku drecha nos bida mesora. (Rev. 2:5, 16; 3:3, 16) Pero tabatin algu otro ku Hesus a bisa e kongregashonnan. Ban wak kiko esei tabata.

12. Kiko nos ta siña for di loke Hesus a bisa e kristiannan na Smirna i Filadelfia? (Revelashon 2:10)

¹² Laga nos wak awor kiko Hesus a bisa e kristiannan na Smirna i Filadelfia. El a splika nan ku nan no mester tin miedu di persekushon pasobra Yehova lo rekompensá nan fieldat. (Lesa Revelashon 2:10; 3:10) Ki ta e lès pa nos? Nos lo haña nos ku persekushon, p’esei nos mester ta prepará pa perseverá. (Mat. 24:9, 13; 2 Kor. 12:10) Pakiko ta importante pa nos keda kòrda esei?

13-14. Kiko a pasa ku Dios su sirbidónan debí na e susesonan menshoná na Revelashon 12?

¹³ E buki di Revelashon ta bisa nos bon kla ku Dios su sirbidónan lo haña nan ku persekushon durante “e dia di Señor,” esta, nos tempu. Kapítulo 12 ta splika ku tabatin guera den shelu nèt despues ku Hesus a bira Rei di Dios su Reino. Miguel, un nòmber ku ta referí na Hesukristu, ku su angelnan a bringa kontra Satanas i e demoñonan. (Rev. 12:7, 8) E enemigunan di Dios a pèrdè i a benta nan abou den serkania di tera. Komo resultado, nan ta kousa sufrimentu pa tur hende aki riba tera. (Rev. 12:9, 12) Pero, ki efekto e suseso ei tabatin riba Dios su sirbidónan?

¹⁴ Revelashon ta sigui bisa ku debí ku Satanas no por bai shelu mas, e ta baha tur su rabia riba e restu di e ungínan riba tera. Nan ta representante di Dios su Reino, i nan “tin e trabou di duna testimonio di Hesus.” (Rev. 12:17; 2 Kor. 5:20; Efe. 6:19, 20) Kon e profesia ei a kumpli?

15. Ken e “dos testigunan” di Revelashon kapítulo 11 ta, i kiko a pasa ku nan?

¹⁵ Satanas a lansa un atake kontra e rumannan ungí ku tabata dirigí e trabou di prediká. Esnan entre nan ku tabatin mas responsabilidat tabata e “dos testigunan” ku segun Revelashon lo a ser matá.b (Rev. 11:3, 7-11) Na 1918, ocho di e rumannan ku tabata dirigí e organisashon a ser akusá falsamente i a ser kondená na hopi aña di prizòn. For di punto di bista di hende a parse ku a “mata” e trabou di e rumannan ungí akí.

16. Kiko a sosodé diripiente na 1919, pero kiko Satanas a sigui hasi desde e tempu ei?

¹⁶ E profesia di Revelashon kapítulo 11 ta bisa tambe ku e “dos testigunan” lo biba bèk despues di un periodo kòrtiku. Sorprendentemente, e profesia akí a kumpli den ménos ku un aña despues ku e rumannan akí a wòrdu tirá den prizòn. Na mart 1919, nan a haña nan libertat i despues korte a anulá tur kargo kontra nan. Mesora nan a bolbe kuminsá dirigí e trabou di prediká i di siña hende e bèrdat. Pero Satanas no a stòp di ataká e pueblo di Yehova. Desde e tempu ei, Satanas ta usa “un riu” di persekushon kontra tur Dios su sirbidónan. (Rev. 12:15) “Esaki ta rekerí perseveransia i fe” di parti di kada un di nos.—Rev. 13:10.

17. Ki yudansa inesperá Dios su pueblo a haña aunke ku Satanas ta keda ataká nan?

¹⁷ Djei Revelashon kapítulo 12 ta indiká ku Dios su pueblo lo a haña un yudansa ku nan no a ferwagt. Lo ta komo si fuera “tera” lo guli “e riu” di persekushon. (Rev. 12:16) Anto esei ta eksaktamente loke a pasa. Tabatin biaha ku Dios su pueblo a haña yudansa for di partinan di Satanas su mundu ku tabata mas rasonabel, manera algun sistema hudisial. Hopi biaha Yehova su sirbidónan a gana kasonan den korte i esei a permití nan un sierto grado di libertat. Kon nan a usa e libertat ei? Nan a hasi tur loke nan tabata por pa hasi e trabou ku Yehova a duna nan. (1 Kor. 16:9) Kiko e trabou ei ta enserá?

18. Kiko ta e trabou di mas importante ku nos tin den e último dianan akí?

¹⁸ Hesus a profetisá ku su disipelnan lo a prediká “e bon notisia akí di [Dios su] Reino” den henter e tera habitá promé ku e fin yega. (Mat. 24:14) Pero ora nan hasi e trabou ei, nan no ta nan so. Nan tin yudansa di e angelnan, ku segun Revelashon, ta “deklará bon notisia eterno na esnan ku ta biba riba tera, na tur nashon, tribu, idioma i pueblo.”—Rev. 14:6.

19. Ki otro mensahe esnan ku ta stima Yehova tin ku prediká?

¹⁹ E bon notisia tokante e Reino no ta e úniko kos ku Dios su pueblo lo tin ku prediká tokante dje. Tambe nan tin ku yuda e angelnan ku e trabou ku Revelashon kapítulo 8 te ku 10 ta papia di dje. E angelnan akí ta anunsiá un seri di plaga kontra esnan ku ta rechasá Dios su Reino. Pues, Testigunan di Yehova a bini ta deklará un mensahe di huisio ku ta manera “pipita di eis i kandela.” E mensahe ei ta revelá Dios su huisionan kontra vários parti di Satanas su mundu malbado. (Rev. 8:7, 13) Hende tin ku sa ku e fin ta serka i ku nan tin ku hasi kambionan grandi den nan bida pa nan por sobrebibí Yehova su dia di rabia. (Sof. 2:2, 3) Pero hopi hende no ke tende nada tokante e mensahe ei. P’esei, pa papia ku otro hende tokante e mensahe ei nos mester di kurashi. Durante tribulashon grandi, e último mensahe di huisio lo ta asta mas fuerte.—Rev. 16:21.

20. Kiko nos ta bai trata den e siguiente dos artíkulonan?

²⁰ Ta masha importante pa nos obedesé “e palabranan di e profesia akí,” pasobra nos ta forma parti di e kumplimentu di loke tin skirbí den e buki di Revelashon. (Rev. 1:3) Pero kon nos por keda fiel i perseverá bou di persekushon i sigui prediká e mensahenan akí ku kurashi? Tin dos kos ku lo fortalesé nos. Promé, loke e buki di Revelashon ta bisa tokante Dios su enemigunan. I di dos, e bendishonnan ku nos lo haña si nos keda fiel. Nos lo trata e dos puntonan ei den e siguiente dos artíkulonan.