“Lo Bo Ta ku Mi den Paradeis”

 1. Promé ku Hesus a muri, kiko el a bisa un kriminal ku tabata banda di dje? (Lukas 23:39-43)

HESUS i e dos kriminalnan banda di dje tabata sufri segun ku pokopoko nan bida tabata kaba. (Luk. 23:32, 33) Tur e dos kriminalnan tabata insultá Hesus, pues ta bisto ku nan no tabata su disipel. (Mat. 27:44; Mar. 15:32) Pero, un di nan su aktitut pa ku Hesus a kambia. El a bisa: “Hesus, kòrda riba mi ora bo drenta bo Reino.” Anto Hesus a respond’é: “Di bèrdat mi ta bisa bo awe: Lo bo ta ku mi den Paradeis.” (Lesa Lukas 23:39-43.) Aunke e kriminal ei kisas a skucha e mensahe di “e Reino di shelu” ku Hesus a prediká durante su sirbishi, e no a bira disipel. Anto Hesus nunka a bisa ku e hòmber akí lo a drenta e Reino. (Mat. 4:17) E paradeis ku Hesus tabata papia di dje tabata den futuro i aki riba tera. Kon nos por sa esei?

 2. Kiko ta indiká ku e kriminal ku a arepentí tabata hudiu?

² E kriminal ku a arepentí a bisa e otro: “Bo no tin niun tiki temor di Dios?” (Luk. 23:40) For di loke el a bisa, nos por dedusí ku e tabata un hudiu. Dikon? Pasobra hudiunan tabata adorá un Dios so, pero hende di e nashonnan tabata kere den hopi dios. (Éks. 20:2, 3; 1 Kor. 8:5, 6) Si e kriminalnan ei no tabata hudiu, kisas e pregunta lo tabata: “Bo no tin niun tiki temor di e diosnan?” Ademas, Dios a manda Hesus na “e karnénan pèrdí di e kas di Israel,” no na hende di e nashonnan. (Mat. 15:24) Anto ta na e israelitanan Dios a revelá ku lo e lanta e mortonan. E kriminal ku a arepentí probablemente tabata sa di esei. I di loke el a bisa, nos por konkluí ku el a komprondé ku Yehova lo resusitá Hesus pa goberná den e Reino di Dios. Evidentemente, e kriminal akí tambe a spera ku Dios lo a resusit’é.

 3. Kiko probablemente e kriminal ku a arepentí a pensa ora Hesus a menshoná Paradeis? Splika. (Génesis 2:15)

³ Si e kriminal ku a arepentí tabata hudiu, e tabata sa ku Yehova a pone Adam ku Eva den Paradeis. Pues ora Hesus a menshoná Paradeis, muy probablemente e kriminal a pensa riba un hòfi bunita aki riba tera.—Lesa Génesis 2:15.

 4. Loke Hesus a bisa e kriminal mester pone nos pensa riba kiko?

⁴ Loke Hesus a bisa e kriminal mester pone nos pensa riba kon bida lo ta den Paradeis. I algu ku lo yuda nos hasi esei ta di kòrda e periodo di pas ku tabatin durante e reinado di Rei Sálomon. Beibel ta bisa ku Hesus ta mas ku Sálomon. Pues, nos por tin sigur ku Hesus huntu ku e 144.000 lo hasi e tera akí un paradeis mashá bunita. (Mat. 12:42) Ta klaru ku e “otro karné” mester siña loke nan tin ku hasi pa por biba den Paradeis pa semper.—Huan 10:16.

 5. Kon bo ta imaginá bida den Paradeis?

⁵ Kon bo ta imaginá bida den Paradeis? Kisas bo ta imaginá un hòfi bunita manera esun na Eden. (Gén. 2:7-9) Òf kisas bo ta kòrda riba e profesia di Mikéas 4:3 i 4 ku ta bisa ku “kada un di [Dios su sirbidónan] lo sinta bou di su palu di wendrùif i bou di su palu di figu.” Podisé bo ta pensa riba e tekstonan den Beibel ku ta menshoná ku lo tin hopi kuminda. (Sal. 72:16; Isa. 65:21, 22) Pues, probablemente bo ta imaginá bo mes den un hardin bunita, sintá na un mesa yen di kuminda dushi. Bo ta mira bo mes ta disfrutá di e aroma dushi di e mata- i flornan? Bo por tende bo famia- i amigunan ta hari i pasa tempu dushi huntu? Kisas algun di nan a ser resusitá. Niun di e kosnan akí no ta un soño. Nos por tin sigur ku nan lo sosodé aki riba tera. Ademas, bida den Paradeis ta inkluí tambe ku nos lo tin trabou satisfaktorio.

 6. Kiko nos lo hasi den Paradeis? (Wak e plachi.)

⁶ Yehova a krea nos ku e kapasidat di disfrutá di nos trabou. (Ekl. 2:24) Durante e Mil Aña ku Kristu lo goberná, nos lo tin hopi kos di hasi. Tur esnan ku sobrebibí tribulashon grandi i e miónes di hendenan ku resusitá lo tin mester di paña, kuminda i un dak riba nan kabes. Pa por logra esaki ta enserá hopi trabou, pero e ta bale la pena. Meskos ku Adam ku Eva mester a kuida i kultivá e hardin na Eden, nos lo tin e dushi trabou di hasi e tera un paradeis. Imaginá kon emoshonante lo ta pa siña e miónes di hendenan resusitá ku no sa kasi nada tokante Yehova ni su propósito. Ademas, nos por yuda e fiel sirbidónan di Yehova ku a biba hopi promé ku Hesus a bini riba tera aktualisá nan konosementu.

 7. Di kiko nos por tin sigur, i dikon?

⁷ Nos tin sigur ku bida den Paradeis lo ta yen di pas, bon organisá i ku nos lo tin tur loke nos mester. Dikon nos ta asina sigur? Pasobra ku e relato di e reinado di Rei Sálomon, Yehova ta duna nos un idea di kon bida lo ta ora Su Yu ta goberná tera.

 8. Kon Salmo 37:10, 11 i 29 a kumpli den pasado? (Wak “Pregunta di Lektor” den e revista akí.)

⁸ Yehova a inspirá Rei David pa skirbi tokante kon bida lo ta den futuro durante reinado di un rei sabí i fiel. (Lesa Salmo 37:10, 11, 29.) Ora nos ta papia ku hende tokante Paradeis, hopi biaha nos ta usa Salmo 37:11. Anto esei ta bon pasobra Hesus mes a sita e teksto ei den su Sermon Riba Seru. Asina el a mustra ku e palabranan ei tin un kumplimentu den futuro. (Mat. 5:5) Pero, David su palabranan tambe a mustra kon bida lo ta den e dianan di e reinado di Sálomon. Durante e periodo ei, Dios su pueblo tabatin pas i tur loke nan tabatin mester den un tera ku tabatin “lechi i miel na abundansia.” Dios a bisa nan: “Si boso kana den mi statutonan . . . lo mi duna pas den e tera, asina ku boso por kai drumi sin ku ningun hende ta hasi boso tembla.” (Lev. 20:24; 26:3, 6) E promesanan ei a kumpli durante reinado di Sálomon. (1 Kró. 22:9; 29:26-28) I Yehova a bisa tambe ku lo no tin hende ku ta adorá otro diosnan mas. (Sal. 37:10) Pues, loke nos a lesa na Salmo 37:10, 11 i 29 a kumpli den pasado i lo kumpli den futuro tambe.

 9. Kiko e reina di Saba a bisa tokante e reinado di Sálomon?

⁹ E reina di Saba a tende kon e israelitanan tabata disfrutá di pas na abundansia bou di e reinado di Sálomon. El a hasi un biahe largu pa bin Herúsalèm i mira esei ku su mes wowo. (1 Rei. 10:1) El a bisa Sálomon: “Loke nan a konta mi no ta ni mitar di loke mi a mira! . . . Bo sirbidónan ta hende felis pasobra nan tin e privilegio di ta konstantemente den bo presensia i asina skucha bo sabiduria!” (1 Rei. 10:6-8) Pero, loke e israelitanan a eksperensiá bou di e reinado di Sálomon tabata djis un muestra di loke Yehova lo hasi pa henter humanidat bou di reinado di Su Yu, Hesus.

10. Dikon Hesus ta mihó ku Sálomon?

¹⁰ Hesus ta mihó ku Sálomon den tur sentido. Sálomon tabata imperfekto i a kometé erornan serio ku despues a trese difikultatnan pa Dios su pueblo. En kambio, Hesus ta un rei perfekto ku nunka lo kometé eror. (Luk. 1:32; Heb. 4:14, 15) Ademas, el a logra vense e pruebanan teribel ku Satanas a lag’é pasa aden. Kristu a proba ku nunka lo e peka ni hasi algu ku lo perhudiká e fiel siudadanonan di e Reino. Sin duda, e ta e mihó Rei ku nos por tin!

11. Ki yudansa Hesus lo haña?

¹¹ Hesus lo kuida humanidat i kumpli ku Yehova su propósito pa tera. Lo e haña yudansa di 144.000 ungí ku lo goberná huntu kuné. (Rev. 14:1-3) Tempu ku e ungínan tabata komo hende aki riba tera, nan a pasa den hopi difikultat i prueba. P’esei, nan ta komprondé bon loke nos ta pasa aden. Pero, ki trabou presis nan lo hasi?

12. Ki trabou Yehova ta bai duna e 144.000?

¹² Kompará ku Sálomon, Hesus i e 144.000 tin hopi mas trabou di hasi. Sálomon a perkurá pa miónes di hende den un solo pais. Pero, esnan ku ta goberná den e Reino di Dios lo tin ku perkurá pa míles di miónes di hende rònt mundu. Di bèrdat Yehova a duna e 144.000 un bunita privilegio!

13. Ki responsabilidat spesial e 144.000 tin?

¹³ Meskos ku Hesus, e 144.000 lo ta rei i saserdote. (Rev. 5:10) Lei di Moises a bisa ku e responsabilidat prinsipal di e saserdotenan tabata pa yuda e pueblo keda ku un bon salú i ku un bon amistat ku Yehova. Hebreonan 10:1 ta mustra ku e Lei tabata “un sombra di e kosnan bon ku lo a bini.” A base di esei, nos por konkluí ku e 144.000 lo tin un responsabilidat spesial: yuda Dios su pueblo keda ku un bon salú i ku un bon amistat ku Yehova. Nos no sa kon e rei- i saserdotenan akí lo komuniká ku nos aki riba tera. Pero un kos sí nos sa: Yehova lo hasi sigur ku tur hende den Paradeis lo haña e guia ku nan mester.—Rev. 21:3, 4.

14. Kon e “otro karné” i e “tou chikitu” ta traha uní?

¹⁴ Hesus a yama esnan ku lo goberná huntu kuné un “tou chikitu.” (Luk. 12:32) El a papia tambe di un di dos grupo, ku el a yama “otro karné.” E dos gruponan akí ta forma un tou uní. (Huan 10:16) Ya kaba nan ta traha uní i lo sigui hasi esei segun ku tera ta bira Paradeis. Ta klaru ku pa e momento ei, e “tou chikitu” lo ta den shelu i e “otro karné” lo tin speransa di biba pa semper riba tera. Pero pa e “otro karné” por biba den Paradeis, nan tin ku kumpli ku sierto rekisitonan for di awor.

15. (a) Kon e “otro karné” ta apoyá e rumannan di Kristu? (b) Kon bo por ta meskos ku e ruman riba e plachi?

¹⁵ E kriminal ku a arepentí a muri promé ku el a haña oportunidat di mustra ku e tabata gradisidu pa loke Kristu a hasi p’e. Pero awe, nos ku ta forma parti di e “otro karné” tin hopi oportunidat pa hasi esei. Por ehèmpel, nos ta mustra kuantu nos ta stima Hesus na e manera ku nos ta trata su rumannan ungí. Hesus a bisa ku ta a base di esei lo e husga ken ta karné. (Mat. 25:31-40) Nos ta apoyá e rumannan di Kristu ora nos ta partisipá ku smak den e trabou di prediká i di yuda hende bira disipel. (Mat. 28:18-20) P’esei nos ke hasi bon uso di e hèrmèntnan ku nan ta duna nos pa studia ku hende, manera e buki Bo Por Disfrutá di Bida pa Semper! Bo no tin un estudio di Beibel ainda? Puntra tur hende ku bo topa si nan ke studia. Sí, hasi esei bo meta.

16. Kon nos por prepará for di awor pa ta siudadano di e Reino di Dios?

¹⁶ Nos no tin ku warda te ora nos ta den Paradeis pa bira e sorto di hende ku Yehova ke tin einan. For di awor nos por hasi esfuerso pa ta onesto den nos abla i akshon i pa hiba un bida balansá. Ademas, nos mester ta leal na Yehova, nos kasá i nos rumannan. Si awor ku nos ta den e mundu malbado akí nos ta hasi tur nos esfuerso pa obedesé Yehova, lo bira hopi mas fásil pa nos obedes’é den Paradeis. Nos mester kultivá tambe aktitut- i kualidatnan pa mustra ku nos ta preparando pa biba den Paradeis. Wak e artíkulo, “Bo Ta Kla pa ‘Heredá e Tera’?” den e revista akí.

17. Dikon nos no mester sigui sinti kulpabel pa pikánan ku nos a kometé den pasado?

¹⁷ Nos tin ku hasi esfuerso tambe pa stòp di sinti nos kulpabel pa pikánan grave ku nos a kometé den pasado. Klaru ku, nos no ke mira e reskate komo un èksküs pa “praktiká piká deliberadamente.” (Heb. 10:26-31) Pero si di kurason nos a arepentí di un piká grave, nos a pidi Yehova i e ansianonan yudansa i nos a kambia nos kondukta, nos por ta sigur ku Yehova a pordoná nos abundantemente, sí kompletamente. (Isa. 55:7; Echo. 3:19) Kòrda loke Hesus a bisa e fariseonan: “Mi no a bini pa yama hende hustu, sino pekadó.” (Mat. 9:13) I ta bèrdat, tur nos pikánan por ser pordoná danki na e reskate.

18. Tokante kiko lo bo ke kòmbersá ku e kriminal ku a muri banda di Hesus?

¹⁸ Imaginá bo mes den Paradeis ta kòmbersá ku e kriminal ku a papia ku Hesus. Sin duda kada un di boso lo ekspresá boso gratitut pa e reskate. Chèns ta hopi grandi ku lo bo pidié konta bo kiko mas a pasa durante Hesus su último oranan aki riba tera i kon el a sintié ora Hesus a kontestá su petishon. Anto kisas lo e pidi bo pa kont’é kon bida tabata durante e último dianan di Satanas su mundu malbado. Ki un privilegio lo ta pa studia e Palabra di Dios ku hende manera e!—Efe. 4:22-24.

19. Dikon bida den Paradeis nunka lo no ta laf? (Wak e plachi riba portada.)

¹⁹ Den Paradeis, nunka bida lo no ta laf. Semper nos lo tin trabou satisfaktorio pa hasi i hende interesante pa topa. Pero riba tur kos, tur dia nos lo sigui konosé nos Tata ku ta den shelu un tiki mas mihó i disfrutá di loke el a perkurá. Nunka nos lo no stòp di siña kosnan nobo tokante dje i tokante su kreashon. Segun ku tempu ta pasa, nos lo stima Yehova mas. Esta gradisidu nos ta ku Yehova i Hesus a primintí ku nos por biba pa semper den Paradeis!