Dikon Ta Importante pa Bo Batisá?

1-2. Kiko ta pasa na un boutismo, i kiko nos ta bai trata den e artíkulo akí?

BO A yega di tuma nota kiko ta pasa na un boutismo? Ku konvikshon e kandidatonan ta kontestá e dos preguntanan promé ku nan batisá. Nan famia- i amigunan ta masha orguyoso di nan. I ora nan sali for di awa, nan tin un smail riba nan kara segun ku tur hende ta bati man. Tur siman, míles di studiante di Beibel ta dediká nan bida na Dios i ta batisá komo Testigu di Yehova.

² Kiko di abo? Bo tin pensá di batisá? Si ta asina, bo ta un hende masha spesial pasó den e mundu malbado akí abo sí ta “buska Yehova.” (Sal. 14:1, 2) I e artíkulo akí ta spesialmente pa bo sea ku bo ta yòn òf di edat. Pero, esnan ku ya a batisá kaba tambe lo disfrutá di e artíkulo akí pasó lo e motivá nan pa fortalesé nan determinashon pa sirbi Yehova pa semper. P’esei, laga nos trata por lo ménos tres di e motibunan dikon nos ta sirbi Yehova.

 3. Dikon sirbidónan di Yehova ta stima bèrdat i hustisia? (Salmo 119:128, 163)

³ Yehova a bisa su pueblo pa “stima bèrdat.” (Zak. 8:19) Anto Hesus a animá su siguidónan pa buska hustisia. (Mat. 5:6) Pues, bo mester tin un deseo fuerte pa hasi loke Dios bisa ku ta hustu i bon. Abo ta stima bèrdat i hustisia? Nos tin sigur di esei. P’esei, bo ta odia mentira, maldat i tur loke ta robes. (Lesa Salmo 119:128, 163.) Hende ku ta gaña ta imitá Satanas, gobernante di e mundu akí. (Huan 8:44; 12:31) Anto un di Satanas su metanan ta pa susha e nòmber santu di Yehova. Desde e rebelion na Eden, Satanas a bin ta plama mentira tokante nos Dios. E ta pinta Yehova komo un Gobernante egoista i desonesto ku ta keda sin duna hende loke ta bon. (Gén. 3:1, 4, 5) E tipo di mentiranan ei ta sigui pone hende pensa malu di Yehova. I hende ku no ta “stima bèrdat,” ta duna Satanas chèns pa influensiá nan pa hasi tur sorto di inhustisia i maldat.—Rom. 1:25-31.

 4. Kon Yehova a demostrá ku e ta e “Dios di bèrdat”? (Wak e plachi.)

⁴ Yehova ta e “Dios di bèrdat” i e gusta siña e bèrdat na esnan ku stim’É. (Sal. 31:5) Di e manera ei Yehova ta libra nan for di gara di Satanas su mentiranan. Tambe Yehova ta siña su sirbidónan pa ta onesto i hustu, i esei ta duna nan mas rèspèt propio i pas mental. (Pro. 13:5, 6) Bo a eksperensiá eseinan for di ora bo a kuminsá ku bo estudio di Beibel? Sin duda, bo a mira tambe ku Yehova su manera di aktua ta mihó pa tur hende i pa abo mes tambe. (Sal. 77:13) Pues, bo ke ta na banda di Dios su hustisia. (Mat. 6:33) P’esei, bo ke pa otro hende sa e bèrdat i bo ke mustra ku loke Satanas ta bisa tokante Yehova nos Dios, ta mentira. Pero kon bo por hasi esei?

 5. Kiko bo tin ku hasi pa por apoyá bèrdat i hustisia?

⁵ Lo bo ke biba di tal manera ku ta demostrá ku bo a rechasá Satanas su mentiranan i ta apoyá loke ta bèrdat? Lo bo ke skohe Yehova komo bo Gobernante i hasi tur loke e bisa ta hustu? Kon bo por hasi esei? Primintí Yehova den orashon ku lo bo sirbié pa semper. Despues batisá pa demostrá públikamente ku bo a dediká bo mes na dje. Bo amor pa bèrdat i hustisia ta un di e motibunan prinsipal pa batisá.

 6. Ki motibunan Salmo 45:4 ta duna pa stima Hesukristu?

⁶ Dikon bo ta stima Hesukristu? Salmo 45:4 ta duna algun bon motibu. (Les’é.) Hesus ta stima bèrdat, humildat i hustisia. Si abo ta stima bèrdat i hustisia, ta di komprondé ku bo ta stima Hesukristu tambe. Pensa kon Hesus ku kurashi a defendé bèrdat i hustisia. (Huan 18:37) Pero awor, kon Hesus ta siña nos pa ta humilde?

 7. Kiko abo ta gusta di Hesus su humildat?

⁷ Hesus ta siña nos pa ta humilde pa medio di su kondukta. Por ehèmpel, nunka e no a hala atenshon na su mes, semper el a dirigí tur gloria na su Tata. (Mar. 10:17, 18; Huan 5:19) Ora bo mira Hesus su humildat, bo no ta haña gana di stim’é i siguié? Sigur ku sí. Pero awor, kon bin Hesus ta humilde? Pasó e ta stima i ta imitá su Tata, kende ta humilde. (Sal. 18:35; Heb. 1:3) Ya ku Hesus ta imitá kualidatnan di Yehova, bo no ta haña mas gana ainda di stima Hesus?

 8. Dikon nos ta kontentu ku Hesus ta nos Rei?

⁸ Nos ta kontentu ku Hesus ta nos Rei pasó e ta e mihó Gobernante ku tin. Ta Yehova mes a train su Yu i a skoh’é pa goberná. (Isa. 50:4, 5) Pensa tambe riba tur e amor ku Hesus a demostrá. (Huan 13:1) Komo e ta bo Rei, e meresé pa bo stim’é. El a bisa ku esnan ku di bèrdat ta stim’é i ta obedesé su mandamentunan ta su amigunan. (Huan 14:15; 15:14, 15) Sí, lo ta un gran onor pa ta amigu di e Yu di Yehova!

 9. Den ki sentido boutismo di un kristian ta similar na esun di Kristu?

⁹ Hesus a duna su siguidónan vários mandamentu, i un di nan ta pa nan batisá. (Mat. 28:19, 20) E mes tambe a batisá. Den algun aspekto, su boutismo ta diferente for di esun di su siguidónan. (Wak e kuadro “Diferensia Entre Boutismo di Hesus i Esun di Su Siguidónan.”) Pero den otro aspekto, e ta similar. Por ehèmpel, ora Hesus a batisá el a ofresé su mes pa hasi boluntat di su Tata. (Heb. 10:7) Asina tambe, ora Kristu su siguidónan batisá, nan ta mustra públikamente ku nan a dediká nan bida na Yehova. Di e momento ei padilanti, e kos di mas importante den nan bida ta di hasi e boluntat di Dios, i no di nan mes. Pues, nan ta sigui ehèmpel di nan Doño, Hesus.

10. Dikon amor pa Hesus lo motivá bo pa batisá?

¹⁰ Pues, bo a aseptá ku Hesus ta Yehova su Yu unigénito i ku Dios a asign’é komo Rei pa goberná nos. I bo sa tambe ku Hesus ta humilde i ta imitá su Tata perfektamente. Ademas, bo a siña ku el a alimentá hende ku tabatin hamber, konsolá hende desanimá i asta a kura hende malu. (Mat. 14:14-21) Tambe, bo a mira kon e ta guia e kongregashon awe. (Mat. 23:10) I bo sa ku, komo Rei di e Reino di Dios, lo e hasi kosnan maravioso pa nos den futuro. Awor, kon abo por mustra ku bo ta stima Hesus? Esei ta dor di sigui su ehèmpel. (Huan 14:21) I un di e promé kosnan ku bo por hasi pa sigui su ehèmpel ta di dediká bo bida na Yehova i batisá.

11. Kiko ta e motibu di mas importante pa batisá, i dikon?

¹¹ Kiko lo bo bisa ta e motibu di mas importante pa batisá? Hesus a duna e kontesta ora el a menshoná Dios su mandamentu di mas importante. El a bisa: “Bo tin ku stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Mar. 12:30) E palabranan ei ta deskribí bo amor pa Dios?

12. Dikon bo stima Yehova? (Wak e plachi.)

¹² Tin masha tantu motibu pa stima Yehova. Por ehèmpel, e ta “e fuente di bida” i e Dunador di “tur don ku ta bon i tur regalo perfekto.” (Sal. 36:9; Sant. 1:17) Tur e bon kosnan ku bo ta disfrutá di dje ta bini di nos Dios ku ta stima nos i ku ta masha generoso.

13. Dikon e reskate ta un regalo asina maravioso?

¹³ E reskate ta un regalo masha maravioso ku Yehova a duna nos. Dikon nos ta bisa esei? Pensa kon será Yehova i su Yu ta. Hesus a bisa: “E Tata stima mi” i “mi ta stima e Tata.” (Huan 10:17; 14:31) Nan amistat a bira mas i mas será den transkurso di míles di miónes di aña. (Pro. 8:22, 23, 30) Awor pensa kuantu doló Dios lo mester a sinti ora el a permití su Yu sufri i muri. Yehova stima hende inkluso abo masha hopi mes. E stima nos asina tantu ku e tabata dispuesto pa duna su Yu komo sakrifisio pa nos tur por biba pa semper. (Huan 3:16; Gal. 2:20) Esaki ta e motibu di mas importante pa stima Dios.

14. Ki ta e mihó meta ku bo por tin den bida?

¹⁴ No ta bèrdat ku mas bo a siña tokante di Yehova mas bo amor p’e a krese? Sin duda, bo ke hala serka dje awor i sigui hasi esei pa semper. I esei ta posibel. E mes ta pidi bo pa hasi su kurason kontentu. (Pro. 23:15, 16) I bo por hasi esei tantu ku palabra komo ku echo. E manera ku bo ta hiba bo bida lo mustra ku di bèrdat bo ta stima Yehova. (1 Huan 5:3) Esei ta e mihó meta ku bo por tin den bida.

15. Kon bo por mustra ku bo ta stima Yehova?

¹⁵ Kon bo por mustra ku bo ta stima Yehova? Promé, primintí e úniko Dios berdadero den orashon ku lo bo sirbié pa semper. (Sal. 40:8) I despues, demostrá esei públikamente ora bo batisá. Manera nos a mira na kuminsamentu di e artíkulo akí, boutismo lo ta un momento masha felis i importante den bo bida. Bo ta kuminsá un bida nobo; un bida no pa bo mes mas, sino pa Yehova. (Rom. 14:8; 1 Ped. 4:1, 2) E ta parse un desishon grandi, i esei e ta tambe. Pero e ta habri kaminda pa e mihó bida. Kon asina?

16. Manera nos ta mira na Salmo 41:12, kon Yehova lo rekompensa esnan ku usa nan bida pa sirbié?

¹⁶ No tin niun persona mas generoso ku Yehova. Semper e ta duna bo muchu mas ku loke abo por dun’é. (Mar. 10:29, 30) E tipo di bida ku e ta bai duna bo lo ta muchu mas mihó ku loke bo por imaginá. I bo por disfrutá di e bida ei asta for di awor. Ora bo batisá, den un sentido bo ta kuminsá un bida nobo. Pero, bo tabata sa ku e bida ei no tin nodi di kaba? Bo tabata sa ku bo por sigui sirbi bo Tata, kende ta stima bo, pa semper? Bo tabata sa ku e amor ku tin entre abo i bo Tata por sigui krese? Bo tabata sa ku bo por biba tanten ku e ta biba, esta, pa eternidat? Sí, tur eseinan ta posibel!—Lesa Salmo 41:12.

17. Kiko abo por duna Yehova ku e no tin?

¹⁷ Ora nos tuma e pasonan pa dediká nos bida na Yehova i batisá, nos tin e bunita privilegio di duna nos Tata algu presioso. Kòrda, tur kos bon i kada momento felis den bida a bini di Yehova. Pero kiko abo por hasi pa Yehova? Ki regalo bo por duna e Doño di shelu i tera? Wèl, loke nos por hasi ta di skohe boluntariamente pa sirbié di henter nos kurason. (Yòb 1:8; 41:11; Pro. 27:11) No tin un mihó manera pa usa bo bida! Sin duda, bo amor pa Yehova ta e mihó motibu ku bo por tin pa batisá.

18. Ki pregunta nos tin ku hasi nos mes?

¹⁸ ‘Bo ta kla pa batisá?’ Kon lo bo kontestá e pregunta ei? Ta bèrdat ku ta abo so por kontestá e pregunta ei. Pero, si bo no por kontestá esei, kisas bo por puntra bo mes e ora ei: ‘Riba kiko mi ta warda?’ (Echo. 8:36) Lo ta bon pa bo kòrda riba e tres motibunan pa batisá ku nos a trata den e artíkulo akí. Esun promé tabata amor pa bèrdat i hustisia. Puntra bo mes: ‘Lo mi ke mira e dia ku tur hende ta papia bèrdat i ta hasi loke ta korekto?’ E di dos motibu tabata amor pa Hesukristu. P’esei, puntra bo mes: ‘Ami ke Dios su Yu komo mi Rei i mi ke imitá su ehèmpel?’ I e di tres motibu, esun di mas importante, ta bo amor pa Yehova. Ku e motibu ei na mente, puntra bo mes; ‘Mi ke sirbi Yehova komo mi Dios i hasi su kurason kontentu?’ Si bo kontestá tur e preguntanan ei ku sí, dikon bo no ta batisá? Riba kiko bo ta warda?

19. Pakiko bo no mester tin miedu pa batisá? (Huan 4:34)

¹⁹ Si bo no ta sigur ainda ku bo ke batisá, pensa riba e ilustrashon ku Hesus a usa aki. (Lesa Huan 4:34.) Tuma nota ku Hesus a kompará hasimentu di e boluntat di su Tata ku kuminda. Dikon? Pasobra kuminda ta bon pa nos. Hesus tabata sa ku tur kos ku Yehova pidi nos pa hasi ta bon pa nos. Yehova nunka lo pidi nos pa hasi algu ku ta malu pa nos. Anto un kos ku e ta pidi nos hasi ta batisá. (Echo. 2:38) Ora bo obedesé e mandamentu ei i batisá, bo por tin sigur ku lo bai bon ku bo. Ta meskos ku den kaso di kuminda. Si un hende ofres’é bo e mihó kuminda ku bo a yega di kome, lo bo no pèrdè e chèns ei. Awèl, den kaso di boutismo, no pèrdè e chèns ei di batisá.

20. Kiko nos ta bai trata den e siguiente artíkulo?

²⁰ Kiko ta pone ku algun studiante ta warda pa batisá? Kisas nan lo kontestá: ‘Mi no ta kla ainda.’ Ta bèrdat ku e desishon pa dediká bo mes na Yehova i batisá ta e desishon di mas grandi ku lo bo tuma den bo bida. P’esei, pens’é bon, tuma bo tempu i hasi esfuerso pa bo por ta kla. Pero si bo tin e deseo fuerte ei pa batisá, kiko ta e pasonan ku bo tin ku tuma? Nos ta bai kontestá e pregunta ei den e siguiente artíkulo.