Capitulo 8
Pakico Dios Ta Permití Sufrimentu?
1, 2. Con hopi biaha hende ta reaccioná na sufrimentu humano?
ORA desaster azotá, destruyendo propiedad i exigiendo bidanan, hopi hende no por comprendé pakico cosnan teribel asina ta sosodé. Otronan ta preocupá p’e grado, crueldad, i inhumanidad di crímen i violencia. Abo tambe tal bes a yega di puntra bo mes, ‘Pakico Dios ta permití sufrimentu?’
2 Debí cu hopi hende no a haña ningun contesta satisfactorio riba e pregunta aki, nan a perde fe den Dios. Nan ta sinti cu e no ta interesá den humanidad. Otronan cu ta aceptá sufrimentu como un realidad di bida ta bira amargá i ta culpa Dios pa tur e cosnan malu den e sociedad humano. Si bo tabatin tal sintimentunan, sin duda lo bo ta hopi interesá den e declaracionnan di e Bijbel riba e asuntunan aki.
SUFRIMENTU NO TA CAUSA DOR DI DIOS
3, 4. Pakico nos por ta sigur cu maldad i sufrimentu no ta bini di Jehova?
3 E Bijbel ta sigurá nos cu e sufrimentu cu nos ta mira rond di nos no ta ser causá dor di Jehova Dios. Por ehempel, e disipel cristian Santiago a skirbi: “Ora e ta bou di prueba, no laga ningun hende bisa: ‘Mi ta ser probá dor di Dios.’ Pasobra cu cosnan malu Dios no por ser probá ni e mes no ta proba ningun hende.” (Santiago 1:13) Siendo esei e caso, Dios no por a causa e cantidad di sufrimentu cu ta plaga humanidad. E no ta trece prueba riba hende pa haci nan apto pa bida den cielu, ni e ta pone hende sufri pa malechonan cu nan supuestamente a cometé den nan bida anterior.—Romanonan 6:7.
4 Ademas, aunke hopi cos teribel a ser cometé den e nomber di Dios of di Cristo, no tin nada den e Bijbel cu ta indicá cu un di nan dos a yega di aprobá tal accionnan. Dios i Cristo no tin nada di haci cu esnan cu ta afirmá di ta sirbi nan pero cu ta cometé fraude i estafa, mata i horta, i ta haci hopi otro cos cu ta causa sufrimentu humano. En realidad, “e caminda di esun malbado ta algu detestabel pa Jehova.” Dios “ta leu for di esnan malbado.”—Proverbionan 15:9, 29.
5. Cua ta algun di Jehova su cualidadnan, i kico e ta opiná di su criaturanan?
5 E Bijbel ta describí Jehova como siendo “masha tierno den cariño i misericordioso.” (Santiago 5:11) E ta proclamá cu “Jehova ta un stimador di husticia.” (Salmo 37:28; Isaías 61:8) E no ta vengativo. Compasivamente e ta cuida su criaturanan i ta duna nan tur loke ta mihó pa nan bienestar. (Echonan 14:16, 17) Jehova a haci esei for di cuminsamentu mes di bida aki riba tera.
UN CUMINSAMENTU PERFECTO
6. Con algun leyenda ta referí indirectamente na humanidad su historia di pasado?
6 Nos tur ta custumbrá di mira i sinti dolor i sufrimentu. P’esei tal bes ta difícil pa imaginá un tempu sin sufrimentu, pero ta asina cosnan tabata n’e principio di historia humano. Asta e leyendanan di algun nacion ta referí na tal cuminsamentu felis. Den mitologia griego, e promé di e “Cincu Epocanan di Hende” tabata yamá e “Epoca di Oro.” Den dje hende a hiba bidanan felis, liber di trabou duru, dolor, i e dañonan causá pa behes. E chinesnan ta bisa cu durante e reinado di e mitológico Emperador Hel (Huang-Ti), hende a biba na pas, disfrutando di armonia asta cu e medio ambiente i e bestianan salbahe. Personan, egipcionan, tibetanonan, peruanonan, i mehicanonan tur tin leyendanan tocante un tempu di felicidad i perfeccion na principio di historia di humanidad.
7. Pakico Dios a crea e tera i humanidad?
7 E mitonan di e nacionnan meramente ta resoná e registro mas bieu skirbí di historia humano, e Bijbel. E ta informá nos cu Dios a pone e promé pareha humano, Adam i Eva, den un paradijs yamá e hofi di Eden i a manda nan: “Sea fructífero i bira hopi i yena e tera i domin’é.” (Génesis 1:28) Nos promé mayornan a disfrutá di perfeccion i tabatin e prospecto di mira henter e tera bira un paradijs ocupá dor di un famia humano perfecto bibando den pas i felicidad duradero. Esei tabata Dios su propósito pa crea e tera i humanidad.—Isaías 45:18.
UN DESAFIO MALICIOSO
8. A ser sperá pa Adam i Eva obedecé cua mandamentu, pero kico a sosodé?
8 Pa permanecé den e fabor di Dios, Adam i Eva lo mester a abstené di come for di “e palu di conocimentu di bon i malu.” (Génesis 2:16, 17) Si nan a obedecé Jehova su ley, lo no tabatin sufrimentu pa daña bida humano. Dor di obedecé e mandamentu di Dios, nan lo a demostrá nan amor pa Jehova i nan lealtad na dje. (1 Juan 5:3) Pero manera nos a siña den Capítulo 6, cosnan no a resultá e manera ei. Instá dor di Satanas, Eva a come fruta dje palu ei. Mas despues, Adam tambe a come di e fruta prohibí.
9. Satanas a lanta cua cuestion enbolbiendo Jehova?
9 Bo ta mira e seriedad di loke a pasa? Satanas tabata atacando e posicion di Jehova como e Haltísimo. Dor di bisa, “Boso positivamente lo no muri,” e Diabel a contradicí Dios su palabranan, “Positivamente lo bo muri.” Satanas su siguiente palabranan a implicá cu Jehova tabata manteniendo Adam i Eva ignorante di e posibilidad di bira manera Dios, pues di no tin mester di Dje pa dicidí loke tabata bon i malu. P’esei Satanas su desafio a trece den cuestion e derecho i valides di Jehova su posicion como e Soberano Universal.—Génesis 2:17; 3:1-6.
10. Ki insinuacionnan Satanas a haci relacioná cu hende?
10 Tambe Satanas e Diabel a insinuá cu hende lo keda obediente na Jehova solamente tanten cu obedeciendo Dios tabata na nan bentaha. Cu otro palabra, integridad humano a ser trecé den cuestion. Satanas a acusá cu ningun hende boluntariamente lo keda leal na Dios. E acusacion malicioso aki di Satanas ta ser claramente revelá den e relato bíblico tocante Job, un sirbidor fiel di Jehova kende a pasa dor di un prueba grandi algu promé cu 1600 P.E.C. Ora bo lesa e promé dos capítulonan di e buki di Job, bo por adkerí comprendimentu penetrante den e motibu di sufrimentu humano i pakico Dios ta permiti’é.
11. Ki clase di homber Job tabata, pero ki acusacion Satanas a haci?
11 Job, “un homber sin culpa i recto,” a cai bou di atake di Satanas. Promé, Satanas a atribuí mal motibunan na Job dor di haci e pregunta, “Ta pornada cu Job ta teme Dios?” Anto, e Diabel astutamente a calumniá tantu Dios como Job acusando cu Jehova a cumpra Job su lealtad dor di proteh’é i bendicion’é. “Pero, pa un cambio,” Satanas a desafiá Jehova, “saca bo man, por fabor, i mishi cu tur cos cu e tin i mira si lo e no maldicioná bo den bo mes cara.”—Job 1:8-11.
12. (a) Cua preguntanan lo por a ser contestá solamente si Dios permití Satanas prueba Job? (b) Den kico Job su prueba a resultá?
12 Job tabata sirbiendo Jehova simplemente pa motibu di tur e bon cosnan cu el a ricibí for di Dios? Job su integridad por a wanta bou di prueba? En turno, Jehova tabatin suficiente confiansa den su sirbidor pa permiti’é ser probá? E preguntanan aki lo por a ser contestá si Jehova permití Satanas trece riba Job e prueba di mas severo. Job su curso fiel bou di e prueba permití dor di Dios, manera ta ser relatá den e buki di Job, a resultá di ta un vindicacion cabal di Jehova su husticia i hende su integridad.—Job 42:1, 2, 12.
13. Con nos ta enbolbí den loke a sosodé den Eden i cu Job?
13 Loke a sosodé den e hofi di Eden i cu e homber Job, sin embargo, tin un nificacion mas profundo. E cuestionnan cu Satanas a lanta ta enbolbé henter humanidad, incluyendo nos awe. Dios su nomber a ser calumniá, i su soberania a ser desafiá. E rectitud di Dios su creacion, hende, a ser cuestioná. E cuestionnan aki mester a ser resolvé.
CON PA RESOLVE E CUESTIONNAN
14. Ora e ser confrontá cu un desafio malicioso, kico un persona acusá tal bes lo haci?
14 Pa ilustrá, laga nos bisa cu bo ta un mayor amoroso cu vários yu den un famia felis. Suponé cu un di bo bisiñanan ta plama mentira, acusando bo di ta un mal mayor. Kico si e bisiña bisa cu bo yunan no ta stimá bo, cu nan ta keda cu bo pasobra nan no sa mihó, i cu nan lo bai foi cas si un persona mustra nan e manera. ‘Absurdo!’ kisas lo bo bisa. Sí, pero con lo bo proba esei? Algun mayor tal bes lo reaccioná cu furia. Ademas di crea mas problema, tal reaccion violento lo proveé mas prueba na e mentiranan. Un manera satisfactorio pa trata cu e problema ei lo ta di permití oportunidad pa bo acusador proba su acusacion i pa bo yunan testificá cu nan sinceramente ta stimá bo.
15. Con Jehova a scoge pa trata cu e desafio di Satanas?
15 Jehova ta manera e mayor amoroso. Adam i Eva por ser compará cu e yunan, i Satanas ta cuadra cu e rol di e bisiña gañador. Dios sabiamente no a destruí Satanas, Adam, i Eva inmediatamente, sino a permití e malechornan aki sigui biba pa un tempu. Esaki a permití nos promé mayornan tempu pa haña yu i asina cuminsá e famia humano, i esei a duna e Diabel un chens pa proba si su acusacion tabata berdad di manera cu e cuestionnan por a ser resolvé. Sin embargo, for di principio, Dios tabata sa cu algun hende lo ta leal na dje i asina lo proba cu Satanas ta un gañador. Ki gradicidu nos ta cu Jehova a sigui bendicioná i yuda esnan cu ta stim’é!—2 Crónicanan 16:9; Proverbionan 15:3.
KICO A SER PROBA?
16. Con e mundu a yega di ta den poder di Satanas?
16 Durante casi henter historia humano, Satanas tabatin man liber pa ehecutá su complot di dominacion riba humanidad. Entre otro cosnan, el a usa su influencia riba e podernan político i a promové religionnan cu sutilmente ta dirigí adoracion na dje mas bien cu na Jehova. Asina e Diabel a bira “e dios dje sistema di cosnan aki,” i e ta ser yamá “e gobernante di e mundu aki.” (2 Corintionan 4:4; Juan 12:31) En berdad, “henter e mundu ta drumí den e poder dje malbado.” (1 Juan 5:19) Esaki ta nificá cu Satanas a proba su acusacion di cu e por a kita henter humanidad for di Jehova Dios? Siguramente cu no! Aunke Satanas a ser permití pa keda na existencia, Jehova a procedé na ehecutá su mes propósito. Kico, anto, e Bijbel ta revelá en cuanto e echo cu Dios a permití maldad?
17. Kico nos mester tene na mente en cuanto e causa di maldad i sufrimentu?
17 Maldad i sufrimentu no ta ser causá dor di Jehova. Siendo cu Satanas ta e gobernante di e mundu aki i e dios dje sistema di cosnan aki, e i esnan na su banda ta responsabel pa e condicion actual di e sociedad humano i pa tur e miseria cu humanidad a sufri. Ningun persona por bisa cu bon razon cu Dios ta e causa di tal dificultadnan.—Romanonan 9:14.
18. Kico e echo cu Jehova a permití maldad i sufrimentu a proba en cuanto e idea di independencia for di Dios?
18 E echo cu Jehova a permití maldad i sufrimentu a proba cu independencia for di Dios no a trece un mundu mihó. Innegablemente, historia a ser caracterisá dor di un desaster tras di otro. E motibu di esaki ta cu hende a scoge pa sigui nan mes curso di independencia i no a mustra ningun berdadero respet pa Dios su palabra i boluntad. Ora Jehova su pueblo di antigua i nan lidernan infielmente a sigui “e curso popular” i a rechasá su palabra, e resultadonan tabata desastroso. Mediante su profeta Jeremías, Dios a bisa nan: “Esnan sabi a bira bergonsá. Nan a bira terorisá i lo ser cogé. Mira! Nan a rechasá e palabra mes di Jehova i ki sabiduria nan tin?” (Jeremías 8:5, 6, 9) Dor di no a sigui e normanan di Jehova, humanidad en general a bira manera un barcu sin timon, tirá p’aki i p’aya den un laman turbulento.
19. Ki prueba tin cu Satanas no por bira tur hende contra Dios?
19 E echo cu Dios a permití maldad i sufrimentu a proba tambe cu Satanas no por a apartá henter humanidad for di Jehova. Historia ta mustra cu semper tabatin individuonan cu a keda fiel na Dios sin importá ki tentacion of adversidad a ser trec’é riba nan. Atrabes dje siglonan, e poder di Jehova a ser manifestá na fabor di su sirbidornan, i su nomber a ser declará den tur e tera. (Exodo 9:16; 1 Samuel 12:22) Hebreonan capítulo 11 ta conta nos di un seri di hende fiel, incluyendo Abel, Enoc, Noe, Abraham i Moises. Hebreonan 12:1 ta yama nan ‘un nubia grandi di testigo.’ Nan tabata ehempelnan di fe firme den Jehova. Den tempu moderno tambe, hopi persona a entregá nan bida den integridad inkebrantabel na Dios. Pa medio di nan fe i amor, tal individuonan a proba definitivamente cu Satanas no por bira henter humanidad contra Dios.
20. E echo cu Jehova a permití pa maldad i sufrimentu sigui a proba kico en cuanto Dios i humanidad?
20 Finalmente, e echo cu Jehova a permití pa maldad i sufrimentu continuá a proveé prueba cu solamente Jehova, e Creador, tin e abilidad i e derecho pa goberná riba humanidad pa nan felicidad i bendicion eterno. Pa siglonan, humanidad a purba hopi forma di gobierno. Pero kico tabata e resultado? E problema i crísisnan complicá cu e nacionnan ta enfrentá awe ta evidencia amplio cu berdaderamente, manera e Bijbel a mencioná specíficamente, “hende a dominá hende pa su mes perhuicio.” (Eclesiástes 8:9) Solamente Jehova por tuma accion pa rescatá nos i cumpli cu su propósito original. Con lo e haci esaki, i na ki tempu?
21. Kico lo ser hací cu Satanas, i ken lo ser usá pa cumpli cu esaki?
21 Inmediatamente despues cu Adam i Eva a bira víctima di Satanas su complot, Dios a anunciá Su propósito en cuanto un medio di salbacion. Esaki ta loke Jehova a proclamá en cuanto Satanas: “Lo mi pone enemistad entre abo i e muher i entre bo simia i su simia. Lo e machicá bo den bo cabes i abo lo machik’é den su hilchi.” (Génesis 3:15) E proclamacion ei a garantisá cu e Diabel lo no ser permití pa cometé su echonan malbado pa semper. Como e Rey di e Reino Mesiánico, e Simia primintí, Jesucristo, lo ‘machicá Satanas den su cabes.’ Sí, “pronto,” Jesus lo aplastá e Satanas rebelde!—Romanonan 16:20.
KICO ABO LO HACI?
22. (a) Cua preguntanan bo mester enfrentá? (b) Aunke Satanas ta baha su rabia riba esnan fiel na Dios, di kico nan por ta sigur?
22 Conociendo e cuestionnan enbolbí, na ken su banda lo bo para? Lo bo proba pa medio di bo accionnan cu bo ta un apoyador leal di Jehova? Siendo cu Satanas sa cu su tempu ta corticu, lo e haci tur loke e por pa baha su rabia riba esnan cu kier wanta integridad na Dios. (Revelacion 12:12) Pero bo por acudí na Dios pa yudansa pasobra “Jehova sa con pa libra hende di debocion piadoso for di prueba.” (2 Pedro 2:9) Lo e no permití pa bo ser tentá mas di loke bo por wanta, i lo e percurá e salida di manera cu bo por ta capas pa soportá tentacionnan.—1 Corintionan 10:13.
23. Kico nos por anticipá cu confiansa?
23 Cu confiansa, laga nos anticipá e tempu ora cu e Rey Jesucristo lo tuma accion contra Satanas i tur cu ta sigui’é. (Revelacion 20:1-3) Jesus lo eliminá tur esnan cu ta compartí e responsabilidad pa e calamidadnan i agitacion cu humanidad a sufri. Te cu e tempu ei, un forma specialmente doloroso di sufrimentu ta e pérdida di nos stimánan den morto. Lesa e siguiente capítulo pa haña sa kico ta sosodé cu nan.
TEST BO CONOCIMENTU
Con nos por sa cu Jehova no ta causa sufrimentu humano?
Cua cuestionnan a ser lantá dor di Satanas den Eden i a ser hací cla den dia di Job?
E echo cu Dios a permití sufrimentu a proba kico?