Sacrificionan Cu A Agradá Dios

“Tur sumo sacerdote ta ser nombrá pa ofrecé tantu regalo como sacrificio.”—HEBREONAN 8:3.

 1. Di con hende ta sinti necesidad di acudí na Dios?

“PA HENDE, haci sacrificio ta parce mes ‘natural’ cu haci oracion; esun ta indicá loke e ta pensa di su mes, i e otro, loke e ta pensa di Dios,” segun historiadó bíblico Alfred Edersheim. For di tempu cu picá a drenta mundu el a producí e dolor di culpa, alehamentu for di Dios i impotencia. Hende tin mester di alivio for di e sintimentunan aki. Ta fácil pa comprendé cu ora hende haña nan den un estado asina desesperá, nan ta sinti e necesidad di acudí na Dios pa yudansa.—Romanonan 5:12.

 2. Ki registro di sacrificionan antiguo na Dios nos ta topa den Bijbel?

² E promé registro bíblico di sacrificio hací na Dios ta relacioná cu Cain cu Abel. E ta bisa: “Despues cu algun tempu a transcurí a sosodé cu Cain a trece algun fruta di suela como ofrenda pa Jehova. Pero, en cuanto Abel, e tambe a trece algun primogénito di su tou, sí, nan partinan yen di sebu.” (Génesis 4:3, 4) Siguientemente, nos ta mira con Noe, kende Dios a protehá durante e gran Diluvio cu a destruí e generacion malbado di su tempu, a sintié motivá pa “ofrecé ofrenda kimá riba e altar” pa Jehova. (Génesis 8:20) Na vários ocasion Dios su promesanan i bendicionnan a motivá Abraham, Dios su fiel sirbidó i amigu, pa ‘traha un altar anto inbocá e nomber di Jehova.’ (Génesis 12:8; 13:3, 4, 18) Mas despues Abraham a confrontá e prueba mas grandi di su fe ora Jehova a bis’é p’e ofrecé su yu Isaac como ofrenda kimá. (Génesis 22:1-14) Apesar cu e relatonan aki ta breve, nan ta aclará hopi cos tocante e tema di sacrificio, manera nos lo mira.

 3. Ki rol sacrificio ta hunga den adoracion?

³ E relatonan aki i otronan den Bijbel ta mustra bon cla cu ofrecé un of otro forma di sacrificio tabata un parti fundamental di adoracion, hopi tempu promé cu Jehova a duna leynan specífico tocante e asuntu. Di acuerdo cu esei, un obra di referencia ta definí “sacrificio” como “un rito religioso caminda ta ofrecé un obheto na un divinidad pa establecé, mantené of restorá un bon relacion entre hende i loke e ta considerá sagrado.” Pero esaki ta lanta un par di pregunta cu merecé nos consideracion cu hopi atencion, por ehempel: Di con sacrificio ta necesario den adoracion? Ki tipo di sacrificio ta aceptabel pa Dios? I ki nificacion sacrificionan antiguo tin pa nos awe?

Di Con Sacrificio Ta Necesario?

 4. Kico tabata e consecuencia pa Adam cu Eva ora nan a peca?

⁴ Ora Adam a peca, el a hacié deliberadamente. El a coge i come e fruta for dje palu di conocimentu di bon i malu como un acto intencional di desobedencia. E castigu pa tal acto di desobedencia tabata morto, manera Dios a declará bon cla: “Den e dia cu bo come di dje lo bo muri positivamente.” (Génesis 2:17) Na final, Adam cu Eva a cosechá e salario di picá: nan a muri.—Génesis 3:19; 5:3-5.

 5. Di con Jehova a tuma iniciativa na fabor di Adam su desendencia, i kico El a haci pa nan?

⁵ Pero kico di Adam su desendencia? Dor cu nan a heredá picá i imperfeccion di Adam, nan ta sometí na e mésun alehamentu for di Dios, desesperacion i morto cu e promé pareha humano a experenciá. (Romanonan 5:14) Pero Jehova no ta un Dios di husticia i poder so, sino tambe, i de echo principalmente, di amor. (1 Juan 4:8, 16) Pues, e ta tuma iniciativa pa remediá e relacion dañá ei. Despues di bisa cu “e salario cu picá ta paga ta morto,” Bijbel ta sigui bisa, “pero e don cu Dios ta duna ta bida eterno mediante Cristo Jesus nos Señor.”—Romanonan 6:23.

 6. Kico ta Jehova su boluntad relacioná cu e daño cu e picá di Adam a causa?

⁶ Pa garantisá e don ei, despues Jehova Dios a percurá algu pa cubri e daño cu Adam su transgresion a causa. Parce cu originalmente e palabra kafár na hebreo a nificá “cubri” of kisas “frega kita,” i e ta ser traducí tambe como “expiacion.”a Cu otro palabra, Jehova a percurá un medio apropiado pa tapa e picá heredá for di Adam i eliminá e daño causá, di manera cu esnan cu ta cualificá pa e don por ser librá dje condena di picá i morto.—Romanonan 8:21.

 7. (a) Ki speransa Dios a duna den su sentencia contra Satanas? (b) Ki prijs mester paga pa libra humanidad for di picá i morto?

⁷ For di ora e promé pareha humano a caba di peca, Dios a referí indirectamente n’e speransa pa hende ser librá for di sclabitud na picá i morto. Den su sentencia contra Satanas, representá dor dje colebra, Jehova a declará: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” (Génesis 3:15) E declaracion profético ei a pone un rayo di speransa lusa pa tur esnan cu lo a pone fe den e promesa ei. Pero mester a paga un prijs p’e liberacion ei. E Simia primintí lo no a bini pa destruí Satanas so; lo mester a machicá e Simia su hilchi, esta, lo e mester a experenciá morto, aunke no pa semper.

 8. (a) Con Cain a resultá di ta un decepcion? (b) Di con e sacrificio di Abel tabata aceptabel den bista di Dios?

⁸ Adam cu Eva lo mester a pensa hopi riba identidad dje Simia primintí. Ora cu Eva a duna lus na Cain, su promé yu, el a proclamá: “Mi a producí un homber cu yudansa di Jehova.” (Génesis 4:1) Ta pensa el a pensa cu su yu por a resultá di ta e Simia? Sea el a pensa esei of no, tantu Cain como su desendencia a resultá un decepcion. Di otro banda, su ruman Abel a mustra fe den Dios su promesa, i esei a motiv’é pa ofrecé algun primogénito di su tou como sacrificio pa Jehova. Nos ta lesa: “Pa medio di fe Abel a ofrecé na Dios un sacrificio di mas balor cu esun di Cain, pa medio di cua fe el a ricibí testimonio di cu e tabata hustu.”—Hebreonan 11:4.

 9. (a) Den kico Abel a pone fe, i con el a expresá esaki? (b) Kico e sacrificio di Abel a logra?

⁹ E fe di Abel no tabata simplemente un fe cu Dios ta existí, loke Cain tambe mester tabata kere. Abel tabatin fe den Dios su promesa di un Simia cu lo trece salbacion pa hende fiel. No a ser revelá na dje con lo a lográ esei, pero Dios su promesa a haci Abel conciente cu lo mester machicá un hende na su hilchi. Sí, aparentemente el a concluí cu lo mester drama sanger, precis loke e idea di sacrificio ta encerá. Abel a haci un ofrenda na e Fuente di bida, un ofrenda cu a enbolbé bida i sanger, posiblemente como un muestra di su anhelo intenso pa e realisacion di Jehova su promesa, i den anticipacion di dje. Ta e expresion di fe aki a haci Abel su sacrificio agradabel pa Jehova, i den un sentido limitá, el a mustra loke eigenlijk sacrificio ta encerá: un medio pa hende imperfecto acercá Dios pa gana su aprobacion.—Génesis 4:4; Hebreonan 11:1, 6.

10. Con e echo cu Jehova a pidi Abraham ofrecé Isaac, a aclará e nificacion di sacrificio?

¹⁰ E nificacion profundo di sacrificio a keda clarificá dramáticamente ora Jehova a manda Abraham ofrecé su yu Isaac como ofrenda kimá. Apesar cu e sacrificio ei no a ser efectuá literalmente, el a sirbi como un idea di loke Jehova mes tabata bai haci un dia: ofrecé su Yu unigénito como e sacrificio mas grandi cu tur, pa cumpli cu Su boluntad relacioná cu humanidad. (Juan 3:16) Pa medio dje sacrificio i ofrendanan dje Ley di Moises, Jehova a establecé patronchinan profético pa siña su pueblo scogí kico nan mester haci pa ricibí pordon di nan picánan, i pa haci nan speransa di salbacion mas firme. Kico nos por siña for di esakinan?

Sacrificio Aceptabel pa Jehova

11. Cua dos categoria di ofrenda e sumo sacerdote di Israel tabata presentá, i cu ki propósito?

¹¹ “Tur sumo sacerdote ta ser nombrá pa ofrecé tantu regalo como sacrificio,” segun apostel Pablo. (Hebreonan 8:3) Wak con Pablo ta parti e ofrendanan dje sumo sacerdote di antiguo Israel den dos categoria, esta, “regalo” i “sacrificio,” of “sacrificionan pa picá.” (Hebreonan 5:1) Generalmente hende ta haci regalo pa expresá cariño i aprecio, i tambe pa cultivá amistad, aprobacion of aceptacion. (Génesis 32:20; Proverbionan 18:16) Mescos nos por considerá hopi dje ofrendanan cu e Ley a prescribí, como “regalo” na Dios pa busca su aceptacion i aprobacion.b Transgresionnan contra e Ley a rekerí un restitucion, i como compensacion hende a ofrecé “sacrificionan pa picá.” E Pentateuco, specialmente e bukinan Éxodo, Levítico i Númeronan, tin masha tantu informacion relacioná cu diferente tipo di sacrificio i ofrenda. Aunke por ta un berdadero reto pa nos asimilá i corda tur e detayenan, un par di punto principal relacioná cu e diferente tiponan di sacrificio ta merecé nos atencion.

12. Unda den Bijbel nos por haña un descripcion dje sacrificio of ofrendanan, den e Ley?

¹² Nos por nota cu Levítico capítulo 1 pa 7 ta describí cincu tipo principal di ofrenda individualmente: ofrenda kimá, ofrenda di grano, sacrificio di comunion, ofrenda pa picá i ofrenda pa culpa, i esei apesar cu eigenlijk nan tabata ofrecé algun di nan pareu. Tambe nos por nota cu e capítulonan aki ta describí e ofrendanan aki dos bes, cu dos meta distinto: un biaha na Levítico 1:2 pa 6:7, pa specificá loke mester a ofrecé riba e altar, i e di dos biaha na Levítico 6:8 pa 7:36, pa mustra e porcion apartá p’e sacerdotenan i e porcion reservá pa esun cu a haci e ofrenda. Anto na Númeronan capítulo 28 i 29 nos ta topa loke por considerá como un agenda detayá cu ta mustra kico mester a ofrecé tur dia, tur siman, tur luna, i na e festivalnan anual.

13. Describí e ofrendanan cu nan tabata haci boluntariamente como regalo pa Dios.

¹³ Ofrendanan hací boluntariamente como regalo of pa acercá Dios pa gana su aprobacion tabata, entre otro: ofrenda kima, ofrenda di grano i ofrenda di comunion. Algun erudito ta bisa cu e expresion hebreo pa “ofrenda kimá” kier men “un ofrenda di subida” of “un ofrenda cu ta subi.” Esaki ta apropiado pasobra den un ofrenda kimá, riba e altar nan tabata kima e bestia cu nan a mata, anto un holó dushi, of trankilisante, a subi bai shelu cerca Dios. Loke a haci e ofrenda kimá distinto dje otronan tabata cu, despues cu nan a spat su sanger rond dje altar, nan a ofrecé e bestia completo na Dios. E sacerdotenan tabata “lagu’é huma completo riba e altar como un ofrenda kimá, un ofrenda hací cu candela cu un holó trankilisante, pa Jehova.”—Levítico 1:3, 4, 9; Génesis 8:21.

14. Con nan a presentá e ofrenda di grano?

¹⁴ Levítico capítulo 2 ta describí e ofrenda di grano. E tabata un ofrenda boluntario cu a consistí di hariña fini, generalmente muhá cu zeta, cu olíbano acerca. “E sacerdote tin cu gara un man yen di su hariña fini i su zeta, cu tur su olíbano; i e tin cu lagu’é huma riba e altar como recuerdo di dje, como un ofrenda hací cu candela cu un holó trankilisante, pa Jehova.” (Levítico 2:2) Olíbano tabata un dje ingredientenan dje censia santu cu nan tabata kima riba e altar di censia den e tabernáculo i e tempel. (Éxodo 30:34-36) Evidentemente rey David tabatin esaki na mente ora el a bisa: “Laga cu mi oracion por ser prepará manera censia dilanti bo, hisamentu di mi plant’i mannan, manera e ofrenda di grano di anochi.”—Salmo 141:2.

15. Ki propósito e sacrificio di comunion a sirbi?

¹⁵ Un otro ofrenda boluntario tabata e sacrificio di comunion, describí na Levítico capítulo 3. Por traducí e nomber como “un sacrificio di ofrendanan di pas” tambe. Na hebreo, e palabra “pas” ta encerá hopi mas cu djis ser liber di guera i disturbio. “Den Bijbel e ta encerá esei, i tambe e estado of relacion di pas cu Dios, prosperidad, goso i felicidad,” segun e buki Studies in the Mosaic Institutions (Studio di e Prácticanan di Ley di Moises). Pues, nan no tabata ofrecé sacrificionan di comunion pa percurá pas cu Dios, como si fuera pa calm’é, sino pa celebrá of expresá gratitud pa e felis condicion di pas cu Dios, cu esnan cu e ta aprobá ta gosa di dje. E sacerdotenan i esun cu ta haci e ofrenda tabata participá dje sacrificio despues cu nan a ofrecé e sanger i e sebu na Jehova. (Levítico 3:17; 7:16-21; 19:5-8) Den un manera bunita i simbólico, esun cu ta haci e ofrenda, e sacerdotenan i Jehova Dios tabata compartí un cuminda, indicando e relacion pacífico cu a existí entre nan.

16. (a) Ki propósito e ofrenda pa picá i e ofrenda di culpa tabatin? (b) Den ki manera nan tabata diferente for dje ofrenda kimá?

¹⁶ Entre e sacrificionan ofrecé pa busca pordon di picá of pa expiá transgresionnan contra e Ley, tabatin e ofrenda pa picá i e ofrenda di culpa. Apesar cu e sacrificionan aki tambe a enbolbé kimamentu riba e altar, nan no tabata mescos cu e sacrificio kimá, pasobra no ta henter e bestia a ser ofrecé na Dios, djis e sebu i cierto partinan di dje. Nan tabata deshací di sobrá dje bestia pafó dje campamentu, of den algun caso e sacerdotenan tabata come di dje. E diferencia aki ta significativo. E sacrificio kimá tabata ser presentá como un regalo na Dios p’e permití bo acerk’é. Dor di esei nan tabata ofrec’é completamente na Dios, i na Dios so. Ta interesante pa nota cu hopi bes, promé cu haci un ofrenda kimá, nan tabata haci un ofrenda pa picá of un ofrenda pa culpa, loke ta duna di comprendé cu pa e regalo di un pecadó ta aceptabel pa Dios, pordon di picá tabata necesario.—Levítico 8:14, 18; 9:2, 3; 16:3, 5.

17, 18. Pa ki tipo di circunstancia a percurá e ofrenda pa picá, i ki propósito ofrendanan pa culpa tabatin?

¹⁷ E ofrenda pa picá tabata ser aceptá únicamente pa picánan no intencional contra e Ley, picá cometí dor di debilidad di carni. “Den caso cu un alma peca pa ekibocacion den cualkier dje cosnan cu Jehova ta manda cu no mag haci,” anto e pecadó mester a ofrecé un ofrenda pa picá di acuerdo cu su státus of posicion den comunidad. (Levítico 4:2, 3, 22, 27) Di otro banda, pecadónan cu no a repentí a ser cortá afó; no tabatin sacrificio pa nan.—Éxodo 21:12-15; Levítico 17:10; 20:2, 6, 10; Númeronan 15:30; Hebreonan 2:2.

¹⁸ Levítico capítulo 5 i 6 ta clarificá e nificacion i propósito dje sacrificio pa culpa. Kisas un hende a peca inintencionalmente. Tog su transgresion por a producí culpa relacioná cu derechonan sea di otro hende of di Jehova Dios, i mester a paga pa loke a bai malu, of corigié. E capítulonan ta mencioná vários categoria di picá. Algun tabata picánan privá (5:2-6), algun tabata picá contra “Jehova su cosnan santu” (5:14-16), i algun, aunke nan no a sosodé henteramente sin cu e persona tabata kier, tabata picánan cu a bini dor di deseonan robes of debilidad di carni (6:1-3). Ademas di confesá picánan asina, e ofensor mester a paga un compensacion, ora esei tabata apropiado, i despues presentá un ofrenda di culpa na Jehova.—Levítico 6:4-7.

Algu Mihó na Caminda

19. Maske Israel tabatin e Ley i su sacrificionan, di con nan a keda sin gana Dios su aprobacion?

¹⁹ E israelitanan a ricibí e Ley di Moises, cu su hopi sacrificio i ofrendanan, pa yuda nan acercá Dios pa gana i keda cu su aprobacion i bendicion te ora e Simia primintí yega. Apostel Pablo, un hudiu natural, a expres’é asin’akí: “E Ley a bira nos maestro cu a guia nos na Cristo, pa nos por ser declará hustu debí na fe.” (Galationan 3:24) Lamentablemente, como nacion, Israel no a respondé n’e guia dje maestro ei, sino a abusá di tal privilegio. Como consecuencia, tur e cantidad di sacrificio cu nan tabata haci a bira repugnante pa Jehova, kende a bisa: “Ya mi ta hartá di ofrenda kimá di chubat’i carné i e sebu di animal gordá; i den e sanger di toro yong i lamchi machu i chubat’i cabritu mi no a haña deleite.”—Isaías 1:11.

20. Kico a pasa na aña 70 E.C. pa loke ta e Ley i su sacrificionan?

²⁰ Na aña 70 E.C., e sistema di cosnan hudiu cu su tempel i su sacerdocio a yega na su fin. Despues di esei, no tabata posibel mas pa sigui haci sacrificio na e manera cu e Ley a stipulá. Esei kier men cu e sacrificionan, como parti integral dje Ley, a perde tur nan nificacion pa adoradónan di Dios djawe? Den nos siguiente artículo nos lo examiná esei.

[Nota]

Bo Por Splica?

• Kico a motivá hombernan fiel di pasado pa ofrecé sacrificio na Jehova?

• Pakico sacrificio tabata necesario?

• Cua ta e tiponan di sacrificio principal cu nan a ofrecé bou dje Ley, i ki propósito nan tabatin?

• Segun Pablo, ki propósito fundamental e Ley i su sacrificionan a sirbi?

[Plachi na página 14]

Abel su sacrificio tabata agradabel dor cu el a reflehá su fe den e promesa di Jehova

[Plachi na página 15]

Abo ta capta e nificacion dje esena aki?