Noe Su Fe Ta Condená Mundu

BO A yega di tende di Noe, un homber cu a teme Dios i cu a traha un arca pa salba bida di hende durante un diluvio mundial? Apesar cu e relato aki ta bieu, miyones di hende conoc’é. Pero loke hopi hende no sa ta cu Noe su bida tin nificacion pa nos tur.

Di con nos mester ta interesá den un relato cu ta miles di aña bieu? Tin aspectonan similar entre e situacion di Noe i esun di nos mes? Si tin similaridad, con nos por beneficiá di su ehempel?

E Mundu den e Dia di Noe

Cronologia bíblico ta indicá cu Noe a nace na aña 2970 promé cu Era Comun. Esaki tabata 126 aña despues di Adam su morto. Den e dia di Noe, mundu tabata yen di violencia, i mayoria di desendiente di Adam a scoge pa sigui ehempel di nan antepasadonan desobediente. Pues “Jehova a mira cu e maldad di hende tabata abundante riba tera i tur inclinacion dje pensamentunan di su curason tabata solamente malu tur ora.”—Génesis 6:5, 11, 12.

Rebelion di hende no tabata e único cos cu a desagradá Jehova. E relato di Génesis ta splica: “E yunan di e Dios berdadero a cuminsá tuma nota dje yu muhernan di hende, cu nan tabatin bunita aparencia; i nan a cuminsá tuma esposa pa nan mes, esta, tur loke nan a scoge. . . . Néfilim a resultá di ta riba tera den e dianan ei, i tambe despues di esei, ora cu e yunan di e Dios berdadero a sigui tene relacion cu yu muher di hende i nan a haña yu di nan, nan tabata e poderosonan cu tabata di antigwedad, homber di fama.” (Génesis 6:2-4) Si bo compará e versículonan aki cu un declaracion di apostel Pedro bo ta mira cu “e yunan di e Dios berdadero” tabata angelnan desobediente. Néfilim tabata desendientenan mesclá cu a resultá for di e relacion sexual prohibí entre hende muher i angelnan rebelde cu a tuma curpa di carni.—1 Pedro 3:19, 20.

“Néfilim” ta nificá “Tumbadó.” I tumbadó ta referí na individuonan cu ta pone otronan cai. Nan tabata abusadónan tiránico, i e picá di nan tatanan inmoral ta comparabel cu e comportacion sexual inaceptabel di Sódoma i Gomora. (Hudas 6, 7) Angel rebelde huntu cu néfilim a instigá maldad intolerabel riba tera.

“Sin Culpa Entre Su Contemporáneonan”

Maldad a aumentá asina tantu cu Dios tabata determiná pa destruí humanidad. Pero e relato inspirá ta bisa: “Noe a haña fabor den bista di Jehova. . . . Noe tabata un homber hustu. El a resultá di ta sin culpa entre su contemporáneonan. Noe a cana cu e Dios berdadero.” (Génesis 6:8, 9) Con tabata posibel pa ‘cana cu Dios’ den un mundu malbado cu tabata merecé destruccion?

Sin duda, Noe a siña hopi di Lamec su tata, un homber di fe i un contemporáneo di Adam. Ora Lamec a duna su yu homber e nomber Noe (loke nan ta kere ta nificá “Descanso” of “Consolacion”), Lamec a profetisá: “Esun aki lo trece consuelo pa nos for di nos trabou i for dje dolor di nos mannan cu ta resultá for dje suela cu Jehova a maldicioná.” Dios a cumpli cu e profecia ei ora el a kita e maldicion cu tabatin riba suela.—Génesis 5:29; 8:21.

E echo cu mayornan ta teme Dios no ta un garantia cu e yunan lo bira hendenan spiritual, pasobra cada hende mester establecé su propio relacion cu Jehova. Noe ‘a cana cu Dios’ dor di hiba un bida cu tabatin aprobacion divino. Loke Noe a siña tocante Dios a anim’é p’e sirbi Dios. Noe su fe no a tambaleá ora cu el a ser informá en cuanto Dios su propósito ‘pa caba cu tur carni den e diluvio.’—Génesis 6:13, 17.

Aunke e desaster aki nunca a yega di sosodé, Noe tabata convencí cu e lo sosodé. P’esei el a obedecé Jehova su mandamentu: “Traha pa bo mes un arca di palu yen di hars. Lo bo traha compartimentu den e arca i bo tin cu cubrié di paden i pafó cu breu.” (Génesis 6:14) No tabata facil pa cumpli cu loke Dios a pidi’é. Tog, “Noe a procedé na haci conforme cu tur loke Dios a mand’é.” Sí, “el a haci precisamente asina.” (Génesis 6:22) Noe a haci esaki cu yudansa di su casá i nan yunan Sem, Cam i Jafet i nan esposanan. Jehova a bendicioná e clase di fe ei. Ki un excelente ehempel pa famianan awe!

Kico construccion dje arca a encerá? Jehova a dirigí Noe pa construí un caha inmenso di palu cu ta waterproef i di tres piso. Esaki mester tabata 133 meter largu, 22 meter hanchu i 13 meter haltu. (Génesis 6:15, 16) Un barcu asina lo tabatin un capacidad comparabel cu vários bapor di carga di awendia.

Esta un proyecto inmenso! Muy probablemente, esaki a nificá kap miles di palu, hiba nan n’e sitio di construccion, i corta nan na planki of biga. El a nificá traha stelashi, traha penchi, busca baki, herment i breu pa yena nachi, etcétera. Traha e arca kisas a encerá negoshá cu comerciante i paga pa material i servicionan. Ta parce cu nan mester tabata sa bon di carpinteria pa hinca e palunan precis na nan lugá i traha un structura suficiente fuerte. I djis pensa, construccion dje arca probablemente a dura mas o ménos 50 pa 60 aña!

Despues Noe mester a dedicá atencion na preparacion di suficiente cuminda pa hende i bestia. (Génesis 6:21) E mester a trece un cantidad di bestia huntu den e arca i cuida nan. Noe a haci tur loke Dios a mand’é, i a caba cu e trabou. (Génesis 6:22) Jehova su bendicion a garantisá cu e trabou tabata un éxito rotundo.

“Un Predicadó di Husticia”

Fuera di construí un arca, Noe a duna advertencia i a sirbi Dios fielmente como “un predicadó di husticia.” Pero e hendenan “no a haci caso te cu e diluvio a bini i a bari nan tur.”—2 Pedro 2:5; Mateo 24:38, 39.

Ora bo pensa riba e condicion spiritual deplorabel dje tempu ei, ta fácil pa comprendé di con bisiñanan incrédulo di Noe su famia a hari nan, haci bofon di nan i maltratá nan. Hende mester a pensa cu nan ta loco. Apesar di esei, Noe tabatin éxito den duna su hendenan di cas animacion i sosten spiritual. I prueba di su éxito ta cu nunca su famia a imitá e violencia, inmoralidad i rebeldia di nan contemporáneonan malbado. Dor di loke Noe a bisa i haci el a demostrá fe i asina a condená e mundu di e tempu ei.—Hebreonan 11:7.

Protehá Durante Diluvio

Un poco promé cu e awa a cuminsá basha, Dios a bisa Noe pa drenta den e arca cu tabata cla. Ora Noe cu su famia i e bestianan tabata paden, “Jehova a cera e porta,” lagando afó cualkier persona cu a burla di nan i a rebahá nan. Ora e Diluvio a bini, aparentemente e angelnan desobediente a laga nan curpa di carni i a scapa destruccion. Pero kico di otronan? Wel, tur cos bibiente cu tabata riba tera secu pafó dje arca, incluso néfilim, a muri! Solamente Noe i su famia a sobrebibí.—Génesis 7:1-23.

Noe cu su hendenan di cas a pasa un aña lunar i dies dia den e arca. Nan tabata ocupá cu e bestianan, dunando nan awa cu cuminda, kitando sushi, i teniendo registro di e tempu. Génesis ta mencioná fecha di tur e etapanan di e Diluvio exactamente, mescos cu un diario di nabegacion. Esaki ta revelá cu e relato ta berdad.—Génesis 7:11, 17, 24; 8:3-14.

Miéntras Noe tabata den e arca, sin duda lo el a papia cu su famia riba cosnan spiritual i duna gradicimentu na Dios. Tur cos ta mustra cu ta Noe cu su famia a conserbá e historia dje tempu promé cu Diluvio. Durante Diluvio, tradicion verbal confiabel of documentonan histórico lo por a duna nan material excelente cu nan por a usa i saca beneficio for di dje.

Esta contentu Noe cu su famia mester a bira ora nan a cana riba tera secu atrobe! E promé cos cu el a haci ta traha un altar i sirbi como sacerdote pa su famia, ofreciendo sacrificio na Esun cu a salba nan.—Génesis 8:18-20.

“Mescos cu e Dianan di Noe Tabata”

Jesucristo a bisa: “Mescos cu e dianan di Noe tabata, asina e presencia dje Yu di hende lo ta.” (Mateo 24:37) Di igual manera awe cristiannan ta predicadónan di husticia, consehando hende pa repentí. (2 Pedro 3:5-9) Cu e comparacion ei na mente, kisas nos ta puntra nos mes kico lo a pasa den Noe su mente promé cu Diluvio. El a yega di sinti cu su predicacion tabata pornada? El a cansa tin bes? Bijbel no ta papia tocante esei. E único cos cu e ta bisa nos ta cu Noe a obedecé Dios.

Bo ta mira con e situacion di Noe ta aplicá na nos? Apesar di oposicion i prueba el a obedecé Jehova. Esei ta e motibu pakico Jehova a consider’é hustu. Noe su famia no tabata sa exactamente ki ora Dios lo a manda Diluvio, pero nan tabata sa cu lo e bini. Fe den Dios su palabra a yuda Noe para firme durante e añanan cu e mester a traha duru i durante loke por a parce predicacion improductivo. Sí, Bijbel ta bisa: “Pa medio di fe Noe, despues cu el a ser duná spiertamentu divino di cosnan cu no a ser contemplá ainda, a desplegá temor di Dios i a construí un arca p’e salbacion di su famia di cas; i pa medio dje fe aki el a condená e mundu, i el a bira un heredero dje husticia cu ta segun fe.”—Hebreonan 11:7.

Con Noe a haña e fe ei? Aparentemente el a tuma tempu pa meditá riba tur loke e tabata sa di Jehova i a laga e conocimentu ei dirigí su bida. Sin duda, Noe a papia cu Dios den oracion. De echo, el a siña conocé Jehova di un manera asina íntimo cu el ‘a cana cu Dios.’ Como cabes di famia, di buena gana Noe a dedicá tempu i atencion amoroso na e hendenan di su cas. Esaki a incluí percurá pa e bienestar spiritual di su esposa, su tres yunan i su suegranan.

Mescos cu Noe, awe cristiannan berdadero sa cu Jehova pronto lo pone un fin na e mundu malbado aki. Nos no sa ki dia ni ki ora esei lo ta, pero nos ta comprendé cu si nos imitá e fe i obedencia di e “predicadó di husticia” aki, esaki lo resultá den “conserbá e alma bibu.”—Hebreonan 10:36-39.

[Kuadro na página 29]

Di Berdad El A Sosodé?

Antropólogonan a haña no ménos cu 270 leyenda di diluvio di casi tur tribu i nacion. Erudito Claus Westermann ta bisa: “Rond mundu bo ta haña e cuenta di diluvio. Mescos cu e relato di creacion, e ta parti di nos herencia cultural básico. E ta realmente asombroso: tur caminda na mundu nos ta haña cuentanan di un antiguo diluvio grandi.” Kico ta e motibu tras di esaki? Comentarista Enrico Galbiati ta bisa: “Den vários nacion cu ta keda leu di otro i di diferente época, constantemente bo ta haña hende cu ta kere den un diluvio. Esei ta un señal cu e ta algu cu a sosodé.” Pero pa cristiannan, loke ta mas importante ta e echo cu Jesus mes a papia di e Diluvio como algu cu di berdad a sosodé den historia di humanidad, i no loke expertonan ta bisa.—Lucas 17:26, 27.

[Kuadro na página 30]

Néfilim den Mitologia?

Mitonan tocante relacion sexual entre dios i hende—i e “héroenan” of “semi diosnan” cu e unionnan aki a producí—tabata comun den teologia griego, egipcio, ugarítico, hurrita i mesopotamio. E diosnan di mitologia griego tabatin forma di hende i nan tabata masha bunita mes. Nan a come, bebe, drumi, tene relacion sexual, pleita, bringa, seducí i violá hende. Aunke nan tabata supuestamente santu, nan tabata capas pa engañá i cometé crímen. Nan ta bisa cu héroenan manera Akiles tabata di desendencia tantu divino como humano i nan tabatin abilidadnan sobrehumano pero no tabata inmortal. Pues, loke Génesis ta bisa tocante néfilim ta yuda nos comprendé di unda e mitonan ei kisas ta bini.