“Machu i Hembra El A Crea Nan”

“Dios a procedé na crea hende den su imágen, den imágen di Dios el a cre’é; machu i hembra el a crea nan.”—GENESIS 1:27.

 1. Con e berdad ta un bendicion pa homber i muhernan cristian?

TA KI un placer pa ta entre Jehova su pueblo i pa asociá cu hende homber i muher, i tambe mucha homber i mucha muher, kende nan prioridad den bida ta di stima i obedecé Dios! E berdad ta haci nos liber tambe di actitudnan i conducta cu ta desagradá Jehova Dios, i e ta siña nos con pa biba manera cristiannan mester biba. (Juan 8:32; Colosensenan 3:8-10) Por ehempel, na tur parti di mundu hende tin tradicion of conceptonan tocante e manera con hende homber mester expresá nan masculinidad, i hende muher nan feminidad. E echo cu hende homber ta nace masculino i hende muher femenino ta tur loke tin? Of tin otro factornan cu mester tuma na consideracion?

 2. (a) Kico mester determiná nos punto di bista tocante masculinidad i feminidad? (b) Kico a sosodé cu e puntonan di bista riba kico kier men ser homber of muher?

² Pa cristiannan, e Palabra di Dios ta e autoridad cu nos ta someté na dje, sin importá puntonan di bista personal, cultural of tradicional cu nos por a adkerí. (Mateo 15:1-9) Bijbel no ta bai den detaye riba tur aspecto di masculinidad i feminidad. Mas bien, e ta laga lugá pa variedad, manera nos por haña den diferente cultura. Pa ta loke Dios a crea nan pa ta, hende homber mester ta masculino i hende muher mester ta femenino. Pakico? Pasobra ademas cu hende homber i muher a ser trahá pa complementá otro den sentido físico, nan a ser trahá pa complementá otro mediante cualidadnan masculino i femenino. (Génesis 2:18, 23, 24; Mateo 19:4, 5) Sin embargo, puntonan di bista riba kico kier men ser homber of muher a bira trocí i deformá. Hopi hende ta kere cu ser masculino ta nificá tene dominio severo, ser sin sintimentu of ser machista. Den cierto culturanan lo ta algu straño of bergonsoso pa un hende homber yora, sea den público of den privá. Sin embargo, den e multitud pará pafó dje graf di Lázaro, “Jesus a entregá na lágrima.” (Juan 11:35) Esei no tabata inapropiado pa Jesus, kende su masculinidad tabata perfecto. Awe hopi hende a haña un punto di bista desbalansá di feminidad. Nan ta consider’é como simplemente ser físicamente i sexualmente atractivo.

Berdadero Masculinidad i Berdadero Feminidad

 3. Con hende homber i hende muher ta diferenciá for di otro?

³ Kico ta berdadero masculinidad i kico ta berdadero feminidad? The World Book Encyclopedia ta declará: “Mayoria hende homber i hende muher ta diferenciá for di otro no solamente den anatomia, sino tambe den comportacion i interesnan. Algun dje diferencianan aki ta ser determiná dor di hende su composicion genético. . . . Pero hopi diferencia cu no ta debí na hende su composicion físico ta parce di ta basá riba patronchi di comportacion pa hende homber i pa hende muher cu tur individuo ta siña. Hende ta nace machu of hembra, pero nan ta siña pa ta masculino of femenino.” Nos composicion genético por splica hopi cos, pero e desaroyo di masculinidad of feminidad apropiado ta dependé riba siña loke Dios ta rekerí i riba loke nos ta scoge pa sigui den bida.

 4. Kico Bijbel ta revelá tocante e papelnan di hende homber i muher?

⁴ Historia bíblico ta revelá cu e papel di Adam tabata di hiba delantera como cabes di su esposa i yunan. Tambe e mester a cumpli cu e boluntad di Dios di yena e tera, domin’é i trece henter creacion terenal inferior den sumision. (Génesis 1:28) E papel femenino den famia pa Eva tabata pa ta un “yudante” i “un complemento” pa Adam, sumiso na su hefatura, cooperando cuné den e cumplimentu di Dios su propósito expresá pa nan.—Génesis 2:18; 1 Corintionan 11:3.

 5. Con e relacion entre homber i muher a daña?

⁵ Pero Adam no a cumpli cu su responsabilidad, i Eva a usa su feminidad den un manera persuasivo pa tenta Adam pa uni cuné den desobedecé Dios. (Génesis 3:6) Dor di entregá na haci loke e tabata sa cu ta robes, Adam a keda sin desplegá berdadero masculinidad. Débilmente el a scoge pa aceptá e palabra di su casá engañá en bes di loke su Tata i Creador a bisa. (Génesis 2:16, 17) Pronto e promé pareha a cuminsá experenciá loke Dios a premirá cu lo ta e consecuencia di desobedencia. Adam, kende anteriormente a describí su esposa cu masha entusiasmo den términonan poético, awor sin ningun emocion a referí na dje como ‘e muher cu bo a duná mi.’ Awor su imperfeccion a daña i a dirigí su masculinidad den mal caminda, i a hiba cu el a bai na ‘dominá su esposa.’ Eva, en buelta, lo a haña un “deseo intenso” pa su esposo, probablemente den un manera excesivo of desbalansá.—Génesis 3:12, 16.

 6, 7. (a) Ki deformacion di masculinidad a desaroyá promé cu e Diluvio? (b) Kico nos por siña for dje situacion promé cu Diluvio?

⁶ Maluso di masculinidad i feminidad a bira flagrantemente notabel promé cu e Diluvio. Angelnan cu a bandoná nan posicion original den shelu a materialisá den curpa humano pa disfrutá di relacion sexual cu hende muher. (Génesis 6:1, 2) E registro ta haci mencion di solamente hombernan cu a nace for dje unionnan innatural ei. I aparentemente e yunan tabata hibrido, incapas pa reproducí. Nan a bira conocí como e poderosonan, Néfilim, of Tumbadónan, ya cu nan a causa e caida di otronan. (Génesis 6:4; nota) Evidentemente, nan tabata violento, agresivo i no a manifestá ningun tierno compasion.

⁷ Claramente, riba nan mes bunitesa físico, forma di curpa, tamaño of fortalesa no ta haci hende mas homber of mas muher. E angelnan cu a materialisá probablemente tabatin bon tipo. I e Néfilim tabata grandi i yen di músculo, pero nan actitud mental tabata trocí. E angelnan desobediente i nan yunan a yena e tera cu inmoralidad sexual i violencia. P’esei, Jehova a trece un fin n’e mundu ei. (Génesis 6:5-7) Sin embargo, e Diluvio no a eliminá influencia demoniaco, tampoco el a eliminá e consecuencianan dje picá di Adam. Despues dje Diluvio atrobe tabatin hende cu a desplegá masculinidad i feminidad inapropiado, i tin ehempelnan den Bijbel, tantu bon como malu, cu nos por siña for di dje.

 8. Ki ehempel excelente di masculinidad apropiado Josef a pone?

⁸ E relato tocante Josef i e esposa di Pótifar ta presentá un contraste poderoso di masculinidad apropiado confrontá cu feminidad mundano. E esposa di Pótifar a namorá di Josef cu tabatin bon tipo i a purba seducié. N’e tempu ei, no tabatin ley skirbí divino cu a prohibí fornicacion of adulterio. Sin embargo, Josef a hui for dje muher inmoral ei i a duna prueba cu e tabata un berdadero homber di Dios, unu cu a demostrá un masculinidad cu tabatin e aprobacion di Dios.—Génesis 39:7-9, 12.

 9, 10. (a) Con Reina Vasti a malusá su feminidad? (b) Ki ehempel excelente di feminidad Ester a percurá pa nos?

⁹ Ester i Reina Vasti a percurá un contraste remarcabel pa hende muher. Evidentemente Vasti a pensa cu e tabata asina bunita cu Rey Asuero semper lo a cede na su deseonan. Pero su bunitesa tabata superficial. E tabata falta modestia i feminidad pasobra el a nenga di desplegá sumision na su esposo i rey. E rey a rechas’é i a scoge un muher berdaderamente femenino cu, de echo tabatin temor pa Jehova, como su reina.—Ester 1:10-12; 2:15-17.

¹⁰ Ester ta sirbi como un ehempel maraviyoso pa muhernan cristian. E “tabatin un nechi figura i bunita aparencia,” sin embargo, el a manifestá e adorno di “e persona secreto di curason den e bistí incoruptibel dje spiritu ketu i suave.” (Ester 2:7; 1 Pedro 3:4) E no a considerá exhibicion di adorno como e cos principal. Ester a demostrá tacto i dominio propio, siendo sumiso na su esposo, Asuero, asta ora bida di su pueblo tabata na peliger. Ester a keda ketu ora esei tabata e cos sabí pa haci, pero a papia sin miedu ora esei tabata necesario i e tempu apropiado pa esei. (Ester 2:10; 7:3-6) El a aceptá conseho for di su primu maduro Mardokeo. (Ester 4:12-16) El a demostrá amor i lealtad pa cu su pueblo.

Aparencia Externo

11. Kico nos mester tene na mente pa loke ta aparencia externo?

¹¹ Kico ta e clave pa feminidad apropiado? Un mama a declará: “Encanto por ta falsu, i bunitesa por ta bano; pero e muher cu ta teme Jehova ta esun cu ta percurá alabansa pa su mes.” (Proverbionan 31:30) Pues un temor reverencial di Dios ta esencial, i bondad amoroso, agradabilidad, modestia i un lenga suave ta contribuí muchu mas na feminidad cu bunitesa físico.—Proverbionan 31:26.

12, 13. (a) Lamentablemente, kico ta caracterisá e abla di hopi hende? (b) Kico ta e nificacion di Proverbionan 11:22?

¹² Lamentablemente, hopi hende homber i muher no ta habri nan boca cu sabiduria, i bondad amoroso tampoco no ta riba nan lenga. Nan abla ta ofensivo, sarcástico, vulgar i sin consideracion. Algun hende homber ta kere cu papia palabra malu ta un marca di masculinidad, i algun hende muher ta asina bobo di imitá nan. Pero, si un muher ta bunita pero ta falta razonabilidad i ta gusta discutí, ta sarcástico of arogante, realmente bo por consider’é bunita den e mihó sentido dje palabra, berdaderamente femenino? “Manera un renchi di oro pa nanishi den e nanishi di un porco, asina ta un muher cu ta bunita pero cu ta leu for di sensates.”—Proverbionan 11:22.

¹³ Bunitesa combiná cu abla sushi, sarcasmo of un falta di razonabilidad lo ta fuera di armonia cu cualkier aparencia femenino cu un persona por duna impresion di tin. Realmente, mal conducta asina por asta haci un persona físicamente atractivo parce mahos. Nos por dicerní fácilmente cu e aparencia físico di homber of muher riba su mes no por compensá of hustificá atakenan di rabia, griteria of abla ofensivo. Tur cristian por i mester haci nan mes atractivo pa Dios i pa nan próhimo dor di nan abla i conducta basá riba Bijbel.—Efesionan 4:31.

14. Ki tipo di adorno ta ser elogiá na 1 Pedro 3:3-5, i kico bo ta pensa di esei?

¹⁴ Aunke berdadero feminidad i masculinidad ta basá riba cualidadnan spiritual, comportacion i aparencia físico, incluyendo e paña cu nos ta bisti i e manera cu nos ta bistié, ta transmití un mensahe tocante nos. Indudablemente apostel Pedro tabatin na mente cierto estilonan di bisti i di areglo personal dje promé siglo ora el a consehá muhernan cristian: “No laga boso adorno ser esun di flegtmentu externo di cabei i bistimentu di adorno di oro ni bistimentu di bistí exterior, sino laga esei ser e persona secreto di curason den e bistí incoruptibel dje spiritu ketu i suave, cu ta di gran balor den bista di Dios. Pasobra asina, tambe, e muhernan santu di ántes cu tabata spera den Dios a dorna nan mes, sometiendo nan mes na nan propio esposo.”—1 Pedro 3:3-5.

15. Kico muhernan cristian mester trata na manifestá den nan bistí?

¹⁵ Na 1 Timoteo 2:9, 10, nos ta haña e comentarionan di Pablo tocante bistí femenino: “Mi ta deseá pa hende muher dorna nan mes cu bistí bon areglá, cu modestia i sano huicio . . . den e manera cu ta pas pa hende muher cu ta profesá reverencia na Dios, esta, mediante bon obra.” Ei el a enfatisá e necesidad pa modestia i bistí bon areglá cu ta reflehá sano huicio.

16, 17. (a) Con hopi hende homber i muher a malusá bistimentu awe? (b) Kico nos mester concluí for dje conseho hañá na Deuteronomio 22:5?

¹⁶ Un hende homber of muher, mucha homber of mucha muher, cu ta comportá su mes of ta bisti den un manera sexualmente provocativo lo no duna realce na berdadero masculinidad of feminidad, i esei siguramente no ta onra Dios. Hopi hende den e mundu ta bai den extremo exhibiendo abiertamente sexualidad masculino of femenino den bistí i conducta. Otronan ta tapa e diferencianan entre e sexonan pa motibunan inmoral. Ki gradicidu nos como cristiannan por ta cu Bijbel ta revelá e pensamentu di Dios! Jehova a declará na Israel di antigwedad: “E paña di un homber físicamente capacitá no mester ser poné riba un muher, ni un homber físicamente capacitá no mester bisti e mantel di un muher; pasobra cualkier hende cu ta haci e cosnan aki ta algu detestabel pa Jehova.”—Deuteronomio 22:5.

¹⁷ En coneccion cu esaki, probablemente lo bo disfrutá di un repaso di loke La Atalaya di 15 di augustus, 1988, a bisa na página 17: “E cuestion no ta si un cierto estilo ta mashá na moda of no, sino si e ta apropiado pa un persona cu ta profesá di ta un minister di Dios. (Romanonan 12:2; 2 Corintionan 6:3) Paña demasiado informal of slordig of hopi pertá por rebahá e balor di nos mensahe. Estilonan cu abiertamente i deliberadamente ta duna un aparencia femenino na hende homber of un aparencia masculino na hende muher ta definitivamente inapropiado. (Compará cu Deuteronomio 22:5.) Naturalmente, custumbernan local por varia, di acuerdo cu weer, necesidadnan di bo ofishi, i cosnan asina, di manera cu e congregacion cristian no ta traha reglanan rígido pa aplicá n’e hermandad mundial.”

18. Ki pasonan nos por dal den aplicá e conseho bíblico tocante nos bistí i areglo personal?

¹⁸ Ki un conseho balansá i apropiado! Lamentablemente, algun cristian, homber i muher, ta sigui ciegamente loke e mundu ta promové den bistí i areglo personal sin considerá con esei por reflehá riba Jehova i e congregacion cristian. Nos cada un por scudriñá nos mes un poco pa mira si pensamentu dje mundu aki a influenciá nos. Of nos por acercá un ruman homber of ruman muher experenciá i respetá i pidié su comentario en cuanto cualkier ahuste cu nos lo por haci den nos estilo di bisti, anto evaluá e sugerencianan seriamente.

Homber i Muhernan Cristian —Berdadero Homber i Muhernan

19. Ki influencia indeseabel nos mester combatí?

¹⁹ E dios dje mundu aki ta Satanas, i su influencia por ser mirá den e confusion relacioná cu sexo di hende, i esei ta bai mas ayá cu bistí. (2 Corintionan 4:4) Den algun pais hopi hende muher ta competí cu hende homber pa hefatura, pasando por haltu di principionan bíblico. Di otro banda, un gran cantidad di hende homber simplemente ta bandoná nan responsabilidadnan di hefatura, mescos cu Adam a haci. Tin esnan cu asta ta purba cambia nan rol sexual den bida birando homosexual of lesbiana. (Romanonan 1:26, 27) Bijbel no ta establecé ningun estilo di bida alternativo aprobá dor di Dios. I cualkier persona cu, promé cu e bira cristian, tabata confundí tocante su identidad of preferencia sexual por confia cu lo ta pa su bienestar eterno pa biba segun e norma di Dios, unu cu siguramente tur persona cu ta alcansá perfeccion humano lo duna hopi balor.

20. Ki efecto Galationan 5:22, 23 mester tin riba nos punto di bista di masculinidad i feminidad?

²⁰ E Scritura ta mustra cu homber i muhernan cristian tin cu desaroyá i manifestá e fruta di spiritu di Dios—amor, goso, pas, gran pacenshi, bondad, amabilidad, fe, suavedad i dominio propio. (Galationan 5:22, 23) Den su gran sabiduria, Dios a duna hende homber e capacidad pa duna realce na nan masculinidad i hende muher na nan feminidad dor di cultivá e cualidadnan ei. Un homber cu ta manifestá e fruta di spiritu ta fácil pa respetá, i un muher cu ta haci esei ta fácil pa stima.

21, 22. (a) Ki patronchi Jesus a establecé pa loke ta estilonan di bida? (b) Con Jesus a manifestá su masculinidad?

²¹ E homber mas grandi cu a yega di biba tabata Jesucristo, i ta su estilo di biba tur cristian mester imitá. (1 Pedro 2:21-23) Mescos cu Jesus, tantu hende homber como hende muher mester ta leal na Dios i obediente na Su Palabra. Jesus a manifestá cualidadnan maraviyoso di amor, ternura i misericordia. Como cristiannan berdadero, nos tin cu imit’é pa duna prueba cu nos ta su disipelnan.—Juan 13:35.

²² Jesucristo tabata un berdadero homber, i nos por mira su cualidadnan masculino ora nos ta studia su registro di bida describí den e Scritura. Nunca el a casa, pero Bijbel ta mustra cu el a disfrutá di asociacion balansá cu hende muher. (Lucas 10:38, 39) Su relacion cu hende homber i muher semper tabata decente i onorabel. E ta e modelo perfecto di masculinidad. E no a permití ningun hende—homber, muher, of angel desobediente—hort’é di su masculinidad divino i fieldad na Jehova. E no a vacilá pa aceptá su responsabilidadnan, i el a haci esei sin keha.—Mateo 26:39.

23. Relacioná cu e papelnan di hende homber i muher, con cristiannan berdadero ta ser bendicioná den un manera notabel?

²³ Ta ki un deleite pa ta entre Jehova su pueblo i pa asociá cu hende homber i muher, i tambe cu mucha homber i mucha muher, kende nan prioridad den bida ta di stima i obedecé Jehova Dios! Obedencia n’e Palabra di Dios no ta limitá nos. Mas bien, nos ta ser librá for dje mundu aki i su camindanan cu ta degradá e bunitesa, e propósito i e papelnan distinto di hende homber i muher. Nos por experenciá e berdadero felicidad cu ta bini di cumpli cu nos posicion den bida cu Dios a duna nos, sea nos ta homber of muher. Sí, ki gradicidu nos ta na Jehova Dios, e Creador, pa tur su percuracionnan amoroso na nos fabor i pa a crea nos machu i hembra!

Con Lo Bo Contestá?

◻ Ki papelnan apropiado pa hende homber i muher Bijbel ta describí?

◻ Con masculinidad a ser deformá promé cu e Diluvio, i con e actitud pa cu masculinidad i feminidad a ser trocí den nos tempu?

◻ Ki conseho bíblico tocante aparencia lo bo busca pa aplicá?

◻ Con homber i muhernan cristian por duna prueba di ta berdadero homber i muhernan?

[Plachi na página 17]

Aunke Ester tabata bunita, e ta ser specialmente recordá pa su modestia i su spiritu ketu i suave

[Plachi na página 18]

Duna atencion razonabel na areglo personal miéntras bo ta duna mayor énfasis na bunitesa interno