Dikon Nos Tin Ku “Keda Vigilá”?

 1. Ilustrá dikon ta importante pa nos sa kuant’or tin i pa nos ta alerta pa loke ta pasa rònt di nos. (Wak e promé plachi.)

SINKU, kuater, tres, dos, unu! E oloshi riba e pantaya ta indiká ku a yega ora pa tuma asiento pa disfrutá di e introdukshon musikal di e kongreso. Ta tempu pa keda ketu i skucha e bunita melodianan ku e orkesta di Watchtower a prepará pa nos, i mas importante ainda, tempu pa prepará nos mente i kurason pa e diskursonan ku ta bai sigui. Pero kiko di esnan ku ta kana rònt òf papia ku nan amigunan sin ripará ku e programa a kuminsá kaba? Nan no a paga tinu i no sa mes kuant’or tin i kiko ta pasando rònt di nan. De echo, e presidente a subi plataforma kaba, músika a kuminsá toka i tur hende ta sintá. E senario akí ta yuda nos mira e importansia di keda alerta pa un suseso muchu mas impaktante ku lo bai tuma lugá den futuro serkano. Kiko esei ta?

 2. Dikon Hesus a bisa su disipelnan pa “keda vigilá”?

² Ora Hesukristu a papia di e “konklushon di e era akí,” el a urgi su disipelnan: “Keda alerta, keda lantá, pasobra boso no sa ki ora e tempu stipulá ta.” Despues di esei, bes tras bes Hesus a bisa nan: “Keda vigilá.” (Mat. 24:3; lesa Marko 13:32-37.) E relato di Mateo ta mustra tambe ku Hesus a spièrta su siguidónan pa keda alerta, bisando: “P’esei, keda vigilá, pasobra boso no sa ki dia boso Señor ta bini. . . . Wak pa boso ta prepará, pasobra e Yu di hende ta bini na un ora ku boso no ta pensa.” I atrobe el a bisa: “P’esei, keda vigilá, pasobra boso no sa ni e dia ni e ora.”—Mat. 24:42-44; 25:13.

 3. Dikon nos ta tuma e spièrtamentu di Hesus masha na serio?

³ Komo Testigunan di Yehova, nos ta tuma e spièrtamentu di Hesus masha na serio. Nos sa ku nos ta bibando kasi na final di “e tempu di e fin” i ku no a sobra muchu tempu mas pa e “tribulashon grandi” dal aden. (Dan. 12:4; Mat. 24:21) Rònt mundu tin guera, mas i mas inmoralidat i maldat, konfushon religioso, epidemia, skarsedat di kuminda i temblor. Nos sa ku tur kaminda e pueblo di Yehova ta hasiendo un tremendo trabou di prediká e Reino. (Mat. 24:7, 11, 12, 14; Luk. 21:11) Nos ta warda ansiosamente pa wak kiko e binida di Señor lo nifiká pa nos i kon e propósito di Dios lo kumpli.—Mar. 13:26, 27.

 4. (a) Dikon ta rasonabel pa konkluí ku awor sí Hesus lo sa ki dia Armagedon lo tuma lugá? (b) Aunke nos no sa ki dia e tribulashon grandi lo dal aden, di kiko nos por ta sigur?

⁴ Nos sa ku kada seshon di kongreso tin un ora stipulá pa kuminsá. Pero maske kuantu nos bula ariba kai abou, nos no por bisa ki aña, muchu ménos, ki dia i ki ora e tribulashon grandi lo kuminsá. Tempu Hesus tabata riba tera, el a bisa: “Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so.” (Mat. 24:36) Pero awor ku Kristu ta den shelu, el a risibí poder di Dios pa bringa kontra e mundu di Satanas. (Rev. 19:11-16) Pues ta rasonabel pa konkluí ku awor sí Hesus lo sa ki dia Armagedon lo tuma lugá. Ma nos sí no sa. Pues awor ta mas importante ku nunka pa keda vigilá te ora e tribulashon kuminsá. Pero Yehova sí semper tabata sa ki dia e fin lo yega, pasobra ta é a fiha e dia. Anto el a kuminsá e konteo kaba pa yega na e tribulashon grandi, i su komienso “lo no tarda.” (Lesa Habakuk 2:1-3.) Kon nos por tin sigur di esei?

 5. Duna un ehèmpel ku ta mustra ku Yehova su profesianan semper ta kumpli nèt na tempu.

⁵ Yehova su profesianan semper a kumpli nèt na tempu! Por ehèmpel, el a libra e israelitanan for di Egipto na e tempu eksakto ku el a fiha pa esei. Moises a referí na 14 di nisan di aña 1513 promé ku Kristu ora el a bisa: “Na fin di kuater shent’i trinta aña, eksaktamente riba e dia ei, tur e ehérsitonan di SEÑOR a sali for di tera di Egipto.” (Éks. 12:40-42) E 430 añanan ei a kuminsá ora Yehova su pakto ku Abraham a drenta na vigor na 1943 promé ku Kristu. (Gal. 3:17, 18) Algun tempu despues, Yehova a bisa Abraham: “Sabi por sierto ku bo desendientenan lo ta estranhero na un tera ku no ta di nan, kaminda nan lo bira esklabo i keda oprimí kuater shen aña.” (Gén. 15:13; Echo. 7:6) Evidentemente, e 400 añanan di aflikshon ei a kuminsá na 1913 promé ku Kristu ora Ismael a tenta Isak tempu Isak a kita for di pechu, i a kaba na aña 1513 promé ku Kristu ora e israelitanan a sali for di Egipto. (Gén. 21:8-10; Gal. 4:22-29) Sí, kuater siglo di antemano Yehova a bisa eksaktamente ki dia lo el a libra su pueblo.

 6. Dikon nos por ta sigur ku Yehova lo salba su pueblo?

⁶ Hosue, kende tabata un di e hendenan ku a sali for di Egipto, a rekordá henter e pueblo di Israel: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.” (Hos. 23:2, 14) Nos por tin sigur ku Yehova su promesa pa libra nos for di e tribulashon grandi tampoko lo no faya. Pero si nos ke sobrebibí e destrukshon di e sistema akí, nos mester keda vigilá.

7, 8. (a) Kiko tabata trabou di un vigilante den antigwedat, i kiko esei ta siña nos? (b) Duna un ehèmpel di kiko por pasa ora un vigilante pega soño.

⁷ Un ehèmpel di tempunan bíbliko por mustra nos e importansia di keda vigilá. Den antigwedat, hopi stat grandi, manera Herúsalèm, tabata rondoná pa murayanan haltu. E murayanan ei a sirbi komo protekshon pa e habitantenan di e stat kontra invasor; a la bes nan tabata puntonan stratégiko for di kua por a wak e paisahe. Tabatin vigilante ta tene warda di dia i anochi riba e murayanan i na porta di e stat, i nan tabatin ku alertá e habitantenan di kualke peliger ku por tabatin na kaminda. (Isa. 62:6) E vigilantenan mester a keda lantá i bei pasobra tabata un kuestion di bida i morto.—Eze. 33:6.

⁸ Hosefo, un historiadó hudiu, a konta ku na aña 70 despues di Kristu, e ehérsito romano a logra poderá di e Toren di Antonia ku tabata keda banda di e muraya di Herúsalèm debí ku e vigilantenan na warda a pega soño. Komo resultado, e romanonan a fòrsa drenta den e tèmpel i send’é na kandela. Esei tabata final di e tribulashon di mas grandi ku Herúsalèm i e nashon hudiu a yega di eksperensiá.

 9. Kiko hopi hende awe no ta realisá?

⁹ Awendia hopi pais ta usa “vigilante,” òf sòldá, pa patruyá nan fronteranan i tambe sistema di siguridat ultra moderno. Nan ta vigilá intrusonan ku ta purba di drenta nan teritorio i enemigunan ku ta forma un menasa pa siguridat nashonal. Sinembargo, e “vigilantenan” ei ta mira solamente e menasanan ku ta bini di hende òf di gobièrnu humano. Nan no ta realisá ku tin un gobièrnu mas poderoso den shelu ku ta den man di Hesukristu ni nan no sa kiko e gobièrnu ei ta logrando, i ku pronto e gobièrnu ei lo destruí tur nashon. (Isa. 9:6, 7; 56:10; Dan. 2:44) Di otro banda, si nos keda vigilá i spiritualmente alerta, nos lo ta prepará pa ora e dia di huisio yega.—Sal. 130:6.

10, 11. (a) Kiko nos mester tene kuidou kuné, i dikon? (b) Kiko ta konvensé bo ku Satanas ta influensiá hende pa ignorá profesianan di Beibel?

¹⁰ Imaginá ku un vigilante ta keda lantá henter anochi na su pòst. Djis promé ku su warda kaba, e ta sinti su mes mas kansá i tin mas chèns di pega soño. Meskos tambe, mas serka nos ta di e fin di e sistema di kosnan akí, mas difísil lo ta pa nos keda lantá. Lo ta hopi lamentabel si nos no keda vigilá! Laga nos konsiderá tres kos ku, si nos no tene kuidou kuné, por stroba nos di keda alerta i keda vigilá.

¹¹ Diabel ta purba di pone hende pega soño spiritualmente. Djis promé ku Hesus a muri, tres biaha el a spièrta su disipelnan tokante “e gobernante di e mundu akí.” (Huan 12:31; 14:30; 16:11) Tur Dios su profesianan tokante futuro tin un sentido di urgensia. Hesus tabata sa ku Diabel lo tene hende den skuridat mental pa nan no mira kon urgente e tempu akí ta. (Sof. 1:14) Satanas ta siega mente di hende mediante e imperio mundial di religion falsu. Ora bo ta kòmbersá ku otro hende, kiko bo ta ripará? Bo no ta ripará ku en bèrdat Diabel “a siega mente di esnan ku no ta kreyente” pa nan no mira ku e fin ta serka i ku Hesus ta reinando awor komo Rei di e Reino di Dios? (2 Kor. 4:3-6) Kuantu biaha hende no a yega di bisa bo ku nan no ta interesá pa skucha nos mensahe? Ora nos purba di bisa nan kiko ta spera e mundu akí, mayoria di biaha nan ta indiferente.

12. Dikon nos no mester laga Diabel gaña nos?

¹² No laga e indiferensia di otro hende desanimá bo òf stroba bo di keda vigilá. Al kontrario, bo sa dikon ta asina importante pa keda alerta. Den un karta, Pablo a skirbi su rumannan: “Boso mes sa bon bon ku e dia di Yehova lo bini,” anto el a agregá, “eksaktamente manera ladron den anochi.” (Lesa 1 Tesalonisensenan 5:1-6.) Hesus a spièrta nos: “Sea prepará, pasobra e Yu di hende ta bini na un ora ku boso no ta kere.” (Luk. 12:39, 40) Pronto, Satanas lo pone hopi hende kere ku tin “pas i siguridat,” i ku tur kos ta kana bon den e mundu akí. Kiko di nos? Si nos “keda lantá i mantené nos sano huisio,” e dia di huisio lo no tin ku “kue [nos] di sorpresa manera lus di dia ta kue ladron di sorpresa.” P’esei nos mester lesa e Palabra di Dios tur dia i meditá riba loke Yehova ta bisa nos.

13. Kon e spiritu di mundu ta afektando hende, i kon nos por evitá e influensia peligroso ei?

¹³ E spiritu di mundu ta pone hende pega soño den sentido spiritual. Hopi hende ta asina okupá ku nan asuntunan di tur dia ku nan no ta “konsiente di nan nesesidat spiritual.” (Mat. 5:3) Nan ta gasta tur nan tempu i energia pa kore tras di e kosnan di mundu ku ta lanta ‘e deseo di karni i e deseo di wowo.’ (1 Huan 2:16) Ademas, e industria di entretenimentu ta influensiá hende pa “stima plaser,” i e tentashonnan ei ta bira mas i mas fuerte. (2 Tim. 3:4) P’esei mes Pablo a bisa e kristiannan pa nan no “plania di antemano pa satisfasé deseo di karni,” loke ta pone hende pega soño den sentido spiritual.—Rom. 13:11-14.

14. Ki spièrtamentu nos ta haña na Lukas 21:34 i 35?

¹⁴ En bes di laga e spiritu di mundu influensiá nos, nos ta laga e spiritu di Dios guia nos den nos bida. Mediante su spiritu, el a laga nos komprondé klaramente loke lo bai sosodé den futuro.^[1] (1 Kor. 2:12) Ma si nos no paga tinu, nos por kabishá spiritualmente i laga e kosnan simpel di bida stroba nos den nos aktividatnan spiritual. (Lesa Lukas 21:34, 35.) Otro hende kisas ta hasi bofon di nos debí ku nos ta keda vigilá. Ma esei no mester pone nos pèrdè nos sentido di urgensia. (2 Ped. 3:3-7) Mas bien, nos mester asosiá regularmente ku nos rumannan kristian na nos reunionnan, kaminda Dios su spiritu ta presente.

15. Kiko a pasa ku Pedro, Santiago i Huan, i kon esei por pasa ku nos tambe?

¹⁵ Nos inklinashonnan imperfekto por suak nos determinashon pa keda alerta. Hesus tabata sa ku hende imperfekto tin e tendensia di sukumbí na debilidatnan karnal. Wak kiko a sosodé e anochi promé ku Hesus a ser ehekutá. Pa e por a mantené su integridat, e mester a pidi su Tata selestial fortales’é. Hesus a pidi Pedro, Santiago i Huan pa “keda lantá” miéntras e tabata hasi orashon. Ma nan no a mira e seriedat di loke tabata na kaminda. En bes di keda lantá manera nan Maestro a bisa nan, nan a laga nan soño dominá nan. Aunke Hesus tambe tabata kansá, el a keda lantá i tabata hasi orashon ferviente na su Tata. Esei ta loke su kompañeronan tambe mester a hasi.—Mar. 14:32-41.

16. Di akuerdo ku Lukas 21:36, kon Hesus a siña nos pa “keda lantá”?

¹⁶ Pa nos “keda lantá” den sentido spiritual, bon intenshon so no ta sufisiente. Algun dia promé ku e suseso den e hòfi di Getsémani, Hesus a bisa e mesun disipelnan ei pa keda lantá i hasi súplika na Yehova. (Lesa Lukas 21:36.) Pues pa nos por keda lantá spiritualmente, nos tambe mester keda alerta i hasi orashon.—1 Ped. 4:7.

17. Kon nos por hasi sigur ku nos ta kla pa loke lo tuma lugá den futuro serkano?

¹⁷ Komo ku Hesus a bisa ku e fin lo yega “na un ora ku [nos] no ta pensa,” aworakí no ta tempu pa kabishá spiritualmente i kore tras di e ilushon- i fantasianan ku Satanas i su mundu ta ofresé i ku nos ‘karni’ ta deseá. (Mat. 24:44) Den Beibel, Dios i Kristu ta konta nos kiko nan tin den tapara pa nos i kon nos por keda vigilá. Nos mester sigui pone e Reino promé, sigui traha riba nos spiritualidat i nos relashon ku Yehova. Nos mester keda al tantu di e tempu den kua nos ta biba i di e susesonan ku ta tuma lugá pa nos por ta prepará pa loke ta na kaminda. (Rev. 22:20) Nos bida ta den wega!