Hala Serka Dios
E Prueba di Mas Grandi di Dios Su Amor
ABRAHAM tabata stima Dios. Ademas, e patriarka fiel ei a stima Isaak, su yu ku el a haña den su behes. Pero ora Isaak tabatin probablemente 25 aña di edat, Abraham a hañ’é ku un prueba ku a pon’é aktua kontra su sintimentu natural di tata—Dios a mand’é sakrifiká su yu hòmber. Pero finalmente, e no a sakrifiká Isaak. Djis promé ku Abraham tabata bai sakrifiká su yu, Dios a interferí dor di manda un angel. E relato bíbliko akí, na Génesis 22:1-18, ta duna nos un bista profétiko di Dios su gran amor pa nos.
Versíkulo 1 ta bisa: “Dios a pone Abraham na prueba.” Abraham tabata un hòmber di fe, pero awor su fe lo a ser probá mas ku nunka promé. Dios a bis’é: “Tuma bo yu hòmber awor, bo úniko yu, kende bo ta stima, Isaak, i . . . ofres’é aya komo un ofrenda kimá riba un di e serunan ku lo mi bisa bo di dje.” (Versíkulo 2) No lubidá, Dios no ta permití su sirbidónan wòrdu tentá mas ku nan por soportá. P’esei, e prueba akí a mustra e konfiansa ku Dios tabatin den Abraham.—1 Korintionan 10:13.
Abraham a obedesé mesora. Nos ta lesa: “Abraham a lanta mainta trempan i a siya su buriku i a hiba dos di su sirbidónan huntu kuné i su yu Isaak; i el a splet palu pa e ofrenda kimá” i a kuminsá su biahe pa bai na e lugá. (Versíkulo 3) Evidentemente, Abraham no a konta ningun hende e detayenan di e prueba akí.
Asina, Abraham a kuminsá ku un biahe di tres dia ku a dun’é tempu pa meditá seriamente. Pero Abraham no a vasilá den su determinashon pa hasi loke Dios a pidié. E palabranan ku el a papia a revelá e fe ku e tabatin. Ora ku for di un distansia el a mira e seru ku Dios a indiká, el a bisa su sirbidónan: “Keda aki . . . i ami ku e mucha lo bai ayanan; i nos lo adorá i bolbe serka boso.” Ora Isaak a puntra Abraham unda e karné pa e ofrenda ta, el a kontest’é: “Mi yu, Dios lo proveé pa su mes e lamchi.” (Versíkulo 5, 8) Abraham a ferwagt ku lo el a regresá huntu ku su yu. Dikon? Pasobra “el a konsiderá ku Dios ta poderoso pa lanta [Isaak] asta for di morto.”—Hebreonan 11:19.
Unabes nan tabata riba e seru, Abraham a kohe e “kuchú pa mata su yu,” pero un angel a par’é. E ora ei Dios a perkurá un karné chubatu, ku a keda pegá den e mondi será, pa Abraham por a ofresé “na lugá di su yu.” (Versíkulo 10-13) Den bista di Dios ta komo si fuera Isaak realmente a wòrdu sakrifiká. (Hebreonan 11:17) Un eksperto den gramátika hebreo a splika: “Pa Dios, e echo ku Abraham tabata dispuesto pa ofresé su yu tabata komo si fuera el a ofres’é.”
A keda demostrá ku Yehova su konfiansa den Abraham tabata hustifiká. I Yehova a rekompensá Abraham pa su konfiansa den dje, pasobra Dios a ripití i a ampliá e pakto ku el a sera ku Abraham; mediante e pakto akí El a primintí ku hende di tur nashon lo ser bendishoná.—Versíkulo 15-18.
Na final, Dios no a permití Abraham hasi e sakrifisio ku E sí lo a hasi despues. E echo ku Abraham tabata dispuesto pa sakrifiká Isaak a prefigurá e echo ku Dios lo a sakrifiká su Yu unigénito, Hesus, pa nos pikánan. (Juan 3:16) E sakrifisio di Kristu ta e prueba di mas grandi di Yehova su amor pa nos. Siendo ku Dios a hasi un sakrifisio asina grandi pa nos, ta bon pa nos puntra nos mes: ‘Ki sakrifisio ami ta dispuesto pa hasi pa agradá Dios?’