Capitulo 6
Pakico Nos Ta Bira Bieu i Muri?
1. Kico científiconan no por a splica tocante bida humano?
CIENTIFICONAN no sa pakico hende ta bira bieu i muri. Ta parce cu nos celnan mester por keda renobá nan mes i cu nos mester por biba pa semper. E buki Hyojun Soshikigaku (Histologia Standarisá) ta bisa: “Ta un misterio grandi con e biramentu bieu di celnan ta relacioná cu biramentu bieu di un individuo.” Hopi científico ta kere cu tin un límite “natural i heredá” na bida. Bo ta kere cu nan tin razon?
2. Kico algun hende a haci pa motibu cu e duracion di bida ta asina pasahero?
2 Hende semper a anhelá pa bida largu i asta a trata pa alcansá inmortalidad. For di siglo cuater P.E.C., droganan supuestamente diseñá pa haci inmortalidad posibel a atraé e atencion di noblenan chines. Algun emperador chines di tempunan mas despues a purba e asina yamá cura-lo-todo di bida—trahá for di mercurio—i a muri! Den tur parti di mundu, hende ta kere cu morto no ta fin di nan existencia. Budista, hindú, moslim, i otronan tur tin e speransa briyante di un bida despues di morto. Den cristiandad, hopi ta imaginá un bida di gloria celestial despues di morto.
3. (a) Pakico hende ta anhelá bida eterno? (b) Ki preguntanan tocante morto mester haña contesta?
3 Conceptonan di felicidad despues di morto ta reflehá un anhelo pa bida eterno. “Asta tempu indefiní el a pone den nan curason,” Bijbel ta bisa relacioná cu e idea di eternidad cu Dios a implantá den nos. (Eclesiástes 3:11) El a crea e promé hende cu e prospecto di cu nan por biba pa semper riba tera. (Génesis 2:16, 17) Pakico, anto, hende ta muri? Con morto a ser introducí den mundu? E conocimentu di Dios ta tira lus riba e preguntanan aki.—Salmo 119:105.
UN COMPLOT MALICIOSO
4. Con Jesus a identificá e criminal responsabel pa morto di hende?
4 Un criminal ta trata na sconde e pruebanan di su crímen. Esaki tambe tabata e caso di esun responsabel pa un crímen cu a resultá den e morto di miles di miyones di hende. El a manipulá cosnan pa cubri morto humano cu un velo di misterio. Jesucristo a identificá e criminal aki ora El a bisa esnan cu a busca pa mat’E: “Boso ta di boso tata e Diabel, i boso kier cumpli cu e deseonan di boso tata. Esun ei tabata un matador ora el a cuminsá, i e no a para firme den e berdad, pasobra berdad no ta den dje.”—Juan 8:31, 40, 44.
5. (a) Cua tabata e orígen di esun cu a bira Satanas e Diabel? (b) Kico e palabranan “Satanas” i “Diabel” ta nificá?
5 Sí, e Diabel ta un “matador” malicioso. E Bijbel ta revelá cu e ta un berdadero persona, no djis e maldad den un hende su curason. (Mateo 4:1-11) Aunke el a ser creá como un angel hustu, “e no a para firme den e berdad.” Ki apropiado ta cu e ta ser yamá Satanas e Diabel! (Revelacion 12:9) E ta ser yamá “Satanas,” of “resistidor,” pasobra el a oponé i resistí Jehova. E criminal aki tambe ta ser yamá “Diabel,” nificando “calumniador,” pasobra blasfemosamente el a malrepresentá Dios.
6. Pakico Satanas a rebeldiá contra Dios?
6 Kico a motivá Satanas pa rebeldiá contra Dios? Golosidad. Di un forma golos el a cudishá e adoracion cu Jehova a ricibí for di hende. E Diabel no a rechasá e deseo pa e ricibí tal adoracion, cua corectamente a pertenecé solamente na e Creador. (Compará cu Ezekiel 28:12-19.) En bes di esei, e angel cu a bira Satanas a alimentá e deseo golos aki te cu el a bira fértil i a duna lus na picá.—Santiago 1:14, 15.
7. (a) Kico ta causa morto humano? (b) Kico ta picá?
7 Nos a identificá esun culpabel kende su acto criminal a hiba na morto di hende. Pero kico ta e causa specífico di morto di hende? Bijbel ta bisa: “E hincá cu ta producí morto ta picá.” (1 Corintionan 15:56) I kico ta picá? Pa comprendé e palabra aki, laga nos considerá e nificacion cu el a carga den e idiomanan original di e Bijbel. E verbo hebreo i griego generalmente traducí como “peca” ta nificá “hera” den e sentido di hera un marca of keda sin alcansá un meta. Cua marca nos tur ta hera? E marca di obedencia perfecto na Dios. No obstante, con picá a ser introducí den mundu?
CON E COMPLOT A SER EHECUTA
8. Con Satanas a trata na gana e adoracion di hende?
8 Satanas cuidadosamente a traha un complot cu el a pensa lo resultá cu lo e goberná tur hende i ricibí nan adoracion. El a dicidí na persuadí e promé pareha humano, Adam i Eva, pa peca contra Dios. Jehova a duna nos promé mayornan conocimentu cu lo a hiba na bida eterno. Nan tabata sa cu nan Creador tabata bon, pasobra el a pone nan den e bunita hofi di Eden. Adam specialmente a sinti e bondad di su Tata celestial ora Dios a dun’é un esposa bunita i servicial. (Génesis 1:26, 29; 2:7-9, 18-23) E kedamentu na bida di e promé pareha humano a dependé di obedencia na Dios.
9. Ki mandamentu Dios a duna e promé hende, i pakico esaki tabata razonabel?
9 Dios a duna Adam e mandamentu: “Bo mag come di tur palu dje hofi te na satisfaccion. Pero en cuanto e palu di conocimentu di bon i malu, bo no mag come di dje, pasobra den e dia cu bo come di dje positivamente lo bo muri.” (Génesis 2:16, 17) Como e Creador, Jehova Dios tabatin e derecho pa pone normanan moral i pa definí loke tabata bon i loke tabata malu pa su criaturanan. Su mandamentu tabata razonabel, pasobra Adam i Eva tabata liber pa come fruta di tur e otro palunan den e hofi. Nan por a mustra nan aprecio pa Jehova su gobernacion legítimo dor di obedecé e ley aki en bes di orguyosamente establecé nan mes normanan moral.
10. (a) Con Satanas a acercá hende pa hala nan na su banda? (b) Cua motibunan Satanas a atribuí na Jehova? (c) Kico abo ta pensa di Satanas su atake contra Dios?
10 E Diabel a planea un complot pa kita e promé hendenan for di Dios. Pa lok nan pa bini na su banda, Satanas a gaña. Usando un colebra, mescos cu un “buikspreker” ta usa un popchi, e Diabel a puntra Eva: “Ta realmente e caso cu Dios a bisa cu boso no mag come for di tur palu di e hofi?” Ora Eva a cita Dios su mandamentu, Satanas a declará: “Boso positivamente lo no muri.” Anto el a atribuí mal motibunan na Jehova bisando: “Dios sa cu den e dia mes cu boso come di dje boso wowo mester habri i boso mester bira mescos cu Dios, conociendo bon i malu.” (Génesis 3:1-5) E Diabel a insinuá anto cu Dios tabata teniendo atras algu bon. Ki un atake calumnioso contra e berdadero i amoroso Tata celestial, Jehova!
11. Con Adam i Eva a bira cómplice di Satanas?
11 Eva a bolbe wak e palu, i su fruta awor a parce specialmente deseabel. Pues el a tuma e fruta i a com’é. Mas despues, su esposo boluntariamente a uni cuné den e acto pecaminoso aki di desobedencia na Dios. (Génesis 3:6) Aunke tabata Eva cu a ser gañá, tantu e como Adam a apoyá Satanas su complot pa goberná e rasa humano. En efecto, nan a bira su cómplice.—Romanonan 6:16; 1 Timoteo 2:14.
12. Kico a resultá for di e rebelion di hende contra Dios?
12 Adam i Eva mester a enfrentá e consecuencianan di nan accionnan. Nan no a bira mescos cu Dios, cu conocimentu special. Mas bien, nan a sinti bergwensa i a sconde nan mes. Jehova a pidi cuenta for di Adam i a pronunciá e sentencia aki: “Cu sodor di bo cara lo bo come pan te cu bo bolbe n’e suela, pasobra for di dje bo tabata tumá. Pasobra stof bo ta i na stof lo bo bolbe.” (Génesis 3:19) “Den e dia” cu nos promé mayornan a come for di e palu di conocimentu di bon i malu, nan a ser sentenciá pa Dios i a muri desde su punto di bista. Anto nan a ser expulsá for di Paradijs i a cuminsá nan bahada den morto físico.
CON PICA I MORTO A PLAMA
13. Con picá a plama na tur e rasa humano?
13 Satanas aparentemente a logra den su complot pa ricibí veneracion di hende. Sin embargo, e no por a mantené su adoradornan na bida. Ora picá a cuminsá obra den e promé pareha humano, nan no por a pasa perfeccion mas pa nan yunan. Manera un inscripcion grabá den un piedra, picá tabata profundamente grabá den e genenan di nos promé mayornan. Pues, nan por a producí solamente yunan imperfecto. Ya cu tur nan yunan a ser concibí despues cu Adam i Eva a peca, nan yunan a heredá picá i morto.—Salmo 51:5; Romanonan 5:12.
14. (a) Cu ken nos por compará esnan cu ta nenga nan picá? (b) Con e israelitanan a ser hací conciente di nan estado pecaminoso?
14 Sin embargo, awe hopi hende no ta kere cu nan ta pecador. Den algun parti di mundu, e concepto di picá heredá ta generalmente desconocí. Pero esei no ta prueba cu picá no ta existí. Un mucha cu un cara sushi por pretendé cu e ta limpi, i por ser convencí di lo contrario solamente despues cu e wak den un spiel. E israelitanan di antigua tabata manera e mucha ei ora nan e ricibí Dios su Ley mediante Su profeta Moises. E Ley a saca na cla cu picá a existí. “Realmente lo mi no a yega na conocé picá si no tabata debí n’e Ley,” apostel Pablo ta splica. (Romanonan 7:7-12) Mescos cu e mucha cu ta wak den un spiel, dor di usa e Ley pa wak nan mes, e israelitanan por a mira cu nan tabata impuru den bista di Jehova.
15. Kico ta ser revelá dor di wak den e spiel dje Palabra di Dios?
15 Dor di wak den e spiel dje Palabra di Dios i dor di observá su normanan, nos por mira cu nos ta imperfecto. (Santiago 1:23-25) Por ehempel, considerá loke Jesucristo a bisa su disipelnan tocante stima Dios i nan próhimo, manera ta skirbí na Mateo 22:37-40. Cuantu bes hende ta hera e marca den e áreanan aki! Hopi hende no ta sinti ni sikiera un remordimentu di nan concenshi ora nan faya di mustra amor pa Dios of pa nan próhimo.—Lucas 10:29-37.
TENE CUIDOU CU SATANAS SU TACTICANAN!
16. Kico nos por haci pa evitá di bira un víctima di Satanas su complotnan, i pakico esaki ta difícil?
16 Satanas ta purba haci nos practicá picá boluntariamente. (1 Juan 3:8) Tin manera pa evitá di bira víctima di su complotnan? Sí, pero esaki ta rekerí pa nos bringa contra inclinacionnan pa peca boluntariamente. Esaki no ta fácil pasobra nos tendencia heredá pa peca ta masha fuerte. (Efesionan 2:3) Pablo mester a hiba un berdadero lucha. Pakico? Pasobra picá tabata biba den dje. Si nos kier e aprobacion di Dios, nos tambe mester bringa contra e tendencianan pecaminoso den nos.—Romanonan 7:14-24; 2 Corintionan 5:10.
17. Kico ta haci e lucha contra nos tendencianan pecaminoso mas difícil?
17 Ya cu Satanas constantemente ta busca oportunidadnan pa persuadí nos pa kibra e leynan di Dios, nos lucha contra picá no ta fácil. (1 Pedro 5:8) Mustrando preocupacion pa compañeronan cristian, Pablo a bisa: “Mi tin miedu cu di algun manera, mescos cu e colebra a seducí Eva usando astucia, boso mente lo por ser corumpí i alehá dje sinceridad i puresa cu ta debí na Cristo.” (2 Corintionan 11:3) Satanas ta usa tácticanan similar awe. E ta trata na sembra simia di duda en cuanto Jehova su bondad i e beneficionan di obedecé Dios su mandamentunan. E Diabel ta trata na saca probecho di nos tendencianan pecaminoso heredá i ta pone nos sigui tras di un curso di orguyo, golosidad, odio, i prehuicio.
18. Con Satanas ta usa e mundu pa promové picá?
18 Un di e inventonan cu Diabel ta usa contra nos ta e mundu, cu ta drumí den su poder. (1 Juan 5:19) Si nos no ta tene cuidou, hendenan corupto i desonesto den e mundu rond di nos lo presioná nos den un curso pecaminoso cu ta violá e normanan moral di Dios. (1 Pedro 4:3-5) Hopi hende ta ignorá e leynan di Dios i asta ta nenga di tuma nota di e prek di nan concenshi, finalmente haciendo e concenshi sin gevoel. (Romanonan 2:14, 15; 1 Timoteo 4:1, 2) Algun gradualmente ta adoptá un curso cu asta nan concenshi imperfecto anteriormente no a permití nan pa tuma.—Romanonan 1:24-32; Efesionan 4:17-19.
19. Pakico no ta suficiente pa djis hiba un bida moralmente limpi?
19 Hibando un bida moralmente limpi ta un logro den e mundu aki. Sin embargo, pa agradá nos Creador, mas ta ser rekerí. Tambe nos mester tin fe den Dios i sinti un responsabilidad pa cuné. (Hebreonan 11:6) E disipel Santiago a skirbi: “Si un hende sa con pa haci loke ta corecto i tog no ta haci’é, esei ta un picá p’e.” (Santiago 4:17) Sí, ignorando deliberadamente Dios i su mandamentunan ta riba su mes un forma di picá.
20. Con Satanas lo por purba strobá bo di haci loke ta corecto, pero kico lo yudá bo resistí tal presionnan?
20 Muy probablemente Satanas lo stimulá oposicion na bo buscamentu di conocimentu di Dios mediante bo studio di Bijbel. Ta spera sinceramente cu lo bo no laga presionnan asina strobá bo di practicá loke ta corecto. (Juan 16:2) Aunke hopi gobernante a pone fe den Jesus durante su ministerio, nan no a confes’é pasobra nan tabatin temor cu hende den nan comunidad lo bai evitá nan. (Juan 12:42, 43) Cruelmente Satanas ta trata na intimidá cualkier persona cu ta buscando e conocimentu di Dios. Sin embargo, semper bo mester corda i apreciá e cosnan maraviyoso cu Jehova a haci. Asta lo bo por ta capas pa yuda opositornan gana e mésun aprecio.
21. Con nos lo por vence e mundu i nos propio tendencianan pecaminoso?
21 Tanten cu nos ta imperfecto, nos lo peca. (1 Juan 1:8) No obstante, nos tin yudansa den bringa e bataya aki. Sí, ta posibel pa sali victorioso den nos lucha contra e malbado, Satanas e Diabel. (Romanonan 5:21) Na final di Jesus su ministerio riba tera, el a animá su siguidornan cu e palabranan aki: “Den e mundu boso tin tribulacion, pero tuma curashi! Mi a vence e mundu.” (Juan 16:33) Asta pa hende imperfecto, ta posibel pa vence e mundu cu yudansa di Dios. Satanas no tin gara riba esnan cu ta opon’é i ta ‘someté nan mes na Dios.’ (Santiago 4:7; 1 Juan 5:18) Manera nos lo mira, Dios a percurá un salida for di sclabitud na picá i morto.
TEST BO CONOCIMENTU
Ken ta Satanas e Diabel?
Pakico hende ta bira bieu i muri?
Kico ta picá?
Con Satanas ta persuadí hende pa peca boluntariamente contra Dios?
[Plachi di henter página 54]