Cua ta Guiábo, Principio of Popularidad?

ORA Norihito tabata den zesde klas di scol, e tabata participa den deporte. Di ripiente, un decision a enfrenté. Tur alumno tabata mandá pa participa den un ceremonia patriótico. E mester participa hunto cu otro alumno den loke a parce un ehercicio rutinario?

Norihito a siña for di Bijbel cu ta malu pa participa den cualkier acto di adoracion di un dios fuera di Jehova Dios. (Éxodo 20:4, 5; Mateo 4:10) També, e tabata sa cu hende cristian mester keda neutral den tur asunto político di mundo. (Daniel 3:1-30; Juan 17:16) Pues, aunque otro alumno a urgié pa participa, cu curashi pero cu respet el a para firme. Kico lo bo a haci den un situacion similar?

E deseo di pertenece

E Scritura ta indica cu Dios a crea hende pa ser social, pa keda bon cu otro, i pa goza hacimento di cosnan hunto. Ta natural pa bo deseá di ser hunto cu otro mucha, pa nan aceptábo, pa bo pertenece na nan categoría. Tal sintimento ta haci bida mas agradabel i ta contribui na paz i armonía den nos tratamento cu otronan.—Génesis 2:18; Salmo 133:1; 1 Pedro 3:8.

E deseo natural di pertenece ta ser reflehá den énfasis fuerte duná na conformidad den algun cultura asta den e dia djawe. Por ehempel mucha haponés ta ser entrená desde infancia pa keda consiente di exigencia dje mayoría i conforma cu nan. Nan herencia ta síñanan cu un deber di mas principal cu nan tin ta di biba na armonía cu e comunidad. Segun Edwin Reischauer, ex-embahador americano na Hapón i un observador intenso di costumber haponés: “Hopi mas probablemente cu hende occidental, hende haponés lo funciona den grupo.” El a agrega: “Ora hende occidental por lo menos tin un pretension di independencia i individualidad, e mayoría di hende haponés ta keda basta contentu pa conformá cu norma di nan grupo den nan bistí, conducta, moda di biba, i asta den nan pensamento.” Pero, e deseo di conformá di ningun manera ta limitá na haponés. Esei ta universal.

Presion pa conformá

Aunque ta deseabel pa hende haci nan posibel pa keda bon cu otro, tin un peliger di inconsientemente conformá cu loke ta popular. Pakico? Pasobra hopi bez loke ta popular ta contrario cu loke ta aceptabel pa Dios. E Bijbel ta bísanos cu “Tur e mundo ta bao di poder dje malbado.” (1 Juan 5:19) Cu astucia Satanás ta usa tur medio den su poder—materialismo, moralidad baho, prehuicio racial, intolerancia religioso, nacionalismo, etc.—pa influenciá tur humanidad i apartánan foi Dios. En efecto, conformidad cu tal costumber por ponébo na oposicion cu Jehova Dios i su propósito. P’sei mes, hende cristian ta ser consehá: “Kita for di conformidad cu e sistema di cosnan aki, mas bien transformá boso rehaciendo boso mente, pa boso proba pa boso mes loke ta e bon i aceptabel i perfecto boluntad di Dios.”—Romano 12:2.

Bibando den e sistema di cosnan aki, hende cristian ta bao di presion constante pa conforma cu loke ta popular. Hovenan ta specialmente vulnerable na tal presion. E deseo pa parce i actua manera compañé di scol ta mashá fuerte. Berdadero curashi ta necesario pa nan splica na otro mucha pakico nan no ta participa den cierto actividad. Sin embargo, si nan no ta splica cu curashi nan posicion, esei por nifica desaster spiritual pa nan.—Proverbio 24:1, 19, 20.

Presion asina ta enfrenta hende adulto na nan lugar di empleo també. Tal bez compañé ta spera pa nan participa den cierto actividad social despues di ora di trabao of na cierto dia liber. Si nan ta nenga di participa, esei por hácinan parce apartá i no cooperativo, creando un ambiente dificultoso den nan lugar di trabao. Algun trahador por síntinan obligá di traha hopi ora largu sobretempo simplemente pasobra otro hende ta haci esei i ta speré di nan. Si nan ta entrega den tal asunto, esei por perhudicánan spiritualmente i també stróbanan di cumpli cu nan otro obligacion.—1 Corintio 15:33; 1 Timoteo 6:6-8.

Presion pa conformá ta presente asta fuera di scol of e lugar di empleo. Un mama cristian a bisa cu na un ocasion e no a disiplina su yiu aunque e tabatin mester di dje urgentemente pasobra el a kere cu otro mama presente lo no aproba.—Proverbio 29:15, 17.

E mayoría por haci equibocacion

E Bijbel ta dúnanos hopi conseho claro den e asunto di sigi e mayoría. Por ehempel, Dios a bisa e nacion di Israel: “Bo no mag sigi tras dje mayoría pa haci malu; i bo no mag duna testimonio tocante un pleitu pa bo desviá cu e mayoría afin di troce husticia.” (Éxodo 23:2; compara cu Romano 6:16.) Nan no a sigi tal conseho cada bez. Un biaha, un poco tempo despues cu nan a sali for di Egipto, ora Moisés no tabatei, cierto hende a influenciá Arón i e pueblo pa traha un bishé di oro i pa adoré den “un fiesta pa Jehova.” E pueblo a come i a bebe i a goza den cantamento i baliamento mientras cu nan a haci sacrificio pe bishé di oro. Pa tal acto corrupto i idólatra, rond di 3.000 lider dje grupo tabata ehecutá. Pero hopi otronan també a sufri di plaga di Jehova pa nan descuido sigiendo tras dje mayoría.—Éxodo 32:1-35.

Un otro ehempel di sigimento dje mayoría pa haci malu a sosode den e promé siglo en relacion cu e morto di Jesucristo. Hopi hende bao di influencia di lider religioso envidioso a participa den gritamento pe morto di Jesús. (Marco 15:11) Ora Pedro a declara nan error serio na Pentecoste despues dje resureccion i subimento di Jesús, hopi hende “a sinti steek di curazón” i a reconoce loke nan a haci ora nan a sigi e mayoría.—Echo 2:36, 37.

Principio bíblico ta mihor

Manera tal relato ta ilustra claramente, sigimento ciegu tras di loke ta popular por resulta den consecuencia serio. Ta cuanto mas mihor pa sigi e Bijbel i laga principio di dje ser un guía den nos bida! Manera Jehova Dios a bisa: “Mescos cu cielo ta mas halto cu e tera, asina mi camina ta mas halto cu boso camina, i mi pensamento mas halto cu boso pensamento.” (Isaías 55:9) Den asunto di moralidad i relacion humano—realmente, den tur decision di nos bida—tabata demonstrá bez tras bez cu e sigimento dje camina di Jehova ta hopi mas mihor cu sigimento di loke ta popular. Esei ta clave pa un moda di biba mas feliz i mas saludable.

Considera, por ehempel, experencia di Kazuya. Aunque el a studia e Bijbel pa basta tempo, el a continuá den sigimento dje camina popular—luchando pa bira ricu i goza bon éxito. Su esfuerzo pa agrada hende na mando i keda bon mirá den bista di colega di trabao a resulta hopi bez den corrimento di paranda te madrugá. El a bira exigente, intolerante, i irritable. Su moda di biba extremo pronto a resulta den un atake cerebral, locual a lagué parcialmente paralizá. Ora e tabata drumí recobrando den hospital, e tabatin tempo pa reflehá riba loke el a siña for di Bijbel i e moda cu e tabata hiba su bida. El a decidi cu ta tempo pa cuminza aplica loke el a siña. El a retira for di su puesto como gerente i a cambia su asociacion. També, el a haci esfuerzo sincero pa bisti e personalidad cristian i ahusta su punto di bista di propiedad material. Como resultado, su balornan a cambia, i su salud a mehora. Finalmente, el a dedica su bida na Jehova Dios i a bautiza.

Pa goza bon éxito sigiendo un camina impopular, bo mester conoce principio cu esei ta enbolbe i keda henteramente convencí cu nan ta correcto. Loke Masaru a experimenta ta mustra cu esei ta e caso. Ora e tabata den zesde klas di scol primario, alumno colega a recomendé pa ser candidato pa presidente dje concilio di alumno. Cu un tiki bergüenza, e ta corda cu pa motibo cu e no a comprende completamente principio bíblico cu esei a encerrá, e no por a splica na colega pakico e no por a corre campaña pa obtene un puesto político. Su miedu di hende a strobé di bísanan cu e tabata cristian. Tur loke e por a haci tabata di baha cabez i repiti na yoramento, “Mi no por.”

E experencia penoso a hacié investiga pakico hende cristian no ta inbolucránan den actividad político. (Compara cu Juan 6:15.) Despues, ora e tabata den scol segundario, un situacion similar a presenta. Pero, awor e tabata prepará pa splica cu conviccion su posicion na su maestro. E maestro a acepta su splicacion, mescos cu varios colega di dje cu a puntré tocante su creencia fundá ariba e Bijbel.

Ora tur hende lo haci loke ta bon

Den e binidero mundo nobo bao dje gobernacion di Cristo, e cos popular pa haci lo ta e cos correcto pa haci. Te ne tempo ei, nos tin cu sigi vigila contra impulso pa conforma cu loke ta popular. Nos por saca animacion for dje conseho di Pablo: “Door cu nos tin un nubia asina grandi di testigo rond di nos, láganos també kita tur peso i e picá cu ta enlazános fácilmente, i láganos corre cu awante e carreda cu ta poní dilanti nos.”—Hebreo 12:1.

Ora cuestion i desafío ta presenta, kico lo bo haci? Lo bo sucumbi na miedu di hende i entrega na hacimento di loke ta popular? Of, lo bo acudi ne Palabra di Dios, e Bijbel, i sigi principio di dje? Sigimento dje camina ei lo no solamente ser beneficioso awor sino també lo dunábo e prospecto di ser hunto cu esnan cu “mediante fe i awante ta hereda e promesa.”—Hebreo 6:12.