Pakico Teme E Dios Berdadero Awor?
“Teme e Dios berdadero i warda su mandamentunan. Pasobra esaki ta henter e obligacion di hende.”—ECLESIASTES 12:13.
1, 2. Pakico un temor apropiado di Dios ta na su lugá?
UN TEMOR saludabel i reverencial di Dios ta bon pa hende. Sí, aunke hopi temor humano ta emocionalmente perturbador, asta perhudicial pa nos bienestar, ta bon pa nos teme Jehova Dios.—Salmo 112:1; Eclesiástes 8:12.
2 E Creador sa esaki. Debí na amor pa su creacion, e ta manda tur persona pa tem’é i ador’é. Nos ta lesa: “Mi a mira un otro angel bulando meimei di cielu, i e tabatin bon nobo eterno pa declará como noticia alegre pa esnan cu ta biba riba tera, i pa tur nacion i tribu i lenga i pueblo, bisando cu bos fuerte: ‘Teme Dios i dun’é gloria, pasobra e ora di huicio di dje a yega, i p’esei, adorá Esun cu a traha cielu i tera.’”—Revelacion 14:6, 7.
3. Kico e Creador a haci pa nos promé mayornan?
3 Nos siguramente no mag ignorá e Creador di tur cos, e Fuente di bida, pasobra e ta nos doño i tambe dje planeta aki. (Salmo 24:1) Como un expresion di su gran amor, Jehova a duna su yunan terenal bida i a percurá un lugá maraviyoso pa nan biba aden—un paradijs bunita. Sin embargo, e regalo maraviyoso aki no tabata incondicional. En efecto, el a ser duná cu e responsabilidad pa cuid’é. Nos promé mayornan mester a cuida nan cas i expand’é te ora nan a pobla i a someté henter e tera. Nan a haña privilegio i responsabilidadnan pa cu bestia di tera, para i piscá—tur otro criatura bibiente cu lo a compartí e tera cu nan i nan desendientenan. P’e gran responsabilidad aki cu a ser confiá na hende, e lo mester a duna cuenta i rason.
4. Kico hende a haci cu Dios su creacion?
4 Apesar dje comienso maraviyoso ei, mira kico hende a haci pa contaminá su bunita cas terenal! Faltando respet cu desprecio pa Dios su posesion dje hoya aki, hende a susha e tera. E contaminacion ta n’e punto di menasá e existencia di mas i mas sorto di bestia, para i piscá. Nos Dios hustu i amoroso lo no tolerá esaki indefinidamente. E plumamentu dje tera ta sclama pa un reglamentu di cuenta, locual ta algu cu hopi hende tin motibu pa teme. Na otro banda, pa esnan cu respetuosamente ta confia den Dios, ta un consuelo pa sa loke lo sosodé. Jehova lo exigí cuenta i rason, i e tera lo ser restorá. Esaki berdaderamente ta noticianan alegre pa tur hende di curason hustu riba tera.
5, 6. Con Jehova lo reaccioná riba loke hende a haci cu Su creacion?
5 Pa medio di ken Dios lo ehecutá su huicio? Pa medio di Jesucristo, awor entronisá como Rey di Dios su Reino celestial. Mediante e Yu celestial ei, Jehova lo caba cu e sistema actual impuru i rebelde. (2 Tesalonicensenan 1:6-9; Revelacion 19:11) Den e manera aki lo e trece alivio pa esnan cu ta tem’é i, na mésun tempu, rescatá i preservá nos cas terenal.
6 Con esaki lo sosodé? Bijbel ta papia di un binidero tribulacion grandi culminando den e guera di Armagedon. (Revelacion 7:14; 16:16) Esaki lo ta Dios su huicio contra e sistema di cosnan contaminá aki i su contaminadornan. Tin hende cu lo permanecé bibu? Sí! Lo ta esnan cu tin, no un temor insaludabel di Dios, sino un temor respetuoso i reverencial di dje. Nan lo ser librá.—Proverbionan 2:21, 22.
Un Manifestacion Asombroso di Poder
7. Pakico Dios a intervení na fabor di Israel den tempu di Moises?
7 E accion dramático aki desplegá dor di Jehova Dios a ser prefigurá dor di un acto poderoso cu el a efectuá na fabor di su adoradornan rond di 1.500 aña promé cu nos Era Comun. E gran poder militar di Egipto a sclabisá su trahadornan imigrante israelita, asta intentando un forma di genocidio ora su gobernante, Fárao, a manda mata tur israelita masculino cu a caba di nace. Dios su triunfo riba Egipto mester a trece liberacion di Israel for dje sistema político opresivo ei, sí, libertad for di un nacion contaminá p’e adoracion di hopi dios.
8, 9. Con Moises i e israelitanan a reaccioná riba e intervencion di Dios?
8 Exodo capítulo 15 ta registrá Israel su reaccion riba liberacion for di Egipto. Analisando e relato aki lo yuda nos comprendé mas plenamente con cristiannan por ser librá for dje sistema actual spiritualmente i físicamente corumpí aki. Laga nos considerá Exodo capítulo 15, enfocando riba versículonan selectá pa haña sa pakico nos mester scoge pa teme Jehova, e Dios berdadero. Nos ta cuminsá cu versículo 1 i 2:
9 “N’e tempu ei Moises i e yunan di Israel a pasa na canta e cantica aki na Jehova i na bisa lo siguiente: ‘Lagá mi canta na Jehova, pasobra el a bira halsá soberanamente. E cabai i su ginete el a tira den laman. Mi forsa i mi poder ta Jah, ya cu e ta sirbi pa mi salbacion.’”
10. Kico a hiba na Dios su destruccion dje ehército di Egipto?
10 Rond mundu hende conocé e relato dje manera con Jehova a libra Israel for di Egipto. El a trece plaga riba e imperio mundial poderoso ei te ora Fárao finalmente a permití e israelitanan bai. Pero e ora ei e ehércitonan di Fárao a persiguí e pueblo indefenso aki i a parce di atrapá nan riba e costa di Laman Corá. Aunke a parce cu e yunan di Israel lo a perde nan libertad recien hañá lihé, Jehova tabatin algu otro na mente. Milagrosamente el a habri un caminda dor di laman i a trece su pueblo na siguridad. Ora e egipcionan a sigui nan, el a cera Laman Corá riba nan i a hoga Fárao i su forsanan militar.—Exodo 14:1-31.
11. Kico tabata e resultado dje accion di Dios contra Egipto?
11 Jehova su destruccion dje forsanan militar egipcio a hals’é den bista di su adoradornan i a haci su nomber ampliamente conocí. (Hosué 2:9, 10; 4:23, 24) Sí, su nomber a ser elevá riba e diosnan falsu sin poder di Egipto, kendenan a resultá di ta incapas pa libra nan adoradornan. Confiansa den nan deidadnan i den hende mortal i poder militar a hiba na decepcion amargo. (Salmo 146:3) Nada straño cu e israelitanan a ser impulsá pa canta alabansa cu a reflehá temor saludabel dje Dios bibu, kende di un manera poderoso ta libra su pueblo!
12, 13. Kico nos mester siña for dje victoria di Dios na Laman Corá?
12 Di igual manera, nos mester reconocé cu ningun dios falsu di nos tempu ni ningun superpotencia, ni cu armamentu nuclear, tin posibilidad pa igualá Jehova. E por i lo libra su pueblo. “E ta haciendo conforme su propio boluntad entre e ehército di cielu i e habitantenan dje tera. I no ta existí ningun cu por detené su man of cu por bis’é, ‘Kico bo ta haciendo?’ ” (Daniel 4:35) Ora nos capta e sentido completo dje palabranan aki, nos tambe ta ser conmoví pa canta su alabansa felismente.
13 E cantica di victoria na Laman Corá ta continuá: “Jehova ta un persona baronil di guera. Jehova ta su nomber.” P’esei e Guerero invencibel aki no ta un of otro producto anónimo di imaginacion di hende. E tin un nomber! E ta ‘Esun cu ta resultá di ta,’ e Magnífico Creador, Esun “kende su nomber ta Jehova, . . . e Haltísimo riba tur e tera.” (Exodo 3:14; 15:3-5; Salmo 83:18) Bo no ta di acuerdo cu lo tabata sabí p’e egipcionan antiguo ei tabatin un sentido razonabel i respetuoso di temor dje Todopoderoso mas bien cu desafi’é?
14. Con e balor di temor piadoso a ser demostrá na Laman Corá?
14 Como Diseñador dje tera, e Creador di laman tin control completo riba e masanan di awa. (Exodo 15:8) Utilisando su control tambe riba bientu, el a realisá loke a parce imposibel. El a parti e profundidad di awa na un cierto punto i a fors’é bek den direccionnan contrario pa por producí un ‘gang’ trahá di awa pa su pueblo pasa dor. Visualisá e esena: miyones di tonelada di awa di laman montoná na haltu den murayanan paralelo, formando un ruta di escape protectivo pa Israel. Sí, esnan cu a manifestá un temor saludabel di Dios a haña proteccion. E ora ei Jehova a los e awa, lagand’e basha bai bek como un diluvio poderoso, hundiendo e forsanan di Fárao i tur nan ekipo. Ki un despliegue di poder divino riba e diosnan sin balor i e poder militar humano! Siguramente, Jehova ta esun pa teme, no ta berdad?—Exodo 14:21, 22, 28; 15:8.
Demostrando Nos Temor di Dios
15. Kico mester ta nos reaccion na Dios su poderoso obranan di salbacion?
15 Si nos tabata pará sano i salbo huntu cu Moises, nos siguramente lo a ser conmoví pa canta: “Ken entre e diosnan ta manera bo, O Jehova? Ken ta manera bo, cu ta resultá di ta poderoso den santidad? Esun cu mester ser temé cu cantica di alabansa, Esun cu ta haci maraviya.” (Exodo 15:11) Sintimentunan asina a ser resoná atrabes dje siglonan for dje tempu ei padilanti. Den e último buki di Bijbel, apostel Juan ta describí un grupo di fiel sirbidor ungí di Dios: “Nan ta cantando e cantica di Moises e esclabo di Dios i e cantica dje Lamchi.” Kico e gran cantica aki ta? “Grandi i maraviyoso ta bo obranan, Jehova Dios, e Todopoderoso. Hustu i berdadero ta bo camindanan, Rey di eternidad. Ken lo no realmente temé bo, Jehova, i glorificá bo nomber, pasobra abo so ta leal?”—Revelacion 15:2-4.
16, 17. Ki desaroyo maraviyoso nos ta mira ta tumando lugá awe?
16 Pues awe tambe tin adoradornan liberá cu ta apreciá no solamente e obranan di creacion di Dios sino tambe su decretonan. Hende for di tur nacion a ser liberá spiritualmente, separá for dje mundu contaminá aki pasobra nan ta reconocé i ta pone na práctica e decretonan hustu di Dios. Anualmente, cientos di miles di hende ta hui for dje mundu corupto aki pa biba cu e organisacion limpi i recto di Jehova su adoradornan. Pronto, despues cu Dios su huicionan ardiente contra religion falsu i e resto dje sistema malbado aki a ser ehecutá, nan lo biba pa semper den un hustu mundu nobo.
17 Na armonia cu Revelacion 14:6, 7, humanidad awor ta tendiendo un mensahe spiertador di huicio cu Testigonan di Jehova ta declará bou di direccion angelical. Den mas cu 230 pais aña pasá, rond di cincu miyon Testigo a proclamá e bon nobo dje Reino di Dios i su ora di huicio. Pa educá nan próhimo pa sobrebibencia, e Testigonan a bishitá casnan di hende regularmente, conduciendo studio di Bijbel grátis. Asina tur aña cientos di miles di hende ta siña suficiente pa teme e Dios berdadero inteligentemente, ta dedicá nan bida na dje, i ta ser bautisá. Ta ki encantador cu hende asina a yega di teme e Dios berdadero!—Lucas 1:49-51; Echonan 9:31; compará cu Hebreonan 11:7.
18. Kico ta ilustrá cu e angelnan ta enbolbí den nos predicacion?
18 Ta berdad cu angelnan ta enbolbí den e trabou di predicacion aki? Wel, siguramente ta parce claro cu guia angelical hopi biaha a trece Testigonan di Jehova na un cas caminda un alma deprimí tabata anhelando, asta haciendo oracion, pa yudansa spiritual! Por ehempel, dos Testigo di Jehova compañá pa un hobencito tabata papiando dje bon nobo na un isla caribeño. Ya cu tabata cerca di bira merdia, e dos adultonan a dicidí pa stop p’e dia ei. Pero e mucha tabata abnormalmente ansioso pa bishitá e siguiente cas. Ora el a mira cu e adultonan no tabatin gana di haci esei n’e ora ei, el a bai riba su mes i a bati na porta. Un señora hóben a habri porta. Ora e adultonan a mira esaki, nan a bai cerca e señora i a papia cuné. El a invitá nan pa drenta, splicando cu net ora el a tende e batimentu na porta, e tabata pidiendo Dios den oracion pa manda Testigonan cerca dje pa siñ’é Bijbel. Areglo a ser hací pa un studio di Bijbel.
19. Kico nos por señalá como un beneficio for di teme Dios?
19 Segun cu nos ta entregá e mensahe di Dios su huicio fielmente, nos ta siña otro hende tambe su decretonan hustu. Ora esakinan ser aplicá den bida di hende, tantu bendicionnan físico como spiritual lo ta e resultado. Por ehempel, Bijbel ta masha cla den su condenacion di tur inmoralidad sexual. (Romanonan 1:26, 27, 32) Awe normanan divino ta ser ampliamente ignorá den e mundu. Kico ta e resultado? Matrimonionan ta kibrando. Delincuencia ta aumentando. Malesanan transmití sexualmente cu ta manca hende i cu a bira pandémico den e siglo 20 aki, ta plamando. En berdad, e malesa spantoso AIDS ta ser plamá principalmente dor di inmoralidad sexual. Pero temor respetuoso di Dios no a resultá di ta un gran proteccion pa adoradornan berdadero?—2 Corintionan 7:1; Filipensenan 2:12; mira tambe Echonan 15:28, 29.
Resultadonan di Teme Dios Awor
20. Kico ta ilustrá cu otronan sa dje reputacion di Testigonan di Jehova?
20 Bendicionnan ta abundante pa esnan cu ta teme Dios i ta sigui su decretonan. Considerá un suceso cu ta ilustrá e reconocimentu creciente dje echo cu Testigonan di Jehova ta forma un hermandad pacífico di cristiannan moralmente recto. Un cantidad di Testigo, delegadonan na un congreso internacional na Sur América, tabata kedando na un hotel cu tambe a ser usá un anochi pa un reunion di hende cu no tabata Testigo di Jehova den cua e presidente dje nacion mester a hiba palabra. Segun cu un ekipo di siguridad a guia e presidente purá den un lift, un Testigo cu no tabata sa ken tabata den e lift a cana drenta, pa sorpresa dje hombernan di siguridad! Realisando loke el a haci, e Testigo a pidi despensa p’e echo cu el a cana drenta. El a mustra su ‘badge’ di congreso identificand’e como un Testigo i a bisa cu e no tabata un menasa p’e presidente. Cu un sonrisa, un guardia a bisa: “Si tur hende tabata manera e Testigonan di Jehova, nos lo no tabatin mester dje clase di siguridad aki.”—Isaías 2:2-4.
21. Ki curso di accion ta disponibel pa hende awe?
21 Esaki ta e clase di hende cu Jehova ta reuniendo i preparando awor pa ‘sali for dje tribulacion grandi’ cu ta caba cu e sistema aki. (Revelacion 7:9, 10, 14) Un sobrebibencia asina lo no bai ta un asuntu di casualidad. Pa ta un sobrebibiente, un persona mester teme Jehova, reconoc’é como e Soberano legítimo i ser dedicá na dje. Sin embargo, echo ta cu mayoria hende lo no cultivá e clase di temor cu lo merecé proteccion. (Salmo 2:1-6) Segun tur e evidencia disponibel, Jehova su Gobernante scogí, Jesucristo, ta reinando como Rey for dje aña crítico di 1914. Esaki ta nificá cu e tempu cu ta keda ta cabando pa individuonan desaroyá i manifestá un temor saludabel di Jehova. No obstante, nos Creador ta permitiendo individuonan, asta esnan den posicion poderoso, pa respondé: “Awor, O reynan, ehercé perspicacia; laga boso mes ser coregí, O huesnan dje tera. Sirbi Jehova cu temor i sea gososo cu temblamentu. Sunchi e yu, pa E no rabia i pa boso no perecé for di caminda, pasobra su rabia ta cende fácilmente. Felis ta tur esnan cu ta busca refugio den dje.”—Salmo 2:7-12.
22. Kico lo ta e futuro pa esnan cu ta teme Dios awor?
22 Laga nos ta entre esnan cu lo alabá nos Creador como Esun cu a rescatá nos. Pero, esaki ta rekerí di nos pa teme e Dios berdadero awor! (Compará cu Salmo 2:11; Hebreonan 12:28; 1 Pedro 1:17.) Nos mester sigui siña su decretonan hustu i obedecé nan. E cantica di Moises i dje Lamchi, registrá na Revelacion 15:3, 4, lo alcansá un crescendo [volúmen mas haltu] ora Jehova eliminá tur maldad riba tera i cuminsá sana hende i su cas terenal dje efectonan contaminador di picá. E ora ei, cu tur nos curason, nos lo canta: “Grandi i maraviyoso ta bo obranan, Jehova Dios, e Todopoderoso. Hustu i berdadero ta bo camindanan, Rey di eternidad. Ken lo no realmente temé bo, Jehova, i glorificá bo nomber?”
Bo Ta Corda?
◻ Pakico Jehova ta merecé nos temor saludabel?
◻ Kico a keda manifestá dor di loke Dios a realisá na Laman Corá?
◻ Ki beneficionan ta bini for di nos temor respetuoso di Jehova?
◻ Ki futuro ta spera esnan cu ta teme e Dios berdadero awor?