“Abo So Ta Leal”

1, 2. Dikon nos por bisa ku Rei David tabata sa bon kiko kier men deslealtat?

REI DAVID tabata sa bon kiko kier men deslealtat. Na un dado momentu su reinado turbulento tabata manera den un nèshi di intriga. Asta su propio paisanonan tabata traha kòmplòt kontra dje. De echo, algun di esnan ku a traishoná David tabata hende ku lo mester tabata su kompañeronan di mas íntimo. Tuma por ehèmpel Mikal, e promé kasá di David. Na kuminsamentu e tabata “namorá di David,” i sin duda el a apoyá David ku su responsabilidatnan di rei. Pero despues el a kuminsá “despresi’é den su kurason.” Asta el a konsiderá David “manera un dje hòmbernan kabes bashí.”—1 Samuel 18:20; 2 Samuel 6:16, 20, NW.

² Otro ehèmpel ta David su konsehero personal, Ahitofèl. E tabata un hòmber respetá. Ora e duna konseho, hende tabata konsiderá nan meskos ku deklarashon direkto di Yehova. (2 Samuel 16:23) Pero ku tempu e aliado di konfiansa aki a bira un traidó, i a uni ku un rebelion organisá pa tumba David. Anto ta ken a instigá e konspirashon ei? Absalon, David su propio yu! E oportunista traidó ei “a hòrta kurason di e hòmbernan di Israel” i a lanta komo un rei rival. E rebelion di Absalon a haña asina tantu forsa ku Rei David a hañ’é fòrsá di hui pa su bida.—2 Samuel 15:1-6, 12-17.

 3. Ki konfiansa David tabatin?

³ No tabatin niun hende ku a keda leal na David? Den tur su atversidatnan, David tabata sa ku tabatin un persona ku sí ta leal. Ken? Ken mas sino Yehova Dios. David a bisa tokante Yehova: “Na e hende miserikòrdioso [“leal,” NW] bo ta mustra bo mes miserikòrdioso [“leal,” NW].” (2 Samuel 22:26) Kiko ta lealtat, i kon Yehova ta duna nos e ehèmpel mas elevá di e kualidat aki?

4, 5. (a) Kiko ta “lealtat”? (b) Ki diferensia tin entre lealtat i fieldat?

⁴ Kaminda e Skritura Hebreo ta usa e palabra “lealtat,” e kier men un bondat ku bo ta keda mustra na algu te ora ku e propósito p’e bira realidat. E ta enserá mas ku fieldat. Un persona por ta fiel simplemente debí na un sentido di responsabilidat. Na kontraste, ta amor ta produsí lealtat. Ademas, por usa e palabra “fiel” pa deskribí sierto ophetonan sin bida tambe. Por ehèmpel, e salmista a bisa ku luna ta ‘un testigu fiel na shelu,’ dor ku e ta aparesé regularmente den anochi. (Salmo 89:37) Pero bo no por bisa ku luna ta leal. Dikon nò? Debí ku lealtat ta un muestra di amor, i un opheto sin bida no por mustra amor.

⁵ Den e sentido ku Beibel ta us’é, lealtat ta un kualidat mará na un sintimentu di kariño profundo. Kaminda lealtat ta ser mustrá, bo sa tambe ku ta eksistí un relashon entre dos persona; esun ku ta mustra lealtat i esun na ken lealtat ta ser mustrá. I e tipo di lealtat ei no ta varia. E no ta manera ola di laman ku bientu ta benta p’aki i p’aya. Al kontrario, lealtat òf amor leal ta fuerte i stabil, i e por vense e opstákulonan di mas difísil.

 6. (a) Kon skars lealtat ta den hende, i kon Beibel ta indiká esaki? (b) Kua ta e mihó manera pa nos siña kiko lealtat ta enserá, i dikon?

⁶ Ta bèrdat ku awendia e tipo di lealtat ei ta skars. Demasiado biaha kompañeronan íntimo ta “dispuesto pa kibra otro na pida-pida.” Kada bes nos ta tende di mas hende ku ta bandoná nan kasá. (Proverbionan 18:24, NW; Malakias 2:14-16) Aktonan di traishon ta asina komun ku nos por haña nos mes ta ripití e palabranan di profeta Mikeas: “E persona fiel [“leal,” NW] a peresé for di e tera.” (Mikeas 7:2) Apesar ku hopi bes hende ta keda sin mustra bondat amoroso, lealtat ta un karakterístika típiko di Yehova. De echo, e mihó manera pa nos siña kiko eksaktamente lealtat ta enserá, ta dor di studia kon Yehova ta ekspresá e gran faseta aki di su amor.

7, 8. Den ki sentido nos por bisa ku ta Yehova so ta leal?

⁷ Tokante Yehova Beibel ta bisa: “Abo so ta leal.” (Revelashon 15:4, NW) Pero, kon por ta? Akaso hende i angel no a yega di demostrá lealtat remarkabel? (Jòb 1:1; Revelashon 4:8) I kiko di Hesukristu? Akaso e no ta e “leal” prinsipal di Dios? (Salmo 16:10, NW) Pues, dikon anto Beibel ta bisa ku ta Yehova so ta leal?

⁸ Na promé lugá, tene na mente ku lealtat ta un faseta di amor. Ya ku “Dios ta amor,” siendo e personifikashon mes di e kualidat aki, ta ken otro por demostrá lealtat na un manera mas kompletu ku Yehova? (1 Juan 4:8) Ta bèrdat ku angel i hende por reflehá Dios su kualidatnan, pero ta Yehova su lealtat so no tin komparashon. Komo e “Ansiano di Dianan,” e ta esun ku a demostrá bondat amoroso pa mas tantu tempu ku tur kriatura den shelu òf riba tera. (Daniel 7:9) P’esei, ta Yehova ta e esensia mes di lealtat. E ta demostrá e kualidat aki na un manera ku niun kriatura no por igualá. Ban wak algun ehèmpel.

 9. Den ki sentido Yehova ta leal “den tur su obranan”?

⁹ Yehova ta leal “den tur su obranan.” (Salmo 145:17) Kon asina? Salmo 136 ta duna e kontesta. E ta menshoná vários dje biahanan ku Yehova a aktua pa salba su pueblo, inkluso e biaha ku el a libra nan na un manera dramátiko dor di laga nan pasa dor di Laman Kòrá. Ta interesante pa nota ku kada versíkulo di e salmo aki ta kaba ku e ekspreshon: “Pasobra su miserikòrdia [òf, lealtat] ta pa semper.” E salmo aki ta inkluí den e kuadro Pregunta pa Meditá Ariba na página 289. Bo no por lesa e versíkulonan aki sin keda impreshoná dor di e kantidat di maneranan ku Yehova a mustra bondat amoroso na su pueblo. Sí, Yehova ta mustra lealtat na su sirbidónan fiel dor di tende nan sklamashonnan pa ousilio i dor di tuma akshon n’e momentu indiká. (Salmo 34:6) Tanten ku su sirbidónan keda leal na dje, Yehova su amor leal pa nan no ta faya.

10. Kon Yehova ta mustra su lealtat den loke ta toka su normanan?

¹⁰ Ademas, Yehova ta demostrá lealtat na su sirbidónan dor di keda fiel na su normanan. E no ta manera sierto hendenan ku ta laga kapricho momentánio i sentimentalismo kontrolá nan. Yehova no ta vasilá den su punto di bista tokante loke ta bon i loke ta malu. Atraves di tur milenio, su punto di bista tokante por ehèmpel spiritismo, idolatria i asesinato no a kambia. Pa medio di su profeta Isaias el a deklará: “Te na boso behes ami lo ta meskos.” (Isaias 46:4) P’esei, nos por konfia ku si nos sigui e guia moral spliká klaramente den e Palabra di Dios, nos lo saka benefisio sigur.—Isaias 48:17-19.

11. Duna algun ehèmpel ku ta mustra ku Yehova ta fiel na su promesanan.

¹¹ Tambe Yehova ta mustra lealtat dor di keda fiel na su promesanan. Ora e predisí algu, esei ta sosodé tambe. P’esei Yehova a bisa: “Mi palabra ku ta sali for di mi boka . . . lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.” (Isaias 55:11) Dor di keda fiel na su promesanan, Yehova ta mustra lealtat na su pueblo. E no ta laga nan keda anhelá algu ku e no tin intenshon di laga sosodé. Yehova su reputashon ta asina impekabel den e aspekto aki ku su sirbidó Josué por a bisa: “Ni un di e bon promesanan ku SEÑOR a hasi na e kas di Israel no a faya; tur a keda kumplí.” (Josué 21:45) P’esei, nos por tin konfiansa ku nunka nos lo no keda desapuntá debí ku Yehova a keda sin kumpli ku un di su promesanan.—Isaias 49:23; Romanonan 5:5.

12, 13. Den ki sentidonan e bondat amoroso di Yehova ta “pa semper”?

¹² Manera nos a bisa kaba, Beibel ta mustra nos ku Yehova su bondat amoroso ta “pa semper.” (Salmo 136:1) Dikon nos por bisa asina? Pa kuminsá, ora Yehova pordoná un piká, e ta pordon’é pa semper. Manera a bini dilanti na Kapítulo 26, Yehova no ta bai bèk riba fayonan ku un hende a kometé den pasado si el a pordoná e pikánan ei kaba. Debí ku nos “tur a peka i ta falta e gloria di Dios,” nos tur mester ta gradisidu ku Yehova su bondat amoroso ta pa semper.—Romanonan 3:23.

¹³ Pero Yehova su bondat amoroso ta pa semper den un otro sentido tambe. Su palabra ta bisa ku e hende hustu “lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.” (Salmo 1:3) Imaginá bo un palu grandi ku su blachinan no ta seka nunka! Meskos asina, si di bèrdat nos tin delisia den e Palabra di Dios, nos bida lo ta largu, pasífiko i fruktífero. E bendishonnan ku Yehova ta drama lealmente riba su sirbidónan fiel ta eterno. Sí, den e hustu mundu nobo ku Yehova lo trese, humanidat obediente lo eksperimentá su bondat amoroso pa semper.—Revelashon 21:3, 4.

14. Kon Yehova ta mustra ku e ta apresiá ku su sirbidónan ta leal na dje?

¹⁴ Bes tras bes Yehova a yega di demostrá ku e ta leal. Debí ku Yehova ta perfektamente konsistente, e lealtat ku e ta mustra na su sirbidónan fiel tampoko no ta kambia. Un salmista a skirbi: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan. Pasobra SEÑOR ta stima hustisia i no ta bandoná su santunan [“esnan leal na dje,” NW].” (Salmo 37:25, 28) Ta bèrdat ku Yehova ta nos Kreadó i e meresé pa nos ador’é. (Revelashon 4:11) Pero tòg, debí ku Yehova ta leal, e ta apresiá ora nos aktua ku fieldat na dje.—Malakias 3:16, 17.

15. Splika kon e manera ku Yehova a trata ku Israel ta hala atenshon na su lealtat.

¹⁵ Den Yehova su bondat amoroso e ta kla pa yuda hende bes tras bes ora nan ta pasa den difikultat. Un salmista ta bisa nos ku “e ta preservá alma di su santunan; e ta libra nan for di man di e malbado.” (Salmo 97:10) Tuma por ehèmpel e manera ku el a trata ku e nashon di Israel. Despues ku el a libra nan dor di laga nan pasa milagrosamente dor di Laman Kòrá, e israelitanan a kanta i proklamá tokante Yehova: “Den bo miserikòrdia [òf, lealtat] bo a guia e pueblo ku bo a redimí.” (Eksodo 15:13) Sin duda, e liberashon na Laman Kòrá tabata un ekspreshon di amor leal di Yehova su parti. P’esei Moisés a bisa e israelitanan: “SEÑOR no a stima boso ni skohe boso . . . pasobra boso tabata mas hopi ku kualkier otro pueblo, pasobra boso tabata esun di mas poko di tur pueblo, ma pasobra SEÑOR tabata stima boso i a warda e huramentu ku el a hura na boso tatanan, p’esei SEÑOR a saka boso pa medio di un man poderoso i a redimí boso for di e kas di sklabitut, for di man di Fárao, rei di Egipto.”—Deuteronomio 7:7, 8.

16, 17. (a) Ki gran falta di apresio e israelitanan a mustra, i sin embargo kon Yehova a trata nan ku kompashon? (b) Kon mayoria israelita a mustra ku “no tabatin remedi mas” pa nan, i ki spièrtamentu e ehèmpel ei ta duna nos?

¹⁶ Ta bèrdat sí ku komo nashon e israelitanan no a mustra apresio pa e bondat amoroso di Yehova, pasobra despues ku el a libra nan “tòg nan a sigui hasi piká kontra dje dor di rebeldiá kontra e Haltísimo den desierto.” (Salmo 78:17) Atraves di siglonan, bes tras bes nan a rebeldiá. Nan tabata bandoná Yehova pa sigui tras di diosnan falsu i práktikanan pagano ku no a hasi nada otro pa nan sino degradá nan. Tòg, ainda Yehova no a kibra su pakto. En bes di esei Yehova a supliká nan asta mas via profeta Jeremias, bisando: “Bolbe, Israel infiel . . . Lo mi no mira riba bo ku rabia, pasobra mi ta miserikòrdioso [“leal,” NW].” (Jeremias 3:12) Pero manera Kapítulo 25 ta mustra, esaki no a konmové mayoria israelita. De echo, “kontinuamente nan tabata hasi bofon di e mensaheronan di Dios, i tabata despresiá su palabranan i hasi bofon di su profetanan.” Ku ki resultado? Finalmente, “e furia di SEÑOR a lanta kontra su pueblo, te ora ku no tabatin remedi mas.”—2 Krónikanan 36:15, 16.

¹⁷ Kiko esei ta siña nos? Ku maske Yehova ta leal, e no ta siegu ni bo no por tum’é hasi kèns. Ta bèrdat ku Yehova ta “yen di bondat inmeresí,” i ku e ta masha kontentu di por mustra miserikòrdia ora tin base p’e hasi esei. Pero, kiko ta pasa si un malechor ta duna evidensia di ta un malbado inkoregibel? Den tal kaso Yehova ta pega na su normanan hustu i ta dikta huisio kontra un hende asina. Ta manera Dios a bisa Moisés: “Di ningun manera [Yehova] lo no laga di kastigá e kulpabel.”—Eksodo 34:6, 7.

18, 19. (a) Kon, riba su mes kaba, e echo ku Yehova ta kastigá malbadonan ta un akto di lealtat? (b) Na ki manera Yehova ta bai demostrá su lealtat na su sirbidónan ku a ser persiguí te na morto?

¹⁸ Riba su mes kaba, e echo ku Dios ta kastigá malbadonan ta un akto di lealtat. Kon asina? Nos por haña un indikashon di esaki den e buki di Revelashon, kaminda Yehova ta duna shete angel e siguiente òrdu: “Bai i basha e shete kònchinan di e furia di Dios riba tera.” Ora e di tres angel ta basha su kònchi “den e riunan i e fuentenan di awa,” esakinan ta bira sanger. E ora ei e angel ta bisa Yehova: “Hustu bo ta, o Señor, kende ta i kende tabata, o abo, Esun ku ta [“leal,” NW], pasobra bo a husga e kosnan aki; pasobra nan a drama e sanger di e santunan i e profetanan, i bo a duna nan sanger pa bebe. Nan ta meresé esaki.”—Revelashon 16:1-6.

¹⁹ Ripará ku e angel, pronunsiando e mensahe di huisio ei, ta yama Yehova ‘Esun leal.’ Dikon? Debí ku, dor di destruí malbadonan Yehova ta mustra lealtat na su sirbidónan, pasobra malbadonan a yega di persiguí hopi di nan te na morto. Den lealtat Yehova ta tene sirbidónan asina bibu den su memoria. E ta anhelá di mira e hendenan fiel aki bèk, i Beibel ta konfirmá ku Dios su propósito ta di rekompensá nan ku un resurekshon. (Jòb 14:14, 15) Yehova no ta lubidá su sirbidónan leal djis pasobra nan no ta na bida mas. Al kontrario, ‘p’e nan tur ta bibu.’ (Lukas 20:37, 38) Yehova su propósito di restorá bida di tur esnan ku ta den su memoria ta un prueba poderoso di su lealtat.

20. Ken ta e “ophetonan di miserikòrdia,” i kon Yehova ta mustra lealtat na nan?

²⁰ Atraves di historia, Yehova a mustra un grado remarkabel di lealtat na hende fiel. De echo, pa míles di aña Yehova a “soportá ku hopi pasenshi e ophetonan di furia, prepará pa destrukshon.” Pakiko? “Pa e por hasi konosí e rikesa di su gloria riba e ophetonan di miserikòrdia, kuanan el a prepará di antemano pa gloria.” (Romanonan 9:22, 23) E “ophetonan di miserikòrdia” aki ta hende ku e aktitut korekto, ungí ku spiritu santu pa bira koheredero ku Kristu den su Reino. (Mateo 19:28) Dor di habri kaminda pa e ophetonan di miserikòrdia aki por haña salbashon, Yehova a mustra lealtat na Abraham, pasobra pa medio di un pakto el a primintié: “Den bo desendientenan tur e nashonnan di e tera lo ta bendishoná, pasobra bo a obedesé mi bos.”—Génesis 22:18.

21. (a) Kon Yehova ta mustra lealtat na e “multitut grandi” ku tin speransa di sali for di e “gran tribulashon”? (b) Kiko Yehova su lealtat ta motivá bo pa hasi?

²¹ Yehova ta mustra lealtat na e “multitut grandi” tambe, esta, esnan ku tin speransa di sali for di e “gran tribulashon” i biba pa semper den paradeis riba tera. (Revelashon 7:9, 10, 14) Maske Yehova su sirbidónan ta imperfekto, lealmente e ta duna nan oportunidat di biba pa semper den paradeis riba tera. Di ki manera e ta hasié? Pa medio di e reskate—e prueba di mas grandi di Yehova su lealtat. (Juan 3:16; Romanonan 5:8) Yehova su lealtat ta atraé hende ku ta kana ku hamber pa hustisia den nan kurason. (Jeremias 31:3) Ora bo pensa riba e lealtat profundo ku Yehova a mustra kaba i lo mustra na bo den futuro, bo no ta sinti bo mas serka dje? Ya ku nos tin deseo di hala serka Dios, laga nos reakshoná riba su amor dor di fortalesé nos determinashon di sirbié ku lealtat.