Ugarit—Un Stat Dominá pa Adorashon di Baal

NA AÑA 1928, e hèrmènt di plug di un kampesino sirio a dal riba un piedra ku tabata tapa un graf ku a kontené serámika di antigwedat. E kampesino no por a imaginá kon importante su deskubrimentu tabata. E siguiente aña un tim di arkeólogo franses ku a tende di e hayasgo inesperá aki, a biaha pa e sitio. E tim tabata enkabesá pa Claude Schaeffer.

No a tarda hopi ku e tim a koba saka un inskripshon ku a yuda nan identifiká e ruinanan ku tabata surgi for di nan trabou di koba e tereno ku kuchara di mètsla. E lugá tabata Ugarit, “un di e statnan di antigwedat mas importante di Serkano Oriente.” Outor Barry Hoberman asta a bisa: “Ningun deskubrimentu arkeológiko, ni sikiera esun di e Ròlnan di Laman Morto, a kousa un impakto asina profundo riba nos komprondementu di Beibel.”—The Atlantic Monthly.

Krusada di Rutanan Stratégiko

Situá riba un seritu konosí komo Ras Shamra, na Kosta Mediteráneo di loke awe ta den nort di Siria, Ugarit tabata un stat kosmopolitano próspero ku a eksistí mas ku 3.000 aña pasá. Su teritorio a kubri un área ku a ekstendé un 60 kilometer for di Seru Casio ku a keda den nort te na Tell Sukas den zùit i 30 pa 50 kilometer for di Mediteráneo den wèst pa Vaye Orontes den ost.

Krio di bestia a prosperá den e klima agradabel di Ugarit. E region a produsí sereal, zeta di oleifi, biña i palu pa konstrukshon, ku ta un produkto hopi skars na Mesopotamia i Egipto. Ademas, e echo ku e stat tabata situá na un krusada di rutanan komersial stratégiko, a hasié un di e promé gran hafnan internashonal. Na Ugarit komersiantenan for di Anatolia, Babilonia, Egeo, Egipto i otro partinan di Medio Oriente, a kumpra i bende metal, produktonan di agrikultura i un kantidat di merkansia produsí lokalmente.

Apesar di su prosperidat material, semper Ugarit tabata un reino supordiná. E stat tabata e base militar mas nort di e Imperio Egipsio te ora ku el a ser inkorporá den e Imperio Heteo (òf Hitita) den siglo 14 promé ku nos era. Ugarit tabata obligá na paga tributo i suministrá sòldá na e rei ku a domin’é. Ora ku “Pueblonan di Laman”a a kuminsá destrosá Anatolia (Turkia sentral) i den nort di Siria, e heteonan a eksigí pa Ugarit manda su sòldá- i flotanan pa nan. Komo resultado, Ugarit mes a keda sin defensa i a ser destruí kompletamente rònt di aña 1200 promé ku nos era.

Restorando Pasado

E destrukshon di Ugarit a laga un enorme seritu di kasi 20 meter haltu i ku a kubri un área di mas ku 25 bènder òf hèktar. Un seksta parti so di e área aki nan a koba. Entre e ruinanan, arkeólogonan a deskubrí e restunan di un inmenso kompleho di palasio ku tabatin kasi shen kamber i vários plenchi i ku a kubri un tereno di un 10.000 meter kuadrá. E kompleho tabatin awa di pipa, tualèt i un sistema di riolering. Muebelnan tabata furá ku oro, ku ivor i ku un piedra presioso blou ku yama lapis lazuli. Tambe nan a haña pènelnan di ivor labrá ku dibuhonan masha detayá. Un hardin será ku muraya i un baki di awa den flur a hasi e palasio mas atraktivo ainda.

Loke a destaká riba e stat i e tereno plat rònt di dje ta e tèmpelnan di Baal i Dagan.b E tèmpelnan aki ku tabata den forma di torennan di mas o ménos 20 meter haltu, a konsistí di un lòbi chikí ku a hiba na un kuarto interior kaminda tabatin un imágen di e dios. Un trapi a hiba na un balkon kaminda e rei tabata presidí durante vários seremonia. Anochi òf durante tormenta, nan lo tabata sende lus di faro riba e tòp di e tèmpelnan pa asina guia barkunan sano i salvo den e haf. Nabegantenan ku a haña ku ta e dios di tormenta Baal-Hadad por tabata kier ku nan a regresá sano i salvo tabata dun’é ofrenda di gradisimentu den forma di anker di piedra. Kasi sigur ta di nan e 17 ankernan di piedra ku a haña den e santuario a bini.

Un Tesoro di Inskripshon

Nan a deskubrí míles di tabla di klei den tur parti di e ruinanan di Ugarit. A haña tekstonan ekonómiko, hurídiko, diplomátiko i atministrativo na ocho idioma, skirbí na sinku diferente letra òf álfabèt. E tim di Schaeffer a haña inskripshonnan den un idioma ku te ku e tempu ei tabata deskonosí—nan a dun’é e nòmber ugarítiko—i ku a usa 30 símbolo di spijkerschrift, lokual a hasié un di e álfabètnan mas bieu ku hamas nan a deskubrí.

Fuera di trata asuntunan di tur dia, e dokumentonan na idioma ugarítiko a kontené tekstonan literario ku a duna ekspertonan un komprondementu nobo di e konsepto- i práktikanan religioso di e tempu ei. E religion di Ugarit ta parse di tabatin gran similaridat ku loke e kananeonan bisiña a praktiká. Segun Roland de Vaux, e tekstonan aki “ta un refleho basta eksakto di sivilisashon den e tera di Kánaan djis promé ku e israelitanan a konkist’é.”

Religion den e Stat di Baal

E dokumentonan di Ras Shamra ta menshoná mas ku 200 dios i diosa. E dios supremo tabata El, yamá tata di e diosnan i di hende. I e dios di tormenta Baal-Hadad tabata “e ginete di e nubianan” i “e señor di tera.” Nan a pinta El komo un hòmber bieu i sabí ku barba blanku ku a keda leu for di humanidat. Na otro banda, Baal tabata un dios fuerte i ambisioso ku a trata na goberná riba e diosnan i humanidat.

E tekstonan ku nan a deskubrí probablemente tabata ser resitá durante fiestanan religioso, manera aña nobo òf fiesta di kosecha. Sin embargo, e interpretashon eksakto no ta muchu kla. Den un poema tokante un disputa pa gobernashon, Baal ta derotá El su yu faborito, e dios di laman Yamm. Kisas ta e viktoria aki a duna e nabegantenan di Ugarit e konfiansa ku Baal lo protehá nan riba laman. Den un pelea ku Mot, Baal ta ser derotá i ta baha den e mundu di mortonan. Esei ta kousa un sekura, i aktividatnan humano ta stòp. Anat, esposa i a la bes ruman muhé di Baal—diosa di amor i guera—ta mata Mot i ta restorá Baal na bida. Baal ta masakrá e yunan di e esposa di El, Athirat (Asera), i ta rekuperá e trono. Pero Mot ta regresá shete aña despues.

Tin hende ta interpretá e poema aki komo un símbolo di e siklo anual di e temporadanan di aña durante kua e áwaseru ku ta duna bida ta ser vensí dor di e kayente di zomer i ta regresá den hèrfst. Otronan ta pensa ku e siklo di shete aña ta relashoná ku miedu di hamber i sekura. Den ámbos kaso, nan a konsiderá e superioridat di Baal komo algu esensial pa e éksito di aktividatnan humano. Erudito Peter Craigie a remarká: “E meta di e religion di Baal tabata pa sigurá su supremasia; ta solamente ora el a keda supremo, segun su adoradónan, nan lo a sigui haña kosecha i krio di bestia ku tabata asina esensial pa sobrebibensia humano.”

Un Barera Kontra Paganismo

Un kos ku ta destaká bon kla den e tekstonan ku nan a deskubrí ta e korupshon i pervershon di e religion ugarítiko. The Illustrated Bible Dictionary ta bisa: “E tekstonan ta mustra e resultadonan degradá di adorá e diosnan aki; ku nan énfasis riba guera, prostitushon sagrado, amor erótiko i e degradashon sosial ku eseinan ta trese kuné.” De Vaux a remarká: “Ora bo lesa e poemanan aki, bo ta komprondé pakiko berdadero kreyentenan di Yahweh i e gran profetanan tabatin asko di e adorashon aki.” E Lei ku Dios a duna e antiguo nashon di Israel tabata un barera kontra tal religion falsu.

Wakmentu di destino, astrologia i magia a ser práktika ampliamente den Ugarit. Nan tabata buska señal pa sa futuro no solamente den kuerponan selestial sino tambe den feto deformá i den órganonan di bestia ku nan mata. Historiadó Jacqueline Gachet a komentá: “Nan a kere ku e dios na ken nan a ofresé segun sierto rito un bestia sakrifiká a bira un parti di dje i ku e spiritu di e dios a djòin ku e spiritu di e bestia. P’esei, dor di lesa e markanan visibel riba e órganonan aki, tabata posibel pa determiná e boluntat di e diosnan kendenan por a duna sea un kontesta positivo òf negativo riba un pregunta relashoná ku susesonan di futuro òf relashoná ku kiko pa hasi den un situashon spesífiko.” (Le pays d’Ougarit autour de 1200 av.J.C.) Na kontraste, e israelitanan mester a keda leu di e práktikanan ei.—Deuteronomio 18:9-14.

E Lei di Moisés klaramente a prohibí tenementu di relashon seksual ku bestia. (Levítiko 18:23) Kon e pueblo di Ugarit a konsiderá e práktika aki? Den e dokumentonan ku nan a deskubrí, Baal ta tene relashon seksual ku un bisé. Arkeólogo Cyrus Gordon a komentá: “Si e argumentu ta ku Baal ta tuma e forma di un toro pa hasi esei, pero no por bisa meskos di su saserdotenan kendenan a ripití e akshonnan di su karera mitológiko.”

E israelitanan a risibí e mandamentu: “No hasi ningun kòrtá na boso kurpa pa un morto.” (Levítiko 19:28) Sin embargo, reakshonando riba e morto di Baal, e dios El “a kòrta su kueru ku un kuchú, i a skèrf su mes ku un blet; el a kòrta su banda di kara i kachete.” Kòrtamentu di kurpa komo rito aparentemente tabata un kustumber serka adoradónan di Baal.—1 Reinan 18:28.

Ta parse ku un poema ugarítiko ta indiká ku tabata komun den religion kananeo pa herebé un yu di kabritu den lechi komo parti di un rito di fertilidat. Sin embargo, den e Lei di Moisés, e israelitanan a haña e siguiente mandamentu: “No herebé un yu di kabritu den lechi di su mama.”—Eksodo 23:19.

Komparando Teksto Bíbliko ku Teksto Ugarítiko

Originalmente nan a tradusí e tekstonan ugarítiko prinsipalmente ku yudansa di e hebreo di Beibel. Peter Craigie a remarká: “Tin hopi palabra ku e teksto bíbliko hebreo a usa di kua nan nifikashon no ta muchu kla, i tin biaha nan ta deskonosí; traduktornan promé ku siglo 20 a rei nan posibel nifikashon usando vários medio. Pero ora e mesun palabranan ei ta aparesé den e teksto ugarítiko, ta bira posibel pa komprondé e nifikashon.”

Por ehèmpel, un palabra hebreo usá na Isaias 3:18 por lo general ta ser tradusí komo “banchi pa bisti na frenta.” E rais di un palabra ugarítiko paresido ta referí na tantu solo komo e diosa di solo. Pues, e muhénan di Yerusalèm menshoná den e profesia di Isaias kisas a dòrna nan mes ku hanger chikí den forma di solo i tambe den forma di luna (“luneta”) na onor di diosnan kananeo.

Na Proverbionan 26:23 den e teksto masorétiko, “lepnan ferviente i un mal kurason” ta ser kompará ku un artíkulo di klei pasá den “skuma di plata.” E rais di un palabra ugarítiko ta permití pa tradusí e komparashon “manera un kapa lombrante riba pida klei.” Beibel na papiamentu koriente apropiadamente a tradusí e proverbio aki: “Palabranan bunita for di un kurason ku mal intenshon ta manera un bañ’i plata riba un pòchi di klei.”

Fundeshi di Beibel?

Eksaminashon di e tekstonan di Ras Shamra a pone algun eksperto yega n’e konklushon ku sierto pasashinan di Beibel ta un adaptashon di e literatura poétiko di Ugarit. Por ehèmpel André Caquot, miembro di e Instituto Franses, a bisa ku “e base kultural kananeo ta fundeshi di e religion israelita.”

Relashoná ku Salmo 29, Mitchell Dahood di e Instituto Bíbliko Pontifikal na Roma a bisa: “E salmo aki ta e manera ku adoradónan di Yahweh a adaptá un himno kananeo mas bieu dediká na e dios di tormenta Baal . . . Kasi tur palabra den e salmo bo por haña bèk den tekstonan kananeo mas bieu.” Tal konklushon ta hustifiká? Apsolutamente ku nò!

Ekspertonan un poko mas kouteloso ta atmití ku e similaridatnan a ser eksagerá. Teólogo Garry Brantley a deklará: “Ni un solo teksto ugarítiko ta paralelo ku henter Salmo 29. . . . No tin ningun base di evidensia pa sugerí ku Salmo 29 (òf kualkier otro teksto bíbliko) ta un adaptashon di un mito pagano.”

E echo ku tin similaridat den e uso di komparashonnan, paralelonan poétiko i rasgonan di estilo ta un prueba di adaptashon? Al kontrario, bo mester ferwagt tal paralelo. The Encyclopedia of Religion ta bisa: “Nan forma i kontenido ta meskos pasobra nan ta bini di e mesun kultura: apesar di e gran diferensia geográfiko i di tempu entre Ugarit i Israel, nan tabata parti di un entidat kultural mas grandi ku a kompartí e mesun vokabulario poétiko i religioso.” P’esei Garry Brantley a konkluí: “No ta korekto pa splika ku kreensianan pagano ta forma e fuente di teksto bíbliko djis pasobra nan tin similaridatnan lingwístiko.”

Por último mester bisa ku si tin kualkier paralelo entre e tekstonan di Ras Shamra i Beibel, nan ta puramente literario i no spiritual. Arkeólogo Cyrus Gordon a remarká: ‘Den Ugarit bo no ta haña e nivelnan étiko i moral ku Beibel ta alkansá.’ En realidat, tin muchu mas diferensia ku tin similaridat.

E investigashonnan di Ugarit probablemente lo sigui yuda studiantenan di Beibel komprondé e ambiente kultural, históriko i religioso di e eskritornan bíbliko i di e nashon hebreo en general. Mas eksaminashon di e tekstonan di Ras Shamra kisas lo por tira lus nobo riba e komprondementu di e antiguo hebreo. Sin embargo, mas ku tur kos, e deskubrimentunan arkeológiko na Ugarit ta resaltá klaramente e kontraste entre e adorashon degradá di Baal i e adorashon puru di Yehova.

[Nota]

[Komentario na página 25]

Deskubrimentunan arkeológiko na Ugarit a mehorá nos komprondementu di e Skritura

[Mapa/Plachinan na página 24, 25]

(Pa e teksto den su formato kompleto, wak e publikashon)

Imperio Heteo den siglo 14 promé ku nos era

LAMAN MEDITERÁNEO

Eufrates

SERU CASIO (JEBEL EL-AGRA)

Ugarit (Ras Shamra)

Tell Sukas

Orontes

SIRIA

EGIPTO

[Rekonosementu]

Estatua chikí di Baal i kopa den forma di kabes di un bestia: Musée du Louvre, Paris; pintura di e palasio real: © D. Héron-Hugé pour “Le Monde de la Bible”

[Plachi na página 25]

Restunan di e entrada di e palasio

[Plachi na página 26]

Un poema ugarítiko di mitologia kisas ta duna informashon ku ta yuda klara Eksodo 23:19

[Rekonosementu]

Musée du Louvre, Paris

[Plachi na página 27]

Piedra inskribí di Baal

Tayó di oro ku dibuho di un esena di yagmentu

Tapa di ivor di un kaha di kosmétiko ku dibuho di un diosa di fertilidat

[Rekonosementu]

Tur potrèt: Musée du Louvre, Paris