Bo Por Mehorá Bo Memoria

YEHOVA DIOS a krea e selebro humano ku e abilidat maravioso di kòrda kos. El a diseñ’é komo un depósito for di kua bo por saka informashon, sin pèrdè e kosnan presioso ku bo a hinka aden. E diseño di e selebro ta kuadra ku e propósito di Dios pa hende biba pa semper.—Sal. 139:14; Huan 17:3.

Pero podisé bo ta sinti ku hopi bes bo mente no ta retené tur loke bo a hinka den dje. Kon bo por mehorá bo memoria?

Interes ta un faktor importante pa mehorá nos memoria. E kustumber di ta un persona opservadó i interesá den hende i den loke ta pasa rònt di nos, ta stimulá nos mente. Lo ta mas fásil e ora ei pa nos reakshoná ku e mesun interes ora nos lesa òf tende algu di balor duradero.

Hopi persona tin problema pa kòrda nòmber di hende. Sin embargo komo kristian, nos sa ku hende ta importante, sea ta kompañeronan kristian, hende ku nos ta prediká na dje òf otro hendenan ku nos tin kontakto kuné den asuntunan nesesario di bida. Kiko por yuda nos kòrda e nòmbernan ku nos no mester lubidá? Apòstel Pablo a menshoná nòmber di 26 persona di un kongregashon ku el a skirbi. E tabata interesá den nan i esei tabata bisto na e echo ku no solamente e tabata sa nan nòmber, sino tambe a menshoná detayenan spesífiko relashoná ku hopi di nan. (Rom. 16:3-16) Den nos tempu tin algun superintendente biahero di Testigunan di Yehova ku ta bon den kòrda nòmber, maske nan ta bai di un kongregashon pa otro tur siman. Kiko ta yuda nan? Nan tin e kustumber di usa un persona su nòmber vários biaha ora nan papia kuné pa promé bes. Nan ta hasi esfuerso pa konektá e persona su nòmber ku su kara. Ademas, nan ta pasa tempu huntu ku diferente ruman den sirbishi di vèlt i ta kome ku nan. Ora bo topa un persona, lo bo kòrda su nòmber? Promé kos, buska un bon motibu pa bo no lubidá su nòmber; despues purba algun di e sugerensianan ya menshoná.

Tambe ta importante pa bo kòrda loke bo ta lesa. Kiko por yuda bo mehorá den esaki? Loke ta importante pa bo logra esaki ta ku bo mester ta interesá den loke bo ta lesa i komprond’é. Bo mester ta asina interesá den loke bo ta lesa ku e ta kapta bo atenshon kompletu. Lo bo no keda kòrda un informashon si bo mente ta otro kaminda miéntras bo ta purba lesa. Bo por komprondé mas tantu ora bo relashoná e informashon ku kosnan konosí òf ku loke bo sa kaba. Puntra bo mes: ‘Kon i ki ora mi por apliká e informashon aki den mi bida? Kon mi por us’é pa yuda un otro hende?’ Tambe, si bo ta lesa grupo di palabra en bes di palabra pa palabra, lo bo kapta e ideanan i e puntonan prinsipal mihó, i lo ta mas fásil pa bo kòrda nan.

Ekspertonan riba tereno di edukashon ta enfatisá e balor di repaso. Un estudio di un profesor universitario a demostrá ku si un hende dediká un minüt na repasá algu mesora, esei lo yud’é kòrda dos biaha mas tantu informashon. P’esei asina ku bo kaba di lesa—òf kaba ku un parti grandi—repasá mentalmente e ideanan prinsipal i purba graba nan den bo mente. Pensa kon lo bo splika ku bo mes palabranan kualkier punto nobo ku bo a siña. Dor di refreská bo memoria asina ku bo kaba di lesa un idea, lo bo keda kòrda e punto ei pa hopi mas tempu.

Anto durante e dianan ku sigui, buska un chèns pa repasá loke bo a lesa dor di kompartí e informashon ku un otro hende. Kisas bo por kompartié ku un miembro di famia, un hende den kongregashon, un kolega, un kompañero di skol, un bisiña òf un hende ku bo topa den sirbishi di vèlt. Purba ripití no solamente e puntonan klave, sino tambe e rasonamentu bíbliko ku ta apoyá nan. Abo lo benefisiá pasobra bo ta keda kòrda puntonan importante, i na mesun tempu lo e benefisiá otro hende.

Fuera di repasá loke bo a lesa i konta otro hende tokante dje, lo bo ripará ku ta bon tambe pa meditá riba kosnan importante ku bo a siña. E eskritornan bíbliko Asaf i David a hasi esei. Asaf a bisa: “Lo mi kòrda e echonan di SEÑOR; siguramente lo mi kòrda bo maravianan di promé aya. Lo mi meditá riba tur bo obranan, i keda pensa riba bo echonan.” (Sal. 77:11, 12) David tambe a skirbi: “Mi ta meditá riba bo den e vigilianan di anochi,” i “mi ta kòrda e dianan di promé ayá; mi ta meditá riba tur bo obranan.” (Sal. 63:6; 143:5) Abo sa hasi esei?

Ora bo ta pensa i konsentrá profundamente riba Yehova su obranan, su kualidatnan i e ekspreshonnan di su boluntat, lo bo keda kòrda mas ku djis detaye so. Si bo hasi e manera di meditá ei un kustumber, lo bo graba informashon krusial den bo kurason. Esei lo forma e klase di persona ku bo ta di paden. E rekuerdonan ku esei ta krea lo representá bo pensamentunan mas íntimo.—Sal. 119:16.

Nos tin un yudansa pa kòrda bèrdatnan relashoná ku e obranan di Yehova i ku e kosnan ku Hesukristu a papia. E anochi promé ku Hesus su morto, el a bisa su siguidónan: “Mi ta papia e kosnan aki ku boso miéntras mi ta huntu ku boso. Pero esun ku lo yuda boso, esta spiritu santu ku Tata lo manda den mi nòmber lo siña boso tur kos i rekordá boso tur loke ami a bisa boso.” (Huan 14:25, 26, BPK) Mateo ku Huan tabata entre esnan presente. Realmente e spiritu santu a yuda nan? Sí! Un ocho aña despues, Mateo a kompletá e promé relato detayá di e bida di Kristu, inkluyendo rekuerdonan sumamente balioso manera e Sermon Riba Seru i e señal detayá di Kristu su presensia i di fin di e sistema di kosnan aki. Sesentisinku aña despues di Hesus su morto, apòstel Huan a skirbi su Evangelio, inkluyendo detaye di loke Hesus a bisa e último anochi ku e apòstelnan a pasa kuné promé ku el a entregá su bida. Sin duda, tantu Mateo komo Huan tabatin rekuerdonan bibu di e kosnan ku Hesus a bisa i hasi tempu nan tabata huntu kuné, pero ta prinsipalmente spiritu santu a garantisá ku nan no a lubidá detayenan importante ku Yehova tabata kier den su Palabra skirbí.

Spiritu santu ta yuda sirbidónan di Dios djawe? Definitivamente! Klaru ku spiritu santu no ta pone den nos mente kos ku nunka nos no a siña, pero sí e ta yuda nos kòrda kosnan importante ku nos a yega di studia. (Luk. 11:13; 1 Huan 5:14) Anto, ora mester, nos mente ta ser stimulá pa “kòrda e palabranan ku a wòrdu papiá ántes pa medio di e profetanan santu i e mandamentu di e Señor i Salbadó.”—2 Ped. 3:1, 2.

Bes tras bes Yehova a spièrta Israel: “No lubidá.” No ku el a spera di nan ku nan mester a kòrda tur kos perfektamente. Mas bien, nan no mester a bira asina drùk ku nan kosnan personal ku lo no a sobra tempu mes pa kòrda riba Yehova su tratonan. Semper lo mester tabata bibu den nan memoria kon Yehova a libra nan ora su angel a mata tur e primogénitonan di Egipto i tambe ora Yehova a habri Laman Kòrá i despues a ser’é bèk, hogando Fárao ku su ehérsito. E israelitanan mester a keda kòrda ku Dios a duna nan su Lei na Seru Sínai, ku el a dirigí nan dor di desierto i a hiba nan den e Tera Primintí. Nan no mester a lubidá den e sentido di ku rekuerdo di e susesonan aki mester tabatin un efekto profundo riba nan bida diario.—Deu. 4:9, 10; 8:10-18; Éks. 12:24-27; Sal. 136:15.

Nos tambe mester tene kuidou pa nos no lubidá. Meimei di tur e preshonnan di bida, nos tin ku kòrda riba Yehova, teniendo na mente e klase di Dios ku e ta i e amor ku el a manifestá dunando su Yu, kende a perkurá un reskate pa nos pikánan di manera ku nos lo por tin bida perfekto pa semper. (Sal. 103:2, 8; 106:7, 13; Huan 3:16; Rom. 6:23) Nos lo mantené e bèrdatnan presioso aki bibu den nos dor di lesa Beibel regularmente i partisipá aktivamente den reunionnan di kongregashon i den sirbishi di vèlt.

Ora bo tin ku tuma desishon, sea nan ta grandi òf chikí, kòrda riba e bèrdatnan vital ei, i laga nan influensiá bo pensamentu. No lubidá nan. Buska Yehova su guia. En bes di wak un asuntu simplemente for di un punto di bista karnal òf konfia e impulso di un kurason imperfekto, puntra bo mes: ‘Kua konseho òf prinsipio for di e Palabra di Dios mester influensiá mi desishon?’ (Pro. 3:5-7; 28:26) Bo no por kòrda kosnan ku nunka bo no a lesa ni tende. Pero segun bo ta krese den konosementu eksakto i amor pa Yehova, lo bo tin un depósito mas grandi di konosementu ku Dios su spiritu por usa pa yuda bo kòrda, i bo kresiente amor pa Yehova lo motivá bo pa aktua na armonia ku loke bo a siña i ta kòrda.