Pregunta di Lector

Segun informe di noticia, despues cu un baby nace, algun hospital ta warda e placenta i cabuya di lombrishi pa saca cosnan for di nan sanger. Esaki mester preocupá un cristian?

Den hopi hospital, e procedura médico aki no ta existí, pues cristiannan no tin nodi preocupá. Si tin bon motibu pa kere cu e hospital den cua un cristian lo duna lus ta sigui un práctica asina, lo ta apropiado pa simplemente informá e dokter cu mester deshací dje placenta i e cabuya di lombrishi i no usa nan den ningun manera.

Vários producto médico a ser obtené for di fuentenan biológico, sea animal of humano. Por ehempel, cierto hormonnan a ser sacá for di urina di cabai dik. Sanger di cabai tabata un fuente di serum contra infeccion di tétano, i pa hopi tempu a derivá gama globulina for di sanger den placenta humano (e ‘nageboorte’) pa combatí malesa. E placentanan a ser retené i di vries dor di algun hospital i despues a ser colectá dor di un laboratorio farmacéutico di manera cu e sanger ricu na anticuerponan por a ser procesá dor dje laboratorio pa saca gama globulina.

Mas recientemente, investigadornan a pretendé di tin éxito den usa sanger for dje nageboorte pa trata un tipo di leukemia, i a ser speculá cu e sanger ei lo por ta útil pa trata algun deficiencia dje sistema inmuno of pa usa na lugá di transplante di tuti di wesu. P’esei, tabatin algun informe di mayornan cu a laga saca sanger for dje nageboorte, pa vries e i ward’é den caso cu lo e por ta útil den un tratamentu pa nan yu den futuro.

Tal comercialisacion di sanger di placenta no ta atraé cristiannan berdadero, cu ta laga e ley perfecto di Dios guia nan pensamentu. Nos Creador ta mira sanger como sagrado, representando e bida duná dor di Dios. E único uso di sanger cu el a autorisá tabata riba e altar, en coneccion cu sacrificionan. (Levítico 17:10-12; compará cu Romanonan 3:25; 5:8; Efesionan 1:7.) Di otro manera, mester a drama riba tera of deshací di sanger sacá for di un criatura.—Levítico 17:13; Deuteronomio 12:15, 16.

Ora cristiannan yag un animal of mata un galiña of porco di cas, nan ta drama e sanger i deshací di dje. Nan no tin nodi dram’é literalmente riba tera, pasobra e punto ta pa nan deshací dje sanger en bes di us’é den un of otro manera.

Cristiannan cu ta hospitalisá ta comprendé cu productonan biológico sacá for di nan ta ser tirá afó, sea e productonan ta desperdicio di curpa, tehido enfermo of sanger. Ta cierto cu un dokter por kier haci algun test promé, manera análisis kímico di urina, un examinacion patológico di tehido di tumor of testnan di sanger. Pero despues di esei, ta deshací dje productonan di acuerdo cu ley local. E pashent den hospital generalmente no tin nodi haci peticion special tocante e asuntu aki pasobra ta razonabel i tambe médicamente prudente pa tira tal productonan biológico afó. Si un pashent tin motibu válido pa duda cu nan ta bai sigui un práctica normal asina, lo e por mencion’é n’e dokter en cuestion, declarando cu pa motibunan religioso e kier pa deshací di tur producto asina.

Sin embargo, manera a ser mencioná, esaki rara bes ta un preocupacion p’e pashent promedio pasobra den hopi lugá nan ni sikiera ta considerá pa extraé i bolbe usa e nageboorte of otro productonan biológico, i muchu ménos ta practicá esei como rutina.

E artículo “Laga Nos Aborecé Loke Ta Malbado,” cu a aparecé den “E Toren di Vigilancia” di 1 di januari, 1997, evidentemente ta enfocá riba pedofilia. Con mester definí e práctica aki?

Webster’s Ninth New Collegiate Dictionary ta definí “pedofilia” como “perversion sexual den cua e obheto sexual preferí ta mucha.” Aspectonan dje práctica aki ta ser condená na Deuteronomio 23:17, 18. Ei Dios a papia contra bira un prostituto di tempel (“of, ‘un sodomita,’ un mucha homber mantené pa propósito di perversion sexual,” nota). E versículonan aki tambe ta prohibí cualkier hende pa trece den “e cas di Jehova” e prijs di “un cachó” (“probablemente un pederasta; un persona cu ta practicá relacion sexual anal, specialmente cu un mucha homber,” nota). E referencianan bíblico i seglar aki ta establecé cu loke E Toren di Vigilancia tabata trata ta ora un adulto haci un mucha e obheto di abusu sexual, incluyendo fulamentu.