Mayornan, Haña Deleite den Boso Yunan

“Bo tata i bo mama lo alegrá.”—PROVERBIONAN 23:25.

 1. Kico lo pone mayornan haña deleite den nan yunan?

TA KI dushi pa mira un mata yong crece i bira un palu mahestuoso cu ta duna bunitesa i sombra—specialmente si ta abo a plant’é i cuid’é! Di igual manera, mayornan cu ta cria yunan cu ta lanta pa bira sirbidornan maduro di Dios ta haña gran deleite den nan, manera e proverbio bíblico ta bisa: “E tata di un persona hustu sin falta lo ta gososo; esun cu ta bira tata di un persona sabí tambe lo alegrá den dje. Bo tata i bo mama lo alegrá, i esun cu a duna lus na bo lo ta gososo.”—Proverbionan 23:24, 25.

 2, 3. (a) Con mayornan por evitá pena i amargura? (b) Kico tantu mata yong como yu mester di dje pa bira un fuente di deleite?

² Sin embargo, un mucha no ta bira automáticamente “hustu” ni “sabí.” Gran esfuerso ta necesario pa evitá cu hóbennan ta bira un fuente di “pena” i “amargura,” mescos cu pa haci un mata yong bira un palu mahestuoso ta enbolbé trabou. (Proverbionan 17:21, 25) Por ehempel, staca por dirigí un mata yong p’e crece regt i fuerte. Un suministro regular di awa ta vital, i un mata yong por tin mester di proteccion contra pest. Finalmente, snuimentu ta yuda producí un palu bunita.

³ E Palabra di Dios ta revelá cu yunan tin mester di cosnan manera entrenamentu piadoso, saturacion cu e awa dje berdad di Bijbel, proteccion contra abusu moral i disiplina amoroso pa snui característicanan indeseabel. Pa yena e necesidadnan aki, Bijbel ta urgi tatanan specialmente pa lanta nan yunan “den e disiplina i reglamentu mental di Jehova.” (Efesionan 6:4) Kico esaki ta enbolbé?

Enfasis Riba e Palabranan di Jehova

 4. Ki responsabilidad mayornan tin pa cu nan yunan, i kico ta rekerí promé cu nan por cumpli cuné?

⁴ “Reglamentu mental di Jehova” ta nificá regulá nos pensamentu p’e armonisá cu e boluntad di Jehova. Mayornan, anto, tin cu inculcá den e mente di nan yunan chikitu e pensamentu di Jehova riba asuntunan. I tambe nan mester imitá e ehempel di Dios di duna disiplina compasivo, of entrenamentu corectivo. (Salmo 103:10, 11; Proverbionan 3:11, 12) Pero promé cu mayornan por haci esaki, nan mes mester absorbá e palabranan di Dios, manera e profeta di Dios, Moises, a spierta e israelitanan antiguo: “E palabranan aki [for di Jehova] cu mi ta mandando bo awe mester resultá di ta riba bo curason.”—Deuteronomio 6:6.

 5. Na ki tempu i den ki manera mayornan israelita mester a instruí nan yunan, i kico kier men “inculcá”?

⁵ Studio regular di Bijbel, meditacion i oracion ta ekipá mayornan pa haci loke Moises a manda siguientemente: “Bo tin cu inculcá [e palabranan di Jehova] den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.” E palabra hebreo traducí como “inculcá” ta nificá “ripití,” “bisa bes tras bes,” “imprimí cu claridad.” Ripará con Moises mas aleu a enfatisá e necesidad pa duna e palabranan di Jehova un lugá importante: “Bo tin cu mara nan como un señal riba bo man, i nan tin cu sirbi como un banchi entre bo wowonan; i bo tin skirbi nan riba e kozijnnan di bo porta di cas i riba bo portanan di curá.” Claramente, Jehova ta rekerí pa mayornan duna nan yunan atencion regular i amoroso!—Deuteronomio 6:7-9.

 6. Kico mayornan mester a inculcá den nan yunan, i cu ki beneficio?

⁶ Cua ta “e palabranan aki” di Jehova cu mayornan mester a inculcá den nan yunan? Moises a caba di ripití loke ta ser yamá generalmente e Dies Mandamentunan, incluyendo e mandamentunan pa no mata, no cometé adulterio, no horta, no duna testimonio falsu i no cudishá. E rekisitonan moral ei, i tambe e mandamentu pa “stima Jehova bo Dios cu tur bo curason i cu tur bo alma i cu tur bo forsa vital,” tabata particularmente loke mayornan israelita mester a inculcá den nan yunan chikitu. (Deuteronomio 5:6-21; 6:1-5) Bo no ta di acuerdo cu esaki ta e clase di siñansa cu muchanan tin mester awe?

 7. (a) Cu kico yunan a ser compará den Bijbel? (b) Kico nos lo examiná awor?

⁷ Jehova a bisa e tata israelita: “Bo esposa lo ta manera un mata di druif cu ta producí fruta den e parti mas interior di bo cas. Bo yu hombernan lo ta manera taki di mata di olijfi tur rond di bo mesa.” (Salmo 128:3) Sin embargo, pa mayornan haña deleite den nan “matanan yong” en bes di pasa pena, nan tin cu mustra un interes personal i diario den nan yunan. (Proverbionan 10:1; 13:24; 29:15, 17) Laga nos examiná con mayornan por entrená, muha spiritualmente, protehá i disipliná nan yunan amorosamente di tal manera cu nan ta yega na haña berdadero deleite den nan.

Entrenamentu for di Infancia

 8. (a) Ken a sirbi como staca di entrenamentu pa Timoteo? (b) Na ki tempu e entrenamentu a cuminsá, i cu ki resultado?

⁸ Considerá Timoteo, kende a ricibí sosten for di, na moda di papia, dos staca di entrenamentu firmemente implantá—su mama i su wela. Siendo cu Timoteo su tata tabata un griego i evidentemente un incrédulo, tabata su mama hudiu, Eunice, i su wela, Loida, kendenan a entrená e mucha ‘for di infancia den e scritura santu.’ (2 Timoteo 1:5; 3:15; Echonan 16:1) Nan diligencia den siña Timoteo—asta ora e tabata un baby—e “cosnan maraviyoso cu [Jehova] a haci” a ser recompensá ricamente. (Salmo 78:1, 3, 4) Timoteo a bira un misionero den paisnan lehano, tal bes miéntras ainda e tabata un tiener, i el a hunga un papel prominente den fortalecé e congregacionnan cristian di promé.—Echonan 16:2-5; 1 Corintionan 4:17; Filipensenan 2:19-23.

 9. Con hóbennan por siña evitá e trampanan di materialismo?

⁹ Mayornan, ki clase di staca di entrenamentu boso ta? Por ehempel, bo kier pa bo yunan desaroyá un punto di bista balansá di cosnan material? E ora ei abo mester pone e ehempel corecto dor di no sigui lo último di tur aparato electrónico of otro cosnan cu bo realmente no tin mester. Si bo scoge pa sigui tras di beneficionan material, no keda sorprendí ora bo yunan imitá bo. (Mateo 6:24; 1 Timoteo 6:9, 10) En berdad, si e stacanan di entrenamentu no ta regt, con e mata yong por crece stret?

10. Ken su guia mayornan mester busca semper, i ki actitud nan mester tin?

¹⁰ Mayornan cu ta haña deleite den nan yunan constantemente lo busca yudansa divino pa entrená nan, considerando semper loke ta den e mihó interes spiritual di nan yunan. Un mama di cuater yu a conta: “Asta promé cu nos yunan a nace, nos tabata haci oracion regularmente na Jehova pa yuda nos ser bon mayor, pa laga su Palabra guia nos, i pa aplik’é den nos bida.” El a agregá: “‘Jehova ta bini na promé lugá’ no tabata djis un frase comun sino e manera cu nos a hiba nos bida.”—Huesnan 13:8.

Dunando “Awa” Regularmente

11. Kico tantu mata yong como yu ta rekerí pa crece?

¹¹ Mata yong particularmente mester di awa constantemente, manera nos por mira den e caso di palunan cantu di un riu cu ta crece hopi bon. (Compará cu Revelacion 22:1, 2.) Babynan tambe lo florecé spiritualmente si nan ta haña e awa dje berdad di Bijbel regularmente. Pero mayornan tin cu tuma na cuenta e cantidad di tempu cu nan yunan por presta atencion. Tal bes sesionnan di instruccion frecuente pero mas corticu lo ta mas eficas cu algun sesion largu. No minimisá e balor di tal sesionnan mas corticu. Pasando tempu huntu ta vital pa crea un relacion cerá entre mayor i yu, un intimidad cu ta ser animá bes tras bes den e Scritura.—Deuteronomio 6:6-9; 11:18-21; Proverbionan 22:6.

12. Kico ta e balor di haci oracion cu yunan chikitu?

¹² Un dje sesionnan cu e yunan chikitu por ta na fin dje dia. Un hóben ta corda: “Mi mayornan tabata sinta na rand di nos cama tur anochi i scucha nos haci nos mes oracion.” Un otro a comentá riba e balor di haci esaki: “Esei a siñá mi e custumber di haci oracion na Jehova tur anochi promé cu mi bai drumi.” Ora muchanan ta tende nan mayornan papia diariamente tocante Jehova i haci oracion na dje, e ta bira un persona real pa nan. Un homber hóben a bisa: “Mi por a cera mi wowonan den oracion na Jehova i mira un berdadero persona manera un abuelo. Mi mayornan a yudá mi mira cu Jehova ta hunga un papel vital den tur loke nos ta haci i bisa.”

13. Kico periodonan regular di instruccion por incluí?

¹³ Pa yuda yu chikitu absorbá e awa dje berdad di Bijbel, mayornan por incluí hopi cos práctico den e periodonan regular di instruccion. E mayornan di dos mucha cu tabata cerca di bira tiener, a bisa: “Tur dos yu a cuminsá ricibí entrenamentu pa sinta ketu den Salon di Reino for di nan promé par di simannan di bida.” Un tata a describí loke su famia a haci: “Nos a skirbi tur e bukinan di Bijbel riba karchi i tabata practicá pone nan na volgorde, beurt pa beurt pa nos tur. E muchanan semper tabata anhelá p’e ocasion aki.” Hopi famia ta incluí un periodo breve di instruccion sea promé of despues di ora di come. Un tata a bisa: “E cuminda di anochi tabata un bon tempu pa nos considerá e texto di dia di Bijbel.”

14. (a) Ki actividadnan spiritualmente recompensador por haci cu yunan chikitu? (b) Ki potencial pa siña mucha tin?

¹⁴ Yunan chikitu tambe ta disfrutá di tende e relatonan bíblico bibu den Mi buki di relato bíblico.a “Ora e muchanan tabata yong,” un pareha a comentá, “nos tabata trata un les den e buki di Relato bíblico i despues e muchanan tabata bisti trahenan i actua e partinan den forma di un mini-drama. Nan tabata stima esaki i hopi biaha a insistí riba haci mas cu un relato pa studio.” No balotá bo yu su potencial pa siña! Muchanan di cuater aña di edad a memorisá capítulonan completo dje buki di Relato bíblico i a asta siña lesa Bijbel! Un hóben ta corda cu ora e tabatin rond di tres aña i mei di edad, cada bes e tabata pronunciá “decisionnan hudicial” robes, pero su tata a anim’é p’e sigui practicá e pronunciacion corecto.

15. Ki asuntunan por ser incluí den consideracionnan cu yunan, i ki evidencia tin cu tal consideracionnan tin balor?

¹⁵ Sesionnan cu bo yunan chikitu por ser usá tambe pa prepará nan pa compartí e awa di berdad cu otronan, manera mediante comentario na reunionnan. (Hebreonan 10:24, 25) “Durante nos sesionnan di práctica, mi tabatin cu comentá cu mi mes palabranan,” un hóben ta corda. “Mi mayornan no a permití mi pa djis lesa sin comprendé.” Ademas, por entrená yunan pa tene un participacion significativo den e ministerio di veld. Un muher cu a ser lantá dor di mayornan temeroso di Dios ta splica: “Nunca nos tabata djis cana tras di nos mayornan pa compañá nan den nan trabou di predicá. Nos tabata sa cu nos tabatin cu participá, maske esei tabata djis pa primi bel i laga un papel di invitacion. Dor di preparacion cuidadoso promé cu e actividadnan di cada fin di siman, nos tabata sa loke nos lo a bisa. Nunca nos tabata lanta riba un diasabra mainta i puntra si nos ta bai sirbishi. Nos tabata sa cu nos ta bai.”

16. Pakico regularidad den tene un studio di famia cu yunan ta importante?

¹⁶ Nunca ta di mas pa mustra riba e necesidad pa muha yunan chikitu regularmente cu e awa dje berdad di Bijbel, locual ta nificá cu un studio di Bijbel semanal den famia ta vital. Un tata di dos yu ta afirmá cu “un factor principal cu ta iritá yunan ta inconsistencia.” (Efesionan 6:4) El a bisa: “Ami i mi esposa a scoge un dia i ora i a tene e studio di famia fielmente segun e programa ei. No a tuma muchu tempu promé cu e yunan a spera esei n’e ora ei.” Tur entrenamentu asina for di infancia ta importante, na armonia cu e berdad obvio, ‘Manera bo forma un taki yong, asina e palu ta crece.’

17. Kico ta mes importante cu duna yunan chikitu berdadnan bíblico?

¹⁷ Dunando yunan chikitu e berdadnan di Bijbel ta importante, pero ehempel di mayor ta igualmente importante. Bo yunan ta mirá bo studia, asistí regularmente na reunion, participá den e ministerio di veld, sí, haña deleite den haci e boluntad di Jehova? (Salmo 40:8) Ta vital pa nan mira esei. Ta digno di nota cu un yu muher a bisa di su mama, kende a soportá e oposicion di su esposo i a lanta seis yu pa bira Testigonan fiel: “Loke a impresioná nos mas tabata Mami su mes ehempel—esei a bisa mas cu palabra.”

Dunando Yunan Chikitu Proteccion

18. (a) Con mayornan por duna yunan e proteccion cu nan tin mester? (b) Ki clase di instruccion yunan chikitu na Israel a ricibí tocante partinan reproductivo di curpa?

¹⁸ Mescos cu mata yong hopi bes mester di proteccion contra pest peligroso, den e sistema di cosnan malbado aki, yunan chikitu mester di proteccion contra “hende malbado.” (2 Timoteo 3:1-5, 13) Con mayornan por duna e proteccion aki? Dor di yuda nan gana sabiduria divino! (Eclesiástes 7:12) Jehova a manda e israelitanan—incluyendo nan “yunan chikitu”—pa scucha n’e lesamentu di su Ley, cu a incluí identificacion di conducta sexual corecto i incorecto. (Deuteronomio 31:12; Levítico 18:6-24) Partinan reproductivo dje curpa ta ser mencioná bes tras bes, incluyendo “testículonan” i “órgano genital.” (Levítico 15:1-3, 16; 21:20; 22:24; Númeronan 25:8; Deuteronomio 23:10) Pa motibu dje corupcion extremo dje mundu djawe, yunan chikitu mester sa e uso corecto i incorecto di tal partinan dje curpa cu ta incluí den e creacion cu Dios a yama “hopi bon.”—Génesis 1:31; 1 Corintionan 12:21-24.

19. Ki instruccion apropiado mester duna yunan chikitu relacioná cu nan partinan privá di curpa?

¹⁹ Lo ta ideal pa ámbos mayor huntu, of cada persona cu tin un mucha bou di su custodia, identificá pa e mucha su partinan privá di curpa. Nan mester splica e ora ei cu ningun otro persona mag di mishi cu e partinan aki. Siendo cu abusadornan sexual di mucha hopi biaha ta test con muchanan ta respondé na avancenan sexual sutil, mester siña un mucha pa resistí firmemente i bisa, “Mi ta bisa riba bo!” Siña bo yunan chikitu cu nan semper mester bisa riba cualkier hende cu ta purba mishi cu nan den un manera cu ta haci nan sinti nan incómodo, sin importá ki menasanan spantoso ta ser hací.

Dunando Disiplina Amoroso

20. (a) Con disiplina ta manera snuimentu? (b) Kico ta e efecto inicial di disiplina, pero kico ta e resultado?

²⁰ Yunan chikitu ta saca beneficio di disiplina amoroso, mescos cu un palu ta bira mihó ora snui e. (Proverbionan 1:8, 9; 4:13; 13:1) Ora corta takinan indeseabel, esei ta animá e crecementu di otro takinan deseabel. Pues si bo yunan ta enfocando particularmente riba posesionnan material of ta incliná na mal asociacion of entretenimentu insaludabel, e inclinacionnan incorecto aki ta manera takinan cu mester ser cortá. Si nan ser eliminá, bo yunan lo ser yudá pa crece den un direccion spiritual. Na promé instante e disiplina ei kisas no ta parce placentero, mescos cu snuimentu por causa algun molester pa un palu. Pero e resultado excelente di disiplina ta crecementu renobá den e direccion cu abo kier pa bo yu crece.—Hebreonan 12:5-11.

21, 22. (a) Kico ta indicá cu disiplina no ta ni placentero pa duna ni pa ricibí? (b) Pakico mayornan no mester keda sin duna disiplina?

²¹ Nos mester admití unbes cu no ta agradabel pa duna ni pa ricibí disiplina. “Mi yu tabata pasa basta tempu cu un hóben cu e ancianonan a spiertá mi cu no tabata bon asociacion,” un tata a mencioná. “Mi mester a actua mas lihé di loke mi a haci. Aunke mi yu no a haña su mes enbolbí den ningun malecho abierto, a tuma tempu pa reahustá su manera di pensa.” E yu homber a comentá: “Ora mi a ser cortá for di mi mihó amigu, mi a keda kibrá.” Pero el a agregá: “Esaki tabata un bon decision, ya cu pronto despues el a ser expulsá.”

²² “E reprendementunan di disiplina ta e caminda di bida,” e Palabra di Dios ta bisa. Pues sin importá con difícil disiplina por ta pa duna, no keda sin disipliná bo yunan. (Proverbionan 6:23; 23:13; 29:17) Cu tempu, nan lo ta gradicidu cu bo a corigí nan. “Mi ta corda cu mi tabata masha rabiá cu mi mayornan ora nan a disipliná mi,” un hóben ta bisa. “Awor lo mi tabata asta mas rabiá si mi mayornan a nengá mi e disiplina ei.”

E Recompensa Ta Bal e Esfuerso

23. Pakico tur e atencion amoroso cu ta ser invertí den hóbennan ta bal e esfuerso?

²³ No cabe duda, e clase di yunan den ken mayornan, i tambe otronan, ta haña deleite ta e producto di hopi atencion amoroso diariamente. Sin embargo, tur e esfuerso cu ta ser invertí den nan—sea nan ta yu natural of spiritual—ta bal e recompensa cu abo por disfrutá di dje. Apostel Juan na edad avansá a mustra esaki ora el a skirbi: “Mi no tin un motibu mas grandi pa gradicimentu cu e cosnan aki, pa mi tende cu mi yunan ta sigui cana den e berdad.”—3 Juan 4.

[Nota]

Bo Ta Corda?

◻ Kico tantu mata yong como yu tin mester afin di bira digno di encomendacion?

◻ Con, na moda práctico, mayornan por sirbi como stacanan di entrenamentu eficas?

◻ Kico por ser incluí den sesionnan di instruccion cu yunan chikitu, i kico mester siña nan resistí?

◻ Den ki manera disiplina ta beneficioso pa un mucha, mescos cu snuimentu ta pa un palu?

[Rekonosementu pa Potrèt na página 10]

Courtesy of Green Chimney’s Farm