E Bijbel ta Contradici su Mes?

AUTOR Hendrik van Dijk a skirbi na antes: “Nací den Oriente i bistí den forma i símbolo oriental, e Bijbel ta camna den tur camina di mundo cu pia familiar i ta drenta den país tras di país pa contra cu loke ta di dje na tur parti. El a siña papia den cientos di idioma cu e curazón di hende. Mucha ta scucha su relatonan cu strañamento i gozo, i homber sabí ta examinánan como parábola di bida. Hende malbado i orguyoso ta tembla na su spiertamento, pero pa hende heridá i arrepentí, e tin e boz di un mama. . . . Ningun hende cu tin tal tesoro como su propiedad ta pober of desolá.”

E Bijbel en berdad “a siña papia den cientos di idioma.” Por lo menos uno di su 66 buki a ser traducí na mas cu 1.970 lenga. Miyones di hende ta considera e Bijbel como un don di Dios i ta lezé cu gusto i beneficio. Sin embargo, otronan ta bisa cu e ta contene contradiccion i p’sei no ta digno di confianza. Kico investigacion cuidadoso ta revela?

Manera e pintura riba e capa ta indica, Dios a usa homber fiel pa skirbi e Bijbel. Realmente, un análisis cuidadoso dje Bijbel ta revela cu mas cu 40 homber durante un periodo di 16 siglo a skirbié. Nan tabata skirbidor profesional? No. Den nan bo por haya wardador di carné, piscador, cobrador di belasting, dócter, trahador di tent, sacerdote, profeta, i rey. Hopi bez nan skirbimento ta menciona hende i costumber cu nos no conoce den siglo 20 aki. Realmente, e nificacion di loke skirbidor bíblico mes a skirbi no a keda claro pa nan cada bez. (Daniel 12:8-10) Pues, no mester ta un sorpresa pa nos si nos ta contra cu cierto dificultad ora nos ta leza e Bijbel.

Bo por resolve tal dificultad? E Bijbel ta contradici su mes? Pa haya sa, láganos considera algun ehempel.

Esakinan ta berdadero dificultad?

▪ Unda Caín a haya su esposa? (Génesis 4:17)

Hende por kere cu despues di asesinato di Abel, solamente Caín su ruman culpabel i nan mayornan, Adam i Eva, a keda riba tera. Sin embargo, Adam i Eva tabatin un famía grandi. Segun Génesis 5:3, 4, Adam tabatin un yiu yamá Set. E relato ta agrega: “E dianan di Adam despues di a engendra Set a yega di ser ocho cien aña. Mientras tanto el a bira tata di yiu homber i yiu muher.” Pues, Caín a casa cu su ruman muher of tal bez cu un sobrina. Siendo cu humanidad ne tempo ei tabata cerca perfeccion humano, tal casamento evidentemente no a causa rísico di salud cu por peligrá yiu di tal casamento den e dia djawe.

▪ Ken a bende Josef pe ser hibá Egipto?

Génesis 37:27 ta bisa cu rumanan di Josef a decidi di bendé cu algun ismaelita. Pero e sigiente texto ta bisa: “Awor, homber, comerciante madianita, tabata pasa. P’sei, [rumanan di Josef] a hala i a hiza Josef for dje poz di awa anto a bende Josef cu ismaelita pa binti pida di plata. Cu tempo, eseinan a hiba Josef na Egipto.” Nan a bende Josef cu ismaelita of cu madianita? Wel, madianita por wel ta yamá també ismaelita, cu locual nan tabata famía via nan antepasado Abraham. Of, comerciante madianita por a haci biahe cu caravana ismaelita. En todo caso, ruman di Josef a bendé, i despues Josef por a bísanan: “Mi ta Josef boso ruman, cu boso a bende pa ser hibá Egipto.”—Génesis 45:4.

▪ Cuanto israelita a muri pa motibo cu nan a tene relacion inmoral cu muher moabita i a participa den e adoracion di Baal di Peor?

Número 25:9 ta bisa: “Esnan cu a muri dje plaga [di Dios pa nan mal conducta] a subi te na binticuater mil.” Sin embargo, apóstol Pablo a bisa: “Ni no practica fornicacion, manera algun di nan [israelita den desierto] a comete fornicacion, solamente pa cai, bintitres mil di nan den un dia.” (1 Corintio 10:8) Kizás e cantidad matá tabata entre 23.000 i 24.000, di manera cu cada cifra ta satisfactorio. Sin embargo, e buki di Número ta indica specialmente cu huez a mata “tur cabezante dje pueblo” enbolbí den e picá. (Número 25:4, 5) Por tabatin mil “cabezante”culpable, haciendo un total di 24.000 ora nan ta agregá ne 23.000 cu Pablo a mencioná. Aunque aparentemente 23.000 tabata víctima directo dje plaga di Dios, tur 24.000 a experimenta e plaga di Jehova pasobra cada un di nan a muri bao di su decreto di huicio desfavorable.—Deuteronomio 4:3.

▪ Siendo cu Agag tabata un contemporario dje rey israelita Saul, e mencion cu Balam a haci di un rey amalekita yamá Agag no ta contrario cu esei?

Rond di aña 1473 PEC, Balam a profetiza cu un rey di Israel lo ta “mas halto cu Agag.” (Número 24:7) Ningun mencion di Agag a wordu hací te cu e reino di rey Saul (1117-1078 PEC). (1 Samuel 15:8) Sin embargo, esei no ta contrario pasobra “Agag” por a ser un título real similar cu e título di faraó di Egipto. Ta posibel també cu Agag tabata un nomber personal cu gobernante amalekita a usa bez tras bez.

▪ Ken a haci David tuma censo di israelita?

Segundo Samuel 24:1 ta bisa: “E rabia di Jehova a bolbe bira ardiente contra Israel, ora David tabata instigá contra nan, bisando: ‘Bai, haci contamento di Israel i Hudá.’” Pero, Jehova no tabata esun cu a impulsa David pa peca, pasobra 1 Crónica 21:1 ta bisa: “Satanás [of, “un resistidor,” nota] a procede di lanta contra Israel i instiga David pa conta Israel.” Dios tabata disgustá cu israelita i p’sei a permiti Satanás e Diabel trece tal picá riba nan. P’es motibo, 2 Samuel 24:1 ta bisa esei como si Dios mes a hacié. Interesantemente, e traduccion di Joseph B. Rotherham ta bisa: “E rabia di Yahweh a cende contra Israel, di manera cu el a permiti instigacion di David contra nan bisando, Bai conta Israel i Hudá.”

▪ Con nos por armoniza e diferencia den e total pa Israel i pa Hudá den e censo di David?

Den 2 Samuel 24:9 e total ta 800.000 israelita i 500.000 di Hudá, pero 1 Crónica 21:5 ta duna e total di 1.100.000 homber di gera di Israel i 470.000 di Hudá. Reclutá regularmente den e sirbishi real tabatin 288.000 soldad, partí den 12 grupo di 24.000, cada grupo sirbiendo un luna durante e aña. Tabatin 12.000 adicional sirbiendo e 12 prinz dje tribunan, haciendo un total di 300.000. Aparentemente e 1.100.000 di 1 Crónica 21:5 ta inclui e 300.000 reclutá caba, pero 2 Samuel 24:9 no ta haci esei. (Número 1:16; Deuteronomio 1:15; 1 Crónica 27:1-22) En cuanto Hudá, 2 Samuel 24:9 aparentemente a inclui 30.000 homber den un ehército di observacion stacioná na frontera di filisteo pero locual no tabata incluí den e cifra di 1 Crónica 21:5. (2 Samuel 6:1) Si nos ta corda cu dos homber cu diferente punto di bista i meta a skirbi 2 Samuel i 1 Crónica, ta fácil pa nos armoniza e cifranan.

▪ Ken tabata e tata di Sealtiel?

Cierto texto ta indica cu Jeconías (rey Jeconías) tabata e tata carnal di Sealtiel. (1 Crónica 3:16-18; Mateo 1:12) Pero Lucas, skirbidor di Evangelio, a yama Sealtiel “yiu di Neri.” (Lucas 3:27) Aparentemente, Neri a duna su yiu muher na Sealtiel como esposa. Siendo cu hende hebreo tabatin e costumber di yama nuero yiu, specialmente den lista di genealogía, Lucas por a yama Sealtiel e yiu di Neri. Di igual manera, ­Lucas a menciona Josef como yiu di Heli, locual realmente tabata tata di María, casá di Josef.—Lucas 3:23.

Armonizando Texto cu ta Enbolbe Jesús

▪ For di cuanto homber Jesucristo a saca demoño locual despues a domina un tao grandi di porco?

Mateo, skirbidor di Evangelio, a menciona dos homber, pero Marco i Lucas a menciona un so. (Mateo 8:28; Marco 5:2; Lucas 8:27) Evidentemente, Marco i Lucas a hala atencion na un solo homber cu demoño a domina pasobra Jesús a papia cuné i su caso tabata mas sobresaliente. Posiblemente, e homber ei tabata mas violento of a sufri pa mas tempo bao di control di demoño. Despues, tal bez e solo homber ei kier a compaña Jesús. (Marco 5:18-20) Den un situacion casi paralelo, Mateo a menciona dos homber ciegu cu Jesús a cura, pero Marco i Lucas a menciona un so. (Mateo 20:29-34; Marco 10:46; Lucas 18:35) Esei no ta un contradiccion, pasobra tabatin por lo menos un homber asina.

▪ Ki color e bistí di Jesús tabatin riba e dia di su morto?

Segun Marco (15:17) i Juan (19:2), soldad a bisti Jesús cu un bistí púrpura. Pero Mateo (27:28) a yamé “un mantel scarlata,” dunando énfasis na su color corrá. Siendo cu púrpura ta cualkier color cu tin un combinacion di corrá i blau, Marco i Juan ta di acuerdo di cu e mantel tabatin un color corrá. Refleccion di claridad i e ambiente por a duna diferente color ne mantel, i skirbidor di Evangelio a menciona e color cu tabata mas fuerte pa nan of pa hende foi ken nan a haya nan informacion. Tal variacion menor ta mustra individualidad dje skirbidornan i ta duna prueba cu no tabatin conspiracion.

▪ Ken a hiba e staca di tormento di Jesús?

Juan 19:17 ta bisa: “[Jesús] mes hibando e staca di tormento, a sali pa loke ta yamá Lugar di Calpachi, cu ta ser yamá Gólgo­tha na hebreo.” Pero Mateo (27:32), Marco (15:21), i Lucas (23:26) ta bisa cu ‘ora nan tabata sali, nan a obligá Simón di Cirene pa rindi e sirbishi di carga e staca di tormento.’ Jesús a carga su staca di tormento, manera Juan a bisa. Sin embargo, den su relato condensá, Juan no a agrega e punto di cu nan a obligá Simón despues pa rindi e sirbishi di hiba e staca. P’sei, relato di Evangelio ta na armonía en cuanto esei.

▪ Con Hudas Iscariote a muri?

Mateo 27:5 ta bisa cu Hudas a horca su curpa, pero Echo 1:18 ta bisa cu Hudas “cayendo cu cabez, a rementa ruidosamente di barica i tur su mondongo a basha afó.” Aunque Mateo a parce di trata cu e moda di esfuerzo di un suicidio, Echo ta duna detaye dje resultado. Ta parce cu Hudás a mara un cabuya na rama di palu, a pasa e cabuya rond di su garganta, i a purba di horca su curpa bulando for di un barranca. Ta parce cu sea e cabuya of e rama di palu a kibra di manera cu el a cai i a rementa den piedra mas abao. E terreno rond di Jerusalem ta haci tal conclusion razonabel.

Con Bo ta Considera e Asunto?

Si nos ta encontra loke ta parce falta di armonía den e Bijbel, ta bon pa comprende cu hopi bez hende ta bisa loke ta parce contradiccion pero cu ta fácil pa splica of comprende. Por ehempel, un comerciante por comunica cu un hende, bisando su secretario kico pa skirbi. Si bo ta puntré, lo e bisa cu el a manda e carta. Pero, siendo cu su secretario a skirbi i a post e carta, e por bisa cu el a mandé. Di igual manera, no tabata un contradiccion pa Mateo (8:5) bisa cu un oficial militar a bini pa pidi un fabor di Jesús, pero Lucas (7:2, 3) a bisa cu e homber a manda representante.

Ehempel anterior ta mustra cu ta posibel pa resolve dificultad bíblico. P’sei, tin bon motibo pa tene un actitud positivo tocante e Scritura. Tal spiritu tabata recomendá den e palabra skirbí den un Bijbel di famía publicá na aña 1876:

“E spiritu correcto pa mantene pa trata cu tal dificultad tá, kítanan tanto leu como ta práctico, i pega i sometébo ne berdad, asta ora tur nubia no por ta eliminá foi dje. Nos mester imita ehempel dje apóstolnan, cu, ora algun disípel a keda ofendí pa loke nan a yama ‘palabra duro,’ i a bandona Cristo, nan a silenciá tur keho cu lo sigiente: ‘Señor, cerca ken nos mester bai? Bo tin e palabra di bida eterna, i nos ta keda sigur cu bo ta Cristo, e Yiu di e Dios bibo.’ . . . Ora nos ta mira un berdad parce di ser na conflicto cu un otro berdad, láganos purba di reconciliánan, i mústranan ­reconciliá asina na tur hende.”—Juan 6:­60-69.

Bo ta tuma un posicion asina? Despues di examina un poco ehempel so demonstrando e armonía dje Scritura, nos ta spera cu bo ta di acuerdo cu e salmista cu a bisa Dios: “E sustancia di bo palabra ta e berdad.” (Salmo 119:160) Testigo di Jehova ta tuma tal punto di bista dje Bijbel henter i cu mucho gusto ta duna motibo pa nan fe den dje. Pakico no considera hunto cu nan tal buki sin igual? Su mensahe animador por wel yenábo cu berdadero speranza i felicidad.

[Plachi na página 7]

Bo a puntra Testigo di Jehova pakico nan tin fe den e Bijbel?