Bo Por Tin Éxito Apesar di Bo Criansa

NICHOLAS tabatin un tendencia di rebeldiá cuné desde su infancia.a Cu tempu su conflictonan interno a pon’é cuminsá usa droga i bebe di mas. Nicholas ta splica: “Mi tata tabata un alcohólico, i el a pone ami cu mi ruman muher sufri hopi.”

Malinda su mayornan a duna e aparencia di tabata miembronan respetá di nan comunidad i baidó di misa. Pero tambe nan tabata profundamente enbolbí den un culto. Malinda, kende awor tin 30 i picu aña, ta lamentá: “Algun di nan prácticanan di culto a pone cu nan a maltratá mi i a destruí mi ánimo como mucha.” E ta agregá: “For di tempu cu mi por corda, e sintimentu di desesperacion i cu mi no ta bal nada a keda inculcá den mi.”

Ken por nenga cu e infancia di hopi hende a ser dañá dor di violencia, abusu, negligencia di parti di mayornan i otro factornan negativo? E heridanan di un infancia infelis por ta hopi profundo. Pero e tipo di heridanan ei mester ruiná pa semper un persona su posibilidad di aceptá e berdad dje Palabra di Dios i di haña un gran midí di felicidad? Nicholas i Malinda por logra éxito como hende íntegro apesar di nan criansa? Considerá promé e ehempel di rey Hosías di Huda.

Un Ehempel Bíblico

Hosías a goberná Huda durante 31 aña den siglo 7 P.E.C. (659-629 P.E.C.) Tempu cu Hosías a ser entronisá, despues dje asesinato di su tata, e condicionnan na Huda tabata hopi malu. Huda i Jerusalem tabata yen di adoradó di Baal i di hende cu tabata haci huramentu firme na e dios principal di Amon, Malcam. Sofonías, un profeta di Dios den e tempu ei, a bisa cu e prinsnan di Huda tabata manera “leon cu ta grita,” i e huesnan manera “lobo djanochi.” Consecuentemente, violencia i engaño tabata plamá den e pais. Hopi hende tabata bisa den nan curason: “Jehova lo no haci bon, i lo e no haci malu.”—Sofonías 1:3–2:3; 3:1-5.

Ki clase di gobernante Hosías a resultá di ta? Ésdras, e escritor di cronologia bíblico, ta skirbi: “[Hosías] a haci loke tabata recto den bista di Jehova i a cana den e camindanan di David, su antepasado; i e no a desviá na man drechi ni na man robes.” (2 Crónicanan 34:1, 2) Evidentemente, Hosías a logra haci loke ta recto den bista di Dios. Pero con e antecedencia di su famia tabata?

Infancia Yen di Cuido of Yen di Abusu?

Ora Hosías a nace na aña 667 P.E.C., su tata Amon tabatin solamente 16 aña di edad i su tawela Manases tabata reina riba Huda. Manases tabata un dje reynan di mas malbado cu a yega di goberná Huda. Trahando altarnan pa Baal, “el a haci na gran escala loke tabata malu den bista di Jehova.” El a laga su yunan pasa den candela, el a practicá magia i a wak destino, a promové prácticanan spiritista i a drama sanger inocente na gran cantidad. Tambe Manases a trece den e cas di Jehova e imágen grabá dje palu sagrado cu el a traha. El a seducí Huda i Jerusalem “pa haci pió cu e nacionnan cu Jehova a eliminá for di dilanti di e yunan di Israel.”—2 Crónicanan 33:1-9.

Manases tabata asina malu cu Jehova a laga nan hib’é Babilonia, un dje stadnan real dje monarkia asirio, mará na cadena. Miéntras e tabata den cautiverio, Manases a repentí, humiyá su mes i a roga Jehova pa pordon’é. Dios a scucha su peticion pa fabor i a restor’é n’e reino den Jerusalem. Anto Manases a instituí cambionan cu un midí di éxito.—2 Crónicanan 33:10-17.

Ki efecto Manases su maldad i despues su repentimentu tabatin riba su yu homber Amon? Amon a resultá di ta hopi malbado. Ora Manases a repentí i a haci esfuerso pa limpia e nacion di contaminacion cu e mes a introducí, Amon no a reaccioná faborabel. Ora el a heredá e trono na edad di 22 aña, Amon “a haci loke tabata malu den bista di Jehova, mescos cu su tata Manases a haci.” En bes di humiyá su mes dilanti Jehova, “Amon tabata unu cu a haci culpabilidad bira mas grandi.” (2 Crónicanan 33:21-23) Hosías tabatin seis aña so ora Amon a bira rey di Huda. Ki un infancia teribel Hosías mester tabatin!

E reinado malbado di Amon a terminá despues di dos aña ora cu su sirbidónan a conspirá contra dje i a mat’é. Sin embargo, e hendenan dje tera a mata esnan cu a conspirá contra Amon, i a haci su yu homber Hosías rey.—2 Crónicanan 33:24, 25.

Apesar dje circunstancianan negativo na principio di su infancia, Hosías a haci loke ta bon den bista di Jehova. Su reinado tabata asina exitoso cu Bijbel ta bisa: “A resultá cu promé cuné no tabatin rey manera dje cu a bolbe na Jehova cu henter su curason i cu henter su alma i cu henter su forsa vital, conforme cu henter e ley di Moises; tampoco despues di dje no a lanta unu manera e.”—2 Reynan 23:19-25.

Esta un ehempel animante Hosías ta pa esnan cu kisas tabatin un infancia teribel! Kico nos por siña for di su ehempel? Kico a yuda Hosías scoge i mantené e curso di bida corecto?

Busca pa Conocé Jehova

Un influencia positivo cu a prevalecé durante e promé añanan di Hosías su bida tabata e repentimentu di su tawela Manases. Bijbel no ta bisa cuantu contacto nan dos tabatin cu otro ni cuantu aña Hosías tabatin ora Manases a corigí su camindanan. Siendo cu famianan hudiu tabatin relacion estrecho cu otro, podisé Manases a purba salba su nietu for dje influencianan corupto rond di dje dor di inculcá den su nietu un grado di respet pa e Dios berdadero Jehova, i pa su palabra. Cualkier simia di berdad cu Manases a logra planta den curason di Hosías, kisas combiná cu otro influencianan positivo, cu tempu a duna fruta. Ora e tabatin ocho aña riba trono di Huda, Hosías di 15 aña di edad a busca pa conocé Jehova i haci su boluntad.—2 Crónicanan 34:1-3.

Pa algun hende, e único contacto spiritual cu nan tabatin durante nan infancia tabata cu un famia djaleu, un conocí of un bisiña. Sin embargo, si cultivá e simianan cu a ser plantá dje forma ei, nan por duna fruta despues. Malinda, mencioná anteriormente, tabatin un pachi bisiña cu tabata trece e revistanan Toren di Vigilancia i Spierta! na su cas. Recordando e pachi cu cariño, Malinda ta bisa: “Loke mas a impresioná mi di mi bisiña tabata cu e no tabata celebrá dianan di fiesta. Esaki tabata importante pa mi pasobra ‘Halloween’ i algun otro dia di fiesta tabata ocasionnan pa prácticanan ritual den e culto di mi mayornan.” Un década despues, ora un amiga a invitá Malinda pa un reunion na Salon di Reino di Testigonan di Jehova, el a corda riba su bisiña i mesora el a aceptá e invitacion. Esei a yud’é busca e berdad.

Ser Humilde Dilanti di Dios

Hosías su reinado tabata marcá pa tremendo reformanan religioso den e tera di Huda. Despues di a hiba un campaña pa seis aña largu contra idolatria i a limpia e tera di Huda, Hosías a cuminsá drecha e cas di Jehova. Miéntras e trabou ei tabata andando, Sumo Sacerdote Hilkías a haci un descubrimentu masha balioso. El a haña e copia original di “e buki di ley di Jehova”! Despues cu Hilkías a confia Safan e secretario cu su hayasgo, Safan a informá e rey kico a pasa. E logronan ei a haci Hosías di 25 aña di edad, orguyoso?—2 Crónicanan 34:3-18.

Ésdras ta skirbi cu “asina cu e rey a tende e palabranan dje ley, mesora el a sker su pañanan.” Esaki tabata un expresion sincero di duele pasobra el a realisá cu su antepasadonan no a cumpli cu tur e mandamentunan di Dios. Esei realmente tabata un señal di humildad! Mesora e rey a comisioná un delegacion di cincu homber pa consultá cu Jehova mediante profetisa Hulda. E delegacion a bolbe bek cu un informe cu de echo tabata bisa: ‘Calamidad lo bini como consecuencia dje desobedencia na Jehova su Ley. Pero pasobra abo, rey Hosías, a humiyá bo mes, lo bo ser derá den bo graf na pas i lo bo no mira calamidad.’ (2 Crónicanan 34:19-28) Jehova tabata contentu cu e actitud di Hosías.

Apesar di nos antecedencia, nos tambe por humiyá nos mes dilanti dje Dios berdadero Jehova, i manifestá un actitud respetuoso p’e i su Palabra, Bijbel. Ta esaki Nicholas, mencioná den e introduccion, a haci. E di: “Maske mi bida tabata yen di problema debí na uso di droga i bebementu di mas, mi tabatin interes den Bijbel i a anhelá pa mi bida tin propósito. Cu tempu mi a haña contacto cu Testigonan di Jehova, mi a cambia mi estilo di bida i a aceptá e berdad.” Sí, nos por mustra respet pa Dios i su Palabra apesar di e ambiente cu nos ta den.

Beneficiá for dje Areglo di Jehova

Hosías tabatin respet profundo pa Jehova su profetanan tambe. No ta cerca profetisa Hulda so el a consultá, ya cu otro profetanan den su tempu tambe tabatin hopi influencia riba dje. Por ehempel, tantu profeta Jeremías como Sofonías tabata ocupá denunciando e idolatria cu tabata ser practicá na Huda. E echo cu Hosías a presta atencion na nan mensahe mester a dun’é hopi vigor pa sigui miéntras e tabata hiba su campaña contra adoracion falsu.—Jeremías 1:1, 2; 3:6-10; Sofonías 1:1-6.

E “doño,” Jesucristo, a nombra e cuerpo di su siguidónan ungí—“e esclabo fiel i discreto”—pa percurá cuminda spiritual n’e debido tempu. (Mateo 24:45-47) Mediante publicacionnan basá riba Bijbel i areglonan di congregacion, e clase di esclabo ta hala atencion n’e beneficionan di haci caso di conseho bíblico i ta ofrecé sugerencianan práctico tocante con pa aplicá nan den nos bida diario. Ta masha apropiado anto pa nos haci uso di Jehova su areglo pa yuda nos vence cualkier actitud insaludabel cu ta profundamente ankrá! For di su infancia, Nicholas tabatin un rabia profundo contra autoridad. Asta ora el a siña e berdad dje Palabra di Dios, e debilidad aki a strob’é di sirbi Jehova mas plenamente. No tabata fácil p’e cambia su actitud. Pero cu tempu, el a logra. Con? Nicholas ta splica: “Cu yudansa di dos anciano comprensivo, mi a reconocé mi problema i a cuminsá aplicá e consehonan bíblico amoroso cu nan a duná mi.” E ta agregá: “Aunke de bes en cuando un tiki rencor ta surgi, awor sí mi a controlá mi genio rebelde.”

Malinda tambe ta busca conseho cerca anciano ora di tuma decision importante den su bida. Ora di trata cu e sintimentunan cu a originá den su infancia, esta sintimentunan di desesperacion i cu e no ta bal nada, e ta haña cu foral e vários artículonan den E Toren di Vigilancia i Spierta! ta masha balioso. E ta bisa: “Tin bes den un artículo tin djis un paragraf of un frase—djis un pida chikitu—cu ta conmové mi. Rond di nuebe aña pasá mi a cuminsá warda e artículonan ei den un map pa mi por haña nan mesora.” Awe, su map ta contené mas o ménos 400 artículo!

No, hende no tin nodi ser víctima permanente di un mal bida di famia. Cu yudansa di Jehova, nan por tin éxito den sentido spiritual. Mescos cu un bon criansa so no ta un garantia pa un persona keda íntegro, un infancia teribel no ta prevení un hende di bira un persona cu ta teme Dios.

Despues cu a descubrí e buki di Ley durante e trabounan di reparacion dje tempel, Hosías ‘a cera un pacto dilanti di Jehova pa sigui Jehova i keda obedec’é cu henter su curason i cu henter su alma.’ (2 Crónicanan 34:31) I te dia cu el a hala su último rosea, e no a desviá for di su determinacion. Mescos tambe, Malinda cu Nicholas ta determiná pa keda leal na Jehova Dios i logra éxito como hende íntegro. Ohalá bo tambe ta determiná pa keda pegá na Dios i sirbié fielmente. Bo por ta sigur di logra éxito, pasobra Jehova ta primintí: “No tene miedu, pasobra mi ta cu bo. No wak rond, pasobra mi ta bo Dios. Lo mi fortificá bo. Di berdad lo mi yuda bo. Di berdad lo mi tene bo firme gará cu mi man drechi di husticia.”—Isaías 41:10, 13.

[Nota]

[Plachinan na página 26]

Maske Hosías tabatin un infancia teribel, el a busca pa conocé Jehova i a haci su bida un éxito

[Plachi na página 28]

Ancianonan por yuda bo vence un rasgo di personalidad cu ta profundamente ankrá

[Plachi na página 28]

“E Toren di Vigilancia” i “Spierta!” por yuda bo mantené integridad