Un les den con pa trata cu problemanan

POCO hende mester a yega di lucha cu tur e problemanan cu Job tabatin cu lucha cuné. Den un espacio corticu di tempu, el a ser aplastá cu e pérdida di su rikesa i medio di sosten, e morto trágico di tur su yunan i finalmente un enfermedad masha doloroso. Bandoná dor di amigu i famia, el a ser instá dor di su esposa pa “plega Dios i muri!”—Job 2:9; 19:13, 14.

Sin embargo, Job, ta un fuente único di animacion pa cualkier hende cu ta experenciando pruebanan similar. E resultado positivo di su prueba ta mustra cu awante confrontando adversidad ta haci Jehova su curason contentu, ora nos ta ser motivá pa berdadero debocion piadoso en bes di interes personal egoista.—Job, capítulo 1, 2; 42:10-17; Proverbio 27:11.

E relato bíblico aki tambe ta contené lesnan balioso den con pa trata cu problemanan. E ta proveé ehempelnan notabel di con un hende cu ta confrontando pruebanan mester—i no mester—ser consehá. Ademas, Job su propio experencia por yuda nos reaccioná den un manera balansá ora nos haña nos mes boftá dor di circunstancianan adverso.

Un Les den Dunamentu di Conseho Negativo

E expresion “consolador di Job” a bira sinónimo di un persona cu, en bes di simpatisá na un tempu di calamidad, ta frega salu den e herida. Pero apesar dje reputacion cu e tres compañeronan di Job merecidamente a gana pa nan mes, nos no mester asumí cu nan motibunan tabata henteramente malu. Te na un cierto grado kisas nan tabata kier a yuda Job, na armonia cu nan punto di bista robes. Pakico nan a faya? Con nan a bira instrumentonan di Satanas, kende tabata determiná pa kibra Job su integridad?

Wel, nan prácticamente a basa tur nan conseho riba un suposicion incorecto: cu sufrimentu ta bini solamente pa esnan cu peca. Den su promé discurso, Elifas a bisa: “Ken cu ta inocente a yega di perecé? I unda esnan recto hamas a ser eliminá? Segun loke mi a mira, esnan cu ta planea loke ta perhudicial i esnan cu ta sembra desgracia, nan mes lo cosech’é.” (Job 4:7, 8) Elifas incorectamente a kere cu esnan inocente ta inmuno na calamidad. El a razoná cu siendo cu Job tabata pasando den asina tantu problema i sufrimentu, lo e mester a peca contra Dios.a Tantu Bildad como Zofar di igual manera a insistí pa Job repentí di su picánan.—Job 8:5, 6; 11:13-15.

Job su tres compañeronan a desanim’é mas aleu expresando ideanan personal en bes di sabiduria piadoso. Elifas a bai asina leu pa bisa cu ‘Dios no tin fe den su sirbidornan’ i cu realmente no a importá Jehova si Job tabata hustu of no. (Job 4:18; 22:2, 3) Ta difícil pa imaginá un comentario mas desanimador—of mas falsu—cu esei! No tabata un sorpresa cu despues Jehova a reprendé Elifas i su compañeronan p’e blasfemia aki. “Boso no a papia tocante mi loke ta verídico,” el a bisa. (Job 42:7) Pero e declaracion mas perhudicial mester a bini ainda.

Finalmente Elifas a bai n’e extremo di haci acusacion abierto. Siendo cu e tabata incapas pa pone Job admití cu e tabata culpabel, el a recurí na inventá picánan cu el a asumí cu Job lo mester a cometé. “Bo mes maldad no ta demasiado caba, i lo no tin fin na bo erornan?” Elifas a puntra. “Pasobra bo ta apoderá di un borg cerca bo rumannan sin causa, i bo ta despohá hende sunú asta di nan pañanan. Bo no ta duna esun cansá un slok di awa, i di esun hambrá bo ta retené pan.” (Job 22:5-7) E acusacionnan aki tabata totalmente infundá. Jehova mes a describí Job como un homber kende tabata “sin culpa i recto.”—Job 1:8.

Con Job a reaccioná n’e atakenan aki riba su integridad personal? Comprendiblemente, nan a haci’é un poco amargá i deprimí pero mas determiná cu nunca pa proba cu e acusacionnan aki tabata falsu. En realidad, el a bira asina absorbá den vindicacion di su mes cu, den un sentido, el a cuminsá culpa Jehova pa su situacion difícil. (Job 6:4; 9:16-18; 16:11, 12) E berdadero cuestionnan enbolbí a ser pasá por haltu, i e diálogo a bira un debate bano tocante si Job tabata, of no tabata, un homber hustu. Ki lesnan cristiannan por siña for dje sesion desastroso aki di dunamentu di conseho?

1. Un cristian amoroso no ta cuminsá na asumí cu un ruman su problemanan ta su mes falta. Crítica severo di erornan di pasado—sea real of imaginá—por desanimá totalmente un persona cu ta luchando pa sigui padilanti. E alma deprimí mester ser ‘consolá’ en bes di ser reprendé. (1 Tesalonicense 5:14) Jehova kier pa superintendentenan ta un “un lugá di sconde for di bientu,” no “consoladornan molestoso” manera Elifas, Bildad i Zofar.—Isaías 32:2; Job 16:2.

2. Nunca nos mester haci un acusacion sin evidencia claro. Rumor of suposicionnan—manera esnan di Elifas—no ta un base sólido pa duna reprendimentu. Por ehempel, si un anciano haci un acusacion falsu, e tin chens di perde credibilidad i causa tension emocional. Con Job a sinti ora e mester a scucha na tal conseho mal dirigí? El a ventilá su angustia cu e sclamacion irónico: “O, di cuantu yudansa bo tabata pa unu sin poder!” (Job 26:2) Un superintendente interesá lo “stret e mannan cu ta cologá,” no haci e problema pió.—Hebreo 12:12.

3. Conseho mester ta basá riba e Palabra di Dios, no riba ideanan personal. E argumentonan dje compañeronan di Job tabata tantu incorecto como destructivo. En bes di hala Job mas cerca Jehova, nan a pon’é pensa cu tabatin un barera ta separ’é for di su Tata celestial. (Job 19:2, 6, 8) Uso ábil di Bijbel, n’e otro banda, por rectificá asuntunan, duna otronan estímulo i ofrecé berdadero consuelo.—Lucas 24:32; Romano 15:4; 2 Timoteo 3:16; 4:2.

Miéntras e buki di Job ta yuda cristiannan identificá cierto trampanan, e ta proveé tambe un les probechoso den con pa duna conseho eficas.

Con pa Duna Conseho

Elihú su conseho tabata completamente diferente for di esun dje tres compañeronan di Job, tantu den contenido como den e manera cu Elihú a trata cu Job. El a usa Job su nomber i a papia cuné como un amigu, no como hues di Job. “Awor, sin embargo, O Job, por fabor tende mi palabranan, i na tur mi papiamentu presta atencion. Mira! Ami ta pa e Dios berdadero net loke abo ta; di klei mi a ser formá, ami tambe.” (Job 33:1, 6) Elihú tabata lihé tambe pa encomendá Job pa su curso recto. “Mi a haña deleite den bo husticia,” el a trankilisá Job. (Job 33:32) Aparte dje manera bondadoso aki di duna conseho, Elihú tabata exitoso pa otro motibunan.

Dor cu el a spera cu pacenshi te ora e otronan a caba di papia, Elihú por a comprendé e cuestionnan mihó promé cu ofrecé conseho. Asumiendo cu Job tabata un homber hustu, Jehova lo a castigu’é? “Sea leu for dje Dios berdadero p’e actua di un manera malbado, i p’e Todopoderoso actua inhustamente!” Elihú a sclama. “Lo e no apartá su wowonan di ningun hende hustu.”—Job 34:10; 36:7.

E husticia di Job realmente tabata e cuestion principal? Elihú a hala Job su atencion na un punto di bista desbalansá. “Bo a bisa, ‘Mi husticia ta mas cu esun di Dios,’ ” el a splica. “Hisa bo cara na cielu i mira, i contemplá e nubianan, cu nan en berdad ta mas haltu cu bo.” (Job 35:2, 5) Mescos cu e nubianan ta hopi mas haltu cu nos, asina Jehova su camindanan ta mas haltu cu nos camindanan. Nos no ta den un posicion pa husga e manera cu Dios ta haci cosnan. “P’esei laga hende tem’é. E no ta considerá ningun di esnan cu ta sabí den nan mes curason,” Elihú a concluí.—Job 37:24; Isaías 55:9.

Elihú su conseho sano a prepará e caminda pa Job ricibí instruccion adicional for di Jehova mes. En realidad, tin un paralelo notabel entre Elihú su repaso di “e obranan maraviyoso di Dios,” den capítulo 37, i Jehova su propio palabranan na Job, registrá den capítulonan 38 pa 41. Evidentemente, Elihú a mira asuntunan for dje punto di bista di Jehova. (Job 37:14) Con cristiannan por imitá Elihú su ehempel excelente?

Mescos cu Elihú, particularmente superintendentenan kier ta empático i bondadoso, cordando cu nan tambe ta imperfecto. Lo ta bon pa nan scucha cuidadosamente pa haña sa e detayenan i comprendé e cuestionnan promé cu nan duna conseho. (Proverbio 18:13) Ademas, usando e Bijbel i publicacionnan bíblico, nan por haci sigur cu Jehova su punto di bista ta prevalecé.—Romano 3:4.

Aparte di proveé e lesnan práctico aki pa ancianonan, e buki di Job ta siña nos con pa enfrentá problemanan den un manera balansá.

Con pa No Reaccioná na Circunstancianan Adverso

Aplastá dor di su sufrimentu i frustrá dor di su consoladornan falsu, Job a bira amargá i deprimí. “Laga e dia riba cua mi a yega di nace perecé . . . Mi alma ciertamente ta sinti asco pa cu mi bida,” el a suspirá. (Job 3:3; 10:1) Inconciente di cu Satanas tabata e culpabel, el a asumí cu Dios tabata causando su calamidadnan. A parce asina inhustu cu e—un homber hustu—mester sufri. (Job 23:10, 11; 27:2; 30:20, 21) E actitud aki a ciega Job pa otro consideracionnan i a hib’é na criticá Dios su trato cu humanidad. Jehova a puntra: “Lo bo invalidá mi husticia? Lo bo pronunciá mi malbado pa bo haña rason.”—Job 40:8.

Tal bes nos reaccion inmediato ora nos haña nos confrontá cu contratempu ta pa sinti cu nos ta víctima, manera Job aparentemente a sinti. E reaccion comun ta pa puntra, ‘Pakico ami? Pakico otronan—cu ta hopi mas malu cu mi—mester disfrutá di un bida relativamente liber di problema?’ Esakinan ta pensamentunan negativo cu nos por contrarestá dor di meditá riba e Palabra di Dios.

Contrario cu Job, nos ta den un posicion pa comprendé e cuestionnan mas importante cu ta enbolbí. Nos sa cu Satanas “ta cana rond manera un leon cu ta gruña, buscando un hende pa devorá.” (1 Pedro 5:8) Manera e buki di Job ta revelá, e Diabel lo gosa pa kibra nos integridad dor di ocasioná problema pa nos. E ta determiná pa proba su pretension cu nos ta Testigonan di Jehova den bon tempu so. (Job 1:9-11; 2:3-5) Nos lo tin e curashi pa apoyá e soberania di Jehova i proba asina cu e Diabel ta un gañador?

E ehempel di Jesus, i cantidad incontabel di otro fiel sirbidor di Jehova, ta mustra cu un of otro forma di sufrimentu ta casi inevitabel den e sistema di cosnan aki. Jesus a bisa cu su disipelnan mester ta dispuesto pa ‘tuma nan staca di tormento’ si nan ta deseá di sigui’é. (Lucas 9:23) Nos “staca di tormento” personal lo por ta un of mas dje contratempunan cu Job a wanta—mal salú, morto di sernan stimá, depresion, dificultad económico of oposicion for di incrédulonan. Sea cual sea e tipo di problema cu nos por ta enfrentando, tin un aspecto positivo dje situacion. Nos por mira nos circunstancia como un oportunidad pa demostrá nos awante i lealtad inkebrantabel na Jehova.—Santiago 1:2, 3.

Esei ta e manera cu Jesus su apostelnan a reaccioná. Djis despues di Pentecoste nan a ser sutá dor cu nan a predicá tocante Jesus. En bes di keda desanimá, nan a sigui nan caminda “alegrando.” Nan tabata gososo, no pa motibu dje sufrimentu mes, sino pa motibu cu “nan a ser contá digno pa ser desonrá pa causa di [Cristo] su nomber.”—Echo 5:40, 41.

Naturalmente, no ta tur nos dificultadnan ta bini riba nos como resultado di sirbi Jehova. Nos problemanan por ta causá pa nos mes—por lo ménos te na un cierto grado. Of tal bes, no dor di nos mes falta, e problema a afectá nos balansa spiritual. Sea cual sea e caso, un actitud humilde manera esun di Job lo permití nos dicerní unda nos a cometé eror. Job a admití na Jehova: “Mi a papia, pero mi no tabata comprendé.” (Job 42:3) Esun cu ta reconocé su erornan den e manera aki tin hopi mas chens di evitá dificultadnan similar den futuro. Manera e proverbio ta bisa, “huicioso ta esun cu a mira e calamidad i ta procedé na sconde su mes.”—Proverbio 22:3.

Mas importante, e buki di Job ta recordá nos cu nos problemanan lo no dura pa semper. Bijbel ta bisa: “Nos ta pronunciá felis esnan cu a wanta. Boso a tende dje awante di Job i a mira e resultado cu Jehova a duna, cu Jehova ta masha tierno den cariño i misericordioso.” (Santiago 5:11) Nos por ta sigur cu Jehova di igual manera lo recompensá e fieldad di su sirbidornan awe.

Nos tambe ta anticipá e tempu ora tur clase di problema—“e cosnan anterior”—a pasa. (Revelacion 21:4) Te ora e dia ei amanecé, e buki di Job ta sirbi como un guia sumamente balioso cu por yuda nos trata problemanan cu sabiduria i fortalesa.

[Notanan]

[Plachi na página 28]

“Contemplá e nubianan, cu nan en berdad ta mas haltu cu bo.” Asina Elihú a yuda Job comprendé cu e camindanan di Dios ta mas haltu cu esnan di hende