Job A Wanta​—⁠nos Tambe Por!

“Mira! Nos ta pronunciá felis esnan cu a wanta.”​—⁠SANTIAGO 5:⁠11.

‘DIABEL ta mi tras! Mi ta sintí mi mescos cu Job!’ Cu e palabranan ei A. H. Macmillan a expresá su sintimentunan na un amigu íntimo n’e sede di Testigonan di Jehova. Ruman Macmillan a terminá su curso terenal n’e edad di 89 aña dia 26 di augustus, 1966. E tabata sa cu mérito p’e sirbishi fiel di cristiannan ungí manera e, lo a “bai huntu cu nan.” (Revelacion 14:13) En berdad, nan lo sigui sin interupcion den Jehova su sirbishi mediante un resureccion pa bida inmortal den cielu. Ruman Macmillan su amigunan a alegrá cu el a obtené e recompensa ei. Sin embargo, den su último añanan debilitante riba tera, el a ser afligí dor di vários prueba, incluyendo problemanan di salú cu a haci’é masha conciente di Satanas su intentonan pa kibra su integridad na Dios.

² Ora ruman Macmillan a bisa cu el a sinti su mes mescos cu Job, e tabata refiriendo na un homber cu a wanta pruebanan grandi di fe. Job a biba den “e tera di Uz,” probablemente den parti nort di Arabia. Como desendiente di Sem, yu di Noe, e tabata un adorador di Jehova. E pruebanan di Job aparentemente a tuma lugá rond dje tempu entre e morto di Josef i e tempu ora Moises a demostrá di ta un homber recto. Durante e periodo ei ningun hende riba tera tabata igual cu Job den debocion piadoso. Jehova a considerá Job como un homber sin culpa, recto i temeroso di Dios.​—⁠Job 1:​1, 8.

³ Como “esun di mas grandi di tur e orientalnan,” Job tabatin hopi criá, i su crio di bestia a yega un cantidad di 11.500. Pero rikesanan spiritual tabata di mayor importancia p’e. Mescos cu tatanan piadoso awe, Job muy probablemente a siña su siete yu hombernan i su tres yu muhernan tocante Jehova. Asta despues cu nan no a biba mas den su cas, el a funcioná como sacerdote di famia ofreciendo sacrificio pa nan, por si acaso nan a peca.​—⁠Job 1:​2-5.

⁴ Job ta un persona pa cristiannan persiguí considerá pa nan por fortalecé nan mes pa awante cu pacenshi. “Mira!” disipel Santiago a skirbi. “Nos ta pronunciá felis esnan cu a wanta. Boso a tende dje awante di Job i a mira e resultado cu Jehova a duna, cu Jehova ta masha tierno den cariño i misericordioso.” (Santiago 5:11) Mescos cu Job, Jesus su siguidornan ungí i e “multitud grandi” djawe mester di awante pa enfrentá pruebanan di fe. (Revelacion 7:​1-9) Pues, ki pruebanan Job a wanta? Pakico nan a sosodé? I con nos por beneficiá for di su experencianan?

Un Cuestion Fundamental

⁵ Sin cu Job tabata sa, un gran cuestion tabata cerca di ser presentá den cielu. Riba un dia “e yunan dje Dios berdadero a drenta pa tuma nan posicion dilanti Jehova.” (Job 1:⁠6) Dios su Yu unigénito, e Palabra, tabata presente. (Juan 1:​1-3) E angelnan hustu i e ‘yunan angelical desobediente di Dios’ tambe tabata presente. (Génesis 6:​1-3) Satanas tabatei, pasobra su expulsion for di cielu no a tuma lugá sino te despues di establecimentu dje Reino na 1914. (Revelacion 12:​1-12) Den tempu di Job, Satanas lo a lanta un cuestion fundamental. E tabata na punto di expresá duda tocante e derecho di Jehova su soberania riba tur Su criaturanan.

⁶ “Di unda bo ta bini?” Jehova a puntra. Satanas a contestá: “Di dualu riba tera i di cana rond riba dje.” (Job 1:⁠7) E tabata buscando un hende pa devorá. (1 Pedro 5:​8, 9) Dor di kibra e integridad di personanan cu ta sirbi Jehova, Satanas lo a trata na proba cu ningun hende lo obedecé Dios completamente motivá pa amor. Tratando cu e cuestion, Jehova a puntra Satanas: “Bo a fiha bo curason riba mi sirbidor Job, cu no tin ningun manera e riba tera, un homber sin culpa i recto, temeroso di Dios i apartando di loke ta malu?” (Job 1:⁠8) Job a biba segun normanan divino cu a tuma su imperfeccionnan na cuenta. (Salmo 103:​10-14) Pero Satanas a contestá: “Ta por nada Job a teme Dios? Bo mes no a pone un trankera rond di dje i rond di su cas i rond di tur loke e tin na tur banda? Bo a bendicioná e trabou di su man, i su crio di bestia mes a plama riba tera.” (Job 1:​9, 10) Asina e Diabel a calumniá Jehova insinuando cu ningun hende ta stim’é i ador’é pa loke E ta sino cu E ta cumpra criaturanan pa sirbi’é. Satanas a pretendé cu Job a sirbi Dios pa probecho egoista, no motivá pa amor.

Satanas Ta Atacá!

⁷ “Pero,” Satanas a bisa, “pa un cambio, saca bo man, por fabor, i mishi cu tur loke e tin i mira si lo e no maldicioná bo den bo cara mes.” Con Dios lo a reaccioná riba un desafio insultante asina? “Mira!” Jehova a bisa. “Tur loke e tin ta den bo man. Solamente contra e mes no saca bo man!” E Diabel a bisa cu tur loke Job a poseé tabata bendicioná, aumentá i protehá. Dios lo a permití Job sufri, aunke Satanas no por a mishi cu su curpa. Determiná pa haci malu, Satanas a bandoná e asamblea.​—⁠Job 1:​11, 12.

⁸ Pronto, e atake satánico a cuminsá. Un di Job su criánan a dun’é e mal noticia aki: “E bacanan mes tabata ploeg i e buricunan hembra tabata come yerba banda di nan ora e sabeonan a bini i haci un invasion i a coge nan, i nan a deribá e sirbientenan cu fila di spada.” (Job 1:​13-15) E proteccion a ser kitá for di rond di Job su propiedad. Casi mesora, poder demoniaco directo a ser aplicá, pasobra un otro criá a informá: “E candela di Dios mes a cai for di cielu i a kima entre e carnénan i e sirbientenan i a come nan.” (Job 1:16) Ki diabólico tabata pa laga parce cu Dios tabata responsabel pa tal calamidad asta riba su mes sirbidor! Siendo cu weerlicht ta bin for di cielu, Jehova por a ser culpá fácilmente, pero en realidad e candela tabata di un fuente demoniaco.

⁹ Segun cu Satanas a continuá e atake, un otro criá a informá cu e caldeonan a coge Job su camelnan i a mata tur e otro sirbientenan. (Job 1:17) Aunke Job a experenciá asina ruina económico, esaki no a destruí su relacion cu Dios. Abo lo por wanta gran pérdida material sin kibra bo integridad na Jehova?

Tragedia Mas Grandi Ta Dal Aden

¹⁰ E Diabel no a caba cu su atake riba Job. Un otro criá mas a informá: “Bo yu hombernan i bo yu muhernan tabata come i bebe biña den e cas di nan ruman e primogénito. I, mira! a bini un gran bientu for dje region dje desierto, i el a golpia e cuater skinanan dje cas, di manera cu el a cai riba e hóbennan i nan a muri. I ami a scapa, ami so, pa contá bo.” (Job 1:​18, 19) Un persona mal informá lo bisa cu e desaster causá p’e bientu ei tabata ‘un obra di Dios.’ Sin embargo, poder di demoño a atacá Job unda su sintimentunan tabata specialmente vulnerabel.

¹¹ Dolorosamente afligí, Job ‘a sker su mantel sin manga, a corta e cabei riba su cabes, a cai na tera i a sak abou.’ Sin embargo, scucha su palabranan. “Jehova mes a duna, i Jehova mes a kita. Laga e nomber di Jehova sigui ser bendicioná.” E relato ta agregá: “Den tur esaki Job no a peca, ni atribuí nada inapropiado na Dios.” (Job 1:​20-22) Satanas a ser derotá un biaha mas. Kico si nos mester sufri pérdida di sernan kerí i tristesa como sirbidornan di Dios? Debocion inegoista na Jehova i confiansa den dje por permití nos wanta como wardadornan di integridad, net manera Job a haci. Esnan ungí i nan compañénan cu tin un speransa terenal siguramente por saca consuelo i fortalesa for dje relato aki di Job su awante.

E Cuestion Ta Bira Mas Intenso

¹² Pronto Jehova a convocá un otro asamblea den e corte celestial. Job a perde tur su yunan i el a bira un homber pober, aparentemente afligí dor di Dios, pero su integridad tabata intacto. Naturalmente, Satanas lo no a admití cu su acusacionnan contra Dios i contra Job tabata falsu. Awor e ‘yunan di Dios’ tabata na punto di tende e argumento i contra-argumentonan segun cu Jehova a maniobrá e Diabel pa asina trece e cuestion na un punto decisivo.

¹³ Pidiendo cuenta di Satanas, Jehova a puntra: “Ta di unda bo ta bini?” Kico tabata e contesta? “Di dualu riba tera i di cana rond riba dje.” Atrobe Jehova a hala atencion na su sirbidor Job, sin culpa, recto i temeroso di Dios, kende ainda tabata wardando su integridad firmemente. E Diabel a contestá: “Cueru pa interes di cueru, i tur loke un hende tin lo e duna pa interes di su alma. Pa un cambio, saca bo man, por fabor, i mishi te na su wesu i su carni i mira si e no ta maldicioná bo den bo cara mes.” P’esei Dios a bisa: “Até ei den bo man! Solamente tene cuidou pa su alma mes!” (Job 2:​2-6) Indicando cu ainda Jehova no a kita tur barera di proteccion, Satanas a pidi pa heridá Job su wesu i carni. E Diabel lo no a ser permití pa mata Job; pero Satanas tabata sa cu malesa físico lo a caus’é dolor i lo a laga parce cu e tabata sufriendo castigu for di Dios pa picánan secreto.

¹⁴ Ora Satanas a sali for dje asamblea ei, el a pasa pa cumpli cu un deleite perverso. El a heridá Job cu “un blufein maligno for di su plant’i pia te n’e corona di su cabes.” Ki un miseria Job a wanta segun cu el a sinta den shinishi i a raspa su mes cu un pida di un pochi di klei! (Job 2:​7, 8) Ningun dokter humano lo por a alivi’é dje afliccion teriblemente doloroso, repugnante i humiyante aki, pasobra el a ser causá dor di poder satánico. Solamente Jehova lo por a cura Job. Si bo ta un sirbidor di Dios cu ta sufriendo di enfermedad, nunca lubidá cu Dios por yudá bo wanta i por duná bo bida den un mundu nobo liber di enfermedad.​—⁠Salmo 41:​1-3; Isaías 33:⁠24.

¹⁵ Finalmente, e esposa di Job a bisa: “Ainda bo ta wardando bo integridad firmemente? Plega Dios i muri!” “Integridad” ta indicá debocion sin culpa, i kisas e esposa a papia sarcásticamente pa pone Job plega Dios. Pero Job a contestá: “Manera un dje muhernan insensato ta papia, bo tambe ta papia. Nos lo aceptá solamente loke ta bon for dje Dios berdadero i no aceptá tambe loke ta malu?” Ni e triki aki di Satanas no tabatin e efecto deseá, pasobra e relato ta bisa nos: “Den tur esaki Job no a peca cu su lipnan.” (Job 2:​9, 10) Suponé cu miembronan di famia opositor bisa nos cu nos ta cansando nos mes soketamente den empeñonan cristian i ta insta nos pa bandoná Jehova Dios. Mescos cu Job, nos por wanta un prueba asina pasobra nos ta stima Jehova i ta deseá na alabá su nomber santu.​—⁠Salmo 145:​1, 2; Hebreo 13:⁠15.

Tres Fingidor Hipócrita Arogante

¹⁶ Den loke a resultá di ta un otro plan satánico, tres “compañé” a bini, supuestamente pa consolá Job. Un di nan tabata Elifas, probablemente un desendiente di Abraham mediante Esau. Siendo cu Elifas tabatin e prioridad pa papia, probablemente e tabata esun di mas edad. Presente tambe tabata Bildad, un desendiente di Sua, kende tabata un dje yu hombernan cu Abraham a haña cu Ketura. E di tres homber tabata Zofar, yamá un naamatita pa identificá su famia of lugá di biba, talbes den parti nortwest di Arabia. (Job 2:11; Génesis 25:​1, 2; 36:​4, 11) Mescos cu esnan cu ta purba di pone Testigonan di Jehova bandoná Dios awe, e trio aki a ser manipulá dor di Satanas den un esfuerso pa pone Job admití culpabilidad riba acusacionnan falsu i kibra su integridad.

¹⁷ E trio a haci un gran despliegue di compasion dor di yora, sker nan pañanan i tira stof riba nan cabes. Pero despues nan a sinta cu Job siete dia i siete anochi largu sin expresá ni un solo palabra di consuelo! (Job 2:​12, 13; Lucas 18:​10-14) E tres fingidornan arogante aki tabata asina bashí di spiritualidad cu nan no tabatin nada di consuelo pa bisa tocante Jehova i su promesanan. Sin embargo, sí nan tabata saca conclusionnan robes i tabata cla pa usa nan contra Job tan pronto cu nan a cumpli cu e formalidad di tristesa público. Interesantemente, promé cu e siete dianan di silencio a terminá, e hóben Elihú a tuma un asiento caminda e por a tende e combersacionnan.

¹⁸ Finalmente Job a kibra e silencio. Siendo cu e no a saca ningun consuelo for dje trio bishitante, el a maldicioná e dia di su nacimentu i a puntra su mes pakico su bida miserabel tabata ser prolongá. El a busca pas den morto, ni sikiera imaginando cu hamas lo e por tin berdadero goso atrobe promé cu el a muri, awor cu e tabata desampará, perdí di su yunan i gravemente malu. Pero Dios lo no a permití pa Job ser heridá te na morto.​—⁠Job 3:​1-26.

E Acusadornan di Job Ta Atacá

¹⁹ Elifas a papia promé den cada un dje tres tandanan di debate cu a pone e integridad di Job mas aleu na prueba. Den su promé discurso, Elifas a puntra: “Unda esnan recto hamas a ser eliminá?” El a concluí cu Job mester a haci algu malu pa ricibí castigu di Dios. (Job, capítulo 4, 5) Den su segundo discurso, Elifas a ridiculisá Job su sabiduria i a puntra: “Kico abo realmente sa cu nos no sa?” Elifas a insinuá cu Job tabata purba haci su mes parce superior cu e Todopoderoso. Finalisando su segundo atake, el a describí Job como culpabel di apostasia, soborno i engaño. (Job, capítulo 15) Den su discurso final, Elifas a acusá Job falsamente di hopi crímen​—⁠extorsion, reteniendo pan i awa for di esnan den necesidad, i oprimiendo biuda i huérfanonan.​—⁠Job, capítulo 22.

²⁰ Tumando e segundo turno den cada un dje tres tandanan di debate, Bildad por lo general a sigui e tema general cu Elifas a establecé. Bildad su discursonan tabata mas corticu pero mas skerpi. El a asta acusá Job su yunan di a haci malu i asina merecé morto. Cu razonamentu eróneo, el a usa e ilustracion aki: Mescos cu papiro i caña ta seca i ta muri sin awa, asina ta cu “tur esnan cu ta lubidá Dios.” E declaracion ei ta cierto, pero e no a aplicá na Job. (Job, capítulo 8) Bildad a clasificá Job su afliccionnan como esnan cu ta bini riba e malbadonan. (Job, capítulo 18) Den su di tres discurso corticu, Bildad a argumentá cu hende ta “un wangui” i “un bichi” i p’esei ta impuru dilanti Dios.​—⁠Job, capítulo 25.

²¹ Zofar tabata e di tres pa papia den e debate. En general, su liña di pensamentu tabata parecido na esun di Elifas i Bildad. Zofar a acusá Job di maldad i a inst’é p’e deshací di su prácticanan pecaminoso. (Job, capítulo 11, 20) Despues di dos tanda Zofar a stop di papia. E no tabatin nada di agregá den e di tres tanda. Sin embargo, durante henter e debate, cu curashi Job a contestá su acusadornan. Por ehempel, na un dado momento el a bisa: “Boso tur ta consoladornan molestoso! Tin un fin na palabranan yen di bientu?”​—⁠Job 16:​2, 3.

Nos Por Wanta

²² Mescos cu Job, nos por enfrentá mas cu un prueba pareu, i Satanas por usa desanimacion of otro factornan den su esfuersonan pa kibra nos integridad. E por purba pone nos bai contra Jehova si nos tin dificultad económico. Si un ser kerí muri of nos experenciá kebranto di salú, Satanas por purba inducí nos pa culpa Dios. Mescos cu e compañénan di Job, un persona por asta acusá nos falsamente. Manera ruman Macmillan a indicá, Satanas por ta ‘nos tras,’ pero nos por wanta.

²³ Manera nos a observá te asina leu, Job tabata wantando su vários pruebanan. Sin embargo, ta apénas e tabata wanta? En realidad, e tabatin un spiritu abatí? Laga nos mira si Job realmente a perde tur speransa.

[Study Questions]

1. Kico un cristian di edad avansá a bisa tocante su pruebanan?

2, 3. Ken Job tabata?

4. (a) Pakico cristiannan persiguí mester considerá e homber Job? (b) En cuanto Job, cua preguntanan nos lo considerá?

5. Sin cu Job tabata sa, kico tabata tumando lugá den cielu?

6. Kico Satanas tabata purba haci, i con el a calumniá Jehova?

7. Den ki manera e Diabel a desafiá Dios, i con Jehova a respondé?

8. (a) Ki pérdida material Job a experenciá? (b) Kico tabata e berdad tocante “e candela di Dios mes”?

9. Con ruina económico a afectá Job su relacion cu Dios?

10, 11. (a) Kico a sosodé cu Job su dies yunan? (b) Despues dje morto trágico di Job su yunan, con el a considerá Jehova?

12, 13. Na un otro asamblea den cielu, kico Satanas a pidi, i con Dios a respondé?

14. Cu kico Satanas a heridá Job, i pakico ningun hende por a aliviá esun cu tabata sufri?

15. Kico e esposa di Job a inst’é p’e haci, i kico tabata Job su reaccion?

16. Ken a bini, supuestamente pa consolá Job, pero con Satanas a manipulá nan?

17. Kico e trio bishitante a haci, i kico nan no a haci pa siete dia i siete anochi largu?

18. Pakico Job a busca pas den morto?

19. Riba kico Elifas a acusá Job falsamente?

20. Kico tabata e caracter di Bildad su atakenan riba Job?

21. Di kico Zofar a acusá Job?

22, 23. (a) Mescos cu den e caso di Job, con e Diabel por purba kibra nos integridad na Jehova Dios? (b) Aunke Job a wanta vários prueba, kico nos por puntra tocante su actitud?

[Caption on page 10]

A. H. Macmillan

[Caption on page 14]

Con Lo Bo Respondé?

◻ Cua gran cuestion Satanas a lanta den tempu di Job?

◻ Den ki manera Job a ser probá te n’e límite?

◻ Di kico Job su tres “compañénan” a acus’é?

◻ Mescos cu den e caso di Job, con Satanas por purba kibra nos integridad na Jehova?