Tuma Refugio Den Jehova
“Mi a tuma refugio den bo, O Jehova.”—SALMO 31:1.
UN BOZ melodioso ta canta di un homber cu, aunque e ta gastá den mente i curpa, ta tira su mes riba Jehova. Fe ta triunfá, segun letra dje cantica sagrado. E homber a haya amparo for di persigidor tras di dje, den e braza dje Haltísimo cu a speré. Segun e salmo: “Mi a tuma refugio den bo, O Jehova. O, no lagámi ser bergonzá nunca. Percura escape pa mi den bo husticia.”—Salmo 31:1.
2 E salmista tin un solo refugio—lo mihor! Otro cos por keda na duda, pero e solo echo ta permanece: Jehova Dios ta su fortaleza, su plaza fuerte. Su confianza ta para riba dos pilar sigur. Uno, su fe, cu Jehova lo no bergonzá, i di dos, e husticia di Jehova, cu kier men cu lo E nunca bandona permanentemente fiel sirbidor di dje. Jehova no ta un Dios cu ta bergonza fiel sirbidor di dje; e no ta kibra su promesa. Mas bien, e ta un Dios dje berdad i recompensador di esnan cu encarecidamente ta pone confianza den dje. Al fin i al cabo, fe lo ser recompensá! Escape lo bini!—Salmo 31:5, 6.
3 E salmista a haya fortaleza interno componiendo su música serio cu melodía cu a expresa e profundidad di pesadumbre i miseria te na expresion sublime di confianza. El a engrandece Jehova pa su amor leal. El a canta: “Bendito sea Jehova, pasobra el a rindi na mi bondad amoroso den un stad bao di tension.”—Salmo 31:21.
Un coro fuerte di proclamador di Reino
4 Awe, e palabra dje salmo a bolbe na bida di nobo. Ni opositor malbado, ni desaster natural, ni ningun calamidad económico por sofoca cantica di alabanza pa Jehova; realmente, e bondad amoroso di Jehova a bira maraviyoso pa su pueblo. Rond di mundo durante e último aña di sirbishi, un coro tremendo, culminando den 4.709.889 hende den 231 tera, a canta e mensahe dje Reino di Dios. E gobierno celestial di Jehova Dios mediante Cristo Jesús ta un refugio cu lo no desilusionánan. Aña pasá, tal proclamador di Reino di 73.070 congregacion a dedica 1.057.341.972 ora ne trabao di evangeliza. Esei a resulta den 296.004 hende simbolizando nan dedicacion na Dios den bautismo bao di awa. I ki un sorpresa maraviyoso tur hende a goza ora nan a asisti ne Asamblea Internacional Siñanza Divino celebrá den Kiev, Ucrania, den Augustus di 1993. Nan a mira un acontecimiento histórico presenciando e bautismo tremendísimo di cristian berdadero, mas grandi cu nunca! Manera Isaías 54:2, 3 a profetiza, e pueblo di Dios ta aumenta na cantidad sin igual.
5 Sin embargo, mas ciudadano boluntario dje Reino di Dios ta spera nan turno pa participa den e coro. Aña pasá, un total asombroso di 11.865.765 hende a asisti ne Conmemoracion dje morto di Jesús. Esperanzadamente, hopi di eseinan lo cumpli cu requisito pa canta cantica di alabanza di cas pa cas durante e aña di sirbishi aki. Ki rabiá enemigo dje berdad, Satanás e Diabel, mester keda cu tal prospecto!—Revelacion 12:12, 17.
6 Satanás lo purba di stroba otro hende di uni nan boz cu e coro tremendo. Por ehempel, publicador den Tailandia ta contra cu un cantidad aumentante di hende bao di atake di demoño. Sin embargo, hopi hende sincero a ser libertá cu e yudanza di Jehova. Despues di a bishitá un hacidor di bruha pa curiosidad, un homber a keda bao di poder di demoño pa diez aña. El a haci esfuerzo pa sali liber for di nan poder cu e yudanza di pastor, pero no a experimenta ningun berdadero progreso. Un predicador di tempo completo di Testigo di Jehova a cuminza un estudio bíblico cu e homber i a siñé for di Bijbel e único manera pa sali liber for di poder di demoño—gana conocimento exacto dje berdad, pone fe den Jehova Dios, i supliqué den oracion.—1 Corintio 2:5; Efesio 4:6, 7; 1 Timoteo 2:3, 4.
7 Anochi despues dje conbersacion, e homber tabatin un soño den locual su difunto tata, a amenazé si e no bolbe ser un medium spiritista. Su famía a cuminza sufri. Indispuesto pa esei influencié, e homber a sigi les di Bijbel i a cuminza asisti na reunion. Durante un estudio bíblico, e pionero a splica cu aveces obheto usá den ceremonia spiritista por laga porta habrí pa demoño molestiá hende cu ta purba di líbranan di poder di demoño. E homber a corda cu e tabatin algun azeta cu el a usa como contra. Awor el a comprende cu e mester tiré afó. Desde cu el a tiré afó spiritu malu no a molestié mas. (Compara cu Efesio 6:13; Santiago 4:7, 8.) E i su esposa ta haci bon progreso den nan estudio i ta asisti regularmente na reunion pa haya instruccion bíblico.
8 Otro obstáculo por sofoca e proclamacion dje bon nobo. Debí na un situacion económico mashá opresivo den Ghana, trahador a perde nan trabao. E costo di bida a subi lihé, locual ta causa un berdadero problema pa obtene e mínimo necesidad di bida. Con e pueblo di Jehova Dios ta enfrenta esei? Door di confia, no den nan mes, sino den Jehova Dios. Por ehempel, un dia un homber a laga un sobre seyá ne lesenar di recepcion dje sucursal. Den e sobre tabatin US$200, of e salario mínimo di tres luna. E sobre a bini di un dunador anónimo di regalo, pero lo sigiente tabata skirbí riba e sobre: “Mi a perde mi trabao, pero Jehova a percura un otro pa mi. Mi ta keda agradicido na Dje i na su Yiu, Cristo Jesús. Pa yuda cu e plamamento dje bon nobo dje Reino promé cu e fin ta yega, mi ta inclui un contribucion humilde.”—Compara cu 2 Corintio 9:11.
9 Asistencia na reunion ta yuda entrená esnan cu ta participa den e coro tremendo di alabanza pa Jehova. (Compara cu Salmo 22:22.) Pues, den e parti di sur di Honduras, tin un congregacion yamá El Jordán. Kico ta tanto special tocante e grupo chikito? Nan asistencia fiel na reunion. Dje 19 publicador, 12 tin cu cruza un rio hanchu pa nan asisti na reunion tur siman. Esei no ta un problema grandi durante berano, pasobra nan por cruza e rio camnando riba piedra. Pero, durante e tempo di awa, e situacion ta cambia. Loke den berano tabata un rio secu sin peliger ta bira un diluvio cu ta hiba tur cos den su camina. Pa vence e obstáculo, e rumanan tin cu ser bon landador. Promé cu nan ta cruza, nan ta pone nan paña di reunion den un tina (tobo di metal) anto ta tapé cu un sacu di plástic. E landador di mas fuerte ta usa e tina como un flota i ta guia e grupo pe otro banda. Sano i salbo ne otro banda, nan ta seca nan curpa, ta bisti nan paña, i ta yega Salón di Reino alegre i briyantemente limpi!—Salmo 40:9.
Un fortaleza unda nos por biba
10 Sea cu bo ta bao di atake directo di demoño of ta sinti presion di otro fuente, Jehova Dios por ta bo fortaleza. Inboqué den oracion. E ta scucha atentamente ne lamentacion di mas suave di su pueblo. E salmista a descubri cu esei ta berdad i a skirbi: “Inclina bo orea na mi. Librámi rápidamente. Bira pa mi un fortaleza di piedra, un cas di fortaleza pa salbámi. Pasobra bo ta mi barranca i mi fortaleza; i pa causa di bo nomber lo bo guiámi i conducími. Lo bo sacámi for di reda cu nan a sconde pa mi, pasobra bo ta mi fortaleza.”—Salmo 31:2-4.
11 Jehova Dios no ta percura un refugio temporario so sino un fortaleza inasaltable unda nos por biba den siguridad. Su liderazo i guía no ta bandona su pueblo. Poder divino lo laga inútil tur echo mañoso di Satanás i su compínchinan. (Efesio 6:10, 11) Mientras cu nos ta confia den Jehova cu tur nos curazón, lo e sácanos for di laz di Satanás. (2 Pedro 2:9) Durante e cuater aña cu a pasa, e trabao di predica di Testigo di Jehova a cuminsa di nobo den mas cu 35 pais. També, den region di mundo unda estado social, económico, of político ta stroba e predicacion dje bon nobo, algun hende semehante di carné a bai biba unda nos por alcanzánan mas libremente. Hapón ta un lugar unda nan a bai biba.
12 Tin un imigracion na Hapón di trahador di stranhería, i hopi congregacion na idioma di stranhería a ser establecí. Experencia di un ruman den un congregacion haponés ta ilustra ki productivo ta e campo di idioma di stranhería. E ruman a deseá di bai sirbi unda cu tin mas necesidad. Pero, e tabata dirigi diez estudio bíblico caba unda e tabata. Un amigo di dje a bisa den chanza: “Si bo ta bai unda cu tin mas necesidad, bo tin cu conduci 20 estudio bíblico ayá!” El a recibi un asignacion i a bai na Hiroshima. Pero, despues di cuater luna, e tabatin un estudio bíblico so. Un dia el a bishitá un homber di Brasil cu a papia portugués so. Siendo cu e ruman no por a comunica cu e homber, el a cumpra un buki pa siña portugués. Despues di a siña algun expresion senciyo di conbersacion, el a bishitá e homber atrobé. Ora e ruman a saluda e doño di cas na idioma portugués, e doño di cas a keda asombrá i, cu un sonrisa grandi a habri e porta hanchu i a invité padén. El a cuminza un estudio bíblico. Pronto e ruman tabata conduci un total di 22 estudio, 14 na portugués, 6 na spañol, i 2 na haponés!
Predicando cu confianza
13 E pueblo di Jehova cu confianza ta canta e cantica di alabanza cu plena fe di cu Jehova Dios ta nan refugio. (Salmo 31:14) Nan no ta tene bergüenza—Jehova lo no humiyánan, pasobra lo e cumpli cu su palabra. (Salmo 31:17) E Diabel i su ehército di demoño lo tene bergüenza. Siendo cu e pueblo di Jehova tin e comision di predica un mensahe cu ta liber di bergüenza, otro hende no ta bergonzánan pa hácinan predicá. Jehova Dios no ta instiga su pueblo pa adoré dje manera ei, ni su Yiu no ta haci esei. Ora e curazón di hende ta yen di fe i aprecio pe bondad i amor bondadoso di Jehova Dios, e bon estado di nan curazón ta loke ta impulsa nan boca pa papia. (Lucas 6:45) P’sei, ora nos ta dedica tempo ne sirbishi tur luna, specialmente si tal tempo ta lo mihor cu nos por haci, esei ta bon i no ta bergonzoso. Jesús i su Tata no a aprecia plenamente e contribucion chikito dje biuda?—Lucas 21:1-4.
14 Pa un cantidad aumentante di publicador, trahando cu tur nan alma den nan adoracion ta inclui trahando como pionero—un máximo di 890.231 aña pasá! Si pionero por mantené e progreso di antes e total probablemente lo pasa 1.000.000. E sigiente experencia ta mustra con un ruman muher den Nigeria a drenta den e sirbishi di pionero. El a skirbi: “Ora mi tabata cerca di caba scol segundario, mi a bai pa yuda cushiná pe rumanan cu a asisti ne scol di pionero di Testigo di Jehova. Mi a conoce dos ruman muher cu tabata di mas edad cu mi abuela. Ora mi a haya sa cu nan tabata pionero cu a asisti ne scol, mi a pensa den mi mes, ‘Si e dos ruman ei por traha como pionero, pakico mi no por hacié?’ Anto, despues cu mi a caba scol, ami també a bira un pionero regular.”
15 Tur hende no por bira pionero, pero nan por duna testimonio. Den Bélgica un ruman muher di 82 aña di edad a sali pa cumpra carni. El a ripara cu esposa dje carnicero a keda basta molestiá riba revolucion político reciente. P’sei e ruman a hinca e tratado Kico Testigo di Jehova ta kere? den e placa di papel ora el a paga su debe. Ora e ruman a bolbe ne carnicería, esposa dje carnicero, sin tarda un momento, a puntra kico e Bijbel ta bisa tocante un posibel tercera gera mundial. E ruman a hiba pe e buki Berdadero paz i siguridad—con bo por hayé? Un poco dia despues, ora e ruman di edad a drenta e carnicería, esposa dje carnicero tabatin mas pregunta pe. E ruman a sinti compasion pe señora; e simplemente tabatin cu ofrecé un estudio bíblico, i el a acepté. Awor, esposa dje carnicero kier bautiza. Kico dje carnicero? El a leza e tratado i awor ta studia e Bijbel també.
‘Un tesoro di bondad’
16 Durante e último dianan aki yen di tension, Jehova Dios no a ‘rindi maraviyoso bondad amoroso’ na hende cu ta tuma refugio den dje? Mescos cu un tata amoroso i protectivo, Jehova Dios a warda un tesoro di bondad pa su yiunan terrenal. El a basha felicidad riba nan dilanti tur mirones, net manera e salmista a bisa: “Ki abundante ta bo bondad, cu bo a warda pa esnan cu ta temébo! Locual bo a rindi na esnan cu ta tuma refugio den bo, dilanti dje yiunan di hende.”—Salmo 31:19, 21.
17 P’sei, hende di mundo ta bira testigo ocular dje onradez di hende cu ta adora Jehova, i nan ta straña. Por ehempel, den Ghana un homber di 96 aña di edad a bai ne oficina di censo i a pidi pa su compañé di 70 aña awor bira su esposa legal. E ambtenaar a recibi un shok i a puntra: “Bo ta sigur cu bo kier haci esei? Na bo edad?”
18 E homber a splica: “Mi kier bira Testigo di Jehova i participa den e trabao di mas importante promé cu e fin di mundo—e trabao di predica e bon nobo dje Reino di Dios. Tal trabao ta hiba na bida eterna. Testigo di Jehova ta obedece e ley civil, incluyendo e ley tocante registracion di matrimonio. Pues, haci e registracion pa mi, por fabor.” E ambtenaar a keda babucá. El a sigi numa cu e registracion, i e bieu a bai contentu di cu awor e tabatin un matrimonio legal.—Compara cu Romano 12:2.
19 Despues di esei, e ambtenaar di registracion di matrimonio a medita riba loke el a tende. “Testigo di Jehova . . . e trabao di mas importante . . . fin di mundo . . . e Reino di Dios . . . bida eterna.” Confundí riba tur loke esei a nifica den e bida di un homber di 96 aña di edad, el a decidi di busca Testigo di Jehova i investiga e asunto mas leu. El a acepta un estudio bíblico di cas i a haci progreso rápido. Awe, e ambtenaar di registra matrimonio ta un Testigo di Jehova bautizá. Pues, ora nos ta obedece Jehova Dios asta den loke otro hende ta considera como un asunto chikito, e por resulta den beneficio incontabel pa nos i pa hende cu ta testigo ocular di nos conducta.—Compara cu 1 Pedro 2:12.
20 Hende di edad cu ta laga e berdad transformánan na hende onrado ta pone bon ehempel pa esnan mas hoven den e mundo desonrado aki. Un ruman muher hoven asina ta biba na Myanmar. E ta bini di un famía pober i humilde di diez yiu. E tata, hubilá, ta un pionero regular. Un dia den scol, e hermanita a haya un rinchi di diamante, cu el a hiba un bez pe jufrow. Ora e klas a reuni su mañan, jufrow a bisa e klas con e rinchi tabata hayá i entregá pa wordu debolbí na su doño. Anto el a pidi e hermanita para dilanti tur e klas i splica pakico el a haci esei, sabiendo cu otro muchanan por a decidi di keda cuné. E hermanita a splica cu e ta un Testigo di Jehova i cu su Dios no ta gusta ladronicia ni ningun sorto di desonradez. Henter e scol a tende di esei, dunando e hermanita un bon oportunidad pa duna testimonio na maestro i també alumno.
21 Den Bélgica un meneer di scol a haci un comentario interesante den klas tocante Testigo di Jehova. El a ripara e conducta di un alumno di dje, cu també tabata un hermanita, i a bisa: “Awor mi a cambia mi opinion tocante Testigo di Jehova. Prehuicio a hacími kere cu nan por ta hende menos tolerante. Nan ta resulta di ser esnan mas tolerante, mientras cu nan no ta compromete nan principionan.” Cada aña maestro ta duna un premio ne mihor alumno. Entre otronan tin un premio pe curso di norma di conducta i huicio moral. Pa tres aña sigí, e meneer a duna premio pe tres marca di mas halto na yiu di Testigo di Jehova. Ta sosode asina hopi bez cu esnan cu tin confianza leal den Jehova Dios.—Salmo 31:23.
22 Salmo 31 ta resona cu un conclusion triunfante: “Sea animoso, i boso curazón sea fuerte, boso tur cu ta spera riba Jehova.” (Salmo 31:24) P’sei, mientras cu nos ta enfrenta e dianan final dje mal sistema di cosnan di Satanás, leu di bandonános, Jehova Dios lo hala mashá cerca nos i hinca su mes poder den nos. Jehova ta fiel i no ta faya. E ta nos refugio; e ta nos toren.—Proverbio 18:10.
[Study Questions]
1. Con Salmo 31 ta expresa confianza den e capacidad di Jehova di percura refugio?
2. (a) Nos por pone confianza den Jehova como nos fortaleza fundá ariba cua dos pilar? (b) Jehova ta ki clase di Dios?
3. Con e salmista a engrandece Jehova?
4, 5. (a) Cua coro tremendo ta alaba Jehova awe, i con nan a haci esei durante e aña di sirbishi di 1993? (Mira cuadro na bladji 12-15.) (b) Di ki manera asistencia na Memorial ta indica cu tabatin hende dispuesto pa uni cu e coro di proclamador di Reino? (Mira cuadro.) (c) Cua grupo den bo congregacion por ta den un posicion pa uni cu e coro?
6, 7. Splica con un homber interesá a vence molester di demoño cu e yudanza di Jehova Dios.
8, 9. Algun proclamador di Reino a vence cua otro obstáculo?
10. Pakico nos por acudi na Jehova durante tempo di tension?
11. Splica pakico e fortaleza di Jehova Dios no ta un lugar temporario.
12. Con un pionero den Hapón a haci Jehova su fortaleza?
13. Pakico ningun hende mag purba di hácinos sirbi Jehova debí na bergüenza?
14. Ki comentario bo por haci tocante e trabao di pionero? (Mira també e cuadro.)
15. Di ki manera dunamento di testimonio informal por haci posibel pa otro hende tuma refugio den Jehova Dios?
16. Con Jehova a warda un tesoro di bondad pa su pueblo?
17-19. Den Ghana, kico beneficioso a resulta ora un homber di edad a legaliza su matrimonio?
20. Den Myanmar, con e onradez di un hermanita a resulta den un bon testimonio?
21. Ora hende hoven ta confia den Jehova, con nan conducta ta refleha riba dje?
22. Salmo 31 tin cua conclusion triunfante, i con esei ta yúdanos durante e dianan final dje sistema di cosnan aki?
[Caption on page 16]
Hende cu ta tuma refugio den Jehova ta forma un coro tremendo di proclamador di Reino—mas cu 4.709.889!
1. Senegal
2. Brasil
3. Chile
4. Bolivia
[Caption on page 16]
1
[Caption on page 17]
2
[Caption on page 17]
3
[Caption on page 17]
4
[Caption on page 19]
Bo ta corda?
◻ Pakico cu confianza nos por haci Jehova Dios nos refugio?
◻ Cua evidencia tin di cu un coro tremendo ta canta alabanza di Reino cu curashi?
◻ Pakico nos por tene confianza di cu e laz di Satanás lo no enlaza e pueblo di Jehova Dios?
◻ Jehova Dios a warda cua tesoro pa hende cu ta tuma refugio den dje?