Dikon Beibel Ta Práktiko pa Nos Tempu

“Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.”​—2 TIMOTEO 3:16.

ATRAVES di siglonan, Beibel a motivá hende di hopi kultura pa mehorá nan estilo di bida. E teksto sitá ariba ta splika dikon Beibel ta asina efektivo den e sentido akí: e ta kontené sabiduria ku ta bini di Dios. Ounke ta hende a skirbi Beibel, e ta transmití Dios su pensamentunan. Beibel ta splika: “Hòmbernan santu di Dios a papia, inspirá dor di spiritu santu.”—2 Pedro 1:21.

Beibel ta un guia práktiko den por lo ménos dos aspekto. Di promé, e ta duna nos un bista realístiko di loke ta un mihó estilo di bida. Di dos, e tin e poder pa motivá hende pa hasi e kambionan nesesario pa logra e mihó estilo di bida ei. Laga nos konsiderá e dos aspektonan akí.

Instrukshon pa Yuda Nos Alkansá Metanan Práktiko

Dios a hasi e promesa akí den Beibel: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Salmo 32:8) Tuma nota ku Dios ta duna nos konseho i instrukshon ku ta yuda nos bira mas sabí. Ora nos tin e instrukshon nesesario pa diserní kua metanan ta realmente benefisioso, esei por evitá ku nos ta desperdisiá nos bida na kosnan inútil.

Por ehèmpel, hopi hende su meta prinsipal den bida ta pa bira prominente òf riku. Bukinan pa yuda bo mes ta yen di maña pa siña bo bai dilanti i asina haña prestigio òf bira riku. Di otro banda, Beibel ta bisa nos: “Kompetensia entre un hende i su próhimo . . . ta banidat i korementu tras di bientu.” “Esun ku ta stima plaka lo no keda satisfecho ku plaka.” (Eklesiastés 4:4; 5:10) E konseho ei ta práktiko pa nos tempu?

Pa ilustrá kon práktiko konseho di Beibel ta, laga nos konsiderá e kaso di Akinori, kende ta biba na Hapon. Akinori tabatin ku vense kompetensia fuerte pa e por a alkansá su meta di gradua na un universidat renombrá i haña trabou na un kompania prestigioso. A parse ku tur kos tabata bai bon. Sinembargo, su éksito no a dun’é e felisidat ku el a spera. En bes di esei, strès i kansansio a ruina su salú. Su amigunan na trabou no tabata un konsuelo p’e. El a kai den depreshon i a bira alkohóliko i asta a pensa di pone un fin na su bida. Pero despues, el a kuminsá studia Beibel ku Testigunan di Yehova. Loke el a siña a kambia su punto di bista di loke mester ta hende su prioridat den bida. Pronto, e malesanan ku strès a kousa a kuminsá disparsé. Awor, en bes di laga orguyo i ambishon dominá su bida, Akinori a eksperensiá loke e proverbio bíbliko ta bisa: “Un kurason trankil ta bida pa e kurpa.”—Proverbionan 14:30.

Segun abo, kiko ta e mihó meta ku bo por tin? Ki logro lo hasi bo realmente felis? Un matrimonio eksitoso? Duna bo yunan un bon komienso den bida? Sera hopi amistat? Disfrutá di bida? Tur esakinan ta metanan ku ta bale la pena. De echo, Beibel ta promové e metanan ei. Pero, e ta mustra ku esakinan no mester ta e kosnan di mas importante den nos bida. Mediante instrukshon práktiko, Beibel ta menshoná un rekisito fundamental pa logra un estilo di bida ku ta duna satisfakshon. E ta bisa: “Teme Dios i warda su mandamentunan, pasobra esaki ta [“e deber di,” NW] kada persona.” (Eklesiastés 12:13) Ora nos no ta kumpli ku e deber akí nos bida lo ta sin propósito, nos ta bira frustrá i ku tempu ta keda desepshoná. Di otro banda, Beibel ta duna nos e siguransa akí: ‘Bendishoná ta esun ku ta konfia den Yehova.’—Proverbionan 16:20.

Kon Beibel Ta Motivá Hende pa Kambia?

Apòstel Pablo a skirbi: “Palabra di Dios ta bibu i poderoso.” Meskos ku un spada skèrpi ku ta kòrta tur dos banda, e por penetrá te den un hende su pensamentu- i deseonan di mas profundo. (Hebreonan 4:12, BPK) Beibel tin e poder pa kambia hende su estilo di bida, pasobra e ta laga un persona mira su mes manera e ta realmente i no manera é ta kere ku e ta. Despues di esei, esnan ku tin e kondishon di kurason korekto lo realisá ku nan mester hasi kambio. Por ehèmpel, relashoná ku esnan den e kongregashon kristian na Korinto di antigwedat, kendenan un tempu tabata ladron, buraché, adúltero i kosnan por estilo, Pablo a bisa: “Asina algun di boso tabata; ma boso a wòrdu labá . . . den e spiritu di nos Dios.” (1 Korintionan 6:​9-11) Awendia, e spiritu santu di Yehova ta mes aktivo i poderoso ku e tempu ei, i e por motivá hende pa hasi e kambionan nesesario.

Mario, kende ta biba na Europa, tabata un hòmber violento ku tabata huma i bende mariwana. Na un okashon, ora un polis a konfiská su droga, el a rabia asina tantu ku el a agredí e polis i a destruí su outo. Fuera di esei, Mario no tabatin trabou i e tabatin hopi debe. El a realisá ku riba su mes, e no por solushoná su problemanan. P’esei, el a bai di akuerdo pa studia Beibel. Segun ku e tabata hasi progreso, Mario a kambia su aparensia, a stòp di usa i bende droga i a stòp di usa violensia. Hopi hende ku tabata sa kon e tabata ántes a keda masha asombrá. Nan tabata par’é i puntr’é: “Ta abo mes, Mario?”

Kiko ta motivá hende manera Akinori i Mario pa kambia nan bida i haña satisfakshon berdadero i goso den bida? Ta klaru ku esei ta e konosementu di Dios ku nan a haña mediante un estudio di Beibel. Ta Dios so por perkurá e instrukshon práktiko ku nos mester pa logra éksito den bida awor i duna nos e speransa di bida pa semper den futuro. Manera un Tata, Yehova Dios ta papia ku nos pa medio di Beibel: “Tende, mi yu, i aseptá mi palabranan, i e añanan di bo bida lo ta hopi. . . . Ora bo kana, bo pasonan lo no wòrdu strobá; i si bo kore, lo bo no trompeká. Gara instrukshon; no lag’é bai. Kuid’é, pasobra e ta bo bida.” (Proverbionan 4:​10-13) No tin ningun konseho ku ta mas práktiko ku esaki, esta, e konseho pa buska e guia di nos Kreador.

[Kuadro/​Plachi na página 7]

Konseho Práktiko pa Nos Tempu

Beibel ta kontené prinsipionan básiko pero balioso ku por guia nos den tur aspekto di bida awe. At’akí algun ehèmpel:

• Disfrutá di bon relashon ku otro hende

“Tur loke boso kier pa hende hasi pa boso, hasi meskos pa nan.”​—Mateo 7:12.

“Esun di mas chikitu den boso, ta esei ta esun di mas grandi.”​—Lukas 9:48.

‘Praktiká hospitalidat.’​—Romanonan 12:13.

• Vense kustumbernan perhudisial

“Esun ku anda ku hende sabí lo ta sabí, ma un kompañero di hende bobo lo sufri daño.”​—Proverbionan 13:20.

“No anda ku esnan ku ta gusta dal nan biña.”​—Proverbionan 23:20.

“No sera amistat ku hende ku ta gusta rabia.”​—Proverbionan 22:24.

• Edifiká un matrimonio stabil

“Laga kada un di boso tambe stima su esposa manera su mes; i e esposa perkurá pa e respetá su esposo.”​—Efesionan 5:33.

“Bisti un kurason di kompashon, kariño, humildat, mansedumbre i pasenshi. I boso soportá otro i pordoná otro.”​—Kolosensenan 3:​12, 13.

• Yuda yunan

“Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”​—Proverbionan 22:6.

“Boso, tatanan, no provoká boso yunan na rabia, ma lanta nan den e disiplina i instrukshon di Señor.”​—Efesionan 6:4.

• Evitá pleitamentu

“Un kontesta suave ta kita rabia, ma un palabra skèrpi ta lanta rabia.”​—Proverbionan 15:1.

“Duna preferensia na otro den onor.”​—Romanonan 12:10.

Asta hende ku ta amigu di otro por evitá pleitu den asuntu di negoshi, dor di pone nan akuerdonan riba papel. P’esei, Dios su sirbidó Jeremias a skirbi: “Mi a firma i seya e dokumento, i a laga testigunan konfirmá esaki i a pisa e plata den balansa.”​—Jeremias 32:10.

• Kultivá un aktitut positivo

“Tur loke ta berdadero, . . . bunita, . . . di bon fama, si tin algun birtut i si tin algu digno di alabansa laga esakinan okupá boso mente.”​—Filipensenan 4:8.

Beibel ta deskurashá hende pa keda pensa riba kosnan negativo i e ta desaprobá “murmuradónan ku ta gusta keha.” E ta bisa: “Regosihá den speransa.”​—Hudas 4, 16; Romanonan 12:12.

Ora nos apliká e prinsipionan ekselente akí den nos bida, nos lo tin pas i felisidat for di awor. Ademas, esaki ta yuda nos kumpli ku Dios su rekisitonan i haña su bendishon. Beibel ta bisa: “E hustunan lo heredá e tera, i lo biba den dje pa semper.”​—Salmo 37:29.

[Plachinan na página 5]

Akinori, ora e tabata un komersiante (na man robes), i huntu ku su esposa gososamente kompartiendo bèrdat di Beibel ku hende awe