Laga Nos Halsa Yehova Su Nòmber Huntu

“O engrandesé [Yehova] ku mi, i laga nos halsa su nòmber huntu.”—SALMO 34:3.

1. Ki ekselente ehèmpel Hesus a pone durante su ministerio riba tera?

DURANTE e anochi di 14 di nisan di aña 33, Hesus huntu ku su apòstelnan a kanta alabansa na Yehova den e sala ariba di un kas na Yerusalèm. (Mateo 26:30) Tabata e último biaha ku Hesus lo a hasi esei huntu ku su apòstelnan. Sin embargo, tabata masha apropiá ku el a konkluí e reunion ku e tabatin ku nan den e manera ei. Hesus a alabá su Tata for di komienso te final di su ministerio riba tera, i ku entusiasmo el a hasi e nòmber di su Tata konosí. (Mateo 4:10; 6:9; 22:37, 38; Juan 12:28; 17:6) De echo, Hesus a ripití e kaluroso invitashon di e salmista: ‘O engrandesé Yehova ku mi, i laga nos halsa su nòmber huntu.’ (Salmo 34:3) Ki un ekselente ehèmpel pa nos imitá!

2, 3. (a) Kon bin nos sa ku Salmo 34 tin nifikashon profétiko? (b) Kiko nos lo konsiderá den e artíkulo aki i esun ku ta sigui?

² Un par di ora despues di a kanta alabansa huntu ku Hesus, apòstel Juan tabata testigu di un suseso kompletamente diferente. El a mira nan mata su Shon huntu ku dos kriminal riba staka di tormento. Sòldánan romano a kibra pia di e dos kriminalnan pa nan a muri mas lihé. Sin embargo, Juan a informá ku nan no a kibra Hesus su pia. Ora e sòldánan a yega na Hesus, e tabata morto kaba. Juan a splika den su Evangelio ku esaki tabata kumplimentu di un otro parti di Salmo 34: “Ni ún wesu di dje lo no wòrdu kibrá.”—Juan 19:32-36; Salmo 34:20.

³ Salmo 34 tin hopi punto mas ku ta interesá kristiannan. P’esei den e artíkulo aki i esun ku ta sigui, nos lo repasá bou di ki sirkunstansia David a skirbi e salmo i despues nos lo konsiderá e kontenido alentador di e salmo mes.

David Ta Hui for di Saul

4. (a) Dikon a ungi David komo futuro rei di Israel? (b) Kon bin Saul a kuminsá ‘stima David mashá’?

⁴ Tempu ku David tabata yòn, Saul tabata rei di Israel. Sin embargo, Saul a bira desobedesidu i a pèrdè e aprobashon di Yehova. Pa e motibu ei profeta Samuel a bis’é: “SEÑOR a sker e reinado di Israel kit’é for di bo, i a duna esaki na bo próhimo, kende ta mihó ku bo.” (1 Samuel 15:28) Despues Yehova a manda Samuel bai ungi David, e yu mas chikitu di Isaí, pa bira e siguiente rei di Israel. Rei Saul entre tantu a kuminsá sufri di melankolia i mal beis ya ku e no tabatin e spiritu di Dios mas riba dje. David tabata un bon músiko, i nan a tres’é na Gabaa pa sirbi e rei. E músika di David a duna Saul alivio, i Saul a kuminsá ‘stima David mashá.’—1 Samuel 16:11, 13, 21, 23.

5. Dikon Saul su aktitut pa ku David a kambia, i kiko David a hañ’é obligá ta hasi?

⁵ Segun ku tempu a pasa, Yehova a duna prueba ku e tabata ku David. Yehova a yud’é konkistá e gigante filisteo Goliat i a apoyá David segun ku el a haña fama den Israel pa su abilidat militar. Sin embargo, Yehova su bendishon riba David a hasi Saul yalurs, i el a kuminsá odia David. Dos biaha ora ku David tabata toka su arpa dilanti di Saul, e rei a tira su lansa riba dje. Ámbos biaha David a logra skapa di e lansa. Ora Saul a hasi un di tres intento pa mata David, e futuro rei di Israel a realisá ku e tabatin ku hui pa skapa su bida. Komo ku Saul a persistí den su intentonan pa kaptur’é i mat’é, David a disidí di bai buska refugio pafó di e teritorio di Israel.—1 Samuel 18:11; 19:9, 10.

6. Dikon Saul a manda mata e habitantenan di Nob?

⁶ Riba kaminda pa bai e frontera di Israel, David a para na e stat di Nob unda e tabernakel di Yehova tabata situá. Aparentemente tabatin un grupo di hòmber hóben ku a kompañá David den su huida i el a bai buska kos di kome pa nan i p’e mes. Despues Saul a bin haña sa ku e sumo saserdote a duna David i su hòmbernan algu di kome i e spada ku David a kita for di Goliat ora el a mat’é. Rabiá, Saul a laga mata tur e habitantenan di e stat, inkluso 85 saserdote.—1 Samuel 21:1, 2; 22:12, 13, 18, 19; Mateo 12:3, 4.

David Ta Bolbe Skapa for di Morto

7. Dikon Gat no tabata un bon lugá di skonde pa David?

⁷ Di Nob, David a hui bai un 40 kilometer den direkshon wèst te den teritorio filisteo i a buska refugio serka Rei Akis na Gat, e stat natal di Goliat. Podisé David a rasoná ku Gat lo ta e último lugá ku Saul lo a busk’é. Pero poko despues, sirbidónan di e rei di Gat a rekonosé David. Ora David a tende ku nan a rekonos’é, el “a haña masha miedu di Akis, rei di Gat.”—1 Samuel 21:10-12.

8. (a) Kiko Salmo 56 ta konta nos di David su eksperensia na Gat? (b) Kon David a skapa na wowo di angua for di morto?

⁸ E filisteonan e ora ei a kapturá David. Podisé tabata na e okashon aki ku David a komponé e salmo konmovedor den kua e ta pidi Yehova: “Pone mi lágrimanan den bo butishi.” (Salmo 56:8 i título di introdukshon) Pues el a ekspresá su konfiansa ku Yehova lo no a lubidá su tristesa pero amorosamente lo a kuid’é i proteh’é. Pero David a pensa tambe riba un strategia pa gaña e rei filisteo. El a aktua komo si fuera e tabata loko. Ora Rei Akis a mira esaki, el a skual su sirbidónan pasobra nan a trese un hòmber “loko” su dilanti. Tabata bisto ku Yehova a bendishoná David su strategia. Nan a kore kuné for di e stat i el a bolbe skapa na wowo di angua for di morto.—1 Samuel 21:13-15.

9, 10. Pa ki motibu David a skirbi Salmo 34, i ken David lo por tabatin na mente ora el a komponé e salmo?

⁹ Beibel no ta bisa si David su hòmbernan a hui bai Gat huntu kuné òf si nan a keda vigilá den e pueblitonan djis pegá den Israel. Loke sea tabata e kaso, nan lo mester tabatin un reenkuentro felis ora ku David a informá nan kon Yehova a bolbe skap’é. E suseso ei tabata e base pa Salmo 34, manera e título di introdukshon di e salmo ta indiká. Den e promé shete versíkulonan di e salmo, David ta alabá Dios pasobra el a libr’é i ta invitá su apoyadónan pa uni kuné den halsa Yehova komo e Gran Reskatadó di Su pueblo.—Salmo 34:3, 4, 7.

¹⁰ David ku su hòmbernan a haña protekshon den e kueba di Adulam situá den un region di Israel yen di seru, un 15 kilometer ost di Gat. Einan, israelitanan ku tabata mal kontentu ku e situashon bou di e gobernashon di Rei Saul a bin i a djòin nan. (1 Samuel 22:1, 2) Ora David a komponé e palabranan di Salmo 34:8-22, kisas e tabatin e personanan ei na mente. E rekordatorionan den e versíkulonan ei ta importante pa nos awe tambe, i nos siguramente lo benefisiá di un konsiderashon detayá di e bunita salmo aki.

Bo Interes Prinsipal Ta Meskos ku di David?

11, 12. Ki motibunan nos tin pa alabá Yehova konstantemente?

¹¹ “Lo mi bendishoná [Yehova] den tur tempu; su alabansa lo ta kontinuamente den mi boka.” (Salmo 34:1) Bibando komo fugitivo, David lo mester tabatin hopi preokupashon relashoná ku su sosten material, pero manera e palabranan aki ta mustra, e no a permití su preokupashonnan diario stroba su determinashon di alabá Yehova. Ki un ekselente ehèmpel esei ta pa nos ora ku nos ta konfrontá difikultat! Sea nos ta na skol, trabou òf ku nos rumannan kristian òf den e ministerio públiko, nos deseo prinsipal lo mester ta pa alabá Yehova. Djis pensa riba e kantidat di motibunan ku nos tin pa hasi esei! Por ehèmpel, no tin fin na loke nos por deskubrí i disfrutá di dje den Yehova su obranan maravioso di kreashon. Anto pensa riba loke Yehova a logra pa medio di e parti terenal di su organisashon! Ounke hende fiel ta imperfekto, tòg Yehova a usa nan na un gran manera den nos tempu. Kon e obranan di Dios ta na komparashon ku e obranan di hende ku mundu ta adorá komo ídolo? Bo no ta di akuerdo ku David, kende a skirbi tambe: “No tin ningun manera bo entre e diosnan, o Señor, tampoko no tin ningun obra manera bo obranan”?—Salmo 86:8.

¹² Meskos ku David, nos ta sinti nos motivá pa alabá Yehova konstantemente pa su obranan inkomparabel. Es mas, ta masha emoshonante pa nos di sa ku e Reino di Dios ta awor den man di Hesukristu, e Heredero permanente di David. (Revelashon 11:15) Esaki ta nifiká ku fin di e sistema di kosnan aki ta serka. E futuro eterno di mas ku seis mil mion hende ta den wega. Nunka promé no tabata asina urgente pa konta otro hende tokante e Reino di Dios i loke lo e hasi pronto pa humanidat, i tambe yuda nan alabá Yehova huntu ku nos. Un kos ta sigur, nos prioridat den bida lo mester ta pa usa tur oportunidat ku presentá pa animá hende pa aseptá e “evangelio” òf bon nobo aki promé ku ta lat.—Mateo 24:14.

13. (a) Den ken David a broma, i ki klase di hende a reakshoná? (b) Kon hende mansu ta ser atraí na e kongregashon kristian awe?

¹³ “Mi alma lo gloria den [Yehova]; e humildenan lo tende i regosihá.” (Salmo 34:2) Aki David no a gloria, es desir broma, den ningun logro personal. Por ehèmpel, e no a broma di e manera ku el a engañá e rei di Gat. El a realisá ku ta Yehova a proteh’é ora ku e tabata na Gat i ku el a skapa ku Yehova su yudansa. (Proverbionan 21:1) Pues, David no a broma òf gloria den su mes, sino den Yehova. Komo ku David a engrandesé Yehova, hende humilde òf mansu a ser atraí na Yehova. Hesus tambe a engrandesé e nòmber di Yehova, i esaki a atraé hende humilde i dispuesto pa siña na Yehova. Awe, hende mansu di tur nashon ta ser atraí na e kongregashon internashonal di kristiannan ungí di kua Hesus ta e Kabes. (Kolosensenan 1:18) Tin dos kos ku ta motivá kurason di e hendenan mansu ei. Di promé ta ora nan tende e nòmber di Dios ser glorifiká pa su sirbidónan humilde i di dos ta ora nan ta tende e mensahe di Beibel, ku e spiritu santu di Dios ta hasi posibel pa nan komprondé.—Juan 6:44; Echonan 16:14.

E Reunionnan Ta Fortalesé Nos Fe

14. (a) David a keda satisfecho ku alabá Yehova den privá so? (b) Ki ehèmpel Hesus a pone relashoná ku reunionnan pa adorashon?

¹⁴ “O engrandesé [Yehova] ku mi, i laga nos halsa su nòmber huntu.” (Salmo 34:3) David no a keda satisfecho ku alabá Yehova den privá so. Kalurosamente el a invitá su kompañeronan pa uni kuné den halsa Dios su nòmber. Asina tambe Hesukristu, e David Mayor, tabatin goso den alabá Yehova públikamente; sea tabata na e snoa lokal, na e fiestanan na e tèmpel di Dios na Yerusalèm i den kompania di su siguidónan. (Lukas 2:49; 4:16-19; 10:21; Juan 18:20) Ki un privilegio gososo nos tin di por sigui e ehèmpel di Hesus i alabá Yehova na tur okashon posibel huntu ku nos rumannan den fe, spesialmente awor ku nos “ta mira ku e dia ta yegando serka”!—Hebreonan 10:24, 25.

15. (a) Ki efekto e eksperensia di David tabatin riba su hòmbernan? (b) Kon nos ta benefisiá ora nos asistí na nos reunionnan?

¹⁵ “Mi a buska [Yehova], i el a kontestá mi, i a libra mi for di tur mi temornan.” (Salmo 34:4) E eksperensia aki tabata importante pa David. P’esei el a sigui bisa: “E pober hende aki a sklama i [Yehova] a tend’é, i a salb’é for di tur su angustianan.” (Salmo 34:6) Ora nos ta asosiá ku nos rumannan den fe, nos tin hopi oportunidat pa konta eksperensianan edifikante ku ta mustra kon Yehova a yuda nos wanta sirkunstansianan difísil. Esaki ta fortalesé e fe di nos rumannan, meskos ku e ekspreshonnan di David a fortalesé e fe di su apoyadónan. Den e kaso di David, su kompañeronan “a hisa kara mira na [Yehova] i a keda radiante, i nunka nan kara lo keda na bèrgwensa.” (Salmo 34:5) Ounke nan tabata hui for di Rei Saul, nan no a sinti bèrgwensa. Nan tabatin sigur ku Dios a respaldá David, i nan karanan tabata radiante. Den un manera similar, tantu personanan resien interesá komo esnan ku tin hopi aña komo kristian berdadero ta akudí na Yehova pa sosten. Komo ku personalmente nan a eksperensiá su yudansa, nan karanan radiante ta reflehá nan determinashon pa keda fiel.

Sea Gradisidu pa e Yudansa for di Angel

16. Kon Yehova a usa su angelnan pa reskatá nos?

¹⁶ “E angel di [Yehova] ta kampa rònt di esnan ku ta tem’é, i ta reskatá nan.” (Salmo 34:7) David no a mira e echo ku Yehova a reskat’é komo algu ku por a pasa kuné so. Ta bèrdat ku David tabata e ungí di Yehova, e futuro rei di Israel; pero e tabata sa ku Yehova ta usa su angelnan pa kuida tur su adoradónan fiel, sin importá ku nan ta prominente òf di kondishon humilde. Den nos tempu, adoradónan berdadero tambe a eksperensiá e protekshon ku Yehova ta duna. Na Alemania nazi—i tambe na Angola, Malawi, Mozambique i hopi otro pais mas—outoridatnan a hiba kampaña pa eliminá Testigunan di Yehova. Nan esfuersonan tabata enbano. Na lugá di ser eliminá, e pueblo di Yehova den e paisnan ei ta sigui prosperá segun ku nan ta halsa Dios su nòmber huntu. Kon bin? Pasobra Yehova ta usa su angelnan santu pa protehá i guia su pueblo.—Hebreonan 1:14.

17. Den ki maneranan e angelnan di Dios ta yuda nos?

¹⁷ Ademas, e angelnan di Yehova por maniobrá asuntunan di tal manera ku ken ku ta pone otro hende trompeká ta ser saká for di entre e pueblo di Yehova. (Mateo 13:41; 18:6, 10) Anto maske nos kisas no ta konsiente di esaki na e momento ku e sosodé, angelnan ta eliminá opstákulonan ku lo por stroba nos sirbishi na Dios, i nan ta protehá nos di kosnan ku lo por pone nos relashon ku Yehova na peliger. Mas importante ainda, nan ta guia nos den e trabou di deklará e bon nobo òf “evangelio eterno” na henter humanidat, inkluso na lugánan kaminda ta efektuá e trabou di prediká bou di sirkunstansianan peligroso. (Revelashon 14:6) E literatura bíbliko publiká pa Testigunan di Yehova hopi biaha a relatá evidensia di yudansa angelikal.a E eksperensianan ei ta muchu hopi pa konsiderá nan komo puru kasualidat.

18. (a) Kiko ta nesesario pa nos por benefisiá di yudansa angelikal? (b) Kiko nos lo konsiderá den e siguiente artíkulo?

¹⁸ Pa sigui benefisiá di guia i protekshon angelikal, nos tin ku sigui halsa Yehova su nòmber apesar di oposishon. No lubidá ku e angel di Yehova ta kampa solamente ‘rònt di esnan ku ta teme Yehova.’ Kiko esaki ta indiká? Kiko ta e temor di Dios, i kon nos por kultiv’é? Dikon un Dios amoroso lo ke pa nos tem’é? Nos lo trata e preguntanan aki den e siguiente artíkulo.

[Nota]

Kon Lo Bo Kontestá?

• Ki pruebanan David a wanta komo yònkuman?

• Meskos ku David, kiko ta nos interes prinsipal?

• Kon nos ta mira e reunionnan kristian?

• Kon Yehova ta usa su angelnan pa yuda nos?

[Mapa na página 21]

(Pa e teksto den su formato kompleto, wak e publikashon)

Rama

Gat

Ziklag

Gabaa

Yerusalèm

Adulam

Keila

Hebròn

Zif

Hores

Maon

Nob

Bètlehèm

En-gadi

Karmelo

Laman Salu

[Rekonosementu]

Mapa: Based on maps copyrighted by Pictorial Archive (Near Eastern History) Est. and Survey of Israel

[Plachi na página 21]

Asta komo fugitivo, David a halsa Yehova su nòmber

[Plachi na página 23]

Nos fe ta bira mas fuerte segun ku nos ta skucha e eksperensianan edifikante ku ta ser relatá na nos reunionnan kristian