Disfrutá di Bida den e Temor di Yehova
“Teme [Yehova], boso su santunan, pasobra esnan ku ta tem’é no tin falta di nada.”—SALMO 34:9.
1, 2. (a) Den ki dos manera kontrali di otro kristiandat ta mira temor di Dios? (b) Ki preguntanan nos lo analisá awor?
PASTORNAN di kristiandat ku ta siña hende ku mester teme Dios, hopi biaha ta hasi esei a base di e siñansa no-bíbliko ku Dios ta kastigá pekadó eternamente den kandela di fièrnu. E doktrina ei ta kontrali na loke Beibel ta siña tokante Yehova komo un Dios di amor i hustisia. (Génesis 3:19; Deuteronomio 32:4; Romanonan 6:23; 1 Juan 4:8) Otro pastornan di kristiandat ta siña nèt lo kontrario. Nunka nan no ta bisa ku hende mester tin temor di Dios. Na lugá di esei, nan ta siña hende ku Dios ta masha tolerante i ta aseptá kasi tur hende sin importá ki klase di bida nan ta hiba. Pero esei tampoko no ta loke Beibel ta siña.—Galationan 5:19-21.
2 Echo ta ku Beibel ta animá nos pa teme Dios. (Revelashon 14:7) E siñansa bíbliko ei ta lanta vários pregunta. Dikon un Dios amoroso ke pa nos tem’é? Ki klase di temor Dios ta rekerí? Kon temor di Dios por benefisiá nos? Nos lo konsiderá e preguntanan aki segun ku nos ta sigui ku nos konsiderashon di Salmo 34.
Pakiko Teme Dios
3. (a) Kiko bo ta pensa di e mandamentu pa teme Dios? (b) Dikon hende ku ta teme Yehova ta felis?
3 Komo Kreadó i Gobernante Soberano di universo, Yehova meresé nos temor. (1 Pedro 2:17) Sin embargo, e temor ei no ta un miedu ekstremo ku bo tin di un dios kruel. E ta un rèspèt i atmirashon profundo ku nos ta sinti p’e persona ku Yehova ta. Tambe e ta e temor di desagrad’é. Temor di Dios ta noble i edifikante, no algu spantoso i desanimante. Yehova, “e Dios felis,” ke pa su kreashon humano disfrutá di bida. (1 Timoteo 1:11, NW) Sin embargo, pa nos hasi esei nos tin ku biba na armonia ku e rekisitonan di Dios. Pa hopi hende esei ta nifiká ku nan mester hasi un kambio den nan estilo di bida. Tur esnan ku hasi e kambio nesesario ta eksperensiá e bèrdat di e palabranan di e salmista David: “O purba i mira ku [Yehova] ta bon; bendishoná ta e hende ku ta tuma refugio den dje! O teme [Yehova], boso su santunan, pasobra esnan ku ta tem’é no tin falta di nada.” (Salmo 34:8, 9) Komo ku hende ku ta teme Yehova tin un bon relashon kuné, nan no falta nada di balor duradero.
4. Ki garantia tantu David komo Hesus a duna?
4 Tuma nota ku komo ku e teksto tabata apliká den tempu di David, el a onra su hòmbernan dor di yama nan “santunan.” Nan tabata parti di Dios su nashon santu. Ademas, nan tabata riska nan bida pa sigui David. Apesar ku nan tabatin ku hui pa Rei Saul, David tabatin e konfiansa ku Yehova lo a sigui perkurá pa nan nesesidatnan básiko. David a skirbi: “Leon chikitu sí tin nesesidat i ta pasa hamber, ma esnan ku ta buska [Yehova] lo no tin falta di ningun kos bon.” (Salmo 34:10) Hesus a duna su siguidónan e mesun tipo di garantia.—Mateo 6:33.
5. (a) Hopi siguidó di Hesus a bin di ki klase di hende? (b) Ki konseho Hesus a duna tokante e asuntu di temor?
5 Hopi di e hendenan ku a skucha Hesus tabata hudiu di e klase ménos privilegiá i di kondishon humilde. Pues, Hesus “a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:36) E personanan di kondishon humilde ei lo tabatin e kurashi pa sigui Hesus? Pa hasi esei, nan lo mester a kultivá temor di Yehova, no di hende. Hesus a bisa: “No tene miedu di esnan ku ta mata e kurpa, i ku despues di esei no por hasi nada mas. Ma lo mi mustra boso ken boso mester teme. Teme Esun ku despues ku el a mata tin outoridat pa tira den [Gehena]; sí, mi ta bisa boso, teme E! No t’asina ku sinku mòfi ta wòrdu bendí pa dos plaka? I ni un di nan no ta wòrdu lubidá dilanti di Dios. Di bèrdat, asta e drachinan di kabei riba boso kabes, tur ta kontá. No tene miedu; boso bal mas ku un kantidat di mòfi.”—Lukas 12:4-7.
6. (a) Kua palabranan di Hesus a fortalesé kristiannan? (b) Dikon Hesus ta e mihó ehèmpel di desplegá temor di Dios?
6 Ora hende ku ta teme Yehova ta bou di preshon di nan enemigunan pa stòp di sirbi Dios, nan por kòrda riba e konseho aki di Hesus: “Ken ku konfesá mi dilanti di hende, e Yu di hende tambe lo konfesá e hende ei dilanti di e angelnan di Dios; ma esun ku nenga mi dilanti di hende lo wòrdu nengá dilanti di e angelnan di Dios.” (Lukas 12:8, 9) E palabranan aki ta fortalesé kristiannan, spesialmente den paisnan kaminda adorashon berdadero ta prohibí. E kristiannan ei ta sigui alabá Yehova diskretamente na reunionnan kristian i den nan ministerio públiko. (Echonan 5:29) Hesus tabata e mihó ehèmpel di desplegá “temor di Dios.” (Hebreonan 5:7, NW) Papiando di Hesus, e Palabra profétiko a predisí: ‘E spiritu di Yehova lo keda riba dje, e spiritu di temor di Yehova. I e lo tin delisia den e temor di Yehova.’ (Isaias 11:2, 3) Pues, Hesus ta sumamente kualifiká pa siña nos e benefisionan di temor di Dios.
7. (a) Kon kristiannan, de echo, ta aseptá un invitashon similar na esun ku David a ekstendé? (b) Kon mayornan por sigui e bon ehèmpel di David?
7 Tur hende ku ta sigui e ehèmpel di Hesus i ku ta obedesé su siñansanan, de echo ta aseptá un invitashon similar na esun ku David a ekstendé: “Bin, yunan, skucha mi; lo mi siña boso e temor di [Yehova].” (Salmo 34:11) Tabata natural pa David yama su hòmbernan “yunan,” pasobra nan a mir’é komo nan lider. David di su parti a duna yudansa spiritual na su siguidónan pa nan por tabata uní i pa nan a disfrutá di e aprobashon di Dios. Ki un ekselente ehèmpel esei ta pa mayornan kristian! Yehova a duna nan outoridat relashoná ku nan yunan pa ‘lanta nan den e disiplina i instrukshon di Yehova.’ (Efesionan 6:4) Mayornan ta yuda nan yunan disfrutá di bida den e temor di Yehova ora nan ta konsiderá asuntunan spiritual ku nan tur dia i ta kondusí un estudio di Beibel regular ku nan.—Deuteronomio 6:6, 7.
Kon pa Praktiká Temor di Dios den Nos Bida
8, 9. (a) Dikon un estilo di bida ku ta reflehá temor di Dios ta asina atraktivo? (b) Kiko warda nos lenga ta enserá?
8 Manera a keda menshoná kaba, temor di Yehova no ta stroba nos di tin goso. David a puntra: “Ta ken ta e hende ku ta deseá bida, i ta stima bida largu, pa e por mira bondat?” (Salmo 34:12) Ta bisto ku e temor di Yehova ta e faktor importante pa disfrutá di un bida largu i felis i pa mira bondat. Sin embargo, ta fásil pa bisa: “Mi ta teme Dios.” Pero no ta fásil pa demostrá nos temor di Dios mediante nos kondukta. P’esei David a splika kon nos por demostrá temor di Dios.
9 “Warda bo lenga di maldat, i bo lepnan di papia engaño.” (Salmo 34:13) Apòstel Pedro a ser inspirá pa sita e parti aki di Salmo 34 despues ku el a konsehá kristiannan pa trata otro ku amor di ruman. (1 Pedro 3:8-12) Warda nos lenga di maldat ta nifiká ku nos lo evitá di plama redu perhudisial. En bes di hasi esei, semper nos lo hasi esfuerso pa papia kosnan edifikante ku otro hende. Es mas, nos lo hasi esfuerso pa demostrá kurashi i papia e bèrdat.—Efesionan 4:25, 29, 31; Santiago 5:16.
10. (a) Splika kiko ke men apartá nos mes for di maldat. (b) Kiko hasi bon ta enserá?
10 “Apartá bo mes for di maldat i hasi bon; buska pas i siguié.” (Salmo 34:14) Nos ta evitá kosnan ku Dios ta kondená, manera inmoralidat seksual, pornografia, ladronisia, spiritismo, violensia, buracheria i uso di droga. Nos ta rechasá tambe entretenimentu ku ta presentá e kosnan repugnante ei. (Efesionan 5:10-12) Mas bien, nos ta usa nos tempu pa hasi bon. E bon di mas grandi ku nos por hasi ta di partisipá ku regularidat den e trabou di prediká e Reino i hasi disipel, anto asina yuda otro hende gana salbashon. (Mateo 24:14; 28:19, 20) Hasi bon ta enserá tambe prepará pa e reunionnan kristian i asistí na nan, duna kontribushon pa e obra mundial, kuida nos Salòn di Reino i mustra interes den e nesesidat di kristiannan di ménos rekurso.
11. (a) Kon David a praktiká loke el a prediká tokante pas? (b) Kiko abo por hasi pa “buska pas i siguié” den e kongregashon?
11 David a pone un bon ehèmpel den buska pas i siguié. Dos biaha el a haña chèns di mata Saul. Na ámbos okashon, el a evitá violensia i despues a papia ku rèspèt ku e rei, ku e speransa di restorá pas. (1 Samuel 24:8-11; 26:17-20) Kiko nos por hasi awe ora un situashon ta menasá di perturbá e pas di e kongregashon? Nos lo mester “buska pas i siguié.” Pues, si nos ta sinti ku e relashon entre nos i un ruman ta tenso, nos ta obedesé e konseho di Hesus: “Rekonsiliá ku bo ruman promé.” Despues nos ta sigui ku otro aspektonan di adorashon berdadero.—Mateo 5:23, 24; Efesionan 4:26.
Teme Dios Ta Trese Hopi Rekompensa
12, 13. (a) Ki benefisionan aktual hende ku ta teme Dios ta gosa di dje? (b) Ki tremendo rekompensa adoradónan fiel lo disfrutá di dje denter di poko?
12 “E wowonan di [Yehova] ta riba e hustunan, i su oreanan ta atento pa skucha nan sklamashon.” (Salmo 34:15) E registro di Dios su trato ku David ta duna prueba ku e palabranan ei ta bèrdat. Awe, nos ta sinti un goso i pas mental profundo pasobra nos sa ku Yehova ta kuida nos. Nos tin e konfiansa ku semper lo e duna nos loke nos tin mester, asta ora nos ta bou di hopi preshon. Nos sa ku denter di poko tur adoradó berdadero lo konfrontá e atake profetisá di Gòg di Magòg i e ‘dia temibel di Yehova.’ (Joel 2:11, 31; Ezekiel 38:14-18, 21-23) Sea kual sea e situashon ku nos lo tin ku konfrontá na e tempu ei, e palabranan di David lo apliká den nos kaso tambe: “E hustunan ta sklama i [Yehova] ta tende, i ta libra nan for di tur nan angustianan.”—Salmo 34:17.
13 Esta emoshonante lo ta e tempu ei pa mira Yehova engrandesé su gran nòmber! Nos kurason lo yena ku mas rèspèt i atmirashon ku nunka, i tur opositor lo haña un destrukshon humiante. “E kara di [Yehova] ta kontra hasidónan di maldat, pa kòrta e rekuerdo di nan kita for di riba tera.” (Salmo 34:16) Lo ta un tremendo rekompensa di por eksperensiá e gran liberashon ei i drenta den Dios su hustu mundu nobo!
Promesanan Ku Ta Yuda Nos Perseverá
14. Kiko lo yuda nos perseverá apesar di kalamidat?
14 Miéntras tantu, pa nos por sigui obedesé Yehova den un mundu degradá i agresivo nos mester di perseveransia. Temor di Dios ta un gran yudansa segun ku nos ta kultivá obedensia. Debí na e tempu trabahoso ku nos ta biba aden, tin sirbidó di Yehova ta pasa dor di difikultatnan ekstremo ku, na moda di papia, ta kibra nan kurason i laga nan ku un spiritu abatí. Sin embargo, nan por tin tur siguransa ku si nan akudí na Yehova, lo e yuda nan perseverá. E palabranan di David ta transmití berdadero konsuelo: “[Yehova] ta serka di e hende di kurason kibrá, i ta salba esnan di spiritu abatí.” (Salmo 34:18) Ta alentador ku David a sigui bisa: “Hopi ta e aflikshonnan di e hustu, ma [Yehova] ta libr’é for di nan tur.” (Salmo 34:19) Sin importá kuantu kalamidat bin riba nos, Yehova ta sufisiente fuerte pa libra nos.
15, 16. (a) Ki kalamidat David a tende di dje poko despues ku el a komponé Salmo 34? (b) Kiko lo yuda nos wanta prueba?
15 Poko despues di a komponé Salmo 34, David a tende di e kalamidat ku a sosodé ku e habitantenan di Nob, ora ku Saul a masakrá nan i mayoria di e saserdotenan. Esta doloroso lo mester tabata pa David ora e kòrda ku ta su bishita na Nob a provoká e rabia di Saul! (1 Samuel 22:13, 18-21) Sin duda David a akudí na Yehova pa yudansa, i siguramente el a haña konsuelo den e speransa ku den futuro lo tin un resurekshon di “e hustunan.”—Echonan 24:15.
16 Awe, e speransa di resurekshon ta fortalesé nos tambe. Nos sa ku nada ku nos enemigunan hasi no por kousa nos daño permanentemente. (Mateo 10:28) David a ekspresá e mesun konvikshon ei den e palabranan aki: “E ta kuida tur [e hustu] su wesunan; ningun di nan no ta wòrdu kibrá.” (Salmo 34:20) E versíkulo ei tabatin un kumplimentu literal den e kaso di Hesus. Ounke nan a mata Hesus di un forma kruel, ni ún di su wesunan no a wòrdu “kibrá.” (Juan 19:36) Den un aplikashon mas amplio, Salmo 34:20 ta sigurá nos ku sin importá ki prueba kristiannan ungí i nan kompañeronan—e “otro karnénan”—ta konfrontá, nunka nan lo sufri daño permanentemente. Na moda di papia, nunka nan wesunan lo ser kibrá.—Juan 10:16.
17. Ki kalamidat ta spera hende ku ta sigui odia e pueblo di Yehova?
17 Pa e malbadonan, e situashon ta otro. Pronto nan lo kosechá loke nan a sembra. “Maldat ta mata e malbado; i esnan ku ta odia e hustu lo wòrdu kondená.” (Salmo 34:21) Ken ku ta sigui oponé e pueblo di Dios lo konfrontá e kalamidat di mas pió ku tin. Na e revelashon di Hesukristu, nan “lo paga e kastigu di pèrdishon eterno.”—2 Tesalonisensenan 1:9.
18. Den ki sentido e “multitut grandi” a ser librá kaba, i kiko nan lo eksperensiá den futuro?
18 E salmo di David ta konkluí ku e palabranan trankilisante aki: “[Yehova] ta redimí alma di su sirbidónan; i ningun di esnan ku ta tuma refugio den dje lo no wòrdu kondená.” (Salmo 34:22) Kasi na final di Rei David su reinado di 40 aña, el a bisa: “[Dios] a redimí mi bida for di tur angustia.” (1 Reinan 1:29) Meskos ku David, hende ku ta teme Yehova pronto lo por wak atras i alegrá ku nan a ser redimí òf librá for di kualke kondena debí na piká i reskatá for di tur nan pruebanan. Ya kaba mayoria di kristian ungí a risibí nan rekompensa selestial. “Un multitut grandi” for di tur nashon aktualmente ta uni ku e restu di e rumannan di Hesus pa sirbi Dios, i komo resultado nan ta gosa di un posishon limpi dilanti di Yehova. Esaki ta pasobra nan ta ehersé fe den e poder di libra di e sanger dramá di Hesus. Durante e binidero Reinado di Mil Aña di Kristu, lo apliká e pleno benefisionan di e sakrifisio di reskate na nan, i asina elevá nan na perfekshon humano.—Revelashon 7:9, 14, 17; 21:3-5.
19. Kiko e miembronan di e “multitut grandi” ta determiná pa hasi?
19 Pakiko e “multitut grandi” di adoradó di Dios lo haña tur e bendishonnan aki? Pasobra nan ta determiná pa sigui teme Yehova, i sirbié ku rèspèt, atmirashon i pleno obedensia. Sí, e temor di Yehova ta hasi bida plasentero awor i ta yuda nos haña ‘gara riba loke ta e bida berdadero,’ esta, bida eterno den Dios su mundu nobo.—1 Timoteo 6:12, 18, 19; Revelashon 15:3, 4.
Bo Ta Kòrda?
• Dikon nos mester teme Dios, i kiko teme Dios ta nifiká?
• Ki efekto temor di Dios mester tin riba nos kondukta?
• Ki rekompensanan nos ta haña komo ku nos ta teme Dios?
• Ki promesanan ta yuda nos perseverá?
[Plachi na página 26]
Hende ku ta teme Yehova ta aktua diskretamente bou di prohibishon
[Plachi na página 28]
E mihó kos ku nos por hasi pa nos próhimo ta di kompartí e bon nobo di Reino ku nan