Onra Kristu, e Rei Glorioso!

1, 2. Dikon nos mester ta interesá den Salmo 45?

UN REI glorioso ta sali riba kabai pa bringa pa kousa di bèrdat i hustisia i ta vense su enemigunan. Despues di gana e bataya final, e ta kasa ku un bunita brùit. Generashon tras generashon, e rei akí ta ser rekordá i onrá. Básikamente, ta esei Salmo 45 ta papia di dje.

² Pero Salmo 45 ta enserá muchu mas ku un storia emoshonante ku un final felis. E susesonan ku e salmo akí ta relatá tin gran nifikashon pa nos: Nan tin efekto riba nos bida awor i den futuro. Pues, laga nos presta bon atenshon segun ku nos ta analisá e salmo akí.

3, 4. (a) Na kiko e “palabranan bon” ku e salmista a menshoná ta referí, i ki efekto esaki por tin riba nos kurason? (b) Ki mensahe nos ta proklamá tokante un rei, i den ki sentido nos lenga ta bira manera pèn?

³ Lesa Salmo 45:1. E ‘bon palabranan,’ òf notisia, ku ta pone kurason di e salmista “rebosá” ta tokante un rei. E verbo hebreo tradusí komo “rebosá” ta nifiká “brota.” E notisia tokante e rei a hasi e salmista asina kontentu ku su kurason tabata brota di entusiasmo i su lenga a bira manera “pèn di un skirbidó eksperto.”

⁴ Awor, kiko di nos? E bon notisia tokante e Reino Mesiániko sigur ta algu bon ku ta konmové nos kurason. E mensahe di Reino a bira spesialmente “bon” na 1914. Dikon? Pasobra di e tempu ei padilanti, e mensahe no tabata tokante un futuro Reino, ma tokante un gobièrnu real ku desde e tempu ei a kuminsá goberná den shelu. Esaki ta ‘e bon notisia di Reino’ ku nos ta prediká “den henter e tera habitá, komo testimonio pa tur nashon.” (Mat. 24:14) E mensahe di Reino ta pone nos kurason “rebosá”? Nos ta prediká e bon notisia di Reino ku zelo? Meskos ku e salmista a resitá “poesia” tokante un rei, nos ta proklamá Kristu komo e Rei selestial di e Reino Mesiániko i ta invitá tur hende—asta gobernantenan—pa someté nan mes na su reinado. (Sal. 2:1, 2, 4-12) I debí ku nos ta usa e Palabra di Dios asina tantu den nos trabou di prediká, ta komo si fuera nos lenga ta bira manera “pèn di un skirbidó eksperto.”

 5. (a) Den ki sentido Hesus tabata un “bunita” persona? (b) Den ki sentido palabranan yen di grasia tabata basha for di e Rei su boka, i kon nos por imitá su ehèmpel?

⁵ Lesa Salmo 45:2. E Skritura no ta duna masha detaye tokante Hesus su aparensia. Pero komo ku e tabata un hòmber perfekto, no tin duda ku e tabata un nèchi hende. Ma loke realmente a hasié un “bunita” persona tabata su fieldat na Yehova i e echo ku e tabata un hòmber íntegro. Ademas, Hesus a prediká e mensahe di Reino “yen di grasia” i a usa palabranan ku a konmové kurason di hende. (Luk. 4:22; Huan 7:46) Nos ta hasi esfuerso pa sigui Hesus su ehèmpel ora nos ta prediká?—Kol. 4:6.

 6. Kon Dios a bendishoná Hesus “pa semper”?

⁶ Debí ku Hesus a sirbi Yehova di henter su kurason, Yehova a bendishon’é durante su sirbishi aki riba tera i a rekompens’é despues ku el a entregá su bida komo sakrifisio. Apòstel Pablo a skirbi: “Ora [Hesus] a presentá komo hende, el a humiá su mes i a bira obediente te na morto, sí, morto riba un staka di tormento. Pa e motibu akí mes tambe Dios a hals’é na un puesto mas haltu i bondadosamente a dun’é e nòmber ku ta riba tur otro nòmber, di manera ku den nòmber di Hesus tur rudia mester dobla—di esnan den shelu, di esnan riba tera i di esnan bou di tera—i tur lenga mester rekonosé públikamente ku Hesukristu ta Señor pa gloria di Dios, e Tata.” (Flp. 2:8-11) Sí, Yehova a bendishoná Hesus “pa semper”: El a resusit’é i a dun’é bida inmortal.—Rom. 6:9.

 7. Den ki sentido Dios a ungi Hesus mas ku su “kompañeronan”?

⁷ Lesa Salmo 45:7. Komo ku Hesus ta stima hustisia i ta odia tur loke ku por desonrá nòmber di su Tata, Yehova a ungié komo Rei di e Reino Mesiániko. Hesus a ser ungí ku “e zeta di goso,” mas ku su “kompañeronan,” esta, mas ku e reinan di Huda kendenan a bini di e liña di desendensia di David. Awor, den ki sentido Hesus a ser ungí mas ku su kompañeronan? Wèl, pa di promé, ta Yehova mes a ungi Hesus. Di dos, Yehova a ungié komo Rei i komo Sumo Saserdote. (Sal. 2:2; Heb. 5:5, 6) I di tres, Hesus no a ser ungí ku zeta ma ku spiritu santu, i su reinado no ta na tera ma den shelu.

 8. Den ki sentido ‘Dios ta e trono di Hesus,’ i dikon nos por ta sigur ku Hesus lo goberná ku hustisia?

⁸ Lesa Salmo 45:6.a Yehova a entronisá su Yu na 1914 komo Rei di e Reino Mesiániko den shelu. ‘E bara di su Reino ta un bara di rektitut,’ pues nos por ta sigur ku Hesus lo goberná ku rektitut i hustisia. I e tin tur derecho di ta Rei pasobra ta ‘Dios ta su trono;’ ku otro palabra, ta Yehova a nombr’é komo Rei. I Hesus su trono lo dura “pa tur eternidat.” Bo no ta sinti bo orguyoso di por sirbi Yehova komo súpdito di un Rei poderoso ku E mes a nombra?

9, 10. (a) Na ki tempu Hesus a faha su spada, i kon el a hasi uso di dje mesora? (b) Kon Kristu lo usa su spada den futuro?

⁹ Lesa Salmo 45:3. Yehova a bisa e Rei pa e ‘faha su spada na su hep.’ Di e manera ei, Yehova a duna Hesus outorisashon pa bringa kontra tur esnan ku ta oponé e soberania di Dios i pa ehekutá Su huisionan riba nan. (Sal. 110:2) I komo ku Kristu ta un Rei i Guerero invensibel, Beibel ta yam’é “esun poderoso.” El a faha su spada na 1914 i a vense Satanas i su demoñonan, saka nan for di shelu i benta nan den bisindario di tera.—Rev. 12:7-9.

¹⁰ Esei tabata djis e komienso di e Rei su kareda viktorioso. Ainda e tin ku “kompletá su viktoria.” (Rev. 6:2) Ainda e tin ku destruí tur e elementonan di e mundu di Satanas. Ademas, e tin ku enkarselá Satanas i su demoñonan pa nan no influensiá hende mas. E promé elemento ku lo ser eliminá ta Babilonia e Grandi, e imperio di religion falsu. Yehova su propósito ta pa usa mundu su gobernantenan pa destruí e “prostituta” malbado akí. (Rev. 17:16, 17) Despues, Kristu lo eliminá henter e sistema polítiko di Satanas su mundu. Kaba, Kristu, kende ta ser yamá tambe “e angel di e abismo,” lo kompletá su viktoria: Lo e tira Satanas i su demoñonan den abismo. (Rev. 9:1, 11; 20:1-3) Laga nos wak kon Salmo 45 a profetisá e susesonan emoshonante akí.

11. Den ki sentido Kristu ta bringa “pa kousa di bèrdat”?

¹¹ Lesa Salmo 45:4. E Rei-Guerero no ta bringa un guera djis pa konkista teritorio i kapturá pueblonan. E ta bringa un guera hustu ku motibunan noble. E ta bringa “pa kousa di bèrdat, humildat i hustisia.” Awor, den ki sentido e ta bringa “pa kousa di bèrdat”? Wèl, e ta defendé e bèrdat di mas grandi ku mester ser defendé, esta, e bèrdat enkuanto Yehova su soberania universal. Satanas a kuestioná Yehova su derecho di goberná ora el a rebeldiá kontra Dje. Desde e tempu ei, tantu hende komo e demoñonan ta kuestioná e bèrdat fundamental ei. Awor a yega tempu pa Yehova su Rei ungí proba unabes i pa semper ku ta Yehova so tin e derechi di goberná.

12. Kon nos por ta sigur ku e Rei lo sigui bringa ‘pa kousa di humildat’?

¹² E Rei ta bringa ‘pa kousa di humildat’ tambe. Hesus mes, komo Yu unigénito di Dios, a pone un ekselente ehèmpel di humildat i a someté su mes lealmente na e soberania di su Tata. (Isa. 50:4, 5; Huan 5:19) Tur súpdito leal di e Rei mester sigui su ehèmpel i someté nan mes humildemente na e soberania di Yehova den tur kos. Ta solamente esnan ku hasi esei lo haña chèns di biba den e mundu nobo ku Dios a primintí.—Zak. 14:16, 17.

13. Den ki sentido Kristu ta bringa ‘pa kousa di hustisia’?

¹³ Kristu ta bringa tambe ‘pa kousa di hustisia.’ E hustisia ku e Rei ta defendé ta loke Dios ta konsiderá “hustu”—Yehova su normanan di loke ta bon i malu. (Rom. 3:21; Deu. 32:4) Relashoná ku Rei Hesukristu, Isaías a profetisá: “Un rei lo reina ku hustisia, i prensnan lo goberná ku huisio.” (Isa. 32:1) Durante su reinado, Hesus lo trese e “shelu nobo” i “tera nobo” primintí den kua “hustisia lo biba.” (2 Ped. 3:13) Tur habitante di e mundu nobo ei lo mester kumpli ku e normanan di Yehova.—Isa. 11:1-5.

14. Den ki sentido e man drechi di Kristu lo hasi “kosnan spantoso”? (Wak e promé plachi.)

¹⁴ Segun e salmista, e Rei a sali ku un spada fahá na su hep. (Sal. 45:3) E tempu lo yega ku lo e saka su spada ku su man drechi i us’é. E salmista a profetisá ku Hesus lo hasi “kosnan spantoso.” (Sal. 45:4, BPK) Ora Hesukristu ehekutá e huisionan di Yehova na Armagedon, lo e hasi “kosnan spantoso” kontra su enemigunan. Nos no sa presis kon Hesus lo destruí e mundu di Satanas. Pero un kos ta sigur: Loke e ta bai hasi lo hinka temor den e habitantenan di tera ku no a hasi kaso di e spièrtamentu divino pa someté nan mes na e gobernashon di e Rei. (Lesa Salmo 2:11, 12.) Hesus mes a bisa den su profesia tokante e fin ku hende lo “desmayá di miedu i di ansha pa e kosnan ku lo bini riba e tera habitá, pasobra e podernan di shelu lo keda sagudí.” El a bisa tambe: “Anto nan lo mira e Yu di hende bini den un nubia ku poder i gran gloria.”—Luk. 21:26, 27.

15, 16. Ken lo forma “e ehérsitonan” ku lo kompañá Kristu den e bataya?

¹⁵ E buki di Revelashon ta bisa ku e Rei ta bini pa ehekutá huisio “ku poder i gran gloria.” E ta bisa: “Mi a mira shelu habri, i ata un kabai blanku. I esun sintá riba dje yama Fiel i Berdadero, i e ta husga i bringa guera ku hustisia. Es mas, e ehérsitonan den shelu tabata siguié riba kabai blanku, i nan tabata bistí na lenen fini, blanku i limpi. I for di su boka tabata sali un spada largu i skèrpi pa e por a dal e nashonnan kuné, i lo e goberná nan ku un bara di heru. Ademas, lo e trapa den e baki di pèrs drùif ku ta e furia di e rabia di Dios, e Todopoderoso.”—Rev. 19:11, 14, 15.

¹⁶ Ken ta e guereronan ku ta forma “e ehérsitonan” ku lo kompañá Kristu den e bataya? Ora Hesus a faha su spada pa saka Satanas i su demoñonan for di shelu, e tabata kompañá pa “su angelnan.” (Rev. 12:7-9) Pues, ta parse lógiko pa konkluí ku na e guera di Armagedon, Kristu su angelnan santu lo forma parti di su ehérsito. Tin mas persona ku lo forma parti di su ehérsito? Hesus a primintí su rumannan ungí lo siguiente: “Esun ku sali viktorioso i kumpli te na fin ku loke mi a manda lo mi duna outoridat riba e nashonnan, e mesun outoridat ku mi a risibí di mi Tata. I e persona ei lo goberná e pueblo ku un bara di heru di manera ku nan lo ser destruí na pida pida meskos ku pòchi di klei.” (Rev. 2:26, 27) Pues, Kristu su rumannan ungí, kendenan tur lo ta den shelu e tempu ei, tambe lo forma parti di su ehérsito selestial. E ko-gobernantenan ungí akí lo ta na lado di Kristu ora e ta hasi “kosnan spantoso” miéntras e ta goberná e nashonnan ku bara di heru.

17. (a) Kiko e kabai blanku ku Kristu ta sintá riba dje ta representá? (b) Kiko e spada i e bog ta simbolisá?

¹⁷ Lesa Salmo 45:5. Revelashon 6:2 ta bisa: “Mi a wak, i ata un kabai blanku; i esun sintá riba dje tabatin un bog; i Dios a dun’é un korona, i el a sali bai, vensiendo su enemigunan i pa kompletá su viktoria.” E echo ku e Rei ta sintá riba kabai blanku ta nifiká ku e ta bringa un guera limpi i hustu den Yehova su bista. (Rev. 19:11) Fuera di un spada, e Rei tin un bog tambe. Tantu e spada komo e bog ta simbolisá e medionan ku Kristu lo usa pa ehekutá huisio riba su enemigunan.

18. Kiko lo sosodé ora Kristu usa su “flechanan”?

¹⁸ Usando idioma poétiko, e salmista a profetisá ku e Rei su ‘flechanan skèrpi’ lo penetrá ‘kurason di su enemigunan’ i pone ‘pueblonan kai’ su dilanti. E matansa akí lo ta mundial. Yeremías a profetisá: “Esnan ku SEÑOR mata riba e dia ei lo keda bentá tur kaminda, for di esun ekstremo di mundu te na e otro.” (Yer. 25:33) Un profesia paralelo ta bisa: “Mi a mira tambe un angel pará den solo, i ku stèm duru el a grita tur para ku ta bula den shelu: ‘Bini akinan! Bini huntu pa e gran bankete di Dios, pa boso por kome karni di rei, karni di komandante militar, karni di hòmber fuerte, karni di kabai i di esnan sintá riba nan i karni di tur hende, tantu di hende liber komo di esklabo, di grandi i di chikitu.’”—Rev. 19:17, 18.

19. Kon Kristu lo sigui “bai viktoriosamente” i kompletá su viktoria?

¹⁹ Despues di destruí e mundu malbado di Satanas, Kristu, den tur su splendor, òf mahestat, lo sigui “bai viktoriosamente.” (Sal. 45:4) Lo e kompletá su viktoria ora e tira Satanas i su demoñonan den abismo, kaminda nan lo keda durante henter e Reinado di Mil Aña. (Rev. 20:2, 3) Komo ku Diabel i su demoñonan lo ta inaktivo e tempu ei, habitantenan di tera lo ta liber di influensia satániko i nan lo por someté nan mes kompletamente na nan viktorioso i glorioso Rei. Pero, promé ku nan por mira planeta Tera kompletamente transformá den un paradeis mundial, nan lo tin un otro motibu pa alegrá huntu ku nan Rei i su ko-gobernantenan selestial. E siguiente artíkulo lo trata e akontesimentu gososo ei.